Nej lub Luag Hauj Lwm Dawb Ceev Txhawb Pab

Cov tub hluas ntawm lub Pov Thawj Hwj Aloos, nej yog Vajtswv cov tub uas nws hlub, thiab Nws muaj ib txoj hauj lwm tseem ceeb rau nej ua. Yog nej yuav ua txoj hauj lwm no tiav, nej yuav tsum ua nej lub luag hauj lwm txhawb pab lwm tus.¹

Nej puas paub kev txhawb pab txhais li cas? Cia li xav txog qhov no thaum kuv qhia nej txog ib tug ntxhais hluas hu ua Chy Johnson.

Thaum Chy pib kawm ntawv high school xyoo tas los, nws raug lwm tus txoj kev thuam thiab tsim txom. Nws raug luag txoj kev thawb, thuam, thiab tsim txom thaum nws mus rau nws hoob kawm---tej tug tub ntxhais kawm ntawv txawb khib nyiab rau nws. Tej zaum nej pom tib neeg raug tej kev phem zoo li no nyob hauv nej lub tsev kawm ntawv thiab.

Ntau tus neeg, thaum lawv yog tub hluas ntxhais hluas, kho siab thiab ntshai heev. Tsis tas muaj li no. Zoo siab uas muaj ib co tub hluas hauv Chy lub tsev kawm ntawv uas to taub hais tias kev txhawb pab txhais li cas.

Chy niam tau thov cov xib hwb hauv lub tsev kawm ntawv pab kom txhob cia neeg thuam nws tus ntxhais, tiam sis qhov ntawd tsis tau pab. Ces nws nrog Carson Jones tham, ib tug uas tuav lub Pov Thawj Hwj Aloos thiab tus uas yog tus thawj txawb pob hauv pawg football. Nws thov Carson pab nws nrhiav seb leej twg thuam nws tus ntxhais.

Carson pom zoo pab, tiam sis nws xav hais tias nws muaj peev xwm ua zoo dua li kev nrhiav cov neeg uas thuam Chy xwb. Tus Ntsuj Plig ntxhi lus rau nws hais tias nws yuav tsum pab Chy paub tias neeg hlub nws.

Carson thov nws ib txhia ntawm cov hauv pawg football koom tes txhawb pab Chy. Lawv caw nws zaum nrog lawv thaum lawv noj su. Lawv nrog nws mus rau nws hoob kawm kom nws paub hais tias nws nyob nyab xeeb. Vim muaj cov hauv pawg football ua phooj ywg nrog Chy, ces tsis yog ib qho xav tsis thoob uas tsis muaj leej twg thuam Chy ntxiv.

Nov yog ib lub sij hawm zoo siab rau pawg football. Tiam sis txawm lawv twb kov yeej txhua pawg, cov tub hluas no nco qab ntsoov txog Chy. Lawv caw nws los koom nrog lawv hauv tshav pob tom qab lawv ua si tag. Chy paub tias muaj neeg hlub nws. Nws nyab xeeb. Nws zoo siab.

Lawv pawg football no twb yeej lub xeev kev sib tw. Tiam sis muaj ib qho tseem ceeb tshaj tshwm sim hauv lawv lub tsev kawm ntawv. Cov tub hluas no coj yam ntxwv kom pab lwm tus tub ntxhais kawm ntawv lees txais lwm tus, ua phooj ywg nrog lawv. Nim no lawv ib leeg ua siab zoo thiab saib tau ib leeg.

Koom haum tshaj xov xwm tau kawm tias cov tub hluas no tau ua li cas thiab tshaj tawm txog lawv zaj dab neeg mus thoob plaws lub teb chaws. Qhov uas lawv pib txhawb pab ib tug neeg xwb twb tshoov ntau txhiab tus neeg lub siab kom ua zoo ib yam.

Chy niam hu cov tub hluas no ua “cov tim tswv uas neeg tsis paub.” Carson thiab nws cov phooj ywg hais tias Chy tau foom koob hmoov rau lawv lub neej ntau tshaj lawv tau foom koob hmoov rau nws. Yeej muaj li ntawd thaum yus tsis khuv xim yus tus kheej thiab mus pab lwm tus---yus thiaj nrhiav tau yus tus kheej.² Kev txhawb pab lwm tus, ua rau yus hloov siab thiab loj hlob tuaj. Cov tub hluas no tau muaj kev xyiv fab los ntawm kev txhawb pab thiab tseem nrhiav cib fim foom koob hmoov rau lwm tus. Lawv xav txhawb pab lwm tus thaum lawv mus ua tub txib ob peb hlis tom ntej.³

Muaj ntau txhiab tus zoo li Chy Johnson nyob thoob plaws lub ntiaj teb---cov neeg uas xav muaj Leej Txiv Saum Ntuj Ceeb Tsheej txoj kev hlub. Lawv nyob hauv nej tej tsev kawm ntawv, hauv nej pawg, thiab nyob hauv nej tsev neeg. Yooj yim paub lawv xav tau dab tsi. Lwm tus muaj tej kev xav tau uas tsis yooj yim pom. Yuav luag txhua leej txhua tus uas nej paub txais tau koob hmoov los ntawm nej txoj kev txhawb pab. Tus Tswv tso siab plhuav rau nej kom nej ncav tes pab lawv.

