Sel Klebokel el Omerolliu el mo Remei

Mlara President Dieter F. Uchtdorf

Ongeru el Counselor er a First Presidency


Sel mngara deureng lousbech er a map el Chedam er a Babelaudes a mla meskemiu el kirel tial lomerael, e ngoikemiu el mora chedaol basio e kom ngoriakl el mo er sel ngarbab el ultekelliu.

Ng dmeu a rengud er chelechal kesus lobengkel a President Thomas S. Monson, el betik er a rengud el profet. President, aki blechoel meluluuch el kirem.

Rodos, ko mesulang er a chelitakl me a tekoi el mla medung. Ng kmal melisiich e chatter er tial Pasqua, el chedaol taem el doldeu er ngii er chelechang.

Ng klebokel el kteloi er kemiu a re mekreos el ngeasek el dil, lobegnterir a redelmiu me a roungerachel er kemiu. Kom dmiich a reng er kemiu me a klikm er kemiu. Ng mera el Rubak a melatk er kemiu e ngara babeluades e dmeu a rengul lomes er kemiu.

Ak mlukeroul er a Zwickau, sel mle Ongos er a beluu er a Dois. Sera locha teruich me a ta rekik, ea demak a siliseb er cheungel a meisiich el omerritel er a romtok a tekoi er a balatiks, me rechad er a blik a mlo omelchesiu el kmo sel mo klungiolel a telungalek eng bai ungil a lechiis el mora Ngebard er a Dois. Ng mloterekokl el kmo sel kot el ungil e selbechakl el rael a bol kakerous a omerollam e kakerous el rael a ki morael er ngii el mora Ngebard, el di mo mechei a rokui el kloklam.

Meng chelsel a klou el kengaol el bla er ngii a demak, e ngii a ngiluu sel kot el mereched el omerael, lokiu a Berlin. A robekuk a mirrael bedul a diluches, e di mle tir el osiik rolir el mora ngebard. A ochedak—el locha mle rekil a betok er kemiu er chelechal sils—ngii me a Helga Fassmann, el sensei er ngii er a Young Women, me a lmuut el bebil a mlara ksia el di mo telkib lengelakl er Ngebard er a Dois. Te mle harau er a mlengkar er a chesimer, me luchul e bol sebechir el soiseb er a tara ikal chesimer, e sel lorael a ksia lengelakl er a tkul Ngebard er a Dois, e tir a ridekekl er tial remurt el ksia el uchul e bol mimokl. Ak meral smiich a renguk er a blekengel ngii lochedak.

Ngak a mle kot el kekerei, me a delak a ulemdasu el kmo ngii me a ngak a mo merael er a ked lomii aikal eru el beluu. Ak medengelii el kildmokl a bento er kemam el uaia le bento er a mo er a hike me a malechub a picnic er a rois.

Aki ngiluu a ksia e mirrael el kmal mlor cheroid, e mocha merael el betok el sikang, lolekeed er kemam er a tkul Ngebard er a Dois. Aikal tkul a beluu a mle meisiich omengkar ngii, eng di a ki uleba map me a ki mle medengelii a taem me a basio el ngii a ungil ki bom iull. Ak mlo omelchesiu er a sebekreng er a delak. Ng kmal mle ungil lomes er a maori er kemam el mo medengei el kmo ng dimlak a roeak kullam. Me a bek el bakes, ea ochil me a bkul ochil a di merael mo mechitechut. Ak ulengeseu loba tial oberaod el til el mui er a kall, meklou a belkul babier, siasing er kemam el telungalek, er a ki bocha molemiakl er tial ulebongel ,e kedidai el rois. Ng ulemdesua, el kmo, aki mla chengelakl er a tkul a beluu er chelechang. Tia er a lomelchesui el kmo ng mla mo ungil, ea ki mocha dengchokl e mocha menga ikal bentelengam. A kmal ungil medengei, el kmo tiaikid el sils, e ngii a mlo omelchesiu er ngii el uaia le kebekakl.

