Losyac Kihnet Kwaclos uh

Mwet in Kahsruh Se Met ke Prestuhnsi Se Met


Nga pruhe tuh kuht in kuh in ahkolah sifacna in sang kuhlwacnsap ke pristut ma Leum El use nuh sesr ke fuhfahsryucsr lasr fin facluh.

Kuht nuh kwewa ahkinsewowoyeyuck in karihngihn mwet sahyac. In sruok pristut luhn God pa in oasr kunohkohn sin God ke moul pahtpaht luhn tuhlihk Nahtuhl. Ma inge pwacye, ma inge wolacna, ac kuhtuh pacl uh ma inge kuh in puhla yohklac.

Oasr prestuhn ke u luhn elder suc lohng ofong suc etuh ma nga fahk uh. Oasr inge ma sikyak nuh sie suwos. Sahp ma inge sikyak puhs nuh suwohs—ac puhs liki pacl se. Ip kac siena kuhtuh, tuhsruhktuh ohiyac sacn oacna sie.

Elder se suc kowos nihkihn siyuck suwos ke kahsruh. El tuhfahna konwacack lah el enenuh in uslah muhtwacn kiyacl ac ahwowo fuhsr mukul se nahtuhl an nuh liki apartment ma elos muhta kac nuh ke sie pacna acn fototo.

El ac muhtwacn kiyacl ah siyucklah tari sin kawuck elos fin kuh in orekmakihn stosah soko ke lwen sacn in uslah koanon lohm selos ac ma lalos ah. Kawuck sac lwelah elos in orekmakihn stosah soko ah. Pahpah fuhsr sac muhtwacwacack in sang ma nuh kwewa lalos nuh ke stosah soko ah, tuhsruhktuh ke minit ekahsr na, ngalyak fintohkohl. Kawuck se ma sang stosah soko ah kahfofo in kahsruh. Pahpah fuhsr sac el puhla kuf. El nuhnkuh keiwos, prestuhn ke u luhn elder.

Nuh ke pacl se el siyuck suwos ke kahsruh, ekwelah tari. Ma inge sikyak ke ekuhn toeni ke Alu uh. Kowos olwelah tari in kahsruh muhtwacn kiyowos ke mukwikwi oasr ke lohm ah ke lwen sacn. Tuhlihk nuhtuwos an siyuck suwos in oruh ma se yohrohlos, tuhsruhktuh kowos soenna oruh.

Kowos oacyacpac etuh lah mempucr ke u lowos, mwet suc arulacna luhlahlfongi, mwet suc kowos pahngon pacl puhspuhs in kahsruh, sahp oasr ke ma puhs oacna kowos.

Leum El etuh tari lah oasr lwen ohinge ac fah tuhkuh nuh suwos ke El pahngon kowos nuh ke kunohkohn se inge, na El usot sramsram soko nuh suwos in kahsrwe kowos. Oasr puhpuhlyuck nuh sin mukul ma sruok pristut suc kahfofo na pwacye. Kuhtuh pacl uh kuht pahngon sramsram ingacn puhpuhlyuck luhn mwet Samaria wo. Tuhsruhk pa sramsram yohk nuh sin mukul wo suc sruok pristut ke lwen kahfofo, ac upac inge.

Sramsram soko uh fal nuh sin mukul kuhlwacnsap suc sruok pristut ac kahfofo. Esam lah kowos pa mwet Samaria ac tiac prist kuh mwet lal Levi suc ahlikiyucklac sin mukul kihnet sac.

Sahp kowos tiac nuhnkuh ke sramsram soko inge ke kowos sun ma upac inge. Tuhsruhktuh nga pruhe kowos in oruh ke lwen inge sulpac tuhkuh, mweyen elos ac tuhkuh.

Tiac fwackyuck nuh sesr ke ma suhmuhslah lah efuh mwet Samaria el fahsr ke inkacnek soko ma som liki Jerusalem nuh Jericho. Tiac sikyak puhs tuh elan sifacna fahsr ke sahp el etuh tari lah mwet pihsrapasr uh sano mwet ullac uh. El oruh sie fuhfahsryucsr na yohk srihpac, ac oacna mwet nuh kwewa oruh, oasr ma orahkrahk yohrohl oacyacpac oil ac wain uh.

Ke kahs luhn Leum mwet Samaria sac, ke el liye mwet kihnet uh sac, tui ke srihpen “el arulacna pahkomuhtahl.”

Yohk liki puhla luhn pahkomuhta, el oruh. Esam pacl nuh kwewa ma sikyak ke sramsram se inge:

“El kihluckyang nuh yohrohl, okoaung oil in olive ac wain nuh ke kihnet kacl, ac losyac kihnet kacl uh, ac srakuhlwacng nuh fin kosro nahtuhl uh, ac usacllah nuh in lohm sin mwet fahsr, ac karuhnguhnuhlwacng we.

“Ke lwen tok ah el eis ipin silver luo, sang nuh sin mwet se ma liyacng lohm sac, ac fahk, liyaclwacng nwