Sel Mosobelii a Kekere el Dil, E Kosobelii a Retelcheroll

Mlara Mary N. Cook

Kot el Counselor er a Cherrengelel Omerrede er a Young Women


A klikiid el klengar kemiu a mo omekngeltengat er a rebeldekiu, telungalek er kemiu er chelechang, me a rechedal a merael mei el telungalek.

Ng klou el chetengakl el bo kungedecheduch er kemiu a roba klaumera el ngeasek el dil er a Ikelesia. Aki mesekemiu el mengull a telbiil ra omeroliu er tial klengar, aki medengei el kldung er a klengar er kemiu a mo omekngeltengat er a rebeldekiu, telungalek er kemiu er chelechang, me a rechedal a merael mei el telungalek, ele a President Gordon B. Hinckley a millekoi, “Sel mosebelii a ngeasek el dil, e kosebelii a retelcheroll.”1

A telbiil el omngarngii a ulemuchel era taem er ometecholb e ngiluu a sengk er a Chedaol Reng. E melemolem er a bek el sandei er a miting er sacrament, el chedaol basio el momekbeches a telbiil er a techolb. Chelecha eng temem el mengedmokl el mo melai a telbiil er a templo. A “chedaol ruoll me a telbiil el ngarngii er a chedaol templo a rulii meng mo [sebeched] el lemuut el mora Dios me a telungalek er [kid] el mo dmak el diak a ulebengelel.”2

Bom dechor er a chedaol basio el kirir a rebeldekem. “A bek el chad el mei er tia el beluulechad a ulekiu a telecheroll er a rechedil me a rechedam. Ng ngarngii a rengud el omak er kid el mo er a rebeldeked.”3 Me sel moruul a reksi er a telungalek me a ureor er a templo, e ke mo kmeed er a rebeldekem sel omongedmokl a urerel osebelir.

Bom dechor er a chedaol basio el kirem me a telungalek er kau. A melemalt lomerellem a mo uchul a klou el deureng, el diak el iior er a delengchekliu. A melemalt el omelilt er kau a mo sebechem el mo ngmai a chedaol telbiil el ngii a mak a telungalek er kau el mo tang el mo cherchar.

Bom dechor er a chedal basio el kirel a mo telungalek er kau. Mnguu el mora rengum el mo merenged el mora bechim lokiu a chedaol priesthood er a templo sel bocha momuchel er a cherechar el telungalek. A rengelekem a mo mukngeltengat er a klemerang sel kldung me a diak el mesim el klaumerang er kau mosiseb er a klengar er tir e mochotii er tir a rael er a telbiil.

Ak miles a ikal osisechakl el mocherchar el mlocholt er a Klaiuengader er a International Art er a Rengeasek. A Megan Warner Taylor a ulusbech a computer el meruul er a siasing, er tirkel teruich el redil er a cheldechedechal a Kristo lousbech a teletael er chelechal taem.4 Ak mlo kebetech ngak me a Megan, meng silodii a belkul tirkal teruich el redil, ng milsaod er tir el ngara klaumerang e mekedung e kldmokl el mo meruul, e oltirakl a chedaol telbiil er a templo. El ua tirka el klikiid el ngeasek el redil, el omengedmeklel okiu omelecha cheluchul olbdelel, el imo el ngimech er a ta el taem, lokiu a blechoel melemalt el klengar. Ak miltebengar a klebokel el delidai el chui. A Megan a silodii el kmo tial delidai a olechotel a kldung er a klengar er ngika el ngeasek el dil el mo kmeed er a rebetok el telecheroll. A imo el ulechull a olechotel a olekeed er a beltikereng me a olengesenges er ngii el mora rebeldekel, a ongerung a olekeed er ngii el mora telungalek er ngii lokiu a melemalt lomerellel el mengetikaik er tir, ea ongedei lulechull, a mo olekeed er a kldmokl el klengar er ngii el mora klengar er a remerael mei el telecheroll.

Ak mlo kebetech ngak me a ta er a ngeasek el dil el uchelel a chedaol el omengetmeklel eng mla okeed a klengar er a llemalt el mora rebetok el telecheroll.

