Kitim Kinej Ko Kinijier

Aolepādwōj rej jeram̧m̧an kōn eddo eo n̄an ro jet. N̄an kabwijer priesthood eo an Anij ej n̄an jitōn̄ er jān Anij n̄an mour indeeo ko an ro Nejin. Ej m̧ool in, ej aiboojoj, im jet iien maron̄ en̄jake etōr jān jon̄an.

Ewōr būreejtōn n̄an doulul eo an elder ro rej ron̄jake joten in eo ejeļā ta meļeļe in aō ba. En̄in ej ta eo eaar waļo̧k n̄an juon iaami. Eaar āinwōt kar waļo̧k n̄an elōn̄ iaami— im elōn̄ļo̧k jān juon alen. Meļeļe ko remaron̄ in okoktak, bōtaab jekjek eo ej juon wōt.

Juon elder eo kwojjab kanooj jeļā kajien eaar kajjitōk kōn jipan̄. Ej kab jeļā bwe eaar aikuj in kōm̧akūt lio pāleen im nin̄nin̄ ļaddik jidikdik eo nejin rainin jān apartment eo ijo raar jokwe n̄an bar juon jikin epaake ijo raar jokwe ie.

E im lio pāleen em̧ōj kadede aer kar kajjitōk ippān juon m̧ōttaer n̄e remaron̄ kōjerbal wa eo waan ium̧win juon raan n̄an kōm̧akūt men ko kōbwebwein m̧weo im m̧weiuk ko aer. Eo m̧ōttaer eaar leļo̧k bwe ren kōjerbal wa eo. Baba in edik eaar jino kanne aolep men ko m̧weier n̄an wa eo, bōtaab ilo minit ko im̧aan, eaar metak diin. Eo m̧ōttan eo eaar leļo̧k wa eo eaar kanooj in boub n̄an jipan̄. Baba in edik eaar en̄jake inepata. Eaar ļōmņak kōn kwe, būreejtōn an doulul eo an elder ro an.

Ilo iien eo eaar kajjitōk kōn jipan̄, eaar ilo ālkin raelep. Eaar raan eo joten eo kweilo̧k eo an Kabun̄. Em̧ōj an kadede kallim̧ūr n̄an jipan̄ lio pāleem̧ kōn būroojāāk ko an m̧weo raan eo. Ajri ro nejūm̧ raar kajjitōk ippam̧ n̄an kōm̧m̧ane juon men n̄an er, bōtaab ejjan̄in wōr de am̧ iien n̄an kōm̧m̧ane.

Kwar barāinwōt jeļā bwe membōr ro an doulul eo am̧, eļaptata ro retiljek tata, ro kwoj kijon̄ kūr n̄an er n̄an jipan̄, raar āinwōt ilo ejja iien eo epen me kwar pād ie.

Irooj eaar jeļā enaaj kar wōr am̧ raan ko reppen ke Eaar kūr eok n̄an jerbal in, kōn menin Eaar lewaj n̄an eok juon bwebwenato n̄an kōketak eok. Ej juon būrabōļ kōn rikabwijer priesthood ro rekanooj poub. Jej jet iien ņa etan bwebwenato eo kōn Risamaria eo em̧m̧an. Bōtaab ej m̧ool in bwebwenato n̄an juon rikabwijer an priesthood eo em̧m̧an, ilo raan kein reboub āliktata.

Bwebwenato eo ej juon wāween ejejjet n̄an juon rikarejar an priesthood eo etubūļak. Kememej bwe kwoj Risamaria eo im ejjab pris eo ak Rilevi eo me raar eļļā ļo̧k jān em̧m̧aan eo ekinejnej.

Komaron̄ jab ļōmņak kōn bwebwenato eo n̄e kwoj jelm̧ae kain idajon̄jon̄ kein. Bōtaab ij jar kwonaaj n̄e kain raan rōt kein rej bar waļo̧k, āinwōt aer lukkuun naaj.

