Ni o Vakabula e Dua na Goneyalewa, O sa Vakabula e Dua na iTabatamata

Sa ka dokai vei au meu vosa vei ira na goneyalewa yalodina ni Lotu. Keimami raici kemuni ena nomuni toso tiko ena nodra sala o ira era dau doka na nodra veiyalayalati, ka keimami kila ni nomuni bula ivalavala dodonu ena vakalougatataki ira na tubumuni, nomuni matavuvale ena gauna oqo, kei ira na lewe ni nomuni matavuvale era se bera ni tadu mai, me vaka a tukuna o Peresitedi Gordon B. Hinckley, “Ni o vakabula e dua na goneyalewa, o sa vakabula e dua na itabatamata.”¹

Na nomu sala ni veiyalayalati a tekivu ena gauna o papitaiso kina ka ciqoma na isolisoli ni Yalo Tabu. Dau tomani tiko e veimacawa ena soqoni ni sakaramede, e dua na vanua savasava o dau vakavouya kina na nomu veiyalayalati ni papitaiso. Oqo na gauna mo vakarautaki iko kina mo cakava na veiyalayalati ni valetabu. Na “veicakacaka vakalotu tabu era tu ena loma ni valetabu ena rawa kina vei [keda] me da lesu tale ki na iserau ni Kalou ka me duavata tawamudu na [noda] matavuvale.”²

Tudei tu ena no[mu] veivanua tabu ena vukudra na nomu itubutubu. “Na tamata yadudua era tadu mai ki na vuravura oqo era sa kawa ni veiitubutubu mai na veiitabatamata. Sa tu vei keda na gagadre dina me da sema vata kei ira na noda qase e liu.”³ Ni o vakaitavi ena vola kawa kei na cakacaka ni valetabu, o sa talia tiko na nomu bula kei na nodra bula na tubuda ena nomu vakarautaka na veicakacaka vakalotu ni veivakabulai me baleti ira.

Tudei tu ena veivanua tabu ena vukumu kei na nomu matavuvale. Na nomu ivakaraitaki dodonu ena yaco me ivurevure ni reki levu, veitalia na ituvaki ni nomu matavuvale. Na nomu digidigi dodonu ena rawa kina vei iko mo cakava ka maroroya tiko na veiyalayalati tabu ka na vauca vata tu na nomu matavuvale me tawamudu.

Tudei tu ena veivanua tabu ena vuku ni nomu matavuvale mai muri. Raica mo vauci vua na watimu mai na matabete tabu ena loma ni valetabu ni o tekivutaka e dua na taba ni matavuvale tawamudu. Ena vakalougatataki ena dina na nomu matavuvale. Era na vakalougatataki ena dina na luvemu ni o talia na nomu ivakaraitaki ni ivalavala dodonu kei na ivakadinadina sega ni yavalati rawa ki na nodra bula ka vakaraitaka vei ira na sala ena gaunisala ni veiyalayalati.

Au raica na kena vakaraitaki na ivakavuvuli tawamudu oqo ena nodra veisisivi Cakacakaniliga ni Vuravura na iTabagone. A cakava o Megan Warner Taylor e dua na cakacaka vakaitaba, ka raica ena rai ni gauna oqo na nona italanoa vakaibalebale na Turaga me baleta na tini na goneyalewa.⁴ Au a sota kei Megan, ka qai vakamacalataka na kena vakatakarakarataki na ikatini ni goneyalewa, ka vakamacalataka o koya ni goneyalewa ivalavala dodonu ka vakabauta, ka sa tu vakarau me cakava ka maroroya na veicakacaka vakalotu tabu ni valetabu. Me vakataki ira kece na goneyalewa vuku, na nona vakavakarau yadua a yaco mai ena nona vakatawana tiko na nona cina ena waiwai, dua na turu ena dua na gauna, ena nona buladodonu tiko e veigauna. Au raica na totoka ni itobe ni uluna. E vakamacalataka o Megan ni matataki ena itobe na kena tali na nona bula ivalavala dodonu na goneyalewa oqo ki na veitabatamata e sega ni wiliki rawa. E dua na itobe e matataka na kena tali na nona loloma kei na vakarokoroko ena vukudra na tubuna, kena ikarua na tali ni nona veivakauqeti dodonu vei ira na nona matavuvale ena gauna oqo, kei na ikatolu ni itobe na kena tali na nona bula sa vakarautaki tu mai ki na nodra na itabatamata ena qai muri mai.

Au sota tale kei na dua na goneyalewa ka sa talia e dua na bula ni ivalavala dodonu ki na vuqa na veitabatamata na nona vakavakarau vakayalo taumada.

Ena dua na sigalevu ni Sepiteba, keirau a tiko ena valetabu kei na watiqu ka waraka na madigi me keirau vakaitavi ena veicakacaka vakalotu ni valetabu. A curu mai ki na rumu o Chris, e dua na neirau itokani. Dua na ka cecere ni da raica na cauravou oqo, ka se qai lesu wale mai ena kaulotu ki Rusia.

Ni vakarau me tekivu na soqoni, a mai dabe e tikiqu e dua na goneyalewa totoka. E serau, matadredredre, ka sinai ena rarama. Au vinakata meu kilai koya, au mani tukuni au yani vakamalua vua. A vakasolokakanataka mai na yacana, o Kate, au kila na iotioti ni yacana, ni dua na matavuvale a dau vakaitikotiko mai Michigan, na vanua a dau vakaitikotiko kina e liu na noqu matavuvale. O Kate na luvedrau goneyalewa, ka se qai lesu ga mai ena nona kaulotu mai Jamani ena lima na macawa sa oti.

Ni yaco tiko na soqoni e votu tiko ga mai noqu vakasama: “Vakaveikilaitaki Kate vei Chris.” Au vakatikitikitaka na veivakauqeti oqo, ka nanuma vaqo, “Na gauna cava, evei, me caka vakacava?” Ni keirau vakarau biubiu, a mai vakamoce vei keirau o Chris au mani vakayagataka na madigi oya. Au dreti Kate ka vakasolokakanataka vua, “O kemudrau e rua na gone ivalavala dodonu ka dodonu mo drau veikilai.” Au biuta mai na valetabu ena vakacegu niu sa cakava e dua na ka me baleta na veivakauqeti oya.

Ena ilakolako i vale keirau veitalanoataka kei watiqu na veika keirau nanuma rawa me baleta na dredre a yaco mai ki na matavuvale nei Kate. Au sa mai kilai Kate vinaka cake, ka sa vukei au meu kila se vu mai vei na mata mamarau au raica vua ena valetabu ena siga ko ya.

Sa dau tovolea o Kate me toka dei ena nona sala ni veiyalayalati ena nona vakasaqara na veivanua savasava. A tubu cake ena dua na matavuvale ka dau vakasavasavataki mai na lotu vakamatavuvale, na dau masumasu vata, kei na vulica na ivolanikalou. Ni se gone, a vulica me baleta na matavuvale, kei na sere “I Love to See the Temple” e dau taleitaki ena gauna ni lotu vakamatavuvale.⁵ Ni se goneyalewa lailai, a saravi rau na nona itubutubu ena kena vakatikori na ivakaraitaki ni vakasaqara na veivanua tabu ena nodrau dau lako ki na valetabu ena dua na bogi ena mua ni macawa ka sega ni laki sara iyaloyalo se ki vakayakavi.

E lomana vakalevu sara na tamana, ka a vakayagataka na nona dodonu ni matabete me vukei koya ena nona cakava na imatai ni nona veiyalayalati ni papitaiso. A qai vakotori e uluna na liga ka ciqoma na Yalo Tabu. E kaya o Kate, “Au a nanamaki meu ciqoma na Yalo Tabu, kau kila ni na vukei au meu tiko ga ena sala ni bula tawamudu.”

A tomani na bula nei Kate ena dua na sala vakalougatataki ka mamarau. Ni yabaki 14, sa tekivu ena vuli torocake ka dau taleitaka na semineri, e dua tale na vanua tabu me vulica kina na kosipeli. Ena dua na siga sa tekivu me tukuna na nona qasenivuli na veivakatovolei ka vakadeitaka ni da na sota kaya kece. Qai kaya e lomana o koya, “au sega ni vinakata na veivakatovolei; au sega ni via rogoca na ka oqo.”

