Jikin ko Am̧ Rekwojarjar

Unin tōl in Mutual eo ad ej itok jān eoon eo āliktata in jekjen 87 in Doctrine and Covenants. Kakpilōklōk in loe ilo jekjen ko jilu rejenolo̧k; ej alikkar bwe rōjan̄ in eaorōk. Ej kōmeļeļeik wāween ad maron̄ bōk kōjparok, kajoor, im aenōm̧m̧an ilo iien jab amņak. Ej kōmeļeļeik wāween ad maron̄ bōk kōjparok, kajoor, im aenōm̧m̧an ilo iien inepata. Kōmeļeļe in eim̧we ej bwe “kom̧win jutak ilo jikin ko rekwojarjar, im jab m̧akūtkūt.¹

Ke ij kejōkļo̧kjeņ kōn unin tōl in, ij kiel eō make n̄an kajjitōk, “Ta ‘jikin ko rekwojarjar’ Jemedwōj Ilan̄ ej kōnono kaki?” Būreejtōn Ezra Taft Benson eaar kapilōk, “Jikin ko rekwojarjar ekitbuuj tampeļ ko ad, im̧ōn jar ko, m̧ōko im̧ōd, im stake ko an Zaion, ko rej, … ‘juon jikin kōjparok im jikin kone.’”² Ilo kakobaba n̄an men kein, ij tōmak kōj kajjojo maron̄ loe jikin ko rellōn̄ ļo̧k. Jen maron̄ kile naan in jikin āinwōt juon peļaak ak juon jikin. Kōn menin, juon jikin emaron̄ “juon jekjek ejjab epaak, jikin, ak paaktokin armej.”³ Meļeļein bwe jikin ko rekwojarjar remaron̄ barāinwōt iien ko raorōk—iien ko raorōk me Jetōb Kwojarjar ej kam̧ool n̄an kōj, iien ko raorōk n̄e jej en̄jake iakwe an Jemedwōj Ilan̄, ak iien ko raorōk n̄e jej bōk juon uwaak n̄an jar ko ad. Ejja wōt, ij tōmak jabdewōt iien kwoj aikuj peran n̄an jutak kōn ta eo ejim̧we, eļaptata ilo jekjek ko ijo ejjeļo̧k juon ej m̧ōņōņō in kōm̧m̧ane, kwoj kōm̧m̧ane juon jikin ekwojarjar.

Ilo aolepān mour eo ekadu im em̧m̧an an Joseph Smith, eaar m̧ool “[jutak] ilo jikin ko rekwojarjar” im jab kar em̧m̧akūt. Āinwōt kar juon jodikdik, eaar tarpok jen kabun̄ ko retarpok ilo jukjukinpād eo an im kar kōņaan jeļā ewi wōt iaan aolep kabun̄ ko rej m̧ool. Jikin eo emarmare epaake m̧weo im̧ōn eaar juon jikin ekwojarjar ke eaar bukwelōlō ibuļōn wōjke ko im leļo̧k ainikien jar eo an kein kajuon. Jar eo an eaar uwaak, im rainin Armej ro Rekwojarjar ilo Raan-ko Āliktata rej ņaetan m̧ar kein Bukwin Wōjke ko Rekwojarjar.

Jiron̄ ro peļaakin laļ in rej jutak ilo jikin ko rekwojarjar ilo jikin ko, kāām an Doulul eo an Jiron̄ ro. Juon ritōl eaar kwaļo̧k bwebwenato in en̄jake an juon jiron̄. Leddik in eaar jab niknik, im eaar jidik n̄ūrbōktak kōn juon en̄jake an jetōb ilo bukwin wōjke ko. Ālkin raan eo kein kajuon, eaar kōnono n̄an ritōl eo, “Em̧m̧an ad pād, ak jemaron̄ ke aolep jab kōnono kōn Jetōb? Ij pād ijin n̄an kāām, lan̄lōn̄ kōn jikin in, pād ippān ro m̧ōtta, im bōk jet limo!” Mekarta, ilo jemļo̧kin kweilo̧k in naan in kam̧ool eo. Ejja leddik in wōt eaar kōmjaļļaaļ im makoko, “Ijjab kōņaan in ro̧o̧l n̄an m̧weo. Ekōjkan aō maron̄ dāpij wōt en̄jake eo aō kiiō, Jetōb in, ippa aolep iien?” Leddik in eaar loe juon jikin ekwojarjar.

