Aki Oumerang el Kiram el Klikiid

Sel diak a ulebengelel klou el belkul a klikiid er a delboes a di sebeched el mo medengelii lokiu a dmolech el klemedengei er a uldesuel a Demad er a Babeluades el kirel a deureng el mora Rengelekel. “Rokui el chad—sechal me a redil—a ulebeob el uaia Dios. A dersta er tir a mekreos el ngalek el sechal me a redil er a reng er a redemerir me a rederrir er a babelaudes, e … oba sel chedaol blebelir me ea teletelir” (“A Telungalek: Chais el mo er a Beluulechad,” Ensign malechub aLiahona, Nov. 2010, 129). A rokui el sechal me a redil a kiliei lobengkel a Dios el Ngelekel er a reng ruchei er a lemechell el mei er a beluulechad. A uldesuel a Chedam a uchul ea Rengelekel sechal me a redil er a reng a sebechir el nguu a bedengir er a tech, e mesuub el ngar tial beluulechad, e merael bedul a diak a ulebengelel klengar.

A bedenged er a tech a uchul eng sebeched el suub a betok e kakerous el bedengel omesuub me a teletael el ngii a dimlak el sebeched el ngmai er sel klengar kid ruchei. Tiaikid a uchul, ea deleuill er kid me a rebebil, sel telkeled el mo medengei e meruul loltirakl a klemerang, me a klisiched loltirakl a llach me a chedaol ruoll er a ebangkelio er a Jesus Kristo a mo chachisois lokiu a bedenged er a tech. Chelechal de ngara beluulechad, e kede mo omelchesiu er a kltalreng, beltikelreng, blekokeuii, deureng, klengitelreng, sebekreng, ringel, me a dirrek el ongarm er a tech el uchul a kedmekled el kirel a diak a ulebengelel klengar. A dongedeb er ngii, eng belkul a kmo ngarngii a suobel el kired el suub me a teletael el kired el ngmai, el uaia ikel losaod a chedaol llechukl el kmo, “lokiu a bedenged er a tech” (1 Nephi 19:6; Alma 7:12–13).

Uriul er a lobeob a beluulechad, ea Adam a mlo kiei er a Sers er a Eden. Eng di, a Dios a dilu el kmo ng diak lungil a chad a di el ngii el tang (Moses 3:18; dirrek el mesa Genesis 2:18), me a Eva mocha bechil a Adam e olngeseu er ngii. A klebokel el uldekial a reng, tech, uldasu, me a omelchesiu er a sechal me a redil a mle klou a belkul me bol motaut a uldasu er a deureng. “Meng diak el sebechel a sechal diak lobengkel a redil me diak a redil el diak lobengkel a sechal, er a medal a Rubak” (1 Korint 11:11). A sechal me a redil a kirir el dmak e kasisechakl, kasisiich, omekngeltengat, oldak, e mengerrungel er a ta me a tang.

Sel teletael el uchul a blebelel a kelngar a mla moterekokl. “A kot el llach … el Dios a milsa Adam me a Eva a melutk el kirel sel techellir el mo oungalek el obekel” (Ensign malechub Liahona, Nov. 2010, 129). Sel llach el mo omechell e omekeek er a beluulechad a melemolem el osisiu er chelechal sils. Maleuaisei, ea chebechiil er a delongelel a sechal me a redil a di chimo el ulterekokl el teletael el uchul e tirkel dirk ngalek er a reng a me soiseb er a beluulechad. Me sel mengeroid er kid er a tekoi er a deleboes ruchei er a chebechiil me a mui el klaumerang ruriul er a chebechiil a mekereuii tial chedaol teletael.

Sel klisiich el mo oungalek a kmal chedaol a belkul. A terrekakl el usbechellel tial klisiich a torbengii a moktek er a Chedam me a moktek er a kelngar kid. A Demad er a Babeluades me a Di Chimo el Ngelekel a omeob e mla msa dersta er kid a telkib er tial Klisichir el omeob. A bleketakl el teletelel a ungil usbechellel tial klisiich lomeob a klengar a klou a belkul telengtengil a uldesuel a Chedam. Me a domelchesiu me a usbechelled er tial chedaol klisiich a kmal klou a rellii el kirel a deureng er tial klengar me a diak a ulebengelel klengar kid.

