2010–2019
Mengemedaol er kemiu el mei er a Ongdibel
April 2013


Mengemedaol er kemiu el mei er a Ongdibel

A kulengit me bo mungil lorrenges e mngai aikel klumech el bo dorrenges. Bol sebeched el mo uaisei a nglunguchek .

Rodam me a rodos, ng dmeu a renguk el mengemedaol er kemiu el mei er tial 183rd el Eru er a Tal Rak el Klou el Ongdibel er a Ikelesia.

Aika el mereko el elolem el buil, eng mle techellek el ngara omerael e kebetech lobengkemiu er aikel mgnarngii. Uriul er sel klou el ongdibel er a October, e ak mlora Dois, el mlo techellek el kebetech ngak me a rechedal a ikelesia er a kakerous el basio er tial beluu me a dirrek el bebil er a beluu er a Austria.

Sera ulebongel er a October eak kulterkeklii a Calgary Alberta Templo er a Canada, lobengkel a Elder me a Sister M. Russell Ballard, Elder me a Sister Craig C. Christensen, me a Elder me a Sister William R. Walker. E sera November eak liluut loterkeklii a Boise Idaho Templo. A mirael lobengkek e ulengeseu er ngak a Elder me a Sister David A. Bednar, me a Elder me a Sister Craig C. Christensen, me a Elder me a Sister William R. Walker.

A teletael me a omeruul dilubech er a oterkeklel aikal templo a kmal mle ungil. Ng mlo diak el sebechek el mora ikal omeruul er a Calgary, le ngmle okai me a eim el tansiobi er a Sister Monson me ak mlo omelchesiu el kirek lobengkel. Eng di, ngii me a ngak a mlo techellam lomes aikal omilil er a delmerab er kemam lokiu a tibi, e sola ak merola el mora Calgary er sel bol kukuk er a tutau el mo olterekokl er a templo. Sera kngara Boise eng kmeed el etui el telael el ngeasek er a temple district a mla er ngii. Ng kmal mle betook a rengeasek el chad el ngarngii meng mlo diak a basio el kirir a retelungalek er a chelsel tial basio el mla er ngii omilil.

Tial mlomerek el buil ea President Dieter F. Uchtdorf, a ulebengkel a Sister Uchtdorf, Elder me a Sister Jeffrey R. Holland, me a Elder me a Sister Gregory A. Schwitzer, el mlora Tegucigalpa, er a Honduras, el mo olterekokl er a beches el templo risei. A klebokel el klokolir a rengeasek a mlo er ngii er sel kesus ruchei er a oterkeklel a templo.

Ngarngii a bebil er a templo el ngara kakerous el basio el mla muchais el dirk merael a ureor er ngii er chelechal taem.

Ng techellek er chelechal tutau el mo ouchais el kirel a teblo el templo, el chelsel aikal merael mei el buil me a rak eng mo mokedechor: e Rodam me a rodos a okedecherul a templo a melemolem el diak a tomer ngii.

Ko medengei, sera klou el ongdibel er a October ea kuluchais el kirel a rekil a rengeasek el sechal me a reedil el sebechir el mora mission, el ngeasek el sechal a 18 ea ngeasek el redil a 19.

A nger er a rengeasek el ngeleked a kmal mengasireng. Sera April 4—eru el klebesei er a memong—e ngarngii a 65,634 el cherrungel el misionari, ea kmeed el lluich el telael a mla ngmai okedong er tir eng di dirkak el siseb er a blil omesuub el mora klmisionari ea kmeed el elolem el telael a dirk ke mengiil a babilengir er a rebisop me a re merreder a stake. Ng mlo kiram el muchel a 58 el beches el mission el mo sebechir tirkal di meleketek a iidisir el misionari el mong.

M e a ngeso el kirel tial ureor er a misionari, eng betok el misionari er kid a diak lungil beserir, ea ki olengit er kemiu, a lesebechemiu, el mo olngeseu er a tekoi er a udoud el mora General Missionary Fund er a Ikelesia.

Chelecha, e rodam me a rodos, kede mo remenges a meang el klumech er chelechal sils me a klukuk. Tirkel mo mengedecheduch er kid a mla ngara nglunguuch el mo medengelii sel ngii a soal a Rubak a bo dorrenges er chelechal taem.

A kulengit me bo mungil lorrenges e mngai aikel klumech el bo dorrenges. Bol sebeched el mo uaisei a nglunguchek el ngara ngklel a Jesus Kristo, amen.