Taem Yu Sevem wan Gel, Yu Sevem Ol Jeneresen

Hem i wan ona blong mi blong toktok long yufala ol fetful yang woman blong Jos. Mifala i luk yufala i stap ona long ol kavenan blong yufala taem yufala i stap go tru long laef ia, mo mifala i save se bae ol klin laef blong yufala i blesem ol bubu blong yufala, ol famle naoia, mo ol famle memba we bae oli kam yet, from olsem Presiden Godon B. Hinkli i talem, “Taem yu sevem wan gel, yu sevem ol jeneresen.”¹

Rod blong yu blong stap folem kavenan i stat long taem we yu bin baptaes mo kasem presen we i Tabu Spirit. I gohed evri wik long sakramen miting, wan tabu ples we yu riniu kavenan blong baptaes. Naoia i taem blong yu blong rere blong mekem ol tempol kavenan. Ol “tabu odinens mo kavenan insaed long ol tabu tempol i mekem i isi blong yumi blong gobak long ples blong God mo blong ol famle blong yumi blong kam wan bakegen long laef we i no save finis.”²

Stanap long ol tabu ples from ol bubu blong yu. “Evri man we i bon i kam long wol i wan ansa blong ol jeneresen blong ol papa mo mama. Yumi gat wan nomol intres blong joen wetem ol bubu blong yumi.”³ Taem yu tekpat long famle histri mo tempol wok, yu stap bildim gud rilesensip wetem ol bubu blong yu taem yu mekem ol odinens blong sevem olgeta.

Stanap long ol tabu ples, blong yuwan mo ol stret famle blong yu. Stret mo gud eksampol blong yu bae i stamba blong bigfala glad, nomata situesen blong famle blong yu. Stret mo gud joes blong yu bae i kwalifaem yu blong mekem mo kipim ol tabu kavenan we bae i fasem yu mo famle blong yu tugeta blong laef we i no save finis.

Stanap long ol tabu ples blong wan fiuja famle blong yu. Komitim yu blong sil long hasban blong yu tru tabu prishud long tempol taem yu statem wan famle yunit we i no save finis. Ol pikinini blong yu bae i gat blesing blong trutok taem yu mekem se gud mo klin eksampol mo strong testemoni blong yu i kam wan pat blong laef blong olgeta mo soem olgeta rod we i go long kavenan.

Mi bin luk ol tabu prinsipol ia we i no save finis, oli bin putumaot long wan Intanasonol Art Kompetisen blong Yut i no longtaem. Megan Wona Teila i bin mekem wan kompiuta wok blong mekem foto, mo tekem wan niu lukluk long parabol blong Kraes abaot ol ten yang gel.⁴ Mi bin mitim Megan, mo hem i eksplenem simbol blong ol ten yang gel ia, we hem i tokbaot olsem wan yang woman blong klin fasin mo fet we i rere blong mekem mo kipim ol tempol kavenan. Olsem evri waes yang gel ia, priperesen blong hemwan i hapen taem hem i putum moa oel long laet blong hem, wan drop long wan taem, tru long fasin blong stap laef stret mo gud oltaem. Mi bin luk stael blong hea blong hem we i naes. Megan i bin eksplenem se stael blong tanem hea ia i ripresentem rilesensip blong klin laef blong yang woman ia wetem plante jeneresen. Wan hip blong hea i ripresentem lav mo respek we hem i gat blong ol bubu blong hem, seken hip hem i olsem stret mo gud eksampol blong hem long famle blong hem tedei, mo nambatri hip, hem i laef we hem i rere blong gat wetem ol jeneresen we oli stap kam.

Mi bin mitim wan nara yang woman, we, hemi bin rere longtaem finis i kam long saed blong spirit, mekem se hem i gat wan stret mo gud laef i go folem plante jeneresen.

Long wan naesfala Septemba aftenun, mi mo hasban blong mi i bin stap long tempol mo wet long janis ia blong tekpat long ol tempol odinens. Kris, wan fren blong mifala i bin kam insaed long rum ia. I bin gud tumas blong luk yang man ia, we i jes kambak long misin blong hem long Rasia.

Taem sesen i rere blong stat, wan naes yang woman i bin sidaon long saed blong mi. Hem i saen, wetem smael, mo fulap wetem laet. Mi wantem save hem, so kwaet nomo, mi talem nem blong mi. Hem i wispa mo talem nem blong hem, Keit, mo mi haremsave las nem blong hem olsem wan famle we i bin stap long Mijigan, we famle blong mi i bin stap ia bifo. Keit hem i bigfala gel blong olgeta, we hem i jes kambak long misin long Jemani faef wik i pas.