Elder Dallin H. Oaks a milsaod el kmo:

“Sel klisiich el omeob a klengar a kot el ngarbab el diak el ngemed el klisiich el Dios a mla mesterir a rengelekel. A usbechellel a mildung er a chelsel sel kot el llach, eng di a ta er a klou a belkul llach a mlocholt el lolkebai er a usbechellel. A klou el belkul a llach er a klikiid er a deleboes a selaod lultuil er a klemedengei er kid el kirel a moktek er a klisiched el mo oungalek loltirakl er a uldesuel a Dios. …

“Ikrel a chebechiil, ea rokui el teletael er a klaungalek a sebechel kmal klou malechub eng kekerei el klengit el tomellii e oitechetur sel kot el chedaol teletelel a sechal me a redil” (“The Great Plan of Happiness,” Ensign, Nov. 1993, 74).

A Ikelesia er a Jesus Kristo er a Uriul-klebesei el Santo a oba di chimong, e diak el mengodech el teletael er a deleboes: a deleboes a di mekedmokl er a delongelel a sechal me a redil er a chelsel a chebechiil el mla mekedmokl er a chelsel a uldesuel a Dios. A teletael er a deleboes, a diak di de semeriar el mo medengelii, malechub e doba el mesumech a soal a rengud, malechub el kora teletael er a di omilil lultuil er a soal a rengud. Ng diak el teletael el kired el mo er ngii malechub el omeruul el kirel mekedmokl. Ng bai, ngarngii er tial beluulechad el ta er a kot el ngarbab el olchotel a chedaol blekeradel e rael el mo melisiich a deleuill me a reng er a delongelir a robekel. Kid a ngeltengat el mimokl el melilt e oba sel dikesed el ngelekel a Dios—el diak di lokiu a teletael er a deleboes, beches el teletael, malechub a llemesed..

A kuk ta er a teletael, ea di klechad lulsaod er ngii a King Benjamin a ngar e seluk er a chelsed (mesa Mosiah 3:19). A di chad el sechal malechub eng redil a diak el ouchel a rengul, el soal a tekoi er a klechad (mesaMosiah 16:5; Alma 42:10; Moses 5:13), el di kongei a diak a ultutelel, e kedidai a rengul e bechechelingaol. El uaia osischeklel a President Spencer W. Kimball, “A ‘di chad’ a ‘chedal tial beluulechad’ el mla mechei a blekerdelel me a soal a charm meng mengucheb er a osengel er sel chedaol di mla blebelel” (“Ocean Currents and Family Influences,”Ensign, Nov. 1974, 112).

Ea kuk bitang, ea sechal malechub eng redil er a Kristo (Helaman 3:29) a chedaol e ulsarch a soal a rengul (mesa Alma 38:12), ngarngii a telkelel e ulsarch a rengul, e bekokeuii e bekerurau. A rsechal me a redil er a Kristo a urrekodel er a tekingel a Dios, lodersii a klengar tir loltirakl er Ngii (mesaMateus 16:24; Markus 8:34; Lukas 9:23; D&C 56:2), e melemolem el ngara melemalt e chibutek el rael er a mui el klaumerang, blekongesenges, me a blakelreng el mora Osobel me a ebangkelio er Ngii.

Me a de sechal me a redil ngelekel a Dios, e kede mla ngmai a cheledaol el Teletelel. Eng di kid a kiei er a chetituokel el beluulechad. Sel kmal uchul ea bedenged a ulebeob a chetituokel e blechoel mekurs el mora klengit, chelbirukel, me a kodall. Maleuaisei, e sel Rebetel a Adam me a ikel telmellel er a tekoi er a reng me a klechad a sebechel tomellid lokiu a bedenged er a tech. Eng di kid a eru el klechad a dolab, sel reng er kid el ngii a diak a ulebengelel el seluk er a chelsel a bedenged er a tech el ngii a telmellel a Rebet a uchul. El uaia Jesus er a le beketeklii el mora Apostol Petrus, “A reng a mesisiich, eng di a tech a mechitechut” (Mateus 26:41).