Kar jab jiron̄ kōj ilo jeje ko rekwojarjar etke Risamaria eo eaar ilo̧k ilo iaļ eo jān Jerusalem n̄an Jericho. Ejjab lukkuun bwe eaar etetal make iaan ilo an kar jeļā bwe riko̧o̧t ro raar kōttar ro rōm̧ōk. Eaar ilo̧k ilo juon em̧m̧akūt eo eaorōk, im āinwōt kar iminene kake, eaar wōr juon ippān menin mour barāinwōt oil im wine.

Ilo naan ko an Irooj Risamaria eo, ke eaar lo em̧m̧aan eo ekinejnej eaar bōjrak, kōnke “eaar wōr an meanwōd.”

Eļapļo̧k jān en̄jake meanwōd, eaar jerbal. Iien otemjej kememej tipdik in bwebwenato eo:

“Im [e] ej itok n̄an ippān, im kūtimi kinej ko kinjen, im lutōk ioer oil im wain, im kajijet e ioon kidu eo an, im bōktok e n̄an im̧ōn ruwamāejet, im lale e.

“Im raan eo ilju ke ej ilo̧k ej bōk ruo sillin̄ im leļo̧k n̄an ri lale m̧weo im ba n̄an e, Kwōn lale e; im jabdewōt eo kwōj koorļo̧k, n̄e ij bar itok, I naaj ņa oņeam̧.”¹

Kwe im rikabwijer priesthood ro kom̧ij kūr n̄an tōl emaron̄ ewōr diktata jilu kallim̧ur ko. M̧oktata, Irooj enaaj lewaj n̄an kwe, eļan̄n̄e kwoj kajjitōk, en̄jake ko an meanwōd Ej en̄jake n̄an ro rej aikuj. Kein karuo, Enaaj kake n̄an ro jet, āinwōt rilale m̧weo, n̄an koba ippam̧ ilo jerbal eo am̧. Im jilu, Irooj, āinwōt Risamaria eo em̧m̧an, enaaj ļapļo̧k jān ņa wōņāān aolep ro rej koba ilo leļo̧k jipan̄ n̄an ro rej pād ilo aikuj.

Būreejtōn ro an doulul eo ami emaron̄ jerbal ioon kallim̧ur kein elōn̄ļo̧k jān juon alen. Kwoj kajjitōk ippān ro jet an priesthood eo an Irooj n̄an jipan̄, kōn lōke renaaj uwaak kōn meanwōd. Kom̧ kar jab mijak n̄an kajjitōk ippān ro me raar uwaak emakijkij tata jem̧aan kōnke kwar jeļā bwe eidodo aer en̄jake meanwōd. Kwar kajjitōk ippāer, jeļā bwe jem̧aan raar en̄jake jouj eo an Irooj ke raar kālet n̄an jipan̄. Kwar kajjitōk ippān jet ro em̧ōj aer eddo kadede, jeļā bwe eļapļo̧k karmejete, eļapļo̧k meanwōd renaaj bōk jān Irooj. Ro me raar jipan̄ jem̧aan raar en̄jake obrak kōn kam̧oolol kōn Rilo̧mo̧o̧r eo.

Bōlen em̧ōj im̧we eok n̄an jab kajjitōk ippān juon n̄an jipan̄ kanne innām ektuwe kobban wa eo. Āinwōt juon ritōl kwojeļā ro uwaan doulul eo am̧ im baam̧le ko aer barāinwōt. Irooj ekanooj jeļā kajier.

Ejeļā wōn lio pāleen epaak an en̄jake tōr jān jon̄an kōnke ļeo pāleen eaar jab maron̄ lo iien eo n̄an kōm̧m̧ane ta eo eaar kōņaan bwe en dedeļok n̄an kake n̄an aikuj ko an. Ejeļā ajri ta ro renaaj jeram̧m̧an jān aer lo jemeer etal bar juon alen n̄an jipan̄ ro jet ak eļan̄n̄e ajri ro raar aikuj en̄jake bwe aorōkļo̧k n̄an jemeer n̄an an joļo̧k an iien ippāer raan eo. Bōtaab E ebarāinwōt jeļā wōn aikuji kūr eo n̄an jerbal bōtaab maron̄ jab āinwōt armej eo me emaron̄ ak em̧ōņōņō in jipan̄.