Long taem blong sesen, tingting ia i stap kambak long maen blong mi, “Presentem Keit long Kris.” Mi putum filing ia long saed, “?Wetaem, wea, olsem wanem?” Taem mifala i stap rere blong go, Kris i kam blong talem tata long mifala, mo hemia i bin janis blong mi. Mi pulum Keit i kam mo wispa long tufala, “Yutufala i tu klin yang pipol we yutufala i nidim blong save yutufala.” Mi bin aot long tempol wetem glad se mi bin mekem folem strong filing ia.

Long rod i go hom, mi mo hasban i stap toktok raon long ol jalenj we i bin kam long laef blong famle blong Keit. Mi bin kam blong save gud moa Keit, mo hem i bin helpem mi andastanem ol risen blong hapi fes ia we mi bin luk long tempol long dei ia.

Oltaem Keit i traehad blong kipim kavenan blong hem taem hem i stap lukaotem blong stap long ol tabu ples. Hem i bin kamaot long wan hom we famle haos naet, prea tugeta, mo stadi skripja i bin mekem hom blong hem wan tabu ples. Olsem wan pikinini, hem i bin lanem abaot tempol, mo singsing ia “Mi Lavem blong Luk Tempol” i bin wan we oli laekem singsing long famle haos naet.⁵ Olsem wan smol gel, hem i bin stap lukluk papa mo mama blong hem i soem eksampol blong stap long ol tabu ples taem oli bin go long tempol long wan naet long wiken be i no blong go long wan muvi o go dina.

Hem i lavem gud papa blong hem, mo hem i yusum prishud atoriti blong hem blong helpem hem i mekem fas kavenan blong hem we i baptaes. Afta oli bin putum han antap long hed blong hem blong kasem Tabu Spirit. Keit i se, “Mi bin glad tumas blong kasem Tabu Spirit, mo mi save se bae i helpem mi stap long rod blong laef we i no save finis.”

Keit i bin gohed blong gat wan laef we i gat blesing mo i hapi. Taem hem i bin gat 14 yia, hem i statem hae skul mo lavem seminari, wan nara tabu ples blong lanem abaot gospel. Wan dei, tija blong hem i bin stat blong tokbaot ol tes mo talem se bae yumi evriwan bae i fesem. Hem i talem long hemwan: “mi no wantem ol tes; mi no wantem harem samting ia.”

Sam wik nomo afta, papa blong hem i wekap long Ista Sandei mo i bin sik tumas. Keit i talem se: “Papa blong mi i bin wan helti man; hem i wan man blong ron. Mama blong mi i bin wari long sik blong hem mo tekem hem i go long hospital. Long 36 aoa, hem i kasem wan bigfala strok we kolosap ful bodi i nomo save muv. Hem i save sarem ae, be ful bodi i nomo wok. Mi tingbaot taem mi luk hem mo tingting, ‘O no, i stap hapen. Seminari tija blong mi i tru ia. Mi stap gat wan tes ia.’” Afta sam dei, papa blong Keit i ded.

Keit i gohed, i talem se: “I bin had tumas. Yu neva wantem lusum hiro blong laef blong yu. Mi save se mi save letem samting ia blong mekem mi gro o letem blong mekem mi no gro. Mi no wantem blong i spolem laef blong mi from mi bin gat 14 yia nomo. Mi bin traem blong stap kolosap long Lod sapos mi save. Mi bin ridim ol skripja blong mi plante taem. Alma japta 40 i konfemem long mi se laef bakegen long ded i tru mo tru long Atonmen blong Kraes, mi save stap wetem papa blong mi bakegen. Mi bin prea plante. Mi bin raetem long jenol blong mi plante taem we mi save. Mi bin kipim testemoni blong mi i strong oltaem taem mi stap raetemdaon. Mi bin go long jos mo long Yang Woman evri wik. Mi gat ol gud fren raon long mi. Mi stap kolosap blong kea long ol famle speseli mama blong mi, we hem i angka blong famle. Mi lukaotem ol prishud blesing tru long bubuman blong mi mo ol nara prishud lida.”

Ol joes ia oltaem, olsem hemia blong ol waes yang gel ia, i putum moa oel long laet blong Keit. Wanem i pusum hem i tingting blong hem blong wantem stap wetem papa blong hem bakegen. Keit i bin save se papa blong hem i bin save long ol joes blong hem mo hem i no wantem mekem hem i harem nogud. Hem i wantem wan rilesensip we i no save finis wetem hem, mo hem i bin andastanem se blong stanap strong blong folem kavenan blong hem bae i mekem laef blong hem i joen gud wetem papa blong hem.

