Zoo Siab Txais Tos Nej rau lub Tuam Rooj Sab Laj

Kuv cov kwv tij thiab cov muam, kuv zoo siab txais tos nej rau lub Tuam Rooj Sab Laj thib 183 ntawm lub Koom Txoos.

Thaum rau lub hli txij thaum peb sib ntsib zaum tas los, yog kuv lub cib fim mus ib lub teb chaws dhau ib lub teb chaws me ntsis thiab ntsib nej ib txhia hauv nej tej cheeb tsam. Tom qab lub tuam rooj sab laj thaum lub Kaum Hli Ntuj tas los, kuv tau mus tim teb chaws Yelemas, es ntsib peb cov mej zeej hauv ob peb qho chaw nyob ntawd thiab nyob hauv Austria teb chaws.

Thaum lub Kaum Hli Ntuj tag, kuv muab lub Tuam Tsev Calgary Alberta hauv teb chaws Canada fij tseg rau Vajtswv, ua ke nrog kev pab los ntawm Txwj Laug thiab tus Muam M. Russell Ballard, thiab Txwj Laug thiab tus Muam Craig C. Christenesen, thiab Txwj Laug thiab tus Muam William R. Walker. Thaum lub Kaum Ib Hlis Ntuj, kuv rov qab muab lub Tuam Tsev Boise Idaho fij tseg rau Vajtswv thiab. Thiab ua ke nrog kuv thaum ntawd yog Txwj Laug thiab tus Muam David A. Bednar, Txwj Laug thiab tus Muam Craig C. Christensen, thiab Txwj Laug thiab tus Muam William R. Walker.

Tej kev ua koob tsheej txog haiv neeg tej kab lis kev cai uas muaj ua ke nrog ob txoj kev fij tseg no yeej zoo kawg nkaus. Kuv tsis tau koom txoj kev ua koob tsheej txog tej kab lis kev cai hauv Calgary, vim yog tus Muam Monson hnub yug 85 xyoos thiab kuv xav tias tsim nyog kuv nrog nws nyob. Txawm yog li ntawd los, nws thiab kuv tau saib tej kev ua koob tsheej hauv wb lub tsev hauv lub this vis, thiab tag kis sawv ntxov kuv tau ya mus rau Calgary. Hauv Boise ntau tshaj 9,000 tus tub hluas ntxhais hluas los ntawm lub tuam tsev lub cheeb tsam ntawd tau koom txoj kev ua koob tsheej txog tej haiv neeg tej kab lis kev cai. Muaj tub hluas ntxhais hluas ntau npaum li tias tsis muaj chaw rau tej tsev neeg koom saib qhov chaw uas cov hluas ua yeeb yam ntawd.

Lub hli tas los xwb Thawj Tswj Hwm Dieter F. Uchtdorf, ua ke nrog tus Muam Uchtdorf, Txwj Laug thiab Muam Jeffrey R. Holland, thiab Txwj Laug thiab Muam Gregory A. Schwitzer, mus rau Tegucigalpa, Honduras, kom muab lub tuam tsev nyob ntawd fij tseg rau Vajtswv. Muaj ib txoj kev ua koob tsheej uas yog cov tub hluas ntxhais hluas ua yeeb yam hmo ua ntej ntawd.

Yeej muaj lwm lub tuam tsev uas tau npaj siab yuav ua thiab uas tseem tab tom ua.

Kuv zoo siab tag kis no tshaj tawm hais tias peb yuav ua ob lub tuam tsev tshiab nyob rau ntawm: Cedar City, Utah, thiab Rio de Janeiro, Brazil. Cov kwv tij thiab cov muam, peb yeej meem ua tuam tsev tshiab tsis tu qab li.

Ib yam li nej twb paub lawm, thaum lub Kaum Hli Ntuj tas los, kuv tshaj tawm txog saib cov tub hluas ntxhais hluas yuav tsum muaj hnub nyoog li cas thiaj mus ua tau tub txib, es txog qhov uas tau muab hloov kom cov tub hluas mus tau thaum muaj hnub nyoog 18 thiab cov ntxhais hluas mus tau thaum muaj hnub nyoog 19.

Peb cov hluas kuj tau npaj siab mus ua tub txib sai. Txog ntawm lub Plaub Hlis Ntuj hnub tim 4—ob hnub dhau los no xwb—peb muaj 65,634 tus tub txib uas ua hauj lwm pab qhia txoj moo zoo, thiab ntau tshaj 20,000 twb tau raug hu los mus tiam sis tseem tsis tau nkag qhov chaw cob qhia thiab tshuav 6,000 ntxiv uas tseem tab tom nrog lawv cov thawj coj xam phaj. Peb tau tsim kam 58 qhov chaw qhia txoj moo zoo tshiab kom thiaj saib xyuas tau tag nrho cov tub txib no.

Kom thiaj pab tau pawg tub txib no, thiab vim lawv feem coob tsis tshua muaj, peb thov caw nej sawv daws, raws li nej pub tau, ua siab zoo thiab muab nyiaj pub rau Pawg Nyiaj Tseg rau cov Tub Txib siv.

Nim no, kuv cov kwv tij thiab cov muam, peb yuav mloog tej zaj zoo kawg hnub no thiab tag kis. Lawv cov uas yuav hais lus tau thov Vajtswv kom paub txog tej yam uas tus Tswv xav kom peb hnov tam sim no.

Kuv thov kom nej ua tib zoo mloog thiab ua raws li lawv cov lus. Kuv thov Vajtswv hais tias peb yuav ua tau li no, los ntawm Yexus Khetos lub npe, amees.