Kamagaer Kam Un ko Conference

Pi walageg nib ppin nge pum’on, gu falflan’ nggu bing biney e 183rd Annual General Conference ko fare Galasia rodad.

Ulane pi nel’ e pul’ nike thimur ko chirofen kad mada’ gad, kug tawath ni nggu milekag boech min mada’nag boech i gimed ko pi nam romed. Tomuren e general conference ko October, kug waen nga Germany, mug mada’ nag bo’or e chongin e galasia rodad u boech e tafen ko re nam nem, ma ku un ngay boech i yang nu Austria.

U tumor ko October, Kug yibliy nag e Temple nu Calgary Alberta u Canada, ni ke un Elder ma Sister M. Russel Ballard, Elder Craig C. Christensen, nge Elder ma Sister William R. Walker. Ko November, kug yibliy nag bayay e Temple nu Boise Idaho. Ma kar milekag gad rog ni Elder nge Sister David A. Bednar, Elder nge Sister Craig C. Christensen, ma Elder nge Sister William R. Walker.

Pi madnom ko am nge falflan’ ni kan tay ko pi yibliy ney e rib fel’. Dan kug un ko madnom ni kan tay u Calgaray ni bachan re rran nem e rran ni tanchubi rok Sister Monson nike 85 e duw ma kug ba’adag nggu paer rok. Machane kug falflan’ gow ni kug guyew u na’un romow u TV, ma kug waen nga Calgary bin magid e rran ni fan ko dedication ngay. U Boise bay yo’or sana mureb e biyu gidii’ nib fel’ yangraed ku temple district ni kar ngongoliyed e madnom riy. Ya bay yo’or e gidii’ ni kar uned ni dari gil’ ni fan e pi chongin e tabinaw rorad ni ngar guyed ko re madnom u ta’ab na’un.

Biney e pul ni ke thimur ma President Dieter F. Uchtdorf, ma un ngay Sister Uchtdorf, Elder Holland, nge ppin rok, nge Elder Gregory A. Schwitzer nge bpin rok, kar milekag gaed nge Tegucigalpa, Honduras, ni ngar yibliy nigew e bin be’ech e temple nikan fal’eg ngaram. Ke buch e madnom nib ga fa binem e nep um’on ko re yibliy.

Bay yug boech e temple u bang ni kug rogned marnga’agen ni gube duwgliy e chiney fa gube fal’eg ni ngan toey.

Be tawath rog ko re kakadbul ney nggu gog l’agruw e temple, ni u pi duw nge pul nga m’on, ran toey u pi nam ney: Cedar City, Utah nge Rio de Janeir, Brazil. Pi walageg ni ppin nge pum’on, dariy ban’en ni ran tal’eg e pi temple ni ngar toyed.

Boed ni gimed ma nang, u October general conference kug weliy ni nggad thiliyeged e duw ni napan pi pum’on nge ppin ni rayog ni ngar pigpig gaed ko missionary, ni pi pum’on rayog ni ngar un napan 18 e duw nge pi ppin rayog ko 19.

Pi gidii’ rodad ni fel’ yangraed e rib yul’yul’ mab fel. Ya ko April 4—l’agruw e rran faram—ka bay 65,634 fulltime missionary ni be pigpig, ni ka bay 20,000 yug boech ni kar athapaged e pi pong rorad machane dowori un ko missionary training center ma bay 6,000 yug boech nibe un ko interview ni ngar ranoed rok e pi bishop nge stake president rorad. Ya kug t’uf nggu fal’eg 58 mission nib be’ech ni nge tafan’ey e pi missionary rodad nibe yo’or.

Nggu ayuweg e pi missionary rodad, ma ni bachan bo’or e missionary rodad be yib ko pi nam nge tabinaw ni gafgow, gu ning romed, f’anre rayog rom, ni ngam pii’ bang ko salpiy rom ko General Missionary Fund ko fare Galasia.

Ma chiney, pi walagaeg, ngad motoyil gad min rungag e pi thin nib thothup e daba’ nge gabul. Picha’ nra non ngodad e kar meybil gad ni ngar nanged e tin ni Somoel e ba’adag ni ngar rogned ngodad e chiney.

Gube wenig ngomed ni ngam motoyil min athapeg e pi thin rorad ni ram rung’ag. Aygi rin’ed e ren’ey e meybil rog u fithingan ku Yesus Kristus, amen.