Bar juon jikin ekwojarjar ilo mour an Joseph Smith eaar ruum̧ in kiki eo an. Menin emaron̄ pen n̄an tōmak, kōnke āinwōt elōn̄ iaami, eaar kwaļo̧k ruum̧ in kiki eo an ippān ro nejin, ak eaar erom juon jikin ekwojarjar ke eaar jar kōn tōmak, im ettā, juon aikuj. Eaar kōmeļeļeiki be ālkin an etal n̄an beet bon̄on̄ eo, eaar jino jar im akweļap n̄an Anij Ekajoor Pōtata kōn jeorļo̧k bōd in aolep jerawiwi im bōd ko an.⁴ Jilu iiō ko me raar m̧ootļo̧k jen ke Joseph Smith eaar lo visiōn eo an ilo Bukwin Wōjke ko Rekwojarjar eo eaar jab pidodo. Jon̄oul jiljilimjuon iiō rūttoon Joseph eaar kijenmej kōn kajjirere ejjeļo̧k jem̧ļo̧kin, naan nana, im kōmetak. Ak bon̄ōn eo ilo ruum̧ in kiki eo an, enjeļ Moronai eaar waļo̧k ilo uwaak n̄an akweļap eo an. Joseph eaar bōk jeļāļo̧kjeņ, im kainōm̧m̧an. Bon̄ōn eo ilo ruum̧ in kiki eo an, eaar erom juon jikin ekwojarjar.

Iien eo iaar alooje juon Mormon Message n̄an Jodikdik ro ilo pija, Iaar bar loe juon ruum̧ in kiki eo eaar erom juon jikin ekwojarjar. Pija eo ej kwaļo̧k Ingrid Delgado, juon jiron̄ jān El Salvador, ej kwaļo̧k en̄jake ko an kōn tampeļ eo. Ej ba, “Elukkuun in em̧m̧an n̄an jeļā bwe ewōr juon jikin eo me jemaron̄ etal jān men ko an laļ in im bōk kain̄i ko rekwojarjar im jipan̄ ro raar jab būki ilo mour in.” Ke ej kōnono, pija eo ej kwaļo̧k an Ingrid riiti jeje ko an rekwojarjar eo ej jebooļ jen peba in karelel an Mormon, kout ko, juon bok in Personal Progress, pija ko an baam̧le eo an im tampeļ, im aaet, barāinwōt menin mour ko raorōk ippān.⁵ Bōlen ilo an jab kile bwe eaar kōm̧m̧ane juon jikin ekwojarjar ettoļo̧k jen men ko an laļ in. Ij kejōkļo̧kjeņ ewōr jete iien Ingrid eaar riiti jeje ko an rekwojarjar, en̄jake jetōb, im bōk uwaak ko n̄an jar ko an ilo jikin in an ekwojarjar.

Bar juon jikin eo ekwojarjar ejjeļo̧k kōtmene kake ilo mour an Joseph Smith eaar jikin Kalbuuj Liberty. Elder Jeffrey R. Holland eaar ba, “Eaar ba bwe ejjeļo̧k kar iien eddoļo̧k ilo mour jen iien nana in, ejekkar, iien kalbuuj eo enana.” Elder Holland eaar etal wōt kōmeļeļeik bwe jikin Kalbuuj Liberty kar ņaetan āinwōt juon “jikin kalbuuj āinwōt tampeļ” kōnke jetōb, en̄jake eo ekwojarjar an Rikanaan Joseph Smith eaar pād ijeņ.⁶

