2010–2019
Kasamw ong Tiepene Lap
April 2013


Kasamw ong Tiepene Lap

I kangoangehkin kumwail en patehng oh poakehng iren kaweid kan me kitail pahn rong. Kitail en kin wia met iei ahi kapakap.

Riei ohl oh lih kempoake kan, I kapingki mehlel en kasamwoh kumwail ong Tiepene Lap en Ehuehu Pahr Nempe 183 en Mwomwohdiso.

Erein sounpwong weneu mwurin atail tuhpene rahn teio, I ahniki ansou mwahu en ekis seiloak oh en tuhweng ekei kumwail nan amwail wasa. Mwurin tiepene lap nan Oaktohpeo, I seiloaklahng Sehmen, wasa me I ahniki ansou mwahu en tuhweng towe kan nan wasa tohto nan wehio iangahki ekei wasa nan Austria.

Ni keimwseklahn Oaktohpe, I kasarawihala Tehnpas Sarawi en Calgary Alberta nan Canada, me iangie iei Elder oh Sister M. Russell Ballard, Elder oh Sister Craig C. Christensen, oh Elder oh Sister William R. Walker. Nan Nohpempeo, I kasarawi sapahl Tehnpas Sarawi en Boise Idaho. Me iangie seiloak oh wia kasarawio iei Elder oh Sister David A. Bednar, Elder oh Sister Craig C. Christensen, oh Elder oh Sister William R. Walker.

Kahlek oh kamadipw kan me wiawi ni ansoun kasarawi kan me inenen kaselel. I sohte iang kamadipw en kasarawi nan Calgary, pwehki e wia ketemenpen ahn Sister Monson sounpar 85 oh I pehm me I konehng mih reh. Ahpw, ih oh ngehi koaros kilang sang imwato nan proahdkahs me sohte langadahng wehi pokon, oh manda nimensengo I pihrla Calgary ong kasarawio. Nan Boise tohtohsang me pwulopwul 9,000 sang district en tehnpaso towehda arail kamadipw en kasarawio. Uwen tohtohn me pwulopwul pwukat sohte itar arail peneinei en pil iang pidolong nan wasahn mwadong me kamadipwo wiawi.

Sounpwong samwalahro President Dieter F. Uchtdorf, iangahki Sister Uchtdorf, Elder oh Sister Jeffrey R. Holland, oh Elder and Sister Gregory A. Schwitzer, seiloak kohla Tegucigalpa, Honduras, pwehn kasarawi ehu atail tehnpas sarawi me ahpwtehn kokouda. Pil ehu kamadipw en kasarawi kaselel sang me pwulopwul kan wiawi nisoutik mwohn kasarawio.

Mie pil ekei tehnpas sarawi me pakairdahr oh me pilahnepe wihwiawihte de wie kokouda.

Ni menseng wet I ahniki ansou mwahu en pakairki tehnpas sarawi kapatapat riau, me nan sounpwong oh sounpar kohkohdo kan pahn kokouda wasa pwukat: oh . Ohl oko oh lih oko, doadoahk en kauwada tehnpas sarawi kan wie nannantihte kohwei.

Ni duwen me kumwail esehier, ni tiepene lap me wiawi Oaktohpe samwalahro I pakairki wekideklahn sounpar me mwahnakapw oh peinakapw akan anahne pwehn papah duwen misineri, ni mwahnakapw akan ahr kakehr papah ni sounpar 18 oh peinakapw akan ni 19.

Pasapeng en neitail me pwulopwul kan me inenen kaselel oh kamarain. Ni Epreil 4—rahn riau samwalahro—kitail nainikihier misineri 65,634 me wie papah, iangahki pil meh 20,000 me alehdier arail malipilip ahpw me saikinte pidolong nan wasahn kaiahn misineri oh tohtohsang 6,000 pil wie kapkapeidek ansou wet rehn arail pisop oh president kan en stake. Se anahne wiahda misin kapw 58 pwehn apwaliala uwen tohtohlahn misineri kan.

Pwehn sewese apwalih pwihn en misineri wet, oh pwehki tohtohn atail misineri kan arail kohdohsang irair karakarahk, se lukeikumwail, ma kumwail kak, en kisakis sapan ong Nekinek en Mwohni ong Misineri en Mwomwohdiso.

Met, ohl oko oh lih oko, kitail pahn rong padahk kamarain kan rahn wet oh lakapw. Irail me pahn patohieng kitail kapakapkihier dah me Kauno kupwurki kitail en rong ni ansou kiset.

I kangoangei kumwail en tetehk mwahu oh alehda padahk kan me kitail pahn karonge. Kitail en wia met iei ahi kapakapki ni mwaren Sises Krais, ahmen.