Bo el Obult a Rengum

Rudam me a rudos, a kuba klengariou el reng el dechor er tiang el betok el chad el kchemat er tir a mla dechor rengii. Ng soak el mouchais a bebil er a kumelchesiu el ngara renguk e a ikang a tokubets el mo er a rengeasek.

A ta er dechat er ngii el ngara Uodel el Renged a mle soldau e profet el ngii a Jushua. Ng mle mengemedaod er a rengelekel Israel el ngii a ulmekrael er tir el kmo: “Molilt er chelechang el kmo ko mo mesiou er techang … eng di ngak me a re chad er a blik, a mo mesiou er a Rubak.”¹ Aikal tekingel a Joshua a olechotel a meral bult el mora ebangkelio. A denguu er a Joshua me kid el rokui, e a bult el mo er a osisecheklel ebangkelio a mei lokiu a melemalt el otireklel osisechaklel a ebangkelio me a otireklel a telbiled lobengkel a Rubak.

Ng soak el mo ouchais er a cheldecheduch el mengai er a reksi er a telungalek er ngak el ngii a ta er a kchat er ngii. A ngklel a Agnes Hoggan, e ngii me a bechil a mlo chad er a Ikelesia er a Scotland er sera 1861. Te mlo chuarm er a mekngit lomeruul er a belurir, me te millukl el mo er a Merikel tir me a rengelekir. Bebil rak ruriul, e a Agnes a millakl el dil lobetiterir a re teai el ngalek loungerachel er tir el meringel loureor me le medinges el ngarngii a bilir. A teruich me a terung a rekil ngelekel, el Isabelle, a mlo ngeltengat el miltik er a urerel el mesiou er a merau, el telungalek el diak el LDS.

A Isabelle a kiliei er a klou el blirir e ullengeseu lomes er a mekekerei el ngelekir. Ng milruul a ikal ureor, e te omsa delal a sesei ludoud er a bek el sandei. A Isabelle di mle mereched e tenguu meng ua el tara chad er a telungalek er tir meng mlo omuchel el melai a klungiaol el uai tir, el mesuub a ngloik, oubail a ungil bail, e mo omes a katsudo. Tial omeruul a mle ngarngii el eua el rak, di le merko tirkal telungalek el Isabel oureor el mo er tir a melukl el mo er a tara beluu. Tirka kmal mla mo smau er a Isabel me te mlo duum er a delal, el Agnes, el ulengit el mo rodelii lokiu a llach. Te mle iaksok el mo msang a ungil skuul, e mesa mo bechiil lungil, e rulii meng mo tara melai a daisang er tir lobengterir tirkal ngelekir. Eng di te melemolem el harau a udoud el mo er a Agnes.

Ng kal meringel a klechad er ngii el chedil a chelbangel er a meringel el uldasu, eng di tia dimlak el meketeket. Ka morrenges er a tekingel a ngelekel a ngelekel redil, aika luluches er a betok el rak ruriul: “Alsekum me a beltkil a rengul a dimlak [lormelii] el mo kotouar, eng ngar ngii a kmal lemuut lungil luchul—ng kang a mlei el mlara Scotland e mla soiseb er a betok longarm me a ringel el kirel a Ebangkelio, e dimlak er a uldesuel, alsekum eng sebechel a chad a choua tial tekoi, el mecherei a ngelekel meng choitii sel ngii a mlara cheroid el mei el kirel me bol klungiolel.”² Tirka el merau el telungalek a ulusbech a bek bedengel a omengesuseu, me a Isabelle a lilangel e ullengit me bol sebechel merael, eng di a Agnes a dimlak el mesim. Me kau a sebechem el mesang choua tiang, el elolem a rekil Isabel a ulemelchesiu er a klengar er ngii el mtemellang.

A Isabelle Hoggan a delal a redelak el mechas, me a kot el mui er saul er a klaumerang me a blak el reng er ngii el mle mesisiich er a chelsel a rengul a delal, el ngii a dimlak el becherei mel ngai el mtechir a klchedal a Ikelesia er ngii er a tekingel a belulechad. Chelecha el sils eng betok el dart el telecheroll el mla er ngii el mei a ngara deureng er a klengeltengat e le te chad er a Ikelesia el ngii a mlo er tir lokiu a dmolech el klaumerang er a Agnes me a beltel el mo er a ebangkelio.