Jet iaami jiron̄ ro bōlen maron̄ en̄jake ami make jikin Kalbuuj Liberty, juon jikin kom̧ij en̄jake kowaan, juon jikin kom̧ij en̄jake lej, juon jikin rej kajjirere kōn kom̧, kōmetak, jorrāān ilo ānbwin. N̄an kom̧ jiron̄ ro, Ij lewaj naan in an Elder Holland, “Kom̧ maron̄ bōk en̄jake eo ekwojarjar, waļo̧k in revelesōn, kōmeļeļe eo eļap kōn Irooj ilo en̄jake ko renana tata ilo mour eo am …, tōre in kom̧ij kijenmej kōn jekjek eo enana, n̄e kom̧ij jelm̧ae eppen ko im jum̧ae ko einwōt reppen jo̧o̧r jeni jen jabdewōt en̄jake ko ami.”⁷Ilo naan ko jet, āinwōt Rikanaan Joseph Smith, kom̧ maron̄ kōm̧m̧an im jutak ilo jikin ko rekwojarjar, aaet ilo iien ko reppen tata kom̧ ar en̄jaki.

Juon rūm̧m̧an ded, Kirsten, eaar kwaļo̧k ippa an en̄jake ekōmetak. High School eaar jikin Kalbuuj Liberty eo an. Ilo m̧ool, ruum̧ in kōmālmel eo ej bōktok jipan̄ ilo high jikuuļ eo an: “Ke ij deļo̧n̄eļo̧k ruum̧ in, eaar āinwōt n̄e iaar deļo̧n̄e juon jikin ekōjparok. Ejjeļo̧k kōkkaļļe eo ej kwaļo̧k kajirere ak kōmetak ejjeļo̧k pija nana. Ijjelo̧kin, kōm̧ ar ron̄ naan in rōjan̄ im iakwe. Kōm̧ij kōjerbal jouj. Ekar juon jikin elem̧ōņōņō. Ruum̧ in kōmālmel kōjan̄jan̄ in eaar obrak kōn Jetōb ke kōm̧ ar kōmālmel im kōjan̄jan̄. ruum̧ eo eaar āinwōt in kilep jon̄an kōnke im̧we eo an rūkaki in kōjan̄jan̄ eo. Eaar juon em̧m̧aan ej Rikūrijin. Reilikļo̧k, ij keememej high jikuuļ eaar kōkōm̧anm̧anļo̧k jetōb eo. Eaar pen, ak iaar katak uwaak ko rem̧m̧an n̄an kapo ko. Inaaj aolep iien kam̧oolol kōn jikin kone eo aō, jikin eo aō ekwojarjar, ruum̧ in kōmālmel kōjan̄jan̄ eo.”⁸

Joten in, emōj ke ami kejōkļo̧kjeņ kōn jikin ko ami rekwojarjar? Iaar kajjitōk ippān bukwi jiron̄ ro n̄an kwaļo̧k “jikin ko aer rekwojarjar” ippa. Men̄e rej pād ilo māb ak en̄jake ko raorōk ilo iien, rej jikin ko rekwojarjar im eļap kajoor in kōkajoorļo̧k eo ie. En̄in rej ratimjuon uwaak ko aer reim̧we im en̄jake:

• Juon: “Iaar pād ilo aujipitōļ, jiburlep nin̄inn̄ eo nejū ej kab ļotak.”

• Ruo: “Kajjojo iien ij riiti kōjeram̧m̧an an petriak eo aō, Ij en̄jake an Jemedwōj Ilan̄ jeļā kajjeeō im iakwe eō.”

• Jilu: “Raan eo iaar jon̄oulruo, leddik jidikdik ro ilo ward eo raar kainōknōk kōjam eo aō kōn peba ko jekjekier wōt menono.⁹ Iaar en̄jake iakwe, errā, m̧ōņōņō!”

• Emen: “Ke iaar riiti jeje ko aō rekwojarjar juon raan, juon naan eaorōk ‘eaar waļo̧k.’ Iaar loe juon uwaan n̄an jar ko aō.”

• Ļalem: “Iaar etal n̄an juon bade ijo armej ro raar idaak. Jetōb eo eaar jiron̄ eō n̄an oktaklik im ro̧o̧l n̄an m̧weo im̧ō. Iaar ro̧o̧l, im aaet, enaaj wōr ‘bōd jen iiaio ippān doon.’ Mekarta, iien in eaar letok n̄an eō lōke eo iakuji n̄an jeļā bwe ij aikuj mour kōn ko̧jpeļ eo.”

