Erom Inem̧m̧an im Ettā Bōro

Mormon ekar katakin bwe juon armej ‟ejjab maron̄ wōr an tōmak im kōjatdikdik, ijjeļo̧kin n̄e enaaj inem̧m̧an, im ettā buruōn.”¹ Mormon ekar bar kobaik bwe n̄e ejjeļo̧k kain jinōkjeej, ‟tōmak im kōjatdikdik e waan, bwe ejjeļo̧k bōk e im̧aan Anij, ijjeļo̧kin ri inem̧m̧an im ettā ilo bōro.”²

Inem̧m̧an ej kadkadin ro rej ‟Mijak Anij, mour jim̧we, ettā bōrō, kipilie, kijenmej ilo en̄taan.” ³ Ro ewōr ippāer jon̄ok in rej laurin̄rin̄ im ikdelel n̄an ļoor Jisōs Kraist, im piktokier einem̧m̧an, ejatōr, eniknik, epokake, im ekijenmej.

Rijilōk Paul ar katakin bwe ineem̧m̧an ej juon leen Jetōb.⁴ Kōn menin, emaron̄ pidodo bōke eļan̄n̄e jej ‟mour kōn jetōb.” ⁵ N̄an mour kōn jetōb, jekjekin ad mour eaikuj kwaļo̧k jim̧we im̧aan mejen Irooj.

Ilo ad bōk iood etan Kraist, kōtmāne bwe jej kajieon̄ n̄an ļoor jon̄ok ko An im ukōt kadkad eo ad n̄an ad erom̧ eļapļo̧k āinwōt E kajjojo raan. Rilo̧mo̧o̧r, eaar rōjan̄ rikaļoor ro An, ekar ba, ‟Innām kom̧ naaj weeppān āinwōt Jememwōj Ilan̄ E weeppān.”⁶ Eļan̄n̄e jej ‟itok n̄an Kraist,… kaarmejete [kōjmake] jen aolep men ko rejjab em̧m̧an; … im iakwe Anij,” innām kōn jouj an Kraist raan eo enaaj itok n̄e jenaaj erom weppān ilo E.⁷

‟Jon̄ok ko āinwōt an Kraist rej menin letok jān Anij. [Jon̄ok kein] rej itok ilo an jim̧we [ad] kōjerbal anemkwoj eo [ad]. … Kōn juon kōņaan n̄an kam̧ōņōņōik Anij, [jej aikuj] kile m̧ōjņo̧ ko [ad] im ikdelel im kijoror n̄an eddōkļo̧k.”⁸

Bwe inem̧m̧an eaorōk n̄an kōj n̄an ļapļo̧k ad erom āinwōt Kraist. N̄e ejjeļo̧k inem̧m̧an jejjab maron̄ ejaak bar jet kain mour wānōk ko raorōk. Jino ineem̧m̧an ejjab meļeļein m̧ōjņo̧, ak ej meļeļein m̧wil em̧m̧an kōn jouj, meanwōd, kwaļo̧k kajoor, aenōm̧m̧an, tokje, im kemmaanwa.

Inem̧m̧an ekar juon iaan jon̄ok ko elutokļo̧k ilo mour eo an Rilo̧mo̧o̧r eo. E Make eaar katakin rikaļoor ro an, ‟Katak Ippa, bwe Ij ineem̧m̧an im ettā būruōn.”⁹

Jej jeram̧m̧an n̄an ļotak kōn ine in inem̧m̧an eo ilo buruwōd. Jej aikuj meļeļe bwe ejjab pidodo n̄an katōk im kōkm̧anm̧an ļo̧k ine eo ilo bwikin kwole ilo rom ak kōn juon iien aitok. Kraist eaar kajjitōk ippād n̄an, ‟ekōņaan [itok ] ilo̧katok, ”¹⁰ meļeļein bwe eaikuj juon mije eo ejjejet im kōņaan.