Nej tsis tas ua ib tug neeg ua kis las kom txhawb pab lwm tus. Thaum tib lub sij hawm uas tau tsa nej rau lub pov thawj hwj, nej tau txais lub hwj chim, txoj cai, thiab lub luag hauj lwm dawb huv kom txhawb pab lwm tus. Thawj Tswj Hwm James E. Faust qhia hais tias, “Lub pov thawj hwj yog txoj cai uas Vajtswv tso rau txiv neej kom lawv tuav Nws lub npe txhawb pab lwm tus.”⁴ Cov uas muaj lub Pov Thawj Hwj Aloos tuav cov yawm sij ntawm cov tim tswv txoj kev txhawb pab.⁵

Thaum nej hlub Nws cov me nyuam, Leej Txiv Saum Ntuj Ceeb Tsheej yuav coj nej, thiab cov tim tswv yuav pab nej.⁶ Nej yuav muaj hwj chim foom koob hmoov rau lwm tus thiab cawm lawv cov ntsuj plig dim.

Yexus Khetos yog nej tus yam ntxwv. Nws “tsis tau los kom leej twg txhawb pab nws, tiam sis nws los txhawb pab lwm tus.”⁷ Kev txhawb pab txhais hais tias yus hlub thiab saib xyuas lwm tus. Nws txhais hais tias yus saib lawv xav tau dab tsi ntawm sab nqaij daim tawv thiab sab ntsuj plig. Qhov yooj yim hais, nws txhais hais tias yus ua raws li tus Cawm Seej yuav ua yog Nws nyob ntawd.

Pib ua li no nyob hauv nej tej tsev. Nej txoj kev txhawb pab lwm tus nyob no yeej tseem ceeb.⁸

Nej puas xav ua ib qho kom sim seb yuav zoo li cas? Lub sij hawm uas nej niam nug nej pab hauv tsev, cia li hais tias, “Ua tsaug koj hais kom kuv ua li ntawd, Niam. Kuv xav pab tiag.” Ces sim seb nws yuav ua dab tsi. Tej zaum nej yuav xav kawm kev kho mob me ntsis ntxiv ua ntej nej ua li no. Tej zaum nej yuav ua rau nws poob plig. Tom qab nej cawm nws, nej yuav pom hais tias nej haj yam sib raug zoo thiab nej yuav muaj tus Ntsuj Plig ntau dua li qub nyob hauv nej lub tsev.

Nov yog ib txoj kev txhawb pab nej tsev neeg xwb; muaj ntau yam nej ua tau. Nej txhawb pab lawv thaum nej hais lus zoo rau nej tsev neeg. Nej txhawb pab lawv thaum nej ua zoo rau nej cov kwv cov tij thiab cov muam zoo li lawv yog nej cov phooj ywg.

Qhov tseem ceeb tshaj plaws, nej txhawb pab lwm tus thaum nej pab nej txiv ua nws tej luag hauj lwm ua tus thawj coj sab ntsuj plig hauv nej tsev. Txhawb nqa thiab yaum txhua tus kom muaj tsev neeg hmo ua ke, tsev neeg thov Vajtswv, thiab tsev neeg kev kawm vaj lug kub. Ua tej yam nej ua tau kom muaj tus Ntsuj Plig nyob hauv nej tsev. Qhov uas nej ua li no yuav txhawb nqa nej leej txiv ua nws txoj hauj lwm thiab npaj nej ua ib leej txiv thiab. Yog tias nej tsis muaj ib leej txiv nyob hauv nej tsev, qhov uas nej muaj kev lav ris txhawb pab nej tsev neeg yeej tseem ceeb.

Nej kuj muaj lub luag hauj lwm txhawb pab nej pawg pov thawj hwj.

Lub pov thawj hwj tab tom nchav mus thoob plaws lub ntiaj teb. Nej feem coob ua raws li Thawj Tswj Hwm Monson txoj kev hu nej cawm tib neeg. Muaj cov uas tuav lub Pov Thawj Hwj Aloos uas muaj siab ntseeg niaj hnub no coob dua li yav tas los hauv lub Koom Txoos zaj keeb kwm. Tiam sis tseem tshuav cov uas tsis tshua muaj siab ntseeg thiab xav tau nej.

Lub Rau Hli Ntuj tas los, peb tsim ib ceg ntseeg tshiab nyob hauv Bangalore, India, thiab tib tug tub hluas hauv kev sib ntsib pov thawj hwj yog ib tug dikas tshiab hu ua Gladwin.

Gladwin, nrog Koom Haum Tub Hluas tus thawj tswj hwm thiab ceg ntseeg tus thawj tswj hwm pib hu cov tub hluas uas tsis tshua muaj siab ntseeg thiab mus xyuas lawv hauv lawv tej tsev. Tsis ntev ces ib tug tub hluas ntxiv, Samuel, pib rov qab tuaj koom lub koom txoos.

