2010–2019
Se Kamehlele me Se Pahn Kin Mwakelekel
April 2013


Se Kamehlele me Se Pahn Kin Mwakelekel

Peikiong kosonned en mwakelekel pahn kalaudehla atail peren nan mour wet oh elehieng atail kak en keirda nan mour soutuk.

Ahi padahk doke ehu peidek poahsoan me pid iren pali ngehn me inenen kesempwal: Dah me kosonned en mwakelekel nohn kesempwaliki? I kapakapki me Ngehn Sarawi pahn kamehlel duwen tepin padahk kan me I kosoaia ahr mehlel.

Sapwellimen Sahm Koasoandi Lap en Popohlo

Kesempwal poatoapoat en mwakelekel pahn sansal oh wehwe ihte ni eh wia kisehn koasoandi lap en popohl en Samatail Nanleng ong Sapwellime serihkan. “Aramas koaros—ohl oh lih—kepikipikda ni mwohmw en Koht. Emenemen iei seri pwutak de serepein ngehn keneinei en pahpa nohno nanleng, oh, pwehki met, emenemen ahniki mwohmw sarawi oh mour en ehu rahn me koasoandi sarawi” (“Peneinei: Kalohk Ehu Ong Sampah,” Ensign de Liahona, Nohpempe 2010, 129). Koaros ohl oh lih momour rehn Koht ni ahr wia Sapwellime seri ngehn mwohn arail kohdo pohn sampah ni duwen aramas. Sapwellimen Sahmo pilahno me elehieng Sapwellime pwutak oh serepein ngehn kan en alehdi paliwar, en alehdi irair en mour, oh en douluhllahng kesepwilda.

Kesempwalpen Paliwar

Iei paliwaratail kan me elehieng atail kak ahniki irair tohto en mour me loal oh me sohte kak alahldi nan mour mwohn mour wet. Eri, atail ehupene ong aramas teikan, atail kak en wehwehki oh mwekidki mehlel, oh atail kak en peikiong tepin padahk oh tiahk sarawi kan en rongamwahu en Sises Krais kin kehlailla nan atail momour nan paliwar. Nan atail mour, kitail kin pehm limpoak, kadek, peren, nsensuwed, pahtou, weirek, oh pil kasongosong kan me pid paliwar ni wiepe kan me pahn kaunop kitail ong mour soutuk. Ni mehlel, mie me kitail anahne esehla oh irair me kitail anahne ahniki, duwen me sansal nan pwuhk sarawi kan, ni paliwar (1 Nephi 19:6; Alma 7:12–13).

Manaman en Kapikada Seri

Mwurin kepikipik en sampah, Adam mih nan Mwetuwel en Ihden. Ahpw, e kesempwal me Koht mahsanih me e sohte konehng aramas menet en kelekelehpw (tehk Moses 3:18; pil tehk Senesis 2:18), oh Ihp wiahla ahn Adam pwoud oh wiahla sawasepe. Patpene kesempwal en pali ngehn, paliwar, pali en madamadau, oh pali en pepehm rehn ohl oh lih koaros anahn pwehn kapwaiada pilahn en popohlo. “Mehlel pwe nan atail mour rehn Kaun-o, lih sohte kin uhtohrasang ohl, pil ohl sohte kin uhtohrasang lih” (1 Korint 11:11). Ohl oh lih koasoandi en kasukuhlpene, kakehlailpene, kapaiada emenemen, kaitara emenemen oh kaunsekihala emenemen.

Wiepen kapikada mour koasoandi sang powe. “Kosonned keieu … Koht ketkihieng Adam oh Ihp doke ara kak en wia pahpa nohno ni duwen ohl oh lih pwopwoud” (Ensign de Liahona, Nohpempe 2010, 129). Kosonned en kaparapar pwe kadaudokatail en kousoanla wasa koaros nan sampah wie manamante lel rahn wet. Eri, pwopwoud nanpwungen ohl oh lih iei wiepe kamanaman me kahrehiong ngehn kan sang mour mwohn mour wet ahr kak kohdohng nan sampah. Liksang douluhl ehupenehn ni paliwar mwohn pwopwoud oh loaloapwoat mehlel nan pwopwoud kin doarehla oh kolokol sarawi en wiepe kesempwal wet.