Sel kmal teletelel a skeng er a klechad, a leuaisei, a sebeched el smodii er tiakid el ker: Ak kongei er a klengit er a di klechad, malechub ak kongei er a odbechel a Chedaol Reng e oridii a di chad e mo santo lokiu a Tngakireng er a Kristo el Rubak (mesa Mosiah 3:19)? Tiaikid a skeng. A bek el nglemekeled, soal a rengud, kse, me a loureng a di chad a sebechel mo cheroid lokiu a Tngakireng er a Jesus Kristo. Kid a ngar tial beluulechad el mo olab aikel rokui el teletelel a kledios e mo ulserechakl a rengud er a ikel soal a bedenged.

A uldesuel a Chedam a kldmokl el mo mesterir a Rengelekl a ulekrael, el ngosuterir el mo ngara deureng, e ngoiteterir el muut el mo er Ngii loba ngar el bedengir, el mora ulebongel el bedengir. A Chedam er a Babeluades a soal a bo dedak er a llomes el mui el ngarngii a urunguled. Eng di, a Diablong a kuk oureor el meruul er a rengelekel a Dios el sechal me a redil me bol rrau a rengrir e diak el ngara deureng e tomellii omerollir el kirel a diak a ulebengelel. Sel kmal moktek er a chedam er a blulak a kmal soal kid el rokui a” de bora ringel el di uaia ngii” (2 Nephi 2:27). A Diablong a kmal soal sel bo de cheloit er a iilkolk el diak el sebeched el mekerang.

A Diablong a diak el meterob loureor el mengeuid er sel kot el klou a belkul teletael er a chelsel a uldesuel a Chedam. Ngii a diak a bedengel er a tech, ea techellel kirel a diak a ulebengelel klengar a mla meterob. El di uaia ralm lomaoch er a omeuachel el meterob er a chelsel a dam, me a diak a ulebengelel klengar er a cherarou a mla metemall le ngii el diak a bedengel er a tech. Meng ultekengel a uchul, ea Diablong a dikea lengai aikel rokui el klengeltengat er a klechad me a teletael leng diak a bedengel er a tech me a iiuis. Ngii a diak el sebechel suub a suobel el uaia tirkel ngarngii a bedengir er a tech. Ngii a diak el sebechel mo bechiil me bol ngara deureng er a chelsel a telungalek. Ngii a chetil sel ngii a meral okiis er a kodall el mora rokui el chad. A ta er a kmal bleketakl el belkul a tekoi el delbeakl a ulecholt el kmo ngii a diak el sebechel mo uaia Chedam er a Babeluades.

Me ng tial bedenged el kmal klou a ultutelel er a chelsel a uldesuel a Chedam el kirel a deureng me a chedaol klechad er kid, ea Diablong a osiik el mo melemall er ngii el mengesuseu er kid me le terrekakl a usbechelled er a bedenged. A ta er a kmal ngodech el teletael er a diak a ulebengelel klengar a kmo a cherarou, a di ngara klengitelreng ele ngii el diak a bedengel er a tech, e mengesuseu er kid el mo oba osisiu el kelngitelreng lokiu a terrekakl el usbechellel a bedenged. Sel dongu el kmal diak er ngii a seikid a kmal lousbech er ngii el mengesuseu e mengeblad er kid el mo ruebet.

A oiietel a llach er a klikiid er a deleboes a kmal klou el klengit e mekngit el usbechellel a bedenged er a tech. Tirkel tir a medengelii a uldasu el kirel a diak a ulebengelel klengar, ea terrekakl el usbechellel a bedenged a olchotel a ultok (mesaMosiah 2:36–37; D&C 64:34–35) e omtok er sel meral teleteled el sechal me a redil el ngelekel a Dios. Me sel domes lengelakl osenged er tial klechad el bedul a diak a ulebengelel, eng beot a desang el kmo sel cheleblad loba cherarou a kmal di kedeb el taem e bechachau.

A Alma milellach er a ngelekel er a Shiblon me loserechii a rengul me luchul e bol mui er a beltikelreng (Alma 38:12). Ng bleketakl, sel dosmechokl er a klechad er kid eng uchul a mesisiich, e dmolech, e telkangel el beltikelreng er a Dios me a Rengelekel. A beltikelreng a mo chachisois sel doserechii a rengud er a klengit e mo kekerei sel sekum e kede ruebet er a klengit.