Ng mle klebokel sils er a September, e ngak me a bechik a mlara templo el milengiil er a temam el mo meruul a ruoll er a templo. A Chris, el sechelimam, a mle soiseb. Ng mle ungil a rengmam el mesa ngika el ngeasek el chad, el dirk mlei el mlara mission el mlora Rosia.

Sera bochu lomuchel ongdibel, ea klebokel ngeasek el dil a mle dengchokl er bita er ngak. Ng mle ungil osenged er ngii, di klikmechur, e mui er a llomes. Ng mle soak el mo medengelii, me a milekekokak el ouchais er a nglek er ngii. Ng millengelulau er a ngkel, el Kate, me a kmiltebengar a lousbech er ngii el ngakl el telungalek el kiliei er a Michigan, el basio el telungalek er ngak a mle tal lekiei er ngii. A Kate a mla mo klou-el ngelekir redil, el eim el sandei ruchei eng mlei el mlara mission er ngii el mlo ra Dois.

Me ngultaut a ongdibel ea imo el uldasu a di mei er a uldesuek, “Mochotii a Kate el mora Chris.” Ak mlo chocheueklii tial odubech e ulemdasu, “Er oingerang, reker, e mekerang?” Aki bocha mongedmokl er kemam el merolang, ea Chris a milrael merkemam e melmesumech me a kngiluu tia el techall. Ak kilersii a Kate el mei e milengelulau, “Kemiu el terung a mekedung el ngeasek el kiriu el mo kaudengei.” Me ak tobeda er a templo lungil a renguk le ak kildmeklii a odbubech el mlei er ngak.

Omerollek el mo remei, ngak ma bechik a mlo mesaod a ki mlilatk el ongarm el mlora telungalek er a Kate. Seikid el me rechelechang e ak kmal mla mo medengelii a Kate, e ngii a mla ngosukak el mo medengelii a uchul tial deureng er osengel el kilsang er a templo er sel sils.

A Kate a mle blechoel melasem di ngar tial rael er a telbiil meng ulsiik a chedaol basio. Ng mlukeroul er a blai el ongdibel ra telungalek, dmak el meluluuch, me a omesubel a chedaol llechukl a rirelii a blil el mo chedaol basio. Sera lekekerei, eng milsuub el kirel a templo, me a chelitakl el “I Love to See the Temple” a mle sorir el chelitakl er a ongdibel er a telungalek.5 Sera le kekerei el redil, eng ulemes er a delal me a demal lulechotii a okesiu er a skel a chedaol basio er sera le bora templo sel bek el weekend a le kebesengei er a bai lebo lomes a katsudo malechub el lomengur er a kmo ng ker.

Ng kmal mle betik a rengul er a demal, me a demal a ulusbech er a ngerchelel er a priesthood el ngosuir el rulii a kot el telbilel er a techolbechelid. Meng ngiluu a Chedaol Reng lokiu omor er a chim. A Kate a dilu el kmo, “Ak meral mle semeriar el monguu Chedaol Reng, ak mle medengei el kmo ng mo ngosukak el di ngar tial rael el mora diak a ulebengelel klengar.”

A klengar er a Kate a millemolm el ngara klengeltengat me a deureng. Sera le teruich me a eua rekil, eng mlo omuchel er a ngarbab el skuul e mle soal a seminary, ng tara chedaol basio el dosuub er a ebangkelio er ngii. A ta er a sisl ea sensei a milsaod er a ringel e mle medengei el rokui a mo er ngii. A Kate a di mle ngii el melekoi er ngii el kmo, “Ngak a diak el soak a ringel; Ng diak el soak lorenges er a ikang.”

Ng kmal di mle kesai el sandei ruriul ea demal a milekiis el meral mle imis el smecher e tia mle Sandei el Baskua. A Kate a millekoi: “A demak a mle mesisiich a bedengel; ng mle chad ra kemangel rurt. A delak a meral mlo bekikl leng meral mle smecher meng ngiluu el mora osbitar. Ng di mle chelsel a okedei me a elolem el sikang eng melloched meng di mlad a betok el klededekellel a bedengel. Ng di sebechel lobusech a medal, e tial rokir el bedengel a ulekeuad. Ak lotkii er a kumes er ngii e omdasu, ‘A chedil, ng mermang. A sensei er ngak a millekoi a klemerang. Ngak tia er chelecha el ngara ringel.’” Ng di mle kesai el klebesei ea demal a Kate a mad.

