Fakpahp ac Inse Puhsisacl

Sel Elder Ulisses Soares

Ke Prestuhnsi luhn Mwet Itngucul


Tiac kalmacn fakpahp pa muhnahs, tuhsruhk kalmac pa in oruh elah wo ac kuhlwacng.

Mormon el luti lah tiac kuh in oasr luhlahlfongi ac finsrak luhn sie mwet, sahyacn na el fakpahp, ac inse puhsisacl.1 El tahfwelah lah fin wacngihn kain ohiyac inge, luhlahlfongi ac finsrak uh wacngihn srihpac, tuh wacngihn kuhtwena ma wo ye muhtuhn God, sahyacn na fakpahp ac inse puhsisacl.2

Fakpahp pa ohiyac luhn elos suc sahngweng sin God, suwohswohs, inse puhsisacl, kuh in lutiyuck, ac mong fihsrwacsr ke kweok.3 Elos suc sruokyac na ohiyac se inge uh pa insese in fahsr tukun Jisus Kraist, ac mongwaclos ohi, ahkostwen, ac kuh in lutiyuck.

Mwet Sap Paul el luti lah fakpahp pa sie fahko luhn Nguhn.4 Pwacnwacng, ke ma inge ac arulacna fihsrwacsr in sruokyac fin kuht moul ke Nguhn.5 Ac in moul ke Nguhn, ohiyacn moul lasr uh enenuh in ahkkahlwemye ohiyac suwohswohs ye muhtuhn Leum.

Ke kuht eis inen Kraist nuh facsr, motkweyuck tuh kuht in srihke in etahin ohiyac Lal ac ekuhllah ohiyacsr in oacna El ke kais sie lwen. Mwet Lahngo, El kai mwet tuhma lutlut Lal, fahk, “Kowos enenuh in suwohsna, oacna ke Pahpah tomowos inkuhsrao El suwohsna.”6 Kuht fin tuhkuh nuh yurin Kraist, sislah ma koluk nuh kwewa, ac luhngse God, na ke luhng kuhlwacng luhn Kraist pacl se ac fah tuhkuh ke kuht ac muh ahksuwohsyeyucklac Kacl.7

“Ohiyac luhn Kraist pa mwe sang sin God. [Ohiyac inge] tuhkuh ke [kuht] orekmakihn suwohs sukohsohk in sulaclah [lasr] uh. … Ke sie kena in ahkenganye God, [kuht enenuh in] akihlen muhnahs [lasr] ac in insese ac rahrah in wolac.”8

Fakpahp uh yohk srihpac nuh sesr in eklac oacna Kraist. Fin wacngihn fakpahp kuht ac tiac kuh in orwaclah ma wo yohk srihpac sahyac. Tiac kalmacn fakpahp pa muhnahs, tuhsruhk kalmac pa in oruh elah wo ac kuhlwacng, ahkkahlwemye kuh, mihs, ohiyac wo lom sifacna, ac sifacna kutong kom.

Fakpahp pa sie sin ohiyac yohk ke moul luhn Mwet Lahngo. El Sifacna luti mwet tuhma lutlut Lal, “Lutlut Sihk; tuh Nga fakpahp ac inse puhsisacl.”9

Kuht insewowo in isuslac ke fihtac luhn fakpahp lun insiyacsr. Kuht enenuh in kahlwem kac lah tiacna fihsracsr in yukui ac karihngihn fihtac soko uh kena kihtin pacl tuhsruhk ke puhlan pacl se. Kraist El siyuck sesr in “sruhkwack sahkseng [lasr],”10 kalmac pa enenuh se in lohacng ac kena pacl nuh kwewa.

Prestuhn Lorenzo Snow, mwet pahluh ahklimekohsr ke lwen sahflah lasr uh, el luti, “ma kunacsr in srihke in suwohsna, … in wolac ke kais sie lwen, ac liye ma kuht oruh ke wik somlah ah ac oruh in wolac liki ke wik se inge; oruh ma uh in wolac mihsenge liki na kuht owraclah ekweah.”11 Na oruh se emet in fakpahpi pa in wolac ke lwen nuh kwewa. Kais sie lwen kuht enenuh in srihke in wolac liki lwen se met ah ke kuht ahkwot nuh met ke oruh se inge.

Prestuhn Snow el tahfwelah:

“Oasr kuhtuhsrihsrihk mukwikwi lahlfon lasr ac muhnahs lasr; kuht enenuh in srihke in kuhtanglah ma inge in sa, ac … enenuh in [oakiyac] puhla se inge ke insiyacn tuhlihk nahtuhsr … tuh elos in kuh in [elah] wo ye Muhtahl ke ohiyac sikyak nuh kwewa.

“Fin sie mukul pahyuck kuh in wi muhtwacn kiyacl an muhta ke lwen se ac tiac akuhkuhin kuh tiac sekuhlwacng nuh sin kuhtwena mwet kuh tiac ahksuhpwacrye Nguhn luhn God … ; el arulacna suwohsna. Na lwelah elan srihke oacna ke lwen se tok an. Tuhsruhk sahp el puhtatlac in oruh ohinge ke lwen se tok ah, wacngihn kuhtwena srihpac ma oruh elan tiac kuhtanglah in oruh ke lwen ahktolu.”12

Ke akihlenyacn insacnweacng ac muhtweng lasr, Leum El fah use nuh sesr ma kuht tiac kuh in sruokyac ke srihpen sesuwohs lasr ac muhnahs luhn mwet.

Sie pac oruh yohk srihpac in fakpahpi uh pa in lotwelah in kutong mongohsr. Ke srihpen ohiyacn mwet uh oasr in kuht kais sie ac ke srihpen kuht muhta ke sie facl ma sesseslah ke ma toasr, kutongyacn mongohsr kuh in pa sie mwe srihkeyuck ke moul lasr uh. Motko ke kihtin pacl lah kom mukwikwi fuhkah ke mwet se tiacna ahkos kena se lom ke pacl se na ma kom kena an. Fuhkah ke mwet uh tiac insese ke nuhnak lom an, finne ke kom etuh na pwacye lah nuhnak ingacn ac ahkwoyaclah elyah uh? Meac top lom ke mwet se ahkkolukye kom, suhfan orekma lom, kuh sekuhlwacng ke srihpen elos srihnglac? Ke pacl inge ac ke ohiyac upac sahyac, kuht enenuh in lotwelah in kutong mongohsr ac ahkkahlwemye ma kuht puhla uh ke mongfihsrwacsr ac kwacfe ohi. Ma inge yohk srihpac emet ke lohm sesr uh ac ke mukwikwi lasr yurin mukul kuh muhtwacn ma pahtpaht kiyacsr. Ke lusen yac 31 ma nga pahyuck nuh sin sweetheart se luhk, el kwacna use nuh sihk mwe acsmak ohi ke ma se inge ke kuht puhlakihn ma upac luhn moul.

Inmahsrlon mwe luti sukokyak ke Lwacta Ahkluo lal nuh sel Timothy, Mwet Sap Paul el fahk:

“Ac mwet kuhlwacnsap luhn Leum uh tiac fal … in akuhkuhin; a elan kuhlwacng nuh sin mwet nuh kwewa, … in luti wo, ac mongfihsrwacsr,

“Elan mongfihsrwacsr ke pacl el ahksuwohsye mwet lain nuh sel; sahp God El ac sang pacl wo nuh selos elos in auliyak ac etuh ma pwacye;

“Ac tohkoh elos fah acsmaklac.”13

Ke kutongyacn mukwikwi lasr uh, in mihs ac ohi, ac kahingkihn fohs, kuht ac muhtwacack in fal in eis mwe sang luhn fakpahp. Prestuhn Henry B. Eyring el tuh fahk sie pacl ah “ke kuht karihngihn ke luhlahlfongi in kutong mongohsr ac kihlyac inse fuhlwact uh, Nguhn Muhtahl El sang insese Lal, ac uli ac olweacng muhtahl uh kuh in sikyak pwacye.”14

Sie pac oruh in eis fakpahp pa in puhsisacli. Leum El luti nuh sel Thomas B. Marsh kacl Mwet Pahluh Joseph Smith fahk lah el (Thomas B. Marsh), enenuh in inse puhsisacl na El fah kohlohl ke pahol, ac sang nuh sel top nuh ke pruhe lal.15

Nga luhlahlfongi muh elos muhkwena suc inse puhsisacl ac kuh in akihlen ac kahlwem ke top luhn Leum nuh ke pruhe lalos. Mwet inse puhsisacl uh kuh in lutiyuck, akihlen luhpan fungyang lalos nuh sin God ac kena in muhta ye kuh Lal. Mwet inse puhsisacl uh fakpahp ac elos kuh in mokle mwet sahyac in oruh oacna. Uli luhn God nuh sin mwet inse puhsisacl pa lah El ac fah kohlohlos ke paholos. Nga arulacna luhlahlfongi lah kuht ac kahingkihn inkacnek ma pwenkuhtlac liki inkacnek ma Leum El kena nuh sesr ac kahingkihn suhpwacr ke moul lasr uh kuht fin fahsr asrihkpolac sin Leum.

Sie sin mwe srihkasrak na kahto emet mihsenge ke fakpahp ma nga etuh kac uh pa kacl Tamuhlwel Moses Mahlangu. Welah se lal uh muhtwacwacack ke yac 1964, ke el tuh eis sie Puk luhn Mormon. El fwefwelac ke el riti puk se inge, tuhsruhk tiac ne ke na muhtuhn puhlan pacl se ke yac 1970 kuhtuh ah, el liyacack akucl luhn Alu ke Lwen-sahflah ke lohm luhlahp se fin acn Johannesburg, South Africa, ke el fahsr inkacnek ah. Tamuhlwel Mahlangu el lut ac utyak nuh lohm sac in lohlngohk pac ke Alu uh. Fwack nuh sel ke kuhlwacng lah el tiac kuh in wi toeni alu kuh pacptaislac ke srihpen masap luhn muhtuhnfacl ah tiac lwelah ke pacl sacn.

Tamuhlwel Mahlangu el inseselac ke wotlac ingacn ke fakpahp, inse puhsisacl, ac tiac srahngwesr, tuhsruhk el tiac tui in oasr kena yohk se in etwaclah yohk ke Alu uh. El siyuck sin mwet kol ke Alu ah elos fin kuh in ikacslah sie winto ke lohm alu ah ke toeni ke Sacnri elan muh kuh in muhta lihkihnihm ah ac lohng alu uh. Ke lusen yac pucspucs, Sucu ac kawuck lal tamuhlwel Mahlangu elos wi alu pacl nuh kwewa ke elos muhta lihkihnihm sisken winto ah ac lohng. Sie lwen ah ke yac 1980 tuh fwack nuh selos lah elos kuh in welah alu uh ac oacyacpac pacptaislac. Fuhkah wolacnaiyacn lwen sacn nuh sel Tamuhlwel Mahlangu.

Tohkoh Alu uh oakiyac pracns se ke inkucl sel ah fin acn Soweto. Ma inge sikyak  muhkwena  ke srihpen insacnweacng, puhlaik, ac oaru luhn mwet suc oacna Tamuhlwel Mahlangu suc muhtweng ke luhlahlfongi ke lusen yac pucspucs ke ohiyac sikyak upac.

Sie sin kawuck lal Tamuhlwel Mahlangu, suc tuh welah Alu uh ke pacl sacpacna, el sruhmuhn sramsram se inge nuh sihk ke nga muhtwactalah nuh ke stek Soweto. Ke sahflahiyacn sramsram lasr ah el apihsyucwi. Ke pacl sac, tamuhlwel ac tahmtahel, nga puhla oacna in muh nga apihsyucki ke po luhngse luhn Mwet Lahngo. Tamuhlwel se inge ahkkahlwemye ohiyacn fakpahp. Ke sie inse sesseslah ke ma wo ac kuloh yohk, el siyuck fin nga kuh in fahk nuh sel Prestuhn Thomas S. Monson luhpan kuloh ac insewowo lal ac mwet pucspucs sahyac ke oasr wosasuc pwacye in moul lalos uh. Mwe srihkasrak ke fakpahp lal Tamuhlwel Mahlangu ac kawuck lal ah pwacyena lah moklweack moul pucspucs in wolac—yohkna moul luhk uh.

Tamuhlwel ac tahmtahel, nga luhlahlfongi tuh Mwet Lahngo Jisus Kraist pa mwe srihkasrak yohk se emet ke fakpahp. Finne ke puhlan pacl sahflah ke moul in sukawihl Lal, ke tuhkahkyak ac sruhngwacyuck, El kweok us sahkseng Lal nuh Golgotha, ahksruhksruhkyeyuck ac koskosiyuck sin mwet lokoalok Lal, sisyucklac sin mwet pucspucs suc Etwacl ac liye ma usrnguck Lal, El srihpsrihpyak fin sahkseng soko.

Finne tukun kweok upac luhn mahno, Leum El foracng nuh sin Pahpah Tuhmwacl ac fahk ke insiyacl nohfohn ke fakpahp ac inse puhsisacl: “Pahpah, nuhnak muhnahs nuh selos; tuh elos tiac etuh ma elos oruh.”16 Kraist El puhlakihn kweok upac luhn mahno ac nguhn, use nuh sesr pacl wo in ekuhllah ohiyacn nguhnasr ac eklac fakpahp oacna El.

Nga fahkwack mwe loh luhk lah Jisus Kraist pa Mwet Lahngo lasr. Nga fahkwack nuh suwos lah, kuloh ke luhngse Lal, kuht kuh in eklac. Kuht kuh in fihliyac tohkohsr muhnahs lasr. Kuht kuh in forlah liki ma mokleyuck koluk ke moul lasr uh, kutong kasrkuhsrak lasr uh, fakpahpi, ac kapkapwack ke ohiyac luhn Mwet Lahngo. El ahkkahlwemye nuh sesr inkacnek uh. El use nuh sesr mwe srihkasrak suwohs ac sapkihn kais sie sesr in oacna El. Suli Lal nuh sesr uh pa in fahsr Tohkohl, fahsr tukun mwe srihkasrak Lal, ac oacna El. Ke ma pwacye inge nga oruh fahkwack luhlahlfongi ke ine muhtahl Lal, Jisus Kraist, amen.

Mostrar referencias

  1.  

    1. Liye Moroni 7:43.

  2.  

    2. Liye Moroni 7:44.

  3.  

    3. Mwe Kol nuh ke Ma Suhmuhslah uh, “Meek, Meekness,” scriptures.lds.org.

  4.  

    4. Liye Galatians 5:22–23.

  5.  

    5. Liye Galatians 5:25.

  6.  

    6. Liye Mattu 5:48.

  7.  

    7. LiyeMoroni 10:32.

  8.  

    8. LiyePreach My Gospel: A Guide to Missionary Service (2004), 115.

  9.  

    9. Liye Mattu 11:29.

  10.  

    10. LiyeLuk 9:23.

  11.  

    11. Lorenzo Snow, ke Conference Report, Eprel 1898, 13.

  12.  

    12. Teachings of Presidents of the Church: Lorenzo Snow (2012), 100, 101.

  13.  

    13. Liye 2 Timothy 2:24–26.

  14.  

    14. Henry B. Eyring, “Families under Covenant,” Ensign or Liahona, Mei 2012, 65.

  15.  

    15. Liye Doctrine and Covenants 112:10.

  16.  

    16. Liye Luk 23:34.