Būreejtōn Lorenzo Snow, rikanaan eo kein kōļalem ilo epepen in, eaar kwaļo̧k, ‟Ej ad eddo n̄an kajieon̄ erom weppān, … n̄an em̧m̧anļo̧k kajjojo raan, im n̄an etale men ko jekar kōm̧m̧ani wiik eo ļo̧k im kōm̧m̧ani men ko rem̧m̧an wiik in; kōm̧m̧ani men ko rem̧m̧an rainin jen ke jōkar kōm̧m̧ani raan eo inne.”¹¹ Innām bun̄tōn nee eo m̧oktata n̄an erom inem̧m̧an ej em̧m̧anļo̧k jen raan n̄an raan. Kajjojo raan jej aikuj kajieon̄ n̄an em̧m̧anļo̧k jen raan eo inne ilo ad wōnm̧aanļo̧k kōn jerbal ilo iaļ in.

Būreejtōn Snow eaar bar kobaiktok:

‟Ewōr jidik ad udekek im ad m̧ōjņo̧; jej aikuj kajieon̄ n̄an eļļā ļo̧k jāni ilo iien eo em̧ōkajtata, im … aikuj [baj likūt ] wōt en̄jake in ilo būruōn ro nejid … bwe ren maron̄ katak n̄an kōkm̧anm̧an [m̧wilier] im̧aan Mejen ilo jabdewōt jekjek ko.

‟Eļan̄n̄e ļeo pālele emaron̄ mour ippān lio pāleen ium̧win juon raan kōn ejjeļo̧k akweel ak ilo jab lāj n̄an ro jet ak ilo jab kaburom̧ōj Jetōb an Anij … ; elukkuun baj weeppān. Innām kōtļo̧k bwe en kajieon̄ ejja āinwōt raan eo tok juon. Bōtaab arromeļo̧k an likjab n̄an kōm̧m̧ane raan eo juon, ejjeļo̧k unin etke ejjab maron̄ em̧m̧an an kōm̧m̧ane ilo raan eo kein kajilu.”¹²

N̄an kile wujlepļo̧k im kakkōt eo ad, Irooj enaaj letok n̄an kōj men eo jejjab maron̄ bōk kōn jab weeppān ko ad im m̧ōjņo̧ ko an armej.

Bar juon bun̄tōn nee eaorōk n̄an erom inem̧m̧an ej ekkatak ekōjkan n̄an dāpij ad illu. Kōnke rikōjdāt epād ilubwilijid kajjojo im kōnke jej mour ilo juon laļ eobrak kōn inepata, dāpij ad illu emaron̄ erom juon iaan apan̄ ko reļļap ilo mour ko ad. Kejokļo̧kjeņ ium̧win jidik iien ekōjkan mejatoto eo am n̄e ro jet rejjab ļoor kōņaan ko am ilo iien eo kokņaan bwe ren. Ak n̄e armej rejjab errā kōn ļōmņak ko am, men̄e kolukkuun jeļā bwe ļōmņak ko am rej uwaak ko rekkar n̄an jorrāān eo? Ta uwaak eo am n̄e ro jet rej ellotaan eok, ņotaik kijejeto ko am, ak jab jouj kōnke rem̧m̧ōļkaro? Ilo iien rōt kein im bar jet jekjek ko reppen, jej aikuj katak n̄an dāpij ad illu im kwaļo̧k en̄jake ko ad kōn kijenmej im kareel em̧m̧an. Elukkuun aorōk ilo m̧oko m̧ōd im jemjerā eo ad ippān eo m̧ōttad indeeo. Ilo 31 iiō ko ikar m̧areik jitenbōro eo aō, emmakijkij an kijon̄ letok n̄an eō kakeememej ko remeanwōd kōn menin ilo am kar ioon apan̄ ko an mour ejej jem̧ļo̧kier.