Manaman en kapikada seri kesempwal ni me pid pali ngehn. Wiakaulahn manaman wet kin uhwong koasoandi kan en pilahn en Kauno oh en atail mour wet. Samatail Nanleng oh Sapwellime Iehros Kempoake wia sounkepikipik oh ketkihieng kitail ekis kisehn Ara manaman en kepikipik. Kaweid oh koasoandi ong doadoahngki manaman en kapikada mour wia kisehn pilahn en Sahmo. Atail pepehm oh mwekid me pid manaman sarawi wet pahn sawas koasoane atail peren nan mour wet oh dah me koasoandi ong kitail nan mour soutuk.

Elder Dallin H. Oaks kawehwe:

Manaman en kapikada mour wia manaman me keieu sarawi me Koht ketkihieng sapwellime kan. Koasoandi ong doadoahkpe sansal nan kosonned keieuo, ahpw pil ehu kosonned mie me kohda pwehn irehdi wiakaulahn manaman wet. Atail kesempwaliki kosonned en mwakelekel kin dehde nan me kitail wehwehki me pid kahrepen manaman pwukat nan kapweidahn sapwellimen Koht pilahno. …

“Doadoahkpen manaman wet likin selin pwopwoud wia kilel en dihp oh kamwahl en mwohmw keieu sarawi en ohl oh lih” (“The Great Plan of Happiness,” Ensign, Nohpempe 1993, 74).

Koasoandi en Mwakelekel ni Paliwar

Mwomwohdiso en Sises Krais en Souleng en Imwin Rahn Akan ahniki koasoandi inen me sohte kin wekidekseli ong me pid mwakelekel en paliwar: ehupenehn nanpwungen ohl oh lih kin pwung ihte nanpwungen ohl oh lih pwopwoud ni duwen me koasoandi nan sapwellimen Koht pilahno. Ehupene pwukat sohte wia mehkot me aramas en wiahki mehkot mwahl, de ineng me anahnepe en kapwaiada, de mwadong de mehn kemweit me aramas en rapahki ong pein ih. Re sohte wia mehn siai de mehn wiawihte. Ahpw, re wia, nan mour wet ehu kasalada kesempwal en atail sohso sarawi oh wiepen kakehlailih pepehm oh ngehn nanpwungen ohl oh lih pwopoud. Kitail kapaikihda manaman en pilipil oh ihs kitail kohsang atail sohso sarawi ni duwen sapwellimen Koht—oh kaidehn sang mwekid me pid tiahk en paliwar, lamalam en mwehiet, de padahk kan en sampah.

Uhdahn Aramas

Duwen udahn aramas me kawehwe sang Nanmwarki Benjamin wie mehlel oh sansal rehn emenemen kitail (tehk Mosiah 3:19). Udahn ohl de udahn lih kin sohte men koluhla, kin mwekidki ineng en paliwar (tehk Mosiah 16:5; Alma 42:10; Moses 5:13), kin rapahki pein nsene oh kasohlap, oh kin pohnmwahso oh nsenohkihte pein ih. Duwen me President Spencer W. Kimball padahngki, “‘Udahan aramas‘ wia kisehn sampah me mweidehng ineng en paliwar en powehdi pali ngeni.” (“Ocean Currents and Family Influences,” Ensign, Nohpempe 1974, 112).

Me weksang met, ohl de lih en Krais (tehk Helaman 3:29) kin mwekidki pali ngehn oh powehdi ineng kan en paliwar (tehk Alma 38:12), kin kaunda pein ih oh kanengamah, oh kin kadek oh tetehk mehteikan. Ohl oh lih en Krais kin koledi mahsen en Koht, soikala pein irail oh alehda Sapwellime lohpwuo (tehk Madiu 16:24; Mark 8:34; Luk 9:23; D&C 56:2), oh wenlahte mwowe nan ahl inen oh tehtik en pwoson, peik, oh loaloapwoat ong Sounkomouro oh Sapwellime rongamwahuo.