Tiaikid ea ki milsa llechukl lolangch er a tkul a beluu. Ng kmal dirk cheroid! Kemam a ou picnic er a tkul a kuk tara beluu. Aki dirk ngara Ongos er a Dois!

A remengkar a tkul a beluu a sebechir el di kuil tmoech!

Ng medekta delak meng mocha kudmokl aikal bentelengam, ea ki orchedemam el ngosecha er a tkul a rois. Tiaikid eng dimlak ki molengull e di mirrael el di merekmo ki bocha modengei el kmo aki mla soiseb er a bitang.

Meng uaisei el bek el chedal a telungalek a mlo ngara kakerous el omerael e mlo obangel a ringel er a omerollir, eng di kemam el rokui el di mlo ngara selbechakl. Aki mlo dmak el telungalek e ruriul. Ng meral mle klebokel el sils!

Cheldecheduch er a Omerael

A bla kuchais er ngii er kemiu a di teletael er a klengar el denguu er ngak eng kmal mekreos lomerael. Ng sebechek er chelechang el melbedebek er a ngara mong el kirel aikel “omerael” er a klengar el blak ngai. Ng kemangel taem el kngarngii. Ng diak el ngii el rokui a oleong a rois malechub e lomerael er a tkul a beluu; ng bai bebil er ngii a uldimukl a mo mesisiich a ringel malechub e ak mo mesisiich el ngar a chedaol tekoi. Eng di, ngii el rokui a di omerael. A kuumerang el kmo a bek el klengar a a uldekial a “cheldecheduch er a omerael” er a dersta el chad.

Ko medengei el bek el beluu me a uldelid el siukang a mui er a cheldecheduch er a omerael er ngii. Okesiu, kom locha medengelii a omerollel a Dorothy me a cheremel bilis, er a Toto, el ngara The Wizard of Oz. A Dorothy me a Toto a mlengai er a ichadedaob el mora Beluu er a Oz. Tiaikid, ea Dorothy a miltik er a telkib el ngodech el bibrurk el selement el rael el ngii a olchotel a rael er a kemanget el omerael el uchul eng mo sebechel mo remei.

E dirrek el ngarngii a Ebenezer Scrooge er a Charles Dickens, el omerollel a diak el ngara basio el mora basio ng bai taem el mora taem. Ng omerael el kmal ngara rengul, el ngoseuir el mo medengei el kmo ngera uchul meng mlo uaisei a klengar ngii e mesa el kmo ngera mo duubech alsekum eng melemolem el ngara chelbirukl el rael er a chechelingaol reng me a diak el oureng a saul.1

A tara merael a chisel cheldecheduch er a Sina a sel Journey to the West.Ng milluches er a 16th century, louchais er a klebokel el cheldecheduch er a monk el, ngeso er a reteua el sechelei a ngilseuir er a, omerollel bedul a chedaol llomes.

E dirrek el ngarngii a Bilbo Baggins, el kekerei, ngariou a rengul el kobito el kmal diak a ngodech el soal ng di soal kiei er a blai e menga kelel sub. Eng di uriul er a lolengod a chesmerel a blil, eng mlo oltirakl er a okedong el mora ikel basio el dirkak a tal le bo er ngii, lobengterir a rechelid me a redelbechel el kobito el mo oltaut er a kengaol eng di ng klou a belkul el ureor.2

Cheldecheduch el Dodengelii Rokui

Ng diak el bai soad aikal cheldecheduch ele kede mtab omerollir tirkal chad? A klungiaol me a cheleuid er tir a ngosukid el metik er a roled er tial klengar. A video el dilsang er a sesel bung er a memong a ouchais er a klebokel el cheldecheduch.Ng locha mekltekid er a cheldecheduch el kirel omerael el kid a kired el kmal ungil medengelii—el cheldechedechal omerael el dersta er kid a klou a belkud er a chelsel.

