Pain Kowos nuh ke Toeni uh

Tamuhlwel ac tahmtahel wolacna wiyuck an, nga sruikihn nuh pwacye in pain kowos nuh ke Toeni Luhlahp ke Yac Ahk Siofok Alngucul-Tolu luhn Alu uh.

Ke mahlwem ohnkohsr tari ah ke pacl se kuht ohsun sahflah ah, nga eis pacl wo in som muhtwacta ac ohsun nuh yurin kuhtuh suwos ke acn lowos. Tukun toeni luhlahp ke Ohktohpa, nga som nuh fin acn Germany, ma pacl wo se luhk in ohsun nuh sin mempucr lasr ke acn pucspucs ke muhtuhnfacl se inge oacyacpac ke kuhtuh acn Austria.

Ke sahflahiyacn Ohktohpa, nga kihsacelah Calgary Alberta Tempuhl fin acn Canada, kahsruh sel Elder ac Tahmtahel M. Russell Ballard, Elder ac Tahmtahel Craig C. Christensen, ac Elder ac Tahmtahel William R. Walker. Ke Nohfuhmpuh, nga sulpac kihsacelah Tempuhl Boise Idaho. Oacyacpac mwet suc wiyuc ke kihsacelah se pa Elder ac Tahmtahel David A. Bednar, Elder ac Tahmtahel Craig C. Christensen, ac Elder ac Tahmtahel William R. Walker.

Ahkfuhlwact luhn acn inge oreklac in laisyac kwewana kihsacelah inge ma wo nuh pwacye. Nga tiac som wi ahkfuhlwact luhn acn sac fin acn Calgary, mweyen lwen sac lwen lal Tahmtahel Monson ac el sun yac 85 ac nga puhla lah nga enenuh in weluhl. Tuhsruhktuh, nga el sruikihn in liye ahkfuhlwact se lun infuckihl luhlahp lasr ke television, na nga sohklah nuh Calgary ke lututwacng tohkoh ah in wi kihsacelah se. Fin acn Boise ahluhkwelah mwet fuhsr 9,000 tuhkuh ke tistrik luhn tempuhl wi ke ahkfuhlwact luhn acn sac. Puhslac na pwacye mwet fuhsr wi kac oruh wacngihn acn mwet ke sucu nuh kwewa lalos in wi ke acn se elos sritacl kac ah.

Ke na mahlwem tari ah Prestuhn Dieter F. Uchtdorf, weluhl pa Tahmtahel Uchtdorf, Elder ac Tahmtahel Jeffrey R. Holland, ac Elder ac Tahmtahel Gregory A. Schwitzer, som nuh fin acn Tegucigalpa, Honduras, in kihsacelah tempuhl sasuc lasr we ah. Ahkfuhlwact wolacna se sin mwet fuhsr oreklac ke ekuh se met liki kihsacelah se.

Oasr tempuhl sahyac suc fahkwack tari ac oasr ke kain in ohiyac ke plwacniyacn muhsah kuh srackna muhsahiyuck.

Pa wo se luhk olutu in fahkwack temple sasuc luo, ma ke mahlwem ac yac fahsruh uh fah muhsahiyuck ke acn inge: Cedar City, Utah, ac Rio de Janeiro, Brazil. Tamuhlwel ac tahmtahel, muhsahiyuck luhn tempuhl srackna fahsr.

Oacna kowos etuh, ke toeni luhlahp ke Ohktohpa ah nga fahkwack ke eklac luhn matwac ma mukul ac muhtwacn fuhsr kuh in som wi misin pacl nuh kwewa, ke mukul fuhsr in pacl inge kuh in kuhlwacnsap ke matwac yac 18 ac muhtwacn fuhsr ke yac 19.

Top sin mwet fuhsr lasr uh arulacna wo nuh pwacye ac mokleyuck. Ke Eprel 4—lwen luo tari ah—oasr misineri 65,634 suc kuhlwacnsap, ac oasr puhs liki mwet 20,000 suc eis tari pahng lalos tuhsruhk soenna ilyak nuh ke nien ahkpah luhlahp luhn misineri ac puhs liki 6,000 oasr ke oruh luhn lohlngohk yurin pisap ac prestuhn luhn stek lalos. Enenuh se nuh sesr in orwaclah misin sasuc 58 in nwacnwack pihsac yohk se luhn misineri uh.

In kahsruh kapwack luhn misineri inge, ac ke srihpen puhs sin misineri lasr uh tuhkuh ke ohiyac wo ke ma enenweyuck, kuht suli kowos, ke kowos kuh, in etatwen in sang nuh ke General Missionary Fund luhn Alu uh.

Ingena, tamuhlwel ac tahmtahel, kuht ac lohng pweng mokleyuck mihsenge ac lutu. Elos suc ac sramsram nuh sesr uh ahkolah ke pruhe in etuh ma Leum El kena kuht in lohng ke pacl se inge.

Nga kwacfe kowos in porongo ac eis pweng ma kuht ac fah lohng uh. Tuh kuht in oruh ohinge pa pruhe luhk ke inen Jisus Kraist, amen.