Koban kanooj maron̄ jeļā aolep ro uwaan doulul eo am̧, bōtaab Anji ejeļā. Kōn menin, āinwōt am̧ kar kōm̧m̧ane elōn̄ alen, kwar jar n̄an jeļā wōn n̄an kajjitōk jipan̄ n̄an jerbal n̄an ro jet. Irooj ejeļā wōn enaaj jeram̧m̧an jān kajjitōk n̄an jipan̄ im an wōn baam̧le eo enaaj jeram̧m̧an jān jab kajjitōk. Ej revelesōn kwoj maron̄ kōtmene ej itok n̄an eok ilo am̧ tōl ilo priesthood eo.

Iaar lo an men jab in waļo̧k ke iaar juon likao. Iaar rijipan̄ eo kein kajuon ilo doulul eo an pris ro. Bisop eo eaar kūr ļo̧k eō juon raan n̄an m̧weo im̧ōn. Eaar ba bwe ekōņaan bwe in etal ippān n̄an loļo̧k juon lio emej pāleen epād ilo aikuj eļap.

Ke iaar kotare n̄an bōk n̄a jān m̧weo im̧ō, iaar inepata. Iaar jeļā bwe bisop eo eaar wōr an rikakpilōklōk ro rekajoor im meletlet. Juon eaar juon riekajet ebun̄bun̄. Eo juon eaar lale juon company eļap im tok ālik erom juon Ritōl Eutiej an Kabun̄. Bisop eo make kar juon raan jerbal āinwōt juon Ritōl Eutiej an Kabun̄. Etke bisop eo eaar ba n̄an juon pris eo ejjab jeļā, “Ij aikuj jipan̄ eo am̧”?

Ekwe, eļapļo̧k aō jeļā kiiō ta eo emaron̄ kar ba n̄an n̄a: “Irooj ej aikuj in kōjeram̧m̧an eok.” Ilo m̧we im̧ōn lio emej pāleen, iaar lo an jiron̄ kōrā eo bwe ejjamin bōk jipan̄ jān Kabun̄ in m̧ae iien eaar kanne budget form eo eaar door ippān m̧oktaļo̧k. Ilo iaļ eo n̄an m̧weo eaar ettōn̄ kōn aō bwilōn̄ im ba, “Hal, n̄e ejeļā kilen kōjbweweik an joļo̧k enaaj maron̄ jipan̄ ro jet.”

Bar juon iien, bisop eo aō eaar bōk eō ippān n̄an juon m̧ōn ro jinen im jemen rekadōkdōk ro raar jilkintok ruo leddik jiddik ro releļn̄o̧n̄ n̄an ioon kōm ilo kōjām eo. Ālkin an ekōnono ippān leddik ro ruo reddik, kōm kar oktak likļo̧k n̄an ilo̧k im eaar ba n̄an eō, “Jejjab maron̄ ukōt jorrāān eo ilo mour ko aer, bōtaab remaron̄ en̄jake bwe Irooj ej iakwe er.”

Ilo juon bar jota eaar bōk eō n̄an m̧weo im̧ōn juon em̧m̧aan me eaar jab itok n̄an jar ilo iiō ko. Bisop eo eaar jiron̄ eō ewi jon̄an an iakwe ļeo im ewi jon̄an an ward eo aikuj e. Eaar āinwōt ļap kilaan ioon em̧m̧an eo. Bōtaab ilo tōre eo, im aolep iien bisop eo eaar bōk eō ippān, ewōr kilaan eļap ippa.