Ni duwen sapwellimen Koht pwutak oh serepein kan, kitail sohsohki koahiek kan en pali ngehn sang Ih. Ahpw kitail momour nan sampah me pwupwila. Soahng kan me wiahda paliwaratail wia kisehn sampah pwupwila wet oh kin kehn lipwen dihp, suwed, oh mehla. Pwehki met, Pwupwilahn Adam oh lipwe kan me pid pali ngehn oh paliwar kin mie lipwe ong kitail pwehki paliwaratail kan. Ahpw kitail ahnikihte pali raiu, pwe pali ngenitail me wia pali me poatoapoat mih nan paliwar me pid Pwupwilao. Duwen me Sises kawehwehiong Wahnpoaron Piter, “pwe ngehn me peik, a paliwar me luwet” (Madiu 26:41)

Mwohmw kan me pid kasongosong en mour, eri, kak oaralapda nin duwe met: I pahn dukieng ineng kan en udahn aramaso, de I pahn peikiong pepehm kan en Ngehn Sarawi oh pwilikihdi udahn aramaso oh wiahla souleng sang ni Tomw en Kauno Krais (tehk Mosiah 3:19)? Iei ih met me kitail kasongosongki. Koaros ineng, madamadau oh mwekid en udahn aramas kak en powehkihdi Tomw en Sises Krais. Kitail mih pohn sampah pwehn kairada mwohmw kan en koht oh en kalowehdi ineng kan en uduk.

Ineng en Imwintihtio

Pilahn en Sahmo koasoandi pwehn kihda kaweid ong Sapwellime serihkan, pwehn sewese irail en peren, oh en kapwureiraildo ni paiamwahu ong Ih nan paliwar iasadahr oh lapalapalahr. Sahm Nanleng kupwuriki kitail en patpene nan marain oh audaudiki koapwoaroapwoar. Me weksang met, Lucifer kin nantihong pwe sapwellimen Koht pwutak oh serepein kan en pwunod oh nsensuwed oh en kauhdi arail keirda soutuk. Koasoandi keieu en sahm en likamw kan iei me kitail koaros pahn “pahtoula duwehte ih” (2 Nephi 2:27). Lucifer inangih kitail en kelehpwla nan rotorot ni sohte koapwoaroapwoar.

Sehdan kin nannanti en wikidala pali kesempwal akan en sapwellimen Sahmo pilahno. E sohte ahniki paliwar, oh e sohlahr kak keirda soutuk. Duwehte kisin pil nan pillap kin uhdi pwehki koaskoasok, keirdahn imwintihtio pil solahr kak pweida pwehki e sohte ahniki paliwar. Pwehki ah sapeik, Lucifer katiasang koaros kapai kan en sampah oh irair kan me kak alahldi sang paliwar en uduk oh tih. E sohte kak alehdi kasukuhl kan me ngehn me mih nan paliwar kelehpw kak ahniki. E lingeringerki iasadahn aramas. Ehu wehwe kehlail en lokaiahn wai me nda damned de riahla wehwehki me e sohte kak doulahte oh wie kekeirda pwehn duwehla Samatail Nanleng.

Pwehki paliwar eh nohn kesempwal ong sapwellimen Sahmo pilahn en popohl oh atail keirda ni pali ngehn, Lucifer kin rapahki en kerempwa atail keirda sang ni kangoangeikitail en doadoangki paliwaratail kan ni wiepe sapwung. Ehu ire kesempwal soutuk iei me imwintihtio, me pahtoukihla eh sohte pein paliwere, kin nantihong kitail en iang ih pahtoula ni atail pahn doadoahngki paliwaratail ni wiepe sapwung. Paliwaro me e sohte ahniki iei me e kin keieu koadoahke pwehn kauweikitailla ni pali ngehn.

Kauwehla kosonned en mwakelekel wia dihp toutou ehu oh wiakaula en paliwaratail kan. Ong irail me ese oh wehwehki pilahn en popohlo, kasaminehla paliwar wia mwekid sapeik (tehk Mosiah 2:36–37; D&C 64:34–35) oh sohpeisang atail sohso mehlel ni duwen sapwellimen Koht pwutak oh serepein. Ni atail kin sohpeisang mour wet ong mour soutuk, e mengei en kasawihada me ehupene en paliwar me imwintihtio kin kangoangehkinkitail en wia sohte poatoapoat oh sohte audepe.

Kapai Kan en Mour Mwakelekel

Alma kaweidki nah pwutak Shiblon en powehdhi koaros ah ineng kan, pwe en kak direkihla limpoak (tehk Alma 38:12). Kesempwalpe, iei me powehdi udahn aramas loalatail kin elehieng atail limpoak ong Koht oh Sapwellime serihkan en ahpwete kehlailla, loalla, oh tengeteng. Limpoak kin laudila ni atail kin doarehla pein kitail sang dihp sang ni mour pwung oh kin tikitikla ni atail kin dukieng kasongosong kan.

