Ni sa Kidavaki ki na Koniferedi

Kemuni na taciqu kei na ganequ lomani, sa ka ni marau vakalevu vei au meu kidavaki kemuni mai ki na ika 183 ni Koniferedi Raraba Vakayabaki ni Lotu.

Ena loma ni ono na vula mai na noda sota sa oti, a noqu na madigi meu veilakoyaki vakalailai ka sota vata kei na so vei kemuni ena nomuni veiyasana. Ni oti na koniferedi raraba ena Okotova, au a lako ki Jamani, a ka dokai kina vei au meu sota vata kei ira eso na noda lewenilotu ena vica na vanua mai na matanitu oya ka vakakina ena so na tiki Austria.

Ena mua ni Okotova au vakatabuya kina na Valetabu e Calgary Alberta mai Kenada, ena nodratou veivuke o Elder kei Sisita M. Russell Ballard, Elder kei Sisita Craig C. Christensen, vata kei Elder kei Sisita William R. Walker. Ena Noveba, au a vakatabuya tale kina na Valetabu e Boise Idaho. Eratou a lako tale tikoga vata kei au ka vakaitavi ena veivakatabui o Elder kei Sisita David A. Bednar, Elder kei Sisita Craig C. Christensen, kei Elder kei Sisita William R. Walker.

A vakasakiti na soqo ni itovo vakavanua a vakayacori me sala vata kei na veivakatabui ruarua oqo. Au a sega ni tiko ena soqo ni itovo vakavanua mai Calgary, me vaka ni donumaka tiko na ika 85 ni nona siganisucu o Sisita Monson kau nanuma ni dodonu meu tiko vata kei koya. Ia, a ka dokai me keirau sarava na soqo ena loma ni neirau rumu ni gade ena retio yaloyalo, kau qai vuka ki Calgary ena mataka ka tarava me baleta na veivakatabui. Mai Boise era vakaitavi ena soqo ni itovo vakavanua e sivia e 9,000 na itabagone mai na tikina vakavaletabu oya. Sa dua na ka na levu ni itabagone era vakaitavi sa sega kina na vanua me ra dabe kina na lewe ni matavuvale ena buturara ni vakatasuasua ka ra vakaitavi kina.

Ena vula ga sa oti a lako kina o Peresitedi Dieter F. Uchtdorf, ena veitomani nei Sisita Uchtdorf kei Elder kei Sisita Jeffrey R. Holland, kei Elder kei Sisita Gregory A. Schwitzer ki Tegucigalpa, Honduras, me vakatabuya na noda valetabu vou se qai tara oti ga mai kea. A vakayacori e dua na nodra soqo ni marau na itabagone ena yakavi ni siga o ya ni bera na veivakatabui.

Eso tale na valetabu era sa kacivaki oti ka sa toka ena veiivakatagedegede eso na kena cakacakataki se ra sa tekivu tara tiko.

Sa ka dokai vei au ena mataka oqo meu kacivaka e rua tale na ikuri ni valetabu, ka ra na tara ena veivula kei na yabaki ka lako mai ena veivanua oqo: Cedar City, Utah, kei Rio De Janeiro, Brazil. Kemuni na taciqu kei na ganequ, sa toso tikoga ka sega ni malumu sobu na tara valetabu.

Me vaka o ni sa kila, ena koniferedi raraba ni vula o Okotova au sa kacivaka kina na veisau ni yabaki ni bula e rawa ni ra laki veiqaravi kina vakadaukaulotu na cauravou kei na goneyalewa, sa rawa ni ra laki veiqaravi ena gauna oqo na cauravou ni ra yabaki 18 ka 19 o ira na goneyalewa.

Na nodra rogoca mai oqori na noda itabagone e vakasakiti ka veivakauqeti. Me yacova mai na ika 4 ni Epereli—ena rua na siga sa oti—sa 65,634 na daukaulotu tudei era sa veiqaravi tiko, ka sivia na 20,000 era sa ciqoma na nodra veikacivi ia era se bera ni curu yani ki na koronivuli ni kaulotu ka sivia na 6,000 tale era se vakatarogi tiko vei ira na nodra bisopi kei na peresitedi ni iteki. Sa ganita kina me da tauyavutaka e 58 na tabana ni kaulotu vovou me sotavi kina na iwiliwili levu ni daukaulotu.

Me veivuke ena kena qaravi na mataivalu daukaulotu oqo, vakakina ni levu vei ira na noda daukaulotu era lako mai ena veiituvaki dravudravua eso, keimami sa sureti kemuni, kevaka o ni rawata, mo ni cau mai ena lomasoli ki na iLavo Raraba ni Kaulotu ena Lotu.

Ena gauna oqo, kemuni na taciqu kei na ganequ, eda na rogoca kina na veitukutuku vakauqeti nikua vakakina ni mataka. O ira era na vosa vei keda era sa vakasaqaqara ena masumasu me ra kila na veika e vinakata na Turaga me da rogoca ena gauna oqo.

Au uqeti kemuni mo ni vakarorogo ka ciqoma na veitukutuku eda na rogoca. Me da kitaka vakakina sa noqu masu ena yaca i Jisu Karisito, na Turaga, emeni.