Ni oti ga e vica na macawa a yadra cake mai na tamana ena mataka ni Sigatabu ni Siganimate ena tauvimate bibi. E kaya vaqo o Kate: “Na tamaqu e dua na tamata bulabula; e dau cici o koya ena maraconi. A taqayataka vakalevu na tinaqu na bibi ni kena mate ka kauti koya ki valenibula. Ena loma ga ni 36 na auwa a sotava e dua na isamu kaukauwa ka sogota sara ga e vuqa na tiki ni yagona. E rawa ni sauriva na matana, ia sa sega ni yavala rawa na vo taucoko ni yagona. Au nanuma na noqu a raici koya ka vakasamataka, ‘Oilei, sa yaco mai. E dina na noqu qasenivuli ni semineri. Au sa sotava tiko e dua na veivakatovolei.’” Ena vica ga na siga sa takali yani na tamai Kate.

Ni tomana, e kaya o Kate: “Sa dua na ka dredre. O na sega ni vinakata me yali vei iko na nomu qaqa ena nomu bula. Au kila ni rawa niu cakava me noqu papa ni rika cake se vakatara me vakataotaka na noqu toso. Au sega ni via vakatara me vakarusa na noqu bula, baleta niu se qai yabaki 14 ga. Au tovolea meu voleka vua na Turaga ena kena levu au rawata. Au dau wilika vakalevu na noqu ivolanikalou. E vakadeitaka vei au na Alama 40 ni ka dina na tucaketale ia ena vuku ni Veisorovaki i Karisito, au na rawa ni tiko tale vata kei tamaqu. Au dau masu vakalevu. Au dau volavola ena noqu ivolaniveisiga ena kena levu au rawata. Au vakabulabulataka tiko ga na noqu ivakadinadina ena noqu dau vola. Au dau lako i lotu ka vakakina ki na soqo ni Goneyalewa e veimacawa. Au vakavolivoliti au ena itokani vinaka. Au dau volekati ira tikoga na wekaqu dau veikauwaitaki vakauasivi vei tinaqu, o koya na iyaqa ni neitou matavuvale. Au dau kerea na veimasulaki ni matabete mai vei tukaqu kei ira tale eso na matabete.”

Na veidigidigi tudei oqo, me vaka na nodratou na goneyalewa vuku, sa vakuri tiko kina na waiwai ni cina nei Kate. A vakauqeti ena nona gagadre me na laki tiko tale kei tamana. E kila o Kate ni sa kila tiko o tamana na nona digidigi, ka sega ni vinakata me vakacudrui koya. E vinakata me tawamudu na kena isema vua, ka kila ni nona tiko ga ena nona sala ni veiyalayalati ena talia vakavakauwa sara kina na nona bula ki na nei tamana.

A sega ni oti na veivakatovolei, ia. Ni sa yabaki 21 o Kate ka sa vakacuruma na nona pepa ni laki kaulotu, a kunei vei tinana na kenisa. Me sa na vakatauca o Kate e dua na vakatulewa bibi sara ena nona bula. Me sa tiko ga mai vale me tokona na tinana se lako ki kaulotu? A soli vei tinana e dua na veivakalougatataki ni matabete ka yalataki kina ni na bula mai na tauvimate oya. Ena veivakadeitaki ni veivakalougatataki oqori, a lako yani o Kate ena vakabauta ka tomana na nona ituvatuva me laki kaulotu.

E kaya vaqo o Kate: “Oqori na ikalawa ki na butobuto, ia niu kaulotu voli, a qai yaco mai na rarama kau ciqoma na itukutuku ni sa yaco na veivakalougatataki a cavuti vei tinaqu. Au sa marau dina niu a sega ni vakadaroya na veiqaravi vua na Turaga. Ni yaco mai na ka dredre, au vakabauta ni dau rawarawa me da tu vakadua ka sega ni taleitaka me da toso ki liu, ia kevaka o vakaliuca na Turaga, e rawa ni kauti keda ki na veivakalougatataki totoka na veika dredre. Ena rawa ni o raica na ligana ka vakadinadinataka na cakacaka mana.” A sotava o Kate na dina ni nona vosa o Peresitedi Thomas S. Monson: “Na noda madigi cecere duadua ena kune ena gauna ni dredre levu duadua.”⁶

