O Lou Tiute Paia e Auauna Atu

Alii talavou o le Perisitua Arona, o outou o atalii faapelepele o le Atua, ma o loo ia te Ia se galuega tele mo outou e fai. Ina ia ausia lenei galuega, e ao ona e faataunuuina lou tiute paia o le auauna atu i isi.¹

Tou te iloa le uiga o le auauna atu? Mafaufau i le fesili lenei a o o’u faamatala atu ia te outou e uiga i se teineitiiti e igoa ia Chy Johnson.

Ina ua amata Chy i le aoga maualuga i le tausaga ua te’a, sa avea ai o ia ma tagata na afaina fua i sauaga faalealofa ma le le magafagafa. Sa sauaina, tulei solo, ma taufaifai i ai pe a savali atu o ia i vasega—o nisi lava o taimi sa tauai atu ni lapisi ia te ia. Atonu sa outou vaai foi o faia le lelei faapea nisi o tagata i o outou aoga.

Mo le toatele o tagata, o tausaga o le talavou o se taimi o le tuua toatasi ma le fefe. E le tatau ona faapena. O le mea na laki ai Chy, sa i ai ni alii talavou i lana aoga o e sa malamalama i le mea e ta’u o le auauna atu.

Sa talosaga atu le tina o Chy i faiaoga o le aoga e fesoasoani e taofi le fia fasitagata, ae sa faaauau pea. Ona ia faafesootaia lea o Carson Jones, o se e umia le Perisitua Arona ma o le taitai autu e muamua taalo o le au lapaki a le aoga. Sa ia talosaga atu ia te ia e fesoasoani atu i lona sueina o le tagata sa faia le fia faasaunoa.

Sa malie Carson e fesoasoani atu, ae o lona loto sa ia lagonaina e tele atu ni mea e mafai ona ia faia nai lo na o le faailoaina o le au fia fasitagata. Sa musumusu atu le Agaga ia te ia e tatau ona fesoasoani ia Chy ia lagona le alofaina.

Sa fai atu Carson i nisi o tama o lana au e auai atu faatasi ma ia i le fesoasoani atu ia Chy. Sa latou valaaulia o ia latou te nonofo faatasi i le taimi o le malologa. Sa latou savavali e momoli atu o ia i le vasega ia mautinoa ai na saogalemu o ia. E le o se mea na faateia ai, faatasi ai ma le au taaalo lakapi sa fai ma ana uo lelei, sa le’i toe fia faasaunoa lava se tasi ia Chy.

O le vaitaimi manaia lenei mo le au lakapi. Ae e ui lava foi i le fiafia tele o se vaitau e le’i toilalo lava, sa le’i galo ai i nei alii talavou ia Chy. Sa latou valaaulia o ia e auai atu ma le au i le malae pe a uma taaloga. Sa lagona e Chy le alofaina ma le talisapaiaina. Sa ia lagona le saogalemu. Sa fiafia o ia.

Sa oo atu le au lakapi i le manumalo i le siamupini i le setete. Ae sa i ai se mea na sili atu le taua nai lo o se siamupini i le lakapi sa tupu i le latou aoga. O faataitaiga a nei alii talavou na faaosofia ai isi tamaiti aoga ina ia faateleina lo latou taliaina, faateleina lo latou faauo. O le taimi nei ua latou faia ai le tasi ma le isi i le agalelei ma faaaloalo faateleina.

Na iloa e le au faasalalau o talafou i le lotoifale le mea na fai e nei alii talavou ma faasoa atu ai le latou tala i le atunuu atoa. O le mea sa amataina o se taumafaiga e auauna atu i se tagata e toatasi ua musuia ai le faitau afe o isi e faia foi faapea.

E ta’u e le tina o Chy ia nei alii talavou o “agelu faalilolilo.” E vave le fai mai o Carson ma ana uo e faapea, ua sili atu ona faamanuiaina o latou olaga e Chy nai lo latou faamanuiaina o ia. O le mea lena e tupu pe a e faamaumau oe lava i le auauna atu i isi—e te faasaoina ai oe lava.² E te sui ma tuputupu ae i auala na semanu e le mafai ai i lena taimi. O nei alii talavou na maua le olioli i le auaunaga ma faaauau ai ona saili mo avanoa e faamanuia ai isi. Ua latou naunau e faalautele atu la latou auaunaga i masina a sau pe a latou auauna atu o ni faifeautalai faamisiona.³

E faitau afe Chy Johnson i le lalolagi atoa—o tagata o e manaomia ona lagona le alofa o le Faaola. O loo i ai i totonu o a outou aoga, i totonu o a outou korama, ma faapena foi i totonu o o outou aiga. O ni isi e vave ona manatua. O isi e i ai ni manaoga e tau le iloa. E toetoe lava o tagata uma e te iloa e mafai ona faamanuaina i se auala faapitoa e ala i lau auaunaga. O loo faalagolago mai le Alii ia te oe e te aapa atu ia i latou.

E le faapea e tau avea oe ma se tagata taalo lauiloa e auauna atu ai i isi. Na e maua le mana, le pule, ma le tiute paia e auauna atu ai i le taimi lava na faauuina ai oe i le perisitua. Na aoao mai Peresitene James E. Faust, “O le Perisitua o le pule lea ua faasafua atu i alii e auauna atu ai i le suafa o le Atua.”⁴ O le Perisitua Arona ua umia ki o le auaunaga a agelu.⁵

A o e alofa atu i Ana fanau, o le a taiala oe e le Tama Faalelagi ma o le a lagolagoina oe e agelu.⁶ O le a tuuina atu ia te outou le mana e faamanuia ai olaga ma laveai ai agaga.

O Iesu Keriso o lou faataitaiga lea. E “le’i sau o Ia ina ia auauna mai tagata ia te ia, a ia auauna atu.”⁷ O le auauna atu o lona uiga ia alofa ma agalelei atu i isi. O lona uiga o le tali atu i o latou manaoga faaletino ma faaleagaga. I se faaupuga faigofie, o lona uiga o le faia o le mea e ono fai e le Faaola pe ana fai o iinei o Ia.

Amata i totonu o lo oe lava aiga. O le nofoaga lenei e mafai ona e faia ai le tele o au auaunaga taua.⁸

Tou te mananao e faataitai se suega manaia? O le isi taimi e fai atu ai lou tina e te fesoasoani i mea o le fale, fai atu i ai se faaupuga e pei o le “Faafetai mo le faailoa mai Tina. O le a ou fiafia e fesoasoani atu.” Ona matau lea o ona uiga faaalia. O nisi o outou atonu e mananao e faalelei muamua a outou tomai faafesoasoani muamua ona faataitai ai lea o le mea lenei. Atonu e te faamatapogiaina o ia. A uma ona e toe faate’iina o ia, o le a e iloa lelei ai se alualu i luma i la oulua mafutaga ma se faateleina o le Agaga i totonu o lou aiga.

Ua na o se tasi lena o auala e auauna atu ai i lou aiga; o loo tele lava isi auala. E te auauna atu a o e tautala atu i upu alofa i tagata o le aiga. E te auauna atu a o e faia nai ou tei e pei o au uo lelei lava.

Atonu o le mea e sili ona taua, e te auauna atu a o e fesoasoani atu i lou tamā i ona tiute o se taitai faaleagaga i totonu o lou aiga. Tuu atu lau lagolago atoa ma faamalosiauga i afiafi faaleaiga, tatalo faaleaiga, ma le faitauina faaleaiga o tusitusiga paia. Fai lau vaega ia mautinoa ai le i ai o le Agaga i totonu o lou aiga. O lenei mea o le a faamalosia ai lou tamā i ona matafaioi ma saunia ai oe e avea ma se tamā i se aso. Afai e le o i ai se tama i totonu o lou aiga, o lou tiutetauave o le auauna atu i lou aiga e sili atu ona manaomia.

O loo i ai foi sou tiute e auauna atu i totonu o lau korama.

Ua salalau atu le perisitua i salafa o le lalolagi. O le toatele o outou ua usitai i le valaau a Peresitene Monson ia laveai. Ua toatele atu i latou e sili ona toaaga o loo umia le Perisitua Arona i le taimi lenei nai lo se isi lava taimi na muamua atu i le talafaasolopito o le Ekalesia. Ae o loo i ai pea lava i latou o ē e le o toaaga ma ē e manaomia outou.

O Iuni i le tausaga ua te’a, ina ua faavaeina se paranesi fou i Bangalore, Initia, na pau lava le alii talavou i le fonotaga a le au perisitua sa o se tiakono na faauuina lata mai nei e igoa ia Gladwin.

Sa amata e Gladwin, faatasi ai ma le peresitene o Alii Talavou ona telefoni atu i alii talavou e le toaaga ma asiasi atu ia i latou i o latou aiga. E le’i leva, ae amata ona toe sau i le lotu se alii talavou lona lua.

O vaiaso taitasi e telefoni atu ai Gladwin ma Samuelu ia i latou o e sa le’i auai mai i fonotaga a le korama, ma faasoa atu i ai mea sa laua aoaoina. Sa laua telefoni atu foi pe asiasi atu foi ia i latou i aso o o latou aso fanau. Sa taitasi, ona avea alii talavou le toaaga ma a laua uo ma amata ona talia valaaulia e o mai i gaoioiga a le korama, e auai i fonotaga a le korama, ma iu ai lava ina fai a latou lava auaunaga. O le taimi nei, o alii talavou uma i le paranesi ua toaaga uma i le Lotu.

Ua aoao mai tusitusiga paia e faapea o korama o le Perisitua Arona e fono faatasi ma aoao atu—pe atinae ma faamalosi—e le tasi le isi.⁹ E te aoao atu a o e aoaoina atu upumoni o le talalelei, faasoa atu aafiaga faaleagaga, ma molimau atu. O mataupu aoaoina a le autalavou ua uunaia ai nei ituaiga o fegalegaleaiga i fonotaga a korama, ae e pau le taimi e mafai ona tupu ai lenei mea, pe afai lea e lagona e tagata uma o le korama le alofaina ma le faaaloalogia. O le taufaifai ma le taufaalili e leai ni avanoa i se fonotaga a le korama—ae maise lava pe afai e faasoa faalauaitele atu ni lagona. E ao i au peresitene o korama ona taulamua i le faamautinoaina o fonotaga a korama o se nofoaga saogalemu mo tagata uma e auai ai.

Ua apoapoai mai le Aposetolo o Paulo, “Aua ne’i alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.”¹⁰

O e umia le perisitua e le faaaogaina gagana masoa pe eleelea. Latou te le faalumaina pe faatiga i isi. Latou te atinae ma faamalosia isi i taimi uma. O se auala faatauvaa ae mamana lenei e auauna atu ai.

O le galuega o le auauna atu e le pau mai i sauniga po o asiasiga i aiga po o galuega faatino e seāseā ona faia. O i tatou o ni alii o le perisitua i taimi uma lava—e le na o Aso Sa ma e le na o taimi tatou te faia ai ni ofutino papae ma ni fusiua. Ua i ai se tatou tiute e auauna atu i soo se mea tatou te tutu ai. O le auauna atu e le na o se mea tatou te faia—e faamatalaina ai foi po o ai i tatou.

Ia auauna atu i aso uma. O loo siomia outou i avanoa. Vaavaai mo na avanoa. Ole atu i leAlii e fesoasoani ia e iloa na avanoa. O le a e iloa ai o le tele lava e aofia ai ni faatinoga laiti, faamaoni, e fesoasoani ai i isi ia avea ma soo o Iesu Keriso.¹¹

A o e taumafai ia agavaa mo le Agaga, o le a e iloa ai manatu ma lagona e uunaia oe e auauna atu. A o e faatinoina nei uunaiga, o le a e maua nisi uunaiga se tele, ma o le a faateleina ma faalauteleina ou avanoa ma gafatia e auauna atu ai.

O’u uso e talavou, ou te molimau atu ua tuuina atu ia te outou le pule ma le mana o le Perisitua Arona mataina e auauna atu ai i le suafa o le Atua.

Ou te tautino atu a o outou faia, o le a avea oe ma se tufugaaao o le Atua e fesoasoani atu ai i isi. O le a sili atu ona lelei ma sili atu ona anoa lou olaga. O le a e maua ai le malosi sili atu e tetee ai le tiapolo. O le a e maua ai le fiafia moni—le ituaiga lea e na o soo moni o Iesu Keriso e iloaina.

Talosia ia outou maua le olioli i le faataunuuina o lou tiute paia e auauna atu, o la’u tatalo lea i le suafa o Iesu Keriso, amene.