Be ol tes oli no bin finis. Taem Keit i bin gat 21 yia mo putum ol misin pepa blong hem, mama blong hem i bin kasem kansa. Keit i mas mekem wan impoten desisen long laef blong hem. ?Bae hem i stap mo sapotem mama blong hem o go long misin? Mama blong hem i bin kasem prishud blesing wetem promes se bae hem i winim sik ia. Wetem stret save we i kam long blesing ia, Keit i bin luk fored wetem fet mo gohed wetem ol pan blong hem blong go long wan misin.

Keit i talem se: “Mi bin muv wetem fet nomata mi no save wanem bae i hapen, be long misin, laet i stat blong kam mo mi kasem nius se blesing blong mama blong mi i bin kamtru. Mi bin glad tumas se mi no bin stop blong go givim seves long Lod. Taem ol hadtaem i kam, mi ting se i isi blong stop gro mo no wantem nating blong go fored, be sapos yu putum Lod fastaem, ol rabis samting i save kam ol gudfala blesing. Yu save luk han blong Hem mo witnesem ol merikel.” Keit i bin eksperiensem toktok blong Presiden Tomas S. Monson: “Bigfala janis blong yumi bae i save stap long ol taem blong bigfala hadtaem.”⁶

Keit i bin gat fet ia nao from hem i bin andastanem plan blong fasin blong sevem man. Hem i bin save se yumi bin laef bifo, we wol ia i wan taem blong tes, mo we bae yumi laef bakegen. Hem i bin gat fet se mama blong hem bae i gat blesing, be wetem eksperiens we hem i gat wetem papa blong hem, hem i bin save se sapos mama blong hem bae i ded, bae i oraet. Hem i se: “Mi no jes tekem nating nomo ded blong papa; i bin kam pat blong miwan blong oltaem, mo sapos mama blong mi tu i go, bae i mekem sem samting long mi. Bae i mekem wan gudfala testemoni long laef blong mi.”⁷

Keit i bin lukaotem wan tabu ples long naet we mi bin mitim hem long tempol. Tingting ia blong wantem gat rilesensip we i no save finis tru long tempol wok, hem i bin folem rod ia we papa mo mama blong hem i putum blong go long tempol oltaem.

I no bin gat tumas samting i hapen long naet mi presentem Keit long Kris, be taem hem i bin lukaotem wan nara tabu ples long nekis Sandei, Keit i bin luk Kris long medel blong ol handred yang singgel adalt long wan institiut divosen. Longwe, tufala i bin traem blong save tufala moa. Sam wik afta, Kris i invaetem hem blong go long jeneral konfrens wetem hem. Tufala i gohed blong faenem ol ples we i invaetem Spirit truaot long frensip go kasem we tufala i go sil long tempol, long tabu ples ia we tufala i bin mit blong fas taem. Tugeta naoia tufala i stap fulfilim tabu responsabiliti ia blong kam wan papa mo mama, i mekem testemoni blong tufala long plan blong sevem man i go long ol laef blong ol trifala smol boe blong tufala, mo soem olgeta rod blong stap kipim ol kavenan.

“Taem yu sevem wan gel, yu save sevem ol jeneresen.” Desisen blong Keit olsem wan 14 yia gel blong stap long rod, mo oltaem putum oel long laet blong hem, mo stanap long ol tabu ples i stap mo bae i sevem ol jeneresen. Taem hem i lukaotem ol bubu blong hem mo mekem wok insaed tempol i mekem hat blong hem i joen wetem hat blong olgeta. Taem hem i tekpat long famle histri mo tempol wok, i semmak, bae i mekem ol hat blong yufala i joen tugeta mo givim ol bubu blong yufala janis blong laef we i no save finis.

Laef long gospel long hom blong yu bae i putum moa oel long laet blong yu mo mekem paoa long saed blong spirit long hom blong yu naoia mo blesem fiuja famle blong yu long plante wei. Mo moa long hemia, olsem Elda Robet D. Hels i talem, “Sapos eksampol we yumi kasem long papa mo mama i no bin gud, hem i responsabiliti blong yumi blong no folem ... mo tijim ol stret fasin blong folem blong ol jeneresen we i stap kam.” ⁸

Disaed naoia blong mekem evri samting we yu save mekem blong fulumap laet blong yu, blong strong testemoni blong yu mo eksampol blong yu bae i joen i go long ol laef blong plante jeneresen, bifo, tedei, mo long fiuja. Mi testifae se laef wetem klin fasin bae i no sevem ol jeneresen nomo, be bae i sevem laef blong yu we i no save finis, from hem i wan rod ia nomo blong gobak long Papa blong yumi long Heven mo faenem tru glad naoia mo truaot laef we i no save finis. Long nem blong Jisas Kraes, amen.