President Marion G. Romney mahsanih:

“Sohte kapai laudsang met me kitail konehng rapahki duwe me mie inoupe ong irail me mwakelekel oh mour mwahu. Sises mahsanih duwen kapai kan ong ekei soahngen mour mwahu ahpw koasoanehdi kapai me keieu kesempwalo, me I lemeleme, ong me nan kapehd mwakelekel ‘pwe re,’ e mahsanih, ‘pahn udiahl Koht’ (Madiu 5:8). Oh kaidehnte me irail pahn udiahl Kauno, ahpw irail pahn nsenamwahu reh.

Kitail pil alehdi inou me, ni atail pahn idawehn ahl en mour mwakelekel, Ngehn Sarawi pahn ieiangetai ansou koaros (tehk D&C 121:45). (“Trust in the Lord,” Ensign, Mei 1979, 42).

Kitail pil alehdier inou me ni atail pahn weid nan ahl en mwakelekel, Ngehn Sarawi pahn ieiang kitail ansou koaros (tehk (D&C 121:46). Eri, momourki kosonned en mwakelekel kin luke kapai kan me keieu lap me ohl oh lih kak alehdi nan mour wet: koapwoaroapwoar ni pali ngehn nanpwungen peneinei, kompoakapah kan, tohn Mwomwohdiso, oh, ni mehlelo, Sounkomouro. Atail ineng en nsenamwahu kin pweida ni atail pahn alu nan marain ni koapwoaroapwoar.

Tepin Padahk en Koluhla

Ekei kumwail me pahn rong padahk wet anahne koluhkihla dipen paliwar de dihp teikan. Sounkomouro pil kohwa mwahr Sounkamwahu Lapo, oh mwahr wet kesempwal ni kilel oh ni mehlel. Kitail koaros pehmehr weirek me kin iang ohla ni paliwaratail kan. Ansou me kitail kin weirek, kitail kin rapahki en mwahula oh kin kapingki wini de mehn kamwahu kan me kin sewesehda atail weirek. Medewehki dihp duwen ohlahn pali ngehn me kin kihieng kitail pepehm en dipada de, duwen me Alma kawehwehiong nah pwutak Corianton, “pepehm en koluhla” (Alma 42:18). Pepehm en dipada wia ong palingenitail duwen me weirek kin wia ong paliwaratail—pepehm en dipada wia mehn kair me pid kahpwal oh kin sile kitailsang ohla kapatapat. Sang ni Tomw en Sounkomouro kin pwilido wini me kak kamwahuih atail ohla kan ni pali ngehn oh kihsang pepehm en dihp. Ahpw, wini wet kin doadoahk sangete ni tepin padahk en pwoson Kauno Sises Krais, koluhla, oh peik ansou koaros. Lipwen koluhla mehlel iei popohl en madamadau, nsenamwahu, oh kamwahulahn pali ngehn.

Amwail pisop de president en prans me wia iengen toahktehn pali ngehn me alehier mweimwei en seweseikumwail koluhla oh mwahula. Ahpw menlau tamataman me amwail koluhla anahne pahrek ong dipamwail kan—ahpw mehlel ong Souleng en Imwin Rahn akan me mih pahn inou sarawi. Dihp toutou kan anahne ansou werei ong winwini oh ansou werei pwen kamwahula ni unsek.

Inou oh Kadehde

Padahk me I kawehwehdahr pahn mwomwen wia mehkot me wereilahr de sohlahr kin doadoahk ong aramas tohto nan sampah ehu me mie lalaudla eh mwamwahliki kepikipik en mour oh wiahki mwahl mour en aramas. Ahpw mehlel kan sang Kauno sohte kin wekidengkihla dahme aramas leliki de lemeleme. I inouki me peikiong kosonned en mwakelekel pahn kalaudehla atail peren nan mour wet oh elehieng atail kak en keirda nan mour soutuk. Mwakelekel oh mour mwahu ansou wet, mahs, oh kohkohlahte pahn wia soahng kan me kitail pahn “keieu poakohng oh kesempwaliki sang mehkoaros” (Moroni 9:9). I kadehde duwen met ni mwahr sarawi en Kauno, Sises Krais, ahmen.