Ejjeļo̧k wāween me imaron̄ pukōt eļan̄n̄e bisop eo eaar jar n̄an jeļā ewi wōt pris eo enaaj kar jeram̧m̧an jān loļo̧k kein. Emaron̄ in kar bōk pris ro jet ippān elōn̄ alen ko. Bōtaab Irooj eaar jeļā inaaj kar juon raan erom juon bisop karuwaineneik ro me tōmak eo aer em̧ōj an m̧ōļo ļo̧k n̄an bar ro̧o̧l tok n̄an okmeņeņ an ko̧jpeļ eo. Irooj eaar jeļā inaaj kar juon raan letok eddo eo an priesthood eo n̄an buki im em̧ool taujin ajri ro nejin Jemed Ilan̄ me raar inepata kōn aikuj in kanniōk.

Kom̧ liako ro kom̧ij jab maron̄ jeļā ta m̧akūtkūt ko an jerbal injipan̄ an priesthood eo Irooj ej kōpooj n̄an kom̧ n̄an liwaj. Bōtaab idajon̄jon̄ eo eļapļo̧k n̄an aolep rikabwijer priesthood eo ej n̄an leļo̧k jipan̄ ilo jetōb. Aolepādwōj ewōr eddo in. Ej itok ippān āinwōt juon uwaan doulul eo. Ej itok ippān āinwōt juon uwaan baam̧le eo. Eļan̄n̄e tōmak eo an jabdewōt ilo doulul eo am̧ ak baam̧le eo ej jodik jān Satan, kwonaaj en̄jake meanwōd. Ejja āinwōt jerbal in jipan̄ im tiriam̧okake eo kar leļo̧k jān Risamaria eo, kwonaaj barāinwōt kwaļo̧k n̄an er kōn oil in kemour n̄an kijen ko aer ilo iien aikuj.

Ilo jerbal in jipan̄ eo ami āinwōt juon mijenede ej jerbal aolep raan, kom̧ naaj ilo̧k n̄an taujin armej ilo tōre in aikuj eļap ilo jetōb. Elōn̄, m̧ae iien eo kwoj katakin er, jamin naaj em̧ool jeļā bwe ewōr aer kinej ko ilo jetōb me, jab kōm̧adm̧ōdi, naaj bōktok jaimeme ejjeļo̧k jem̧ļo̧kin. Kom̧ naaj ilo̧k ilo jerbal in lo̧mo̧o̧ren er an Irooj. Irooj wōt emaron̄ kemour kinej ko ilo jetōb aer ilo aer bōk kain̄i ko me ej tōl n̄an mour indeeo.

Āinwōt juon uwaan doulul eo, āinwōt juon rūkaki in loļo̧k m̧weo, im āinwōt juon mijenede, kom̧ij jab maron̄ jipan̄ bar kōm̧m̧ane jorrāān in jetōb eo ijello̧kin tōmak eo ami make ej kajoor. Meļeļe in eļapļo̧k jān riiti jeje ko rekwojarjar aolep iien im jar kōn er. Jar eo ilo tōre eo im riit eo ekadu ilo jeje ko rekwojarjar ejjab bwe kōppopo. Kaenōm̧m̧an eo an ta eo kwonaaj aikuji ej itok ippān jān 84th section in Doctrine and Covenants: bwe jej aikuj jab ļōmņak m̧okta ta eo jenaaj ba, bōtaab kejekļo̧kjeņ ilo ļōmņak ko ami naan ko an mour, innām m̧ōttan eo ad naaj letok n̄an kōj ilo iien eo jej aikuji.²

Kallim̧ur eo emaron̄ in wōt bōke eļan̄n̄e jej “kejōkļo̧kjeņ” naan ko an mour im wōnm̧aanļo̧k in kōm̧m̧ani. Kejōkļo̧kjeņ eo ej m̧ōttan eoon eaar aorōk n̄an n̄a juon en̄jake in juon men kōn naan ko. N̄an waanjon̄ak, ke iaar ilo̧k n̄an kajieon̄ jipan̄ juon epere tōmak eo an kōn kūr kwojarjar eo an Rikanaan Joseph Smith, en̄jake ko raar ro̧o̧l tok n̄an n̄an.