• Jiljino: “Ilo kwojkwoj eo ilo Jabōt eo iaar kōļmenļo̧kjeņ kōn Pinmuur eo, iaar kile bwe iaar aikuj in joļo̧k an juon armej bōd eo iaar illu ippān. Aō kālet n̄an joļo̧k an armej eo bōd eaar m̧akūtkūt eo em̧m̧an eo enaaj bōktok Pinmuur eo n̄an mour eo aō aolep raan.”

• Jiljilimjuon: “Ālkin aō kar pād ilo New Beginning eo ippān jinō, eaar mejān meik jeba, im ba n̄an eō bwe ej iakwe eō. Menin ekar kein kajuon n̄e imaron̄ keememej an kōm̧m̧ane menin.”

• Ruwalitōk: “Kōn kam̧ool eo an bisop eo aō. Ijeļā bwe kalim̧m̧ur eo ilo jeje ko rekwojarjar eo eaar m̧ool: ‘Men̄e bōd ko ami rej āinwōt būrōrō, renaaj mouj āinwōt sno.”¹⁰ Iaar en̄jake iakwe, ruwainene, errā, im m̧ōņōņō!”

• Āliktata: “Juon joten, iaar kōperan eō n̄an kwaļo̧k en̄jake ko aō kōn ko̧jpeļ eo im juon Bok in Mormon ippān eo m̧ōtta. Tokālik, eaar juon aō kōjeram̧m̧an n̄an pād ilo peptaij eo an. Kiiō kōm̧ij etal n̄an m̧ōnjar eo ippān doon.”

Imaron̄ ke kwaļo̧k ippāmi juon iaan jikin ko aō rekwojarjar? Kar juon iien, iaar en̄jake eddodo eļap, mijak, im lukkuun make iaaō. Iaar jar ilo ejjeļo̧k ainikien, “Jemedwōj Ilan̄, ijjab jeļā elemen aō kōm̧m̧ane menin. Jouj, jouj, jipan̄ eō!” Ejjab etto, juon armej ejjeļo̧k kōtmene kake eaar wōnm̧aantak, likūt juon pā ioon aera im kwaļo̧k naan ettā, naan in rōjan̄ ko. Ilo iien in, iaar en̄jake aenōm̧m̧an. Iaar en̄jake kile. Men otemjej raar oktak. Naan ko an Būreejtōn Spencer W. Kimball eaar itok n̄an kōļmenļo̧kjeņ: “Anij ej kile kōj, im ej mije kōj. Ak ekkā an itok jen armej eo juon eo ej ņamejļan aikuj ko ad.”¹¹ N̄an n̄a, iien eo, bwe jikin eo eaar erom kwojarjar.

Jiron̄ ro rejitōn bōro, jej jab maron̄ būni jikin ko jet rekwojarjar ko ikōņaan bwe jen kar kwaļo̧ki ippān doon joten in. N̄e kwoj rool n̄an kapijuknen eo ami joten in, ij rōjan̄ kom̧ n̄an ļo̧ki ilo jōnōļ jikin ko kom̧ij kile im keememeji āinwōt. Elukkuun alikkar n̄an n̄a bwe taujin iami rej jutak ilo jikin ko rekwojarjar. Jikin kein rej lewaj kōjparok, kajoor, im aenōm̧m̧an ilo iien jab amņak. Naan in kam̧ool ko ami rej kajoorļo̧k kōnke kom̧ij jutak kōn m̧ool im jim̧we ilo wāween ko aiboojoj.

Kom̧, jodikdik ro routiej an Kabun̄ in, kom̧ij aō hero, ij iakwe kom̧. Ij en̄jake iakwe eļap an Jemedwōj Ilan̄ n̄an kom̧, im ij kwaļo̧k aō naan in kam̧ool bwe ko̧jpeļ eo an Jisōs Kraist ej m̧ool. Ej kōttar, pojak n̄an leļōn̄ļo̧k kom̧ ilo ami “jutak … ilo jikin ko rekwojarjar, im jab emmakut.” Ij iakwe im rejtake Būreejtōn Thomas S. Monson, rikanaan eo ad em̧ool im rikapilōk. Ij ba men kein ilo etan Jisōs Kraist, amen.