Meng millemolem a Kate el kmo: “Ng meral mle meringel. Kau a diak el soam el choitii a omoltirak er ngii el chad er a klengar er kau. Ak mle medengei el sebechek el nguu tiang meng mekerulak malechub eng torbengii a ulekerulek. Ng dimlak el soak el mecherei meng tomelii a klengar er ngak, ele a kmal dirk mle 14 a rekik. Ak millasem el bereked er a Rubak. Ak blechoel menguiu a chedaol llechukl. A 40 el klou el bliongel er a Alma a mle smisichak el kirel a Kiis er a Kodall el klemerang me ngokiu a Tngakireng er a Kristo, eng sebechek el muut el mo obengkel a demak. Ak mle blechoel meluluuch. E blechoel meluches er a journal er ngak sel bol sebechek. A klaumera er ngak a ngarngii elek mle blechoel meluches er ngii. Ak mlora ikelesia ma Young Women ra bek el sandei. E iliueklak er a rungil sechelei. Ak mle kmeed er a rechedak tokuni a delak, el ngii a mle otil a telungalek er kemam. A kulsiik a klengeltengat er a priesthood er a demal a delak me a rebebil er a rolab a priesthood.”

Melilt osisiu el tekoi, el diua tirka el mellomes el redil, a dochelir a cheluchul a olbdelel a Kate. Ng mlodubech lokiu a klemeriar reng er ngii el muut el mobengkel a demal. A Kate a mle medengei el demam a medenge lolilt, meng dimlak el soal tomelii a rengul. Ng mle soal a deleuill lobengkel el di ngarngii el mo cherchar, meng mle medengei el sekum meng di ngara rael er a telbilel eng mo smisichii el kmeed a klengar er ngii el mora demal.

Eng di a ringel a dimlak, bol merek. Le sera le 21 a Kate me bol omeche babilengel ra mission, ea delal a le biltik er ngii el kasinoma. A Kate a mlo a melilt el kirel a klengar er ngii. Ngkang kirel di kiei e olengeseu ra delal malechub eng mora mision? A delal a ngiluu a klengeltengat er a priesthood el telbiil el kirel a mo ungil ra rektel. Tia el klengeltengat a killungii a rengul, ma Kate a mocha merael bedul ruchei loba klaumerang e melemolem el mengedmoklt el mora mision.

A Kate a millekoi: “Ng ua dorael bedul a ilkolk, ngdi sera lengara mission, eng uaia blol mellomes ele ak ngilai a chais el klengeltengat el mlora delak a mlotaut. Ng dmeu a renguk el dimlak kelteketii tia lomesiou el mora Rubak. Sel leme ringel, ea kumdasu eng beot el bo delelualu e diak el sal soak el merael bedul ruchei, eng di sel omnguu a Rubak el mo kot, ea ongarm a sebechel ngoikau el mora klebokel klengeltengat. Ng sebechem el mes Chimal e sioning a ongasireng.” A Kate a mlo medengelii a klemerang er a tekingel a President Thomas S. Monson el kmo: “Aikel kot el meklou el techall a debetik er a chetituokel taem.”6

A choua tiang a mle klaumerang er a Kate eleng mle medengelii a uldasu er a mo suobel. Ng mle medengei el de kiliei ruchei ra demei er tiang, e tia el beluu a taem er omelasem, e kid a lmuut el mo ngar. Ng mla rengii a klaumerang er ngii el delal a nguu a klengeltengat, engdi dokiu a dilubch el mora demal, eng mle medengei el kmo alsekum a delal a mad, eng di ungil besul. Ng dilu: “Ng dimlak el di blo kungil er a lemad a demak; tia bai mlo tebedechel a klengar rengak, e alsekum a delak meng merael, eng dirrek el di osisiu el merngak. Ng locha bai milskak a mesisiich el klaumerang el mera klengar er ngak.”7

A Kate a ulsiik er a chedaol basio sel kesus ra kisang er a templo. Eleng soal el chemaus losiich aikal deleuill el ngarngii el mo cherchar el dengai er a ureor er a templo, ng ultirakl er a okesiu el mlocholt lokiu a delal me a demal er a le blechoel el mora templo.