Ejjab naan ko jān Bok in Mormon wōt. Ej juon en̄jake in kallim̧ur kōn m̧ool eo me ej itok jabdewōt iien ij riiti jet eoon ko jān Bok in Mormon. Ijjab maron̄ kallim̧ūr bwe enaaj iotk n̄an aolep armej me ewōr en̄jake ko an pere ak Bok in Mormon. Ijeļā Jospeh Smith ej rikanaan an Jepļaaktok eo. Ijeļā bwe Bok in Mormon ej naan an Anij.

Ijeļā jān en̄jake bwe kom̧ maron̄ bōk kallim̧ur eo m̧ool eo jān Jetōb kōnke eaar itok n̄an eō. Kwe im n̄a aikuj ewōr kallim̧ur jab in m̧okta jān an Irooj likūt kōj ilo wāween eo an juon rito-tak je iakwe me eaar kinejnej jān rikejdet ro an m̧ool eo.

Ebar wōr juon kōppopo jej aikuj kōm̧m̧ane. Ej juon piktok in armej n̄an erom kijin̄en̄e n̄an metak ko an ro jet. Ej juon iaan un ko etke Rilo̧mo̧o̧r eaar kanooj ļap an jerbal n̄an kwaļo̧k kōn Pinmuur eo An im An bōk Ioon make metak ko im būrom̧ōj ko an aolep ajri ro nejin Jemedwōj Ilan̄ bwe En maron̄ jeļā ekōjkan kaenōm̧m̧an er.

Jekdo̧o̧ņ rikabwijer priesthood eo em̧m̧an tata an Jemed Ilan̄ ilo mour in n̄an jab bōk jon̄ak eo an meanwōd. Kōņaan ko ad armej ej n̄an jab kijenmej ippān armej eo ejjab maron̄ lo m̧ool eo me ekanooj in jej uwaan. Jej aikuj mejmejkaruo bwe jab kijenmej eo ad jab loe āinwōt kaje ak kowaan.

Ilo ad kōppopo n̄an leļo̧k kaenōm̧m̧an n̄an Irooj āinwōt rikarejeran ro an priesthood eo An, ewōr jeje ko rekwojarjar n̄an tōl kōj. Epād ie juon menin letok jenaaj aikuji n̄an em̧m̧akūt in ad, Jabdewōt iien Irooj enaaj jilkinwaj kōm̧ iwōj. Risamaria eo em̧man ewōr ippān menin letok in. Jenaaj aikuji menin in, im Irooj eaar jiron̄ kōj ewi wāween ad maron̄ loe:

“Kōn menin, ro jeiū im jatū re jitōnbōro, eļan̄n̄e ejjeļo̧k ami iakwe-em̧ool, kom̧jekdo̧o̧n. Kōnke menin, kom̧in eddāp n̄an iakwe-em̧ool, eo ej ļaptata jān men otemjej, bwe men otemjej renaaj jem̧ļo̧k—

“A iakwe-em̧ool ej iakwe eo erreo an Kraist, im e kijejeto indeeo, im jabdewōt eo ilo e ippān ilo raan eo āliktata, enaaj em̧m̧an ippān.

“Kōn menin, ro jeiū im jatū re jitōnbōro, kom̧in jar n̄an jemād kōn aolep kajoor ilo bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej ri kaļoor ro an rem̧ool an Nejin Jisōs Kraist, bwe kom̧in maron̄ erom̧ m̧aan ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron bōk kōjatdikdik in; bwe jān maron̄ karreo em̧ool āinwōt E erreo.”³

Ij jar bwe jān maron̄ kōpooj kōj make n̄an leļo̧k jabdewōt jerbal in jipan̄ an priesthood eo Irooj emaron̄ letok im̧aad ilo iaļ in ad ilo mour in. Ilo etan Jisōs Kraist, amen.