2010–2019
Manava i te amuiraa
Eperera 2013


Manava i te amuiraa

Te a‘o atu nei au ia outou ia vai ara e ia apo maitai i te mau a‘oraa ta tatou e faaroo mai. Ia ti‘a ia tatou ia rave i te reira, o ta’u ïa pure.

E mau taea‘e e mau tuahine here e, ua oaoa roa vau i te fariiraa ia outou i te 183raa o te amuiraa rahi a te Ekalesia.

Ono ava‘e i ma‘iri mai ta tatou farereiraa hopea ra, ua ratere rii au e ua farerei au i te tahi o outou i to outou iho mau fenua. I muri mai i te amuiraa rahi no atopa ra, ua tere atu vau i te fenua Heremani, i reira vau i te fana‘oraa ia farerei i to tatou mau melo i te tahi mau vahi i tera fenua e i te fenua Auteria atoa.

I te hopea ava‘e no atopa ra, ua haamo‘a vau i te hiero no Calgary Alberta i Canada, tauturuhia mai e Elder M. Russell Ballard e to’na hoa, Elder Craig C. Christensen e to’na hoa e Elder William R. Walker e to’na hoa. I te ava‘e no novema ra, ua haamo‘a faahou vau i te hiero no Boise Idaho. E na muri ia’u i te oro‘a haamo‘araa, ua haere atoa mai o Elder David A. Bednar e to’na hoa, o Elder Craig C. Christensen e to’na hoa, e o Elder William R. Walker e to’na hoa.

Ua riro te mau ta‘urua faahanahanaraa no taua na oro‘a haamo‘araa ei ohipa rahi i te faahiahia. Aita vau i tae tino roa’tu i te ta‘urua faahanahanaraa i Calgary, no te mea ho‘i e mahana fanauraa te reira no te tuahine Monson, 85 matahiti, e ua mana‘o vau e faaea i piha‘i iho ia’na. Tera râ, ua fana‘o maua ite mata‘ita‘iraa i te ta‘urua faahanahanaraa na roto i te teata i roto i to maua piha faafaaearaa na ni‘a i te tahi reni haapurororaa opani i te taata, e po‘ipo‘i a‘e ua na ni‘a atu vau i te manureva i Calgary no te haamo‘araa. I Boise, hau i te 9 000 feia apî no te mataienaa o te hiero tei amui mai no te ta‘urua faahanahanaraa. Ua rahi roa ino te feia apî i roto e aita faahou te parahiraa i nava‘i no te mau utuafare i roto i te vahi mata‘ita‘iraa i reira te ohipa i te tupuraa.

I te ava‘e i ma‘iri a‘enei, ua tere te peresideni Dieter F. Uchtdorf, apeehia e to’na hoa, na reira atoa o Elder Jeffrey R. Holland e to’na hoa, e o Elder Gregory A. Schwitzer e to’na hoa i Tegucigalpa, i te fenua Honduras no te haamo‘a i ta tatou hiero tei oti noa mai i reira. E ta‘urua faahanahanaraa rahi tei faatupuhia i te aru‘i na mua a‘e i te haamo‘araa.

Te vai faahou ra te tahi mau hiero tei faaarahia, te vai ra tei roto i te taime faaineineraa e te vai ra te ravehia ra te paturaa.

E haamaitairaa no’u i teie po‘ipo‘i e faaara atu e piti faahou â hiero, e i te mau ava‘e e te mau matahiti e haere mai nei, e patuhia te reira i te mau vahi i muri nei : Cedar City, i Utah, e Rio de Janeiro, i Beresiria. Te mau taea‘e e te mau tuahine, te haere noa ra te paturaa hiero i mua e aita e tuuraa.

Mai ta outou i ite, i te amuiraa rahi no atopa, ua faaara atu vau i te tauiraa i roto i te matahiti e tano ai te feia apî tamaroa e te feia apî tamahine ia tavini ei misionare rave tamau, no te feia apî tamaroa, i te 18raa o te matahiti e no te feia apî tamahine, i te 19raa o te matahiti.

Ua faahiahia roa te pahonoraa o te feia apî, ua riro ho‘i te reira ei faaûruraa. Ia au i te numera no te 4 no eperera—a piti mahana i teie nei—65 634 misionare rave tamau e tavini ra, e te vai faahou ra 20 000 tei farii i ta ratou piiraa e aita râ i tomo atura i roto i te pû haapiipiiraa misionare e te vai ra hau i te 6 000 faahou atu i roto i te faanahoraa no te uiuiraa e te episekopo e te peresideni tĭtĭ. Titau-roa-hia ia faati‘a matou e 58 misioni apî no te farii i te maraaraa numera o te mau misionare.

No te tauturu i roto i te aupururaa i teie nuu misionare, e no te mea ho‘i, e rave rahi o ta tatou mau misionare e oraraa haehaa to ratou, te ani nei matou ia outou, ia au i tei roaa ia outou, ia horo‘a rahi i te afata moni rahi na te misionare o te Ekalesia.

I teie nei, e te mau taea‘e e te mau tuahine, e faaroo tatou i te tahi mau a‘oraaa faaûru, i teie mahana e ananahi. Ratou te a‘o mai i mua ia tatou, ua imi ratou na roto i te pure ia ite mai i te mea ua hinaaro te Fatu ia tatou ia faaroo i teie taime.

Te a‘o atu nei au ia outou ia vai ara e ia apo maitai i te mau a‘oraa ta tatou e faaroo mai. Ia ti‘a ia tatou ia rave i te reira, o ta’u ïa pure i te i‘oa o Iesu Mesia ra, te Fatu, amene.