Ng dimlak a kmal ngeral dubech er sel kesus er a kuchotii a Kate el mora Chris, eng di skel a kuk tara chedaol basio er a Sandei ruriul, ea Kate a milsa Chris er a delongelir a rebetok el dart el mekekerei el chad el diak el bechiil el mlara ongdibel er a institute. Meng mlar tiang e te liluut el kmal mo kaudengei. A sesei el sandei ruruil, ea Chris a ulengit er ngii el mo mes er a klou el ongdibel lobengkel. Te millemolem losiik a basio el ngarngii a Chedaol Reng er ngii er a le kasisiik e te kol mo a merenged er a templo, el chedaol basio el kot el blol kebetech er ngii. Tir el terung el loltaut a chedaol ngerachel er a roungalek, mengaus a klaumerang er tir er a uldasu er a mo suobel el mora klengar er a retedei el mekekerei el buik, lolecholt er tir a rael er a telbiil.

“Sel mosobelii a ngalek el redil, e kosebelii a retelecheroll.” A blel tibir a Kate er a le 14 a rekil el mo ngara rael, e blechoel melechel a cheluchul a olbdelel, e dechor er a chedaol basio amla olsobeler a retelecheroll. Osiik a rebeldekel e mesiou el ngara templo a mla okeedii a rengul el mora rengrir. A omeruul el reksi er a telungalek me a ureor er a templo a sebechel okeed a rengum lobengterir e mesterir a rebeldekem a techall er a diak a ulebengelel klengar.

A otireklel a ebangkelio er a blim a dirrek el dochel a cheluchul a olbdelem e ousii a chedaol klisiich leko er a blim er chelecha e omekngeltengat er a merael mei el telungalek er a kmal betok el teletael. A lmuut el tang, el uai kel le dilu Elder Robert D. Hales, “Alsekum me a okesiu el dengai er a rechad ra blid a diak lungil, e tiang a ngercheled el torbengii tia lomeruul … e mo olisechakl a ungil teletael er a merael mei el telecheroll.”8

Molilt er chelechang el mo meruul a rokui el sebechem el mo omekeek er a olbdelem, me a mesisiich el klaumerang er kau me a okesium bol muchaus el mora klengar er a rebetok el telecheroll—er chelii, chelechang, me a klukuk. Ak kuuchais el kmo tial kldung el klengar kau a diak di bol lolsobel a telecheroll, ng dirrek el mo olsobel er a diak a ulebengelel klengar kau le tia, di ta el rael el mluut el mora Demad er a Babeluades e metik a meral deureng er chelechang el mo cherechar. El ngara ngklel a Jesus Kristo, amen.

Mostrar referencias

  1.  

    1. Gordon B. Hinckley, “Standing Strong and Immovable,” Worldwide Leadership Training Meeting, Jan. 10, 2004, 20; dirrek el mesa Gordon B. Hinckley, “Our Responsibility to Our Young Women,” Ensign, Sept. 1988, 10.

  2.  

    2. “Telungalek: Chais el mora Beluulechad,” Ensign me a Liahona, Nov. 2010, 129.

  3.  

    3. Russell M. Nelson, “Generations Linked in Love,” Ensign or Liahona, May 2010, 92.

  4.  

    4. Mesa Mateus 25:1–13.

  5.  

    5. Mesa “I Love to See the Temple,” Children’s Songbook, 95.

  6.  

    6. Thomas S. Monson, “Meeting Your Goliath,”New Era, June 2008, 7.

  7.  

    7. Cheldecheduch lobengkel a milluches, 2013.

  8.  

    8. Robert D. Hales, “How Will Our Children Remember Us?”Ensign, Nov. 1993, 10.