E tu vei Kate na mataqali vakabauta vakaoqo baleta ni kila na ituvatuva ni veivakabulai. E kila o koya ni da a bula tu e liu, ni vuravura e gauna ni vakatovolei, ka ni da na bula tale. E vakabauta o koya ni na vakalougatataki na tinana, ia ena veika a sotava vei tamana, e kila o koya ni kevaka ena mani takali yani na tinana, ena sega ni dua na ka. E kaya kina o koya: “Au sega walega ni lakosivita rawa na mate nei tamaqu, sa yaco me tiki ni kequ ivakatakilakila ni vinaka, ia kevaka me kau tani na tinaqu, ke na tautauvata ga na ka e yaco. Ena talia e dua na ivakadinadina cecere cake ena noqu bula.”⁷

A vakasaqara tiko o Kate e dua na vanua tabu ena bogi au sotavi koya kina ena valetabu. E vinakata me talia vakamatua cake na isema tawamudu e dau yaco mai ena veiqaravi ena valetabu, a vakamuria na ivakarau erau sa virikotora toka na nona itubutubu ena dau lako ki valetabu e veigauna.

E sega soti ni levu na ka a yaco ena bogi au vakaveikilaitaki Kate kina vei Chris, ia ena nona vaqara e dua tale na vanua tabu ena Sigatabu ka tarava, a raici Chris o Kate ena kedra maliwa e drau na cauravou kei na goneyalewa itabaqase ena dua na lotu ni inisitute. Erau qai veikilai vakavinaka cake e keri. Ena vica na macawa ka tarava a sureti koya o Chris me rau laki sara koniferedi raraba vata. Erau tomana na nodrau vaqara na veivanua ena sureta na Yalotabu ena nodrau veigadivi ka qai yaco me rau laki vauci ena valetabu, na vanua tabu erau a vakaveikilaitaki mai kina. Erau sa qarava ruarua tiko ena gauna oqo na itavi tabu vakaitubutubu, ena nodrau talia vata na nodrau ivakadinadina ni ituvatuva ni veivakabulai ki na nodratou bula na gonetagane lalai e tolu, ena nodrau vakaraitaka tiko vei iratou na sala ni veiyalayalati.

“Ni o vakabula e dua na goneyalewa, o sa vakabula tiko e dua na itabatamata.” na nona vakatulewa o Kate ni se yabaki 14 me toka ga ena sala, ka dau vakuria tikoga kina na waiwai ena nona cina, ka dau tudei ena veivanua tabu sa dau ka na vakabula na veitabatamata. Ena nona vakasaqarai ira na tubuna kei na veiqaravi ena valetabu sa talia vata na yalona kei na yalodra. Ni da vakaitavi ena vola kawa kei na cakacaka ni valetabu ena vakakina na kena talia vata na yalomuni ka solia vei ira na tubumuni na madigi ni bula tawamudu.

Na bulataki ni kosipeli ena nomuni veivale ena vakuria talega na waiwai ki na nomuni cina ka talia na igu vakayalo ki na nomuni vale ena gauna oqo ka vakalougatataka na nomuni matavuvale ena veisiga ni mataka ena veisala e sega ni wili rawa. Ka me kena ikuri, e tukuna o Elder Robert D. Hales, “Kevaka a sega ni vinaka na ivakaraitaki eda ciqoma mai vei ira na noda itubutubu, sa noda itavi me da tamusuka na ivalavala … ka vakavuvulitaka na ivalavala dodonu ki na itabatamata era muri mai.”⁸

Vakatulewa ena gauna oqo mo cakava na veika kece e rawa mo vakatawana na nomu cina, me tali kina ki na nodra bula e vuqa na itabatamata era sa lako yani, ira era tiko oqo, kei na kena se bera mai na nomu ivakadinadina qaqa kei na ivakaraitaki. Au vakadinadinataka ni nomu bula ivalavala dodonu ena sega walega ni vakabula na itabatamata, ia ena vakabula talega na nomu bula tawamudu, ni sai koya duadua ga oqo na sala me da lesu kina vei Tamada mai Lomalagi ka kunea na reki dina ena gauna oqo kei na gauna tawamudu kecega. Ena yaca i Jisu Karisito, emeni.