Ngeasek el sechelei, kid a kiei er a kmal kengaol el taem, a uldasu el kau a mocha kirem el mo oltaut er a bek el sils, malechub a bek el sikang, a ngarngii a bol relii er a ngarmedam el mong. A uldasu el moltaut a mo oterkeklii a mo dubech el mei er kau ruriul. Alsekum meng dirkak mnguu a dmolech el klaumerang me a mesisiich el klemedengei el kmo a Ikelesia er a Jesus Kristo er a Uriul-klebesei el Santo a rengedel a Dios el ngara beluulechad, e chelechang eng taem el kiriu el mo er sel tkul rebak el mo nguu tial klemedengei. A mo meoud el kudmeklii a ngeiul tial dmolech el klemedengei a sebechel mo chuker a kerreor el kirel..

A meral bult a diak el di el klemedengei er a osisecheklel a ebangkelio me a diak el di el klaumerang er a ikal osisechakl. Ng sebeched el ngar ngii a klaumerang er kid er a ebangkelio e diak doltirakl. A meral bult a belkul a kmo kid a mo ruul loltirakl a doumerang e kongei el mo er ngii” a klou el ngodech er kemam, malechub eng chelsel a rengmam.”³ Ngara babier er a True to the Faith, e kede mesuub el kmo a “bult a domekeroul er ngii, ng diak el dubech er a ta el taem. Kau a mo obult lokiu a … llemalt lomeruul loltirakl er a Osobel.”⁴ Ng mo melai a taem, blak el reng, me a ureor. A delal a rdelak a uleba dmolech el klemedengei el kmo a ebangkelio a lmuut el klou a belkul el mo er a rengelekel er a klungiaol er a beluulechad el ilteet me a ungil delengchokl eleng ngii el mlo chouarm, outekangel, el kiei loltirakl er a ebangkelio. A beltel a mlo er ngii lokiu a otireklel a osisecheklel a ebangkelio el blol charm el kirel.

Ng kired el mo soiseb er a osisiu el omeruul alsekum meng soad el mo nguu a osisiu el blak el reng. A Osobel a ulsisechakl el kmo alsekum me a chad a mo meruul a ikel soal, eng mo medengei el kmo a osisechakl, ng mlara Dios, malechub eng kuk di ngar kid.”⁵ Sel bebil er a team e kede meruul a tekoi el oubeteteluut. A okesiul tiang, e kede locha meruul er tiang: Ak mo ngara deureng alsekum a kultirakl er a llach er a ongeltacher, eng di a kot eng kirek el mo medengelii el kmo ngklemerang. Alta e kede locha meluluuch el mo er ngii a klaumerang er kid er a llach er a ongeltacher e oureng ulekum me a Rubak a omekngeltengat er kid er tial klaumerang ruchei er a doluches er a babier er a ongeltacher. Ng diak loureor el uaisei. A Rubak a mengerchir er kid el mo ousbech er a klaumerang er kid. Ng kired el di blechoel el melecha mui e merang el ongeltacher me bol sebeched el nguu a klaumerang er kid er a ongeltacher.

Ng soak el mo meskid okesiu lochotii a otireklel a osisechakl eng ngosukid el mo obult el mo er tial osisechakl. Ak mle ngeasek el dil er a chelesl a 60’s e di mle ta el ngak a LDS er a skulek. Tiang a mle taem er a bek bedengel a omeruul el lolecholt a ultekengel a di mla ngarngii el kerbai er a klechad, ulsbechellel a mekngit el kar, me a “bo er a ikel soam” el teletael. Betok el kim ta el basech a ungil chad eng di ng mle beot er tir el soiseb er tial klemeriar reng er a beches el klechad, e a mera rengii tia di mla meketeketa el delngerenger er a klechad. A delak me a demak me a resensei er ngak er a ikelesia a mla dolemii a belkul sel kungil e kulii a bedengek, mededaes a uldesuek, e sel kot el ngarbab, a mesuub el mo oumerang er a llechul a Rubak. Ak tilbir er a renguk el mo cheroid er a rokui el kudengei el mo er ngii a rrom er ngii e omekiai er a dekool me a mekngit el kar. Tia belkul a kmo ng dimlak kuldimukl er a omilil, me a ka bo kuilil lobengkel a sechal. A ulsbechellel a kar a mla mo siukang er a rengeasek, e a kngtil a dimlak desal medengei el ua chelechang. Te betok el kim ta el basech a miltemall ruruil er aikal kar el melodech a uldesued malechub e te mlo smau er a ulsbechellel. A kuureng a saul el mlosisechakl el moltirakl er a Llach er a Ulekereuil a Bedenged er a blik, e ngiluu a dmolch el klaumerang er ngak er ngii el osisechakl er a ebangkelio er sera kultirakl er ngii el oba klaumerang. Sel klungiolel a rengud el denguu er a otireklel a meral osisechakl er a ebangkelio a sel Edaol Reng el loterkeklii tial osisechakl el klemerang. Tiaikid sel desa a meral beltel a chad el omuchel.