Tial cheldecheduch a ulemuchel er a ngara mo el taem, ngara mong ruchei er a beluulechad a lomuchel el meliuekl er a rolel, ngara mong ruchei er a lomuchel a dichel a sils er a beluulechad, ngara mong ruchei er a rokui el ngar el meklou me a mekekerei lesekedii tial beluulechad er kid. Ngara uchelel tial cheldecheduch, e kom kiliei er a cheroid e klebokel basio.

Ng diak desal medengei a mekekerei telengtengil a klengar ruchei, eng di kede medengei a bebil. A Demad er a Babeluades a mla ocholt er kid el kmo Ngii ng techang, e kid kede techang, e ngera sel sebeched el mo er ngii.

Sera de ngara kot el beluad, e ko mle ungil medengei el kmo a Dios a ngarngii ele ko milsang e Rirngesii. Ko mle medengelii a Jesus Kristo, el ngii a mo Ngelekel a Sib er a Dios. Ng mla er ngii a klaumera er kemiu er Ngii. E ko mle medengei el kmo a ulebongel el omerolliu a diak el di lultuil er tial ungil klengar ruchei. Meng uaisei el kmal mle somiu tial diak a ulebengelel beluu, eng di ko mle medengei el kmo ng mle kiriu el tuobed el mora omerael. Kom tuobed er a rengedel a Chedam, lengelakl er a kateng el mobes a rokui, e nguu a bedengiu er a tech, e suub e ngmai aikel ngii a omousbech el mo sebechiu el mo uaia Chedam er a Babeluades e lmuut el mo er a Rengedel.

Chelsel tial chedaol beluu, el meliuekl er ngii tirkel muldengelterir me a rebetik er a rengmiu, e sel kot el ker el mlara uldesuiu a mle locha “Ngak ak locha sebechek el lemuut el mei er a blik er a babeluades?”

Ng betok el tekoi a mo meringel er kemiu. A klengar er a beluulechad a mo meringel sel bebil er a taem, el mui er a diak dodengei el teletael el mo duubech: secher, ringelel a reng, aksident, me a mondai.

Meng diak modengelii sel klengar ruchei el—diak modengei el kmo kom mle tal omkiei lobengkel a Demmiu er a Babelaudes e kom locha dirk medengelii oto er a Ngerel el diak el iior er a betok el cherrodech me a olibesongel el ngara tial klengar?

Tial omerael er medad a kora uaia le sal kemanget e diak dodengelii—e mui er a kengaol.

Ng diak el bol beot, eng di ko mle medengei el kmo ng mo klungioliu.

Me, kom dechor er a diak a ulebengelel lomerael, lomes el bedul a klukuk loba klemeriar reng me a ongiil—ea kumdasu, a dirrek el bebil er a sebekreng me a dakt a mullab.

Ea ulebongel, e ko medengei el kmo a Dios a melemalt—el Klungiolel a mo mesisiich. Ko mle teloi er sel klou el miting er a babeluades e mle medengei el kmo a Osobeliu e Olsobel, el Jesus Kristo, mo meskemiu a rael e ko mo beches er a kngtmiu e mosebechakl er a kodall. Ng mla er ngii a klaumera er kemiu, el kmo sel mo ulebongel, e ko mo ngara deurreng me a omengitakl el mora babeluades loldiu loldanges er a chedaol Ngklel.

Maleuaisei, e ko multuu a telmiu …

E omakes el mo ruchei …

Me chelecha kom ngara tiang!

A dersta, er kemiu, a ulemuchel er a klebokel el omerolliu el muut el mora blimiu er a babeluades!

Map el Mobang

Chelecha el mngar tia el beluulechad, eng locha ungil omoker kau el kmo ngua ngera omerollem. Ke ngara mera el rael? Kau ke merael mo ngkel chad el kau a ulebeob el kirel soam el mo ngii? Kau ke melilt aikel tekoi el ngosukau el muut el mora Demam er a Babeluades?