Ilubwilijin kōmeļeļe ko loi ilo leta eo an kein karuo n̄an Timote, Rijilōk Paul ekar ba:

‟Im rikarijeran Irooj, en jab akwāāl, a en jouj n̄an armej otemjej im pojak in katakin armej, en meanwōd,

‟Ilo ineem̧m̧an en kajim̧we ro rej jum̧ae; eļan̄n̄e bōlen Anij enaaj leļo̧k n̄an er ukeļo̧k bwe ren jeļā m̧ool;

‟Im bwe ren maron̄ kōtļo̧k ermake.”¹³

Kōn jeļā dāpij uwaak ko ad, aenōm̧m̧an im jo̧kne, im ko̧jekdo̧o̧n iakweelel, jenaaj ijjino n̄an menin letok an inem̧m̧an. Būreejtōn Henry  B. Eyring ekar ba, ‟Eļan̄n̄e jej kōn tōmak dāpij ad illu im anjo̧ jen uteij bōro, Jetōb Kwojarjar ej letok kōmālim eo An, im kalim̧m̧ur im bujen ko rekwojarjar rej kūrm̧ool.”¹⁴

Bar juon bun̄tōn nee n̄an bōk inem̧m̧an ej n̄an erom ettā. Irooj eaar kōmeļeļeik Thomas  B. Marsh kōn rikanaan Joseph Smith, bwe e eaikuj ettā im Irooj Anij enaaj tōl ļo̧k e kōn pein, im leļo̧k uwaak in jar ko an.¹⁵

Ij tōmak bwe ro wōt rettā rej maron̄ kile im meļeļe uwaak ko an Irooj n̄an jar ko aer. Eo ettā ekipilie, kile jon̄an aer make ļo̧k ilo pein Anij im kōņaan n̄an erom doon n̄an An kilaan. Rittā rej aenōm̧m̧an im wōr kajoor n̄an kareel ro jet n̄an erom ejja āinwōt kōn aer kareel. Kalim̧m̧ur an Anij n̄an rittā ej bwe Enaaj tōl er kōn pein. Ij lukkuun tōmak bwe jenaaj kōjekdo̧o̧n men ko remaron̄ tarļo̧ke kōj jen iaļ eo Irooj ekōņaan n̄an kōj im būrom̧ōj ko ilo mour ko ad toon wōt ad etetal im jibwe pein doon ippān Irooj.

Juon iaan waanjon̄ok ko raiboojoj raan kein kōn inem̧m̧an me Ikar ron̄ ej kōn oktaktok eo an Brother Moses Mahlangu. Bwebwenato eo oktak an eaar ijjino ilo 1964, ke eaar bōk juon kape in Bok in Mormon. Eaar bwilōn̄ ilo an kar riiti bok in, ak ejjab to ituriin ļo̧k 70 jima ko eaar lo juon LDS Church jain ilo juon em̧ ekilep ke ekar etetal ilo juon iaļ. Brother Mahlangu eaar iruj lo̧jien im kar deļo̧n̄e m̧weo n̄an katak eļapļo̧k kōn Kabun̄ in. Kar jiron̄ e bwe ejjab maron̄ pād ilo iien jar ko ak peptaij kōnke kakien ko an laļ eo, jab kōmālimi ilo tōre eo.

Brother Mahlangu ekar bōk ļōmņak eo kōn inem̧m̧an, ettā, im kar jab ellotaan, ak eaar wōnm̧aanļo̧k n̄an bōk juon kōņaan ekajoor n̄an katak eļapļo̧k kōn Kabun̄ in. Ekar jeļā bwe ededeļo̧k an lo ta eo eto an kar pukōte ium̧win iiō ko. Eaar kajjitōk ippān ritōl ro an Kabun̄ in eļan̄n̄e remaron̄ kōppeļļo̧k wōt juon iaan wintō ko ilo im̧ōn kweilo̧k eo ilo iien kweilo̧k ko ilo Jabōt bwe en maron̄ jijet nabōj im ron̄jake katak ko. Ium̧win jet iiō ko, baam̧ļe eo an Brother Mahlangu im ro m̧ōttan aolep iien rej pād ilo im̧ōn jar ilo aer jijet nabōj turin wintō eo epeļļo̧k im ron̄jake. Juon raan ilo 1980 kar jiron̄ er bwe remaron̄ deļo̧n̄ ilowaan im̧o̧n jar eo im barāinwōt peptaij. Eaar juon raan eaiboojoj n̄an Brother Mahlangu.