A profet Moroni, er a Babier er a Mormon, a ulsisechakl el kmo a klaumerang a tekoi el doureng e diak de ues; me a le uaisei, e ngdiak domtok ele kid el diak de ues, e le ng diak deguu a sioning er tial tekoi dil merko bo luriul er a omelasem el a klaumerang er kid.”⁶Tial beluulechad el sebeched el ngmai a soad er a di mereched el taem, me kede blechoel ngara klengit el mengerchir er a sengk el diak a ta me doureor el kirel. A kuumerang el Moroni a melekoi er kid kired el oureor el kot e mochu oba klaumerang er otireklel ebangkelio, e kede monguu a sioning el merkid el kmo ng klemerang. A meral bult a morngii sel molemolem el meruul a modengei el osisechakl el kmo ng klemerang e oltirakl er ngii el llach, er a bek el sils, me a bek el buil.

Tia klebokel el taem el de ngeasek er a Ikelesia. Kemiu a kot el mo ousbech er a suobel el Mei, e Moltirakl er Ngak, el ngii a ngar ngii a ta er a moktek el ngii a mo omult er kau el mo er a ebangkelio er a Jesus Kristo. Ng di ngungil bo dolatk ng kmal mo uangera el ulekrael a delam me a demam me a roungerachel er a rengeasek, “kau [a] ngerchelem el kirem mo omult er a klengar rekau. Ng diak a mo obult el kirem, e diak a chad el lorrimel er kau el mo obult.”⁷ A bult a mo er ngii sel blak a rengud e meluluuch, mesuub a chedaol llechukl, ngara ikelesia, e klikiid el mo meruul a ruoll er a templo. A bult a mei sel dotirakl a melemalt el osisechakl e desuub er a rekeblid me a blil omesuub. A bult a mei sel de kiek el bliochel e kedung e ngara deureng loba a Chedaol Reng el obengked, e kiei el klikiid e kedung er a klengar er kid. A bult a mei sel dodengelii a Tngakireng er a Jesus Kristo e de kengei er Ngii er Osobeled e Olsobel, e mecherei a Tngakireng meng ngoureor er a klengar er kid.

A beltem a mo ngosukau el kutmemklau el mo meruul a telbiil er a templo, mo er a mission, e mengedmokl er a mo telungalek er kau er a ngarmedam. Me sel bo mobult, eng mo soam el mo cholecholt el mo er a rebebil aikel bla msuub, sel kloureng me a decham el ouchais el mo er a rebebil loba dmolech el klemedengei me a klisiich a mo klou. A klemeriar el mo omerk er a ebangkelio el mo er a rebebil e klou a rengum el bekeu louchais a rodech er a meral bult. A Osobel ulsisechakl er a Petrus, “E sel mleta el mer ngak, eng kirem el smisicheterir a rudam er kau.”⁸

Ke lotkii a Joshua el soldau e profet? Ngii a kmal dirk mle obult, eng di ng mle blak a rengul loureor el mo er a orokiolel a klengar rengii el lobetiterir a rengalek er a Israel el mo er a Dios. Kede mengui er a Uodel el Renged: “E a Israel a mle mesiou er a Rubak er a ikel rokui el sils er a Joshua.”⁹ A chad el mla nguu a meral bult a melai er a klisichel a Tngakireng e nguu a mo osebelii a klengar er ngii, e mochu oba klisichel el mengetikaik er tirkel tir a medengelii.

Otireklel a ebangkelio e dechor er a chedaol basio a diak el blechoel beot malechub el ungil, eng di a kuuchais el kmo ng meral klou a belkul. A Rubak a ulsisechakl er a Emma Smith el mo mechei a kloklel tial beluulechad, e mo osiik a kloklel a ungil beluulechad.”¹⁰ A kumdasu eng diak el sebeched el lomuchel mesang sel klungiolel aikel “kloklel a ungil” beluulechad!

A kuuchais el kmo kid a ngar ngii a ungil Demad er a Babeluades el sel kot el soal a mo ngusukid e omekngeltengat er kid er a blak el reng el kiei loltirakl er a ebangkelio e mo obult. Ngii a kmal mla meketeklii el kmo sel moktek er ngii me a urerel a kirel a diak a ulebengelel klengar.”¹¹ A urungulel a mo melai er kid el mo remei el ngar bita er Ngii. A kuuchais el kmo sel doltirakl a osisechakl er a ebangkelio e doruul er a bek el sils, e kede mo obult e mo dongu er a betok el lungil omeruul er a rekeblid me a beluulechad. Mei me kid el rokui bo de mukngeltengak er a blak el reng er kid el oureor el kirel tial moktek er kid a nglunguchek loba ngklel a Jesus Kristo, amen.