ຂໍຕ້ອນຮັບສູ່ກອງປະຊຸມໃຫຍ່ສາມັນ
ໂດຍ ປະທານທອມມັສ ແອັສ ມອນສັນ
ຂ້າພະເຈົ້າຂໍຊຸກຍູ້ທ່ານ ໃຫ້ຕັ້ງໃຈຟັງຂ່າວສານທີ່ເຮົາຈະໄດ້ຍິນ. ນັ້ນຄືຄຳອະທິຖານຂອງຂ້າພະເຈົ້າ ວ່າເຮົາຈະເຮັດ.
ອ້າຍເອື້ອຍນ້ອງທີ່ຮັກແພງ, ຂ້າພະເຈົ້າດີໃຈຫລາຍທີ່ຈະໄດ້ຕ້ອນຮັບທ່ານສູ່ກອງປະຊຸມໃຫຍ່ສາມັນຄັ້ງທີ 183 ຂອງສາດສະໜາຈັກ.
ລະຫວ່າງຫົກເດືອນນັບແຕ່ພວກເຮົາໄດ້ພົບກັນ, ຂ້າພະເຈົ້າໄດ້ມີໂອກາດເດີນທາງໄປຫລາຍບ່ອນ ແລະ ໄດ້ພົບກັບຜູ້ຄົນຢ່າງຫລວງຫລາຍ. ຫລັງຈາກກອງປະຊຸມໃຫຍ່ສາມັນເດືອນຕຸລາແລ້ວນີ້, ຂ້າພະເຈົ້າໄດ້ເດີນທາງໄປປະເທດເຢຍລະມັນ, ບ່ອນທີ່ຂ້າພະເຈົ້າໄດ້ມີໂອກາດພົບກັບສະມາຊິກຢູ່ໃນຫລາຍບ່ອນ, ຕະຫລອດທັງພາກສ່ວນໜຶ່ງໃນປະເທດໂອສະເຕຣຍ ນຳອີກ.
ໃນທ້າຍເດືອນຕຸລາ ຂ້າພະເຈົ້າໄດ້ອຸທິດພຣະວິຫານ ຄາວກາຣີ ອາເບີຕາ ຢູ່ປະເທດການາດາ, ໂດຍໄດ້ຮັບການຊ່ອຍເຫລືອຈາກແອວເດີ ແລະ ຊິດສະເຕີ ເອັມ ຣະໂຊ ບາເລີດ, ແອວເດີ ແລະ ຊິດສະເຕີ ຄະເຣກ ຊີ ຄຣິສເຕັນເສັນ, ແລະ ແອວເດີ ແລະ ຊິດສະເຕີ ວິວລຽມ ອາ ວອກເກີ. ໃນເດືອນພະຈິກ ຂ້າພະເຈົ້າໄດ້ອຸທິດພຣະວິຫານ ບອຍສີ ໄອດາໂຮ. ແລະ ຜູ້ທີ່ໄດ້ເດີນທາງໄປກັບຂ້າພະເຈົ້າເພື່ອອຸທິດພຣະວິຫານແມ່ນ ແອວເດີ ແລະ ຊິດສະເຕີ ເດວິດ ເອ ແບ໊ດນາ, ແອວເດີ ແລະ ຊິດສະເຕີ ຄະເຣກ ຊີ ຄຣິສເຕັນເສັນ, ແລະ ແອວເດີ ແລະ ຊິດສະເຕີ ວິວລຽມ ອາ ວອກເກີ.
ການສະເຫລີມສະຫລອງທີ່ໄດ້ຈັດຂຶ້ນສຳລັບການອຸທິດທັງສອງບ່ອນນັ້ນແມ່ນດີເດັ່ນຫລາຍ. ຂ້າພະເຈົ້າບໍ່ໄດ້ໄປຮ່ວມການສະເຫລີມສະຫລອງຢູ່ທີ່ ຄາວກາຣີ ດ້ວຍຕົວເອງ, ເພາະມື້ນັ້ນເປັນມື້ຄົບຮອບວັນເກີດ 85 ປີຂອງຊິດສະເຕີມອນສັນ ແລະ ຂ້າພະເຈົ້າຮູ້ສຶກວ່າ ຕ້ອງຢູ່ກັບນາງ. ແຕ່ນາງກັບຂ້າພະເຈົ້າໄດ້ຊົມການສະແດງທີ່ຖ່າຍທອດຢູ່ໃນບ້ານຂອງພວກເຮົາ, ແລ້ວຂ້າພະເຈົ້າໄດ້ເດີນທາງໄປເມືອງຄາວກາຣີ ໃນເຊົ້າມື້ຕໍ່ມາ ເພື່ອອຸທິດພຣະວິຫານ. ໃນເມືອງບອຍສີ ມີຊາວໜຸ່ມຈຳນວນ 9,000 ຄົນ ຈາກທ້ອງຖິ່ນຕ່າງໆຂອງພຣະວິຫານໄດ້ຮ່ວມສະເຫລີມສະຫລອງ. ມີຊາວໜຸ່ມເປັນຈຳນວນຫລວງຫລາຍ ຈົນວ່າບໍ່ມີບ່ອນພຽງພໍສຳລັບຄອບຄົວຂອງເຂົາເຈົ້າທຸກຄົນ ຢູ່ໃນສະໜາມອັນກວ້າງໃຫຍ່ບ່ອນທີ່ເຂົາເຈົ້າສະແດງ.