Tokālik, Kabun̄ in ekar ejaake juon branch ijo jikin ilo Soweto. Menin ekar pidodo  kōn wōt kōttōpar, peran, im tōmak an armej ro āinwōt Brother Mahlangu eo ekar tōmak wōt ium̧win elōn̄ iiō ko ilo elōn̄ jekjek ko reppen.

Juon iaan ro m̧ōttan Brother Mahlangu, eo ekar kobatok ilo Kabun̄ in ilo ejja iien eo wōt, kar bar kwaļo̧k bwebwenato in n̄an n̄a ke Iaar loļo̧k Soweto stake. Ilo jem̧ļo̧kin bwebwenato eo am, eaar atōbakoj eō. Ilo iien eo, ro jeiū im jatū, ikar en̄jake āinwōt n̄e Iaar jebooļ ilo pein iakwe eo an Rilo̧mo̧o̧r. Inem̧m̧an eaar waļo̧k jen mejen brother in em̧m̧an. Kōn juon bōro eobrak kōn jouj im kam̧m̧oolol eļap, eaar kajjitōk eļan̄n̄e Imaron̄ kajjitōk ippān Būreejtōn Thomas S. Monson kōn jon̄an kam̧m̧oolol im jeram̧m̧an eo e im elōn̄ ro jet me raar bōk ko̧jpeļ eo em̧ool ilo mour ko aer. Waanjon̄ok eo an Brother Mahlangu im ro m̧ōttan kōn inem̧m̧aan elukkuun kareel elōn̄ mour n̄an―kōn em̧man eļaptata mour eo aō.

Ro jeiū im jatū, Ij tōmak bwe Rilo̧mo̧or Jisōs Kraist ej waanjon̄ok eo eļaptata an inem̧m̧an. Mekarta ilo iien ko āliktata in mour wabanban eo An, jab em̧m̧an kar notaiki im kakkure, metak ineek make debwāāl eo An n̄an Golgotha, kar kajjirere kake im kanijnij jān rikōjdāt ro An, kar meļo̧kļo̧k e jān elōn̄ ro rekar jeļā kajjien im kar kam̧ool kōn menin bwilōn̄ ko An, kar diliaiki ioon debwāāl.

Men̄e ālkin metak eo ekein̄taanan, Irooj eaar reilo̧k n̄an Jemen im kōnono ilo inem̧m̧an im ettā: ‟Jema, Kwōn joļo̧k rueir, bwe rejaje ta eo rej kōm̧m̧ane.”¹⁶ Kraist eaar en̄jake en̄taan eo eļap jim̧or ilo kanniōk im jetōb, letok n̄an kōj iien em̧m̧an n̄an ukōt kadkadin jetōb eo ad im erom inem̧m̧an āinwōt E.

Ij kwaļo̧k kam̧ool bwe Jisōs Kraist ej ad Rilo̧mo̧or. Ij kam̧ool n̄an kom bwe, kam̧m̧oolol kōn An iakwe, epidodo n̄an oktak. Epidodo n̄an ad door m̧ōjņo̧ ko ad itulik. Epidodo n̄an kaarmejete kareel ko an tepil ilo mour ko ad, dāpij ad illu, erom inem̧m̧an, im kōļapļo̧k jon̄ok ko an ad Rilo̧mo̧o̧r. Eaar kwaļo̧k n̄an kōj iaļ eo. Eaar letok n̄an kōj waanjon̄ok eo eweppān im rōjan̄ kōj kajjojo n̄an erom āinwōt E. Kūr eo An n̄an kōj ej n̄an ļoor E, lo̧o̧r An waanjon̄ok, im erom āinwōt E. Kōn men kein rem̧ool Ij kwaļo̧k aō naan in kam̧ool ilo Etan ekwojarjar, Jisōs Kraist, amen.