Txhua lub lim tiam Gladwin thiab Samuel hu cov uas tsis tau tuaj kev sib ntsib pov thawj hwj thiab qhia tias nkawd tau kawm dab tsi. Nkawd kuj hu cov tub hluas los sis mus xyuas lawv thaum txog lawv hnub yug. Ces cov tub hluas uas tsis tshua muaj siab ntseeg pib ua phooj ywg nrog nkawd thiab pib tuaj koom tej yam ntxim saib ntxim ua, koom kev sib ntsib pov thawj hwj, thiab koom ua kev txhawb pab nrog Gladwin thiab Samuel. Hnub no, tag nrho cov tub hluas ntawm ceg ntseeg ntawd muaj siab ntseeg lub Koom Txoos.

Cov vaj lug kub qhia hais tias tej pawg Pov Thawj Hwj Aloos yuav tsum sib sab laj thiab ib leeg txhawb nqa ib leeg.⁹ Nej txhawb nqa lwm tus thaum nej qhia txoj moo zoo tej qhov tseeb, qhia tej yam uas tau tshwm sim ntawm sab ntsuj plig, thiab ua tim khawv. Cov ntaub ntawv qhia rau cov tub hluas ntxhais hluas qhia kom muaj tej kev sib tham li no nyob hauv tej pawg pov thawj hwj kev sib ntsib, tiam sis yuav muaj li no tsuas yog txhua tus hauv nej pawg xav tias nej hlub nws thiab saib nws rau nqi. Tej kev thuam yeej tsis muaj chaw nyob hauv pawg pov thawj hwj kev sib ntsib---qhov tseem ceeb yog thaum yus xav kom lawv qhia txog lawv tej kev xav. Tej pawg pov thawj hwj pawg thawj tswj hwm yuav tsum coj yam ntxwv qhia hais tias tej pawg pov thawj hwj kev sib ntsib yog ib qho chaw puaj phais rau txhua tus qhia tias lawv xav li cas.

Tus Thwj Tim Povlauj ntuas hais tais, “Nej tsis txhob hais lus twm lwm tus, tiam sis nej yuav tsum hais tej lus zoo xwb thiaj muaj nqis rau cov uas mloog.”¹⁰

Cov uas tuav lub pov thawj hwj yeej tsis hais lus phem los hais lus dev. Lawv yeej tsis ua phem rau lwm tus los sis ua rau lawv tu siab. Lawv yeej txhawb nqa thiab ntxiv dag zog rau lwm tus. Nov yog ib txoj kev yooj yim txhawb pab lwm tus uas muaj hwj chim.

Kev ua hauj lwm txhawb pab tsis yog kev ua kab ke los yog kev mus qhia tom tsev los sis tej kev pab lwm tus tej lub sij hawm xwb. Peb yeej yog cov txiv neej uas tuav lub pov thawj hwj---tsis yog thaum hnub Sunday xwb thiab tsis yog thaum nej hnav tsho dawb thiab coj ka la vav xwb. Peb muaj ib lub luag hauj lwm txhawb pab lwm tus nyob hauv txhua qhov chaw uas peb sawv. Kev txhawb pab tsis yog ib qho uas peb ua xwb---kev txhawb pab yog lub ntsiab ntawm peb lub neej.

Txhawb pab lwm tus txhua hnub. Muaj tej cib fim pab nyob ib puag ncig nej. Nrhiav tej cib fim ntawd. Thov tus Tswv pab nej paub txog tej ntawd. Nej yuav kawm hais tias tej yam peb ua tiag tiag yog tej yam uas pab lwm tus raws Yexus Khetos qab.¹¹

Thaum nej sib zog ua neeg tsim nyog txais tus Ntsuj Plig, nej yuav paub tej kev xav uas tshoov nej mus txhawb pab lwm tus. Thaum nej ua raws li tej kev tshoov siab no, nej yuav txais ntxiv, thiab nej tej cib fim thiab txuj ci txhawb pab lwm tus yuav loj tuaj.

Kuv cov kwv, kuv ua tim khawv hais tias nej tau txais txoj cai thiab lub hwj chim ntawm lub Pov Thawj Hwj Aloos kom tuav Vajtswv lub npe txhawb pab lwm tus.

Kuv ua tim khawv tias thaum nej ua li ntawd, nej yuav ua ib lub cuab yeej hauv Vajtswv txhais tes kom pab lwm tus. Nej lub neej yuav muaj nqi tshaj li qub. Nej yuav muaj zog dua yav tas los kom tiv thaiv txhob raug phem. Nej yuav muaj kev zoo siab tiag tiag---kev zoo siab uas tsuas yog cov uas nrog Yexus Khetos mus muaj xwb.

Kuv thov kom nej yuav muaj kev xyiv fab thaum nej ua nej lub luag hauj lwm txhawb pab, kuv thov los ntawm Yexus Khetos lub npe, amees.