A President Marion G. Romney a dilu el kmo:

“Ng diak a ngodech el klengeltengat e kudesuar el ngii a dosiik er ngii er a ikel mla yaksok el mora re klikiid e mekedung. A Jesus a millekoi el kirel a ngkedel a kakerous el teletael er a klikiid eng di milcherei sel kot el ngarbab, me a kumdasu el kmo, ng mo er tirkel klikiid a rengrir, ‘ele tir,’ ngii a millekoi, ‘a mo mesa Dios’ (Matt. 5:8). E diak di bo lesa Rubak, te dirrek el mo omelchesiu er tir el mla me remei er a rengedel.

“Tiaikid a … yaksok er a Osobel: Omko klikiid a mo menglebokel a uldesued, e kede mo mesisiich el ansing er kid er a chelsel a rengedel a Dios (Mesa D&C 121:45)” (“Trust in the Lord,” Ensign, May 1979, 42).

Kede dirrek el mla nguu a yaksok el kmo, sel dolemolem el ngara rael er a klikiid, ea Chedaol Reng a mo melemolem el kldemed (Mesa D&C 121:46). Maleuaisei, ea otireklel a llach er a deleboes a siotai a bebil er a kmal meklou el klengeltengat el sechal me a redil a sebechir el ngmai er tial klengar: el ungil chedaol er a chelsel a telungalek, resechelei, rechedal a Ikelesia, me a, uldimukl, er a Osobel. Sel kmal soal a rengud el mo uldimukl a mo mekedmokl lokiu a llemalt sel dorael er a llomes.

Bebil er kemiu el nguu tial klumech a kirir el mo ouchel a rengrir el kirel a klengit er a tekoi er a deleboes. A Osobel a blechoel loleker ngii el kmo Ngarbab el Toktang, e tiang a ngarngii a olengchelel me a meral belkul. Kid el rokui a medengelii sel ringel sel sekum a bedenged a metemall. Sel de ngara ringel, e kede mereched losiik a ngeso e mereng a saul er a kar el ngii a sobecheklid el choridii a ringel. Momdasu er a klengit el uaia le telemall a reng el uchul a klengitelreng malechub, sel losaod er ngii a Alma el mora ngelekel er a Corianton el kmo, “ng uchul ea chad a mo meringel a uldesuel” (Alma 42:18). A klengitelreng a mora reng er kid ea ringel a mora bedenged—el omeklatk er kid er a kengaol e merrob a lmuut el bebil er a tellemall. Me ngokiu a Tngakireng er a Kristo eng mei a chilt el sebechel mkerur a telmellel a reng e oridii a klengitelreng. Eng di, tial chilt a sebechel di mekedmokl lokiu a osisechakl er a klaumerang er a Rubak el Jesus Kristo, ouchel reng, e melemolem el olngesenges. A olchotel a meral ouchel el reng a budech er a uldasu, ongelaod, me sel omekungil e omekbeches er a reng.

A bisop malechub a merreder er a branch er kau a ngii a oba kerul a reng el mla metutk el mo olngeseu er kau el mo ouchel a rengum e omekungil er kau. A kulengit me bo modengei, ng uaisei, el kmo a delechel me a klemengetel a ouchel el reng er kau a kirel chatter er a teletelel me a berredel a kngtim oumesingd a—Ruriul-klebesei el Santo el ngara cheungel a chedaol telbiil. A ikel oberaod el telmellel a reng a ousbech er a klebech el ukeruul me a taem el kmal mo cherrungel e ungil.

A suobel el blak sodii a locha uaia le uodel e dikea belkul el mora rebetok el chad er a beluulechad el loltuub er sel klisiich el mo oungalek e mengkekerei er a moktek er a klengar er a chad. Eng di a klemerang er a Rubak a diak el mengodech er a ngii dil ngera el kora klebokel, merael chisel, malechub el uldesuel a buai. Ak yaksok el kmo a otireklel a llach er a tekoi er a deleboes a mo choisisii a deureng er tial klengar e sumecheklii a omerolled el mora diak a ulebengelel. A kuuchais el kmo a klikiid me a kldung er chelechang, me a ngara mong, e melemolem el “kot el meringelchad lokedeldaol er a rokui el tekoi” (Moroni 9:9). A kmung el ngara chedaol ngklel a Rubak el Jesus Kristo, amen.