ເດືອນແລ້ວນີ້ ປະທານດີເດີ ແອັຟ ອຸກດອບ, ໄດ້ພາຊິດສະເຕີອຸກດອບ, ແອວເດີ ແລະ ຊິດສະເຕີ ແຈັບຟະຣີ ອາ ຮໍແລນ, ແລະ ແອວເດີ ແລະ ຊິດສະເຕີ ເກຣກເກີຣີ ເອ ສະວິດເຊີ ໄດ້ໄປເມືອງເທກູຊີກາປາ, ປະເທດຮົງດູຣັສ, ເພື່ອອຸທິດພຣະວິຫານຫລັງໃໝ່. ການສະແດງອັນດີເດັ່ນຂອງຊາວໜຸ່ມ ໄດ້ຖືກຈັດຂຶ້ນໃນຄ່ຳຄືນນັ້ນ ກ່ອນມື້ອຸທິດພຣະວິຫານ.
ມີພຣະວິຫານຫລາຍແຫ່ງອີກທີ່ໄດ້ຖືກປະກາດໃຫ້ຮູ້ແລ້ວ ແລະ ກຳລັງຖືກສ້າງຢູ່ໃນເວລານີ້.
ມັນເປັນສິດທິພິເສດຂອງຂ້າພະເຈົ້າ ໃນເຊົ້າມື້ນີ້ ທີ່ຈະປະກາດພຣະວິຫານອີກສອງແຫ່ງ, ຊຶ່ງບໍ່ດົນນີ້ ຈະຖືກສ້າງຂຶ້ນທີ່: ເມືອງຊີເດີ, ລັດຢູທາ, ແລະ ໃນເມືອງຣິໂອ ເດ ຢາເນໂຣ, ປະເທດບຣາຊິນ. ອ້າຍເອື້ອຍນ້ອງທັງຫລາຍ, ການສ້າງພຣະວິຫານບໍ່ໄດ້ຊ້າລົງ.
ດັ່ງທີ່ທ່ານຮູ້ຈັກ, ໃນກອງປະຊຸມໃຫຍ່ສາມັນເດືອນຕຸລາຜ່ານມາ ຂ້າພະເຈົ້າໄດ້ປະກາດເລື່ອງການປ່ຽນອາຍຸຂອງຜູ້ສອນສາດສະໜາໜຸ່ມໃຫ້ຕ່ຳລົງ, ຊຶ່ງຕອນນີ້ຊາຍໜຸ່ມອາຍຸ 18 ປີ ແລະ ຍິງໜຸ່ມອາຍຸ 19 ປີ ເລີ່ມສາມາດໄປເຜີຍແຜ່ໄດ້.
ການຕອບຮັບຂອງຊາວໜຸ່ມຂອງພວກເຮົາແມ່ນເປັນໜ້າປະທັບໃຈຫລາຍ ແລະ ເປັນການດົນໃຈ. ນັບແຕ່ວັນທີ 4 ເດືອນເມສາ—ສອງມື້ຜ່ານມານີ້—ມີຜູ້ສອນສາດສະໜາເຕັມເວລາຢູ່ 65,634 ຄົນ, ແລະ 20,000 ຄົນຕື່ມອີກທີ່ໄດ້ຮັບການເອີ້ນ ແຕ່ຍັງບໍ່ໄດ້ເຂົ້າສູນອົບຮົມເທື່ອ ແລະ ຫລາຍກວ່າ 6,000 ຄົນ ທີ່ກຳລັງຮັບການສຳພາດນຳອະທິການ ແລະ ປະທານສະເຕກຂອງເຂົາເຈົ້າ. ເປັນສິ່ງຈຳເປັນທີ່ພວກເຮົາຕ້ອງໄດ້ຈັດຕັ້ງເຂດເຜີຍແຜ່ໃໝ່ 58 ແຫ່ງຕື່ມອີກ ເພື່ອຕ້ອນຮັບຜູ້ສອນສາດສະໜາທີ່ເພີ່ມທະວີຂຶ້ນເລື້ອຍໆ.
ໃນການຊ່ອຍເຫລືອເສີມສ້າງພະລັງຂອງຜູ້ສອນສາດສະໜາ, ແລະ ເພາະວ່າ ຜູ້ສອນສາດສະໜາຢ່າງຫລວງຫລາຍຂອງພວກເຮົາ ມາຈາກສະພາບທີ່ທຸກຍາກລຳບາກ, ສະນັ້ນພວກເຮົາຈຶ່ງຂໍໃຫ້ທ່ານ ຈົ່ງບໍລິຈາກເງິນທຶນສຳລັບການເຜີຍແຜ່ຂອງສາດສະໜາຈັກ.
ບັດນີ້, ອ້າຍເອື້ອຍນ້ອງທັງຫລາຍ, ເຮົາຈະໄດ້ຍິນຂ່າວສານອັນດົນໃຈໃນມື້ນີ້ ແລະ ມື້ອື່ນ. ຜູ້ທີ່ຈະກ່າວກັບເຮົາ ໄດ້ສະແຫວງຫາການນຳພາດ້ວຍການອະທິຖານ ເພື່ອຈະໄດ້ຮູ້ຈັກສິ່ງທີ່ພຣະຜູ້ເປັນເຈົ້າຢາກໃຫ້ເຮົາໄດ້ຍິນໃນເວລານີ້.
ຂ້າພະເຈົ້າຂໍຊຸກຍູ້ທ່ານ ໃຫ້ຕັ້ງໃຈຟັງຂ່າວສານທີ່ເຮົາຈະໄດ້ຍິນ. ນັ້ນຄືຄຳອະທິຖານຂອງຂ້າພະເຈົ້າ ວ່າເຮົາຈະເຮັດ ໃນພຣະນາມຂອງພຣະເຢຊູຄຣິດ, ພຣະຜູ້ເປັນເຈົ້າ, ອາແມນ.