Ngii a dimlak lodureklau er tial omerael el di mererorael el diak a moktek er kau. Ngii a soal a bom rei el mo er Ngii. Ng mla meskemiu a roubeltikelreng el rechad er a blim me a rungil mengeteklel a Ikelesia, lobengkel a map el meketeklii a rael e dmangch a kengaol; tial map a ochotii er kau el kmo a budech me a deureng a sebechem el metik e ngosukau el kudmeklii a rolem el muut el mo remei.

Mechelechang, e ng sebechem el metik er a map er kau er ker?

  1. Er a chelsel a chedaol llechukl.
  2. Chelsel a tekingir a reprofet me a reapostol.
  3. Me a dirrek lokiu a chedaol ocholt er a Chedaol Reng.

Tial map a ebangkelio er a Jesus Kristo, ngungil chais, e deureng er a bek el chedal a Kristo. Ng llach e okesiu el bla el beskid a Sebechekled e Sensei er kid, el medengelii a rael ele Ngii a a rael.3

Ng uaisei, a di moba map eng diak a ngera el rellii a lak msuubii—a lak mousbech er ngii er a klengar er kau. A kulengit me mnguu el kot el klou a ultutelel el mo mesuub e oltirakl a tekingel a Dios. Bok a rengmiu el kirel Chedaol Reng me luchul e Ngii bo lomekrael er kemiu er a omerolliu er a klengar.

A map el mobang a mui er a suobel el melisiich me a klemechel a Demmiu er a Babeluades me a Ngelekel er a Jesus Kristo. Chelechal sils eng soak louchais er kemiu a kldei er a ikal klumech el mo ngosukemiu er a omerolliu el mo remei.

A kot el tekoi: “Ng diak ko medakt, ele Rubak a obengkemiu.”4

Ng diak mcheloit er tial omerael. A Demam er a Babeluades a medengelkau. Luldimukl a lak a chad lorrenges er kau, e Ngii a rongesau. Sel mngara deureng er a llemalt, me Ngii me ngara deureng lobengkem. A om ngara ringel er a ongarm, me Ngii me ngelmangel lobengkem.

A klemeriar reng er a Chedam er a Babeluades el kirem a diak lultuil er a iltetem malechub el klebekelem malechub el klisichel a bedengem malechub el lemesem. Ngii a mesekau el diak el uaia beluulechad a lomes er kau; Ngii a omes er kau er sel kmal ngii a kau. Ngii omes er a chelsel a rengum.5 E Ngii a betik a rengul er kau6 ele kau el Ngelekel.

Rodos, bol blak a rengmiu losiik er Ngii, me bo betik er Ngii.7

Ak yaksok er kemiu, ng diak mcheloit.

Chelecha, e bom chelellakl el telkib e momes er a rechad el meliuekl er kau. A rebebil a locha tirkel oungerachel er kemiu, sechelei, malechub a rechedal a telungalek. Ea rebebil a locha dirkak a tal mesterir. Eng di, a dersta el chad el meliuekl er kau—er tial miting malechub a ngii dil basio, er chelechal sils malechub a tara taem—a mle mesisiich er sel klengar ruchei. Ngkel ngariou a rengul e di hutsu el chad el dengchokl er bitar kau a locha ble mchat e betik a rengum e soam ngii er sel klengar ruchei. Kau me ke locha mle ungil okesiu!

A tara tekoi el kirem el kmal ungil medengelii a kmo: dertsa el chad el mesang—el diak el iior er a beluu, klechelid, klaumerang, meklungel a bedengel, malechub a ikrel a bedengel a— telungalek. Ngkel ngeasek el dil el momes er ngii a ngelekel a osisiu el Chedam er a Babeluades el di uai kau, e ngii a tilobed er a Rengedel el di uai kau, el semeriar el me kiei er tial beluulechad me luchul el luut el mo er Ngii er a tara klebesei.

Eng di, ng locha omelchesiu er ngii el cheloit, el uai kau a lebebil er a taem. Ng locha dirrek el mo obes er a moktek er a omerollel. A kulengit me momeklatk er ngii lokiu a tekingem me a omerollem el kmo ngii a diak el cheloit. Kid a ngar tiang el kaingeseu.

A klengar a sebechel kmal mo meringel, e sebechel docherechel a reng el uchul ea rechad a mo diak el sebeched el ngosuterir. A rebebil a locha mo mui er a ngasechereng. Ea rebebil omtelub e oltuub er tirkel loumerang er a oubeltikelreng el Dios. Ng di ka momdasu er tiang: ng uaisei el diak lodengelii a klengar ruchei, eng di tir a mla er ngii a taem er a klengar tir ete ulelsingch a mo remei el mora Demerir er a Babeluades.

Ng diak el ngerchelem el omult er a ngii dil chad. Tiang a urerel a Chedaol Reng. A ngerchelem a di ouchais er a klaumera er kau e diak ko medakt. Bom sechelei el mora rokui el chad, eng di diak molenganget a ngarbab el llach el kau olab. Bom dechor el mesisiich er a klaumerang me a klechelid er kau. Bo mesisiich el dechor, ele kau a redil ngelekel a Dios, e Ngii a dechor bitar kau!

Ongeru el tekoi: “Bom kaubeltikelreng, el uai Ngak el betik a renguk er kemiu.”8

Kom locha mo melbedebek el kmo ngera el omelekoi a dullekoi er ngii er sera de kiei er a rengedel a Dios? A kumdasu eng locha tekoi er a Dois, eng di locha diak a ungil medengelii tiang. Eng di ak medengei el kmo chelsel sel klengar kid ruchei e kede mle kot el suub a klubeled, er a Demal a reng er kid, omelekoi el dodengelii el rokui—el tekoi el ngarngii a klisichel el mo mesisiich er a ikel lomelchesiu a chelsel a reng, bedenged, me a, olibesongel er a reng.

Tial omelekoi a klikiid el beltikelreng er a Jesus Kristo.

Ng kot el mesisiich el omelekoi er a beluulechad.

A beltikelreng er a Kristo a diak el kora di meruul a reng. Ng diak el beltikelreng el obetik er ngii er a llechukl el card. Ng diak el beltikelreng er a chetengakl lokiu a rua chelitakl me a katsudo.

Tial beltikelreng a meral lochotii a mengodech el teleletelel a chad. Ng sebechel mo mesisiich er a klauketui el reng e choroid a chechelingaol reng. Ng sebechel sumechii a ngasechereng el mo mesisiich er a mekngit el blekeradel. Ng sebechel oureor ongasireng el omeruul.

Kede ngiluu a “kot el subeled”9 er tiaikid el omelekoi er a beltikelreng er a de kiei lobengkel a Dios, e chelecha el de ngara beluulechad e ngarngii a techelled el ousbech er ngii e kmal mo meduch er ngii. Ng sebechem el mo medengei el kmo ke mesuub er tial omelekoi er a beltikelreng sel di le kau el omes a uldesuem me a omerellem.

Alsekum a moktek er a uldesuem a melutk el kirel aikel tekoi el di mo klungiolem, e tial moktek a locha ngariou e bechechelingaol. Tiang a diak el ngii omelekoi el soam el mesuub er ngii.

Eng di alsekum ea kot el moktek er a uldesuem me a omerellem a ngara omesiou el mora Dios me a rebebil—el meral soam el omekngeltengat e mesebechakl er tirkel ngara bitar kau—e seikid ea klisichel a klikiid el beltikelreng er a Kristo a mo oureor er a chelsel a rengum me a klengar kau. Tiaikid a omelekoi el soam el mesuub er ngii.

Me sel bo meduch er tial omelekoi e mousbech er ngii lobengterir a rebebil, e te mo mtebengar er kau e rulteir el mo osiik er a meral rael er tial omerollir el mo remei er a babelaudes. Ea mera er ngii, e tial omelekoi er a beltikelreng a dirrek el meral tekingir.

Tial dmolech e ungil blekeradel a omelekoi el remutech a chelsel a reng. Ng omelekoi er a bleketakl el klemedengei, omelekoi er a omesiou, omelekoi er a mesebechakl e ngara deureng e mengelaod.

Mosuub lousbech er a omelekoi el dodengelii el rokui el ngii a beltikelreng er a Kristo.

Ea ongedei el tekoi: “Ng kired el mo ngara deureng.”10

Bebil er a taem eng mo kedeb a rengud er tial omerael, ng uaisei? Omko ke teruich me a eru rekim, e koureng el teruich me a euang. E sel bocha mteruich me a euang, e koureng el teruich me a eai. E sel mteruich me a eai, e ke locha kuk mo oureng el ulekum e ke lmuut el mo teruich me a eru e lmuut el omuchel.

Ng di blechoel ngarngii a tekoi el doumondai el kirel—tekoi el diak el sal melemalt er a rengud. Ng sebechem el chemoit a sils el di mekngit a rengum, sabisi, diak a remedengelaku, malechub ete sorir kau. Eng di tia diak el omerael el kau a ulsingch el kirel, e diak el ngii omerael el Chedam er a Babelaudes a uldureklau el kirel. Molatk el kmo, kau a kmal redil ngelekel a Dios!

Sel modengelii tiang, eak kulengit me morael el blekebek e mngara deureng. Oi, a rael a betok a tebtebull me a metucheklel me a dirrek el kengaol er ngii. Eng di lak momtab. Momes er sel deureng el Demam er a Babelaudes a mla kudmeklii el kirem er a bek el bakes er tial omerollem. A deureng a seikid a mo ulebengelel, e dirrek el rael. “Budech er tial beluulechad, me a diak a ulebengelel klengar er sel tara beluulechad” a Ngii a mla yaksok el mei er kid.11 Tiaikid a uchul e Ngii a mla dmu er kid me “bo de ngara deureng.”

Me sel mousbech er a map el Demam er a Babeluades a mla meskau er tial omerollem, e ke mo er sel ngii a kau a kirem el ngarngii. Ke mukeroul el mo ngelekel a Dios el redil er sel teletael el kau a ulsingch el kirel.

Rodos, kemiu el ngeasek el redil er a Ikelesia, kemiu el ngeasek el sechelik, ngak el Apostol er a Rubak a meskemiu a klengeltengat el kmo ko mo metik er a rael er tial omerolliu el mo remei e mo ngeso el mora rebebil el ngar tial omerael. Ak dirrek el yaksok e meluluuch el kmo sel mongull e moltirakl a telbiieliu, osisechakl, me a llach er a ebangkelio er a Jesus Kristo, e sel ulebongel er a omerolliu ea Chedam er a Babeluades a ngarisei. Ngii a mo mechulau, e ngulebongel el bo modengei el kmo ke mla mo remei. El ngara ngklel a Jesus Kristo, amen.

Mosiik a Osisiu

  1.  

    1. Mesa Charles Dickens, A Christmas Carol.

  2.  

    2. Mesa J. R. R. Tolkien, The Hobbit.

  3.  

    3. Mesa Johanes 14:6.

  4.  

    4. Mesa Doctrine and Covenants 68:6; dirrek el mesa Isaia 41:10; Johanes 14:18.

  5.  

    5. Mesa 1 Samuel 16:7.

  6.  

    6. Mesa 1 Petrus 5:6–7.

  7.  

    7. Mesa Jeremiah 29:13.

  8.  

    8. Johanes 15:12; dirrek el mesa Johanes 13:34; Moroni 7:45–48.

  9.  

    9. Mesa Doctrine and Covenants 138:56.

  10.  

    10. Mesa Doctrine and Covenants 78:18; dirrek el mesa Johanes 16:33; 3 Nephi 1:13.

  11.  

    11. Mesa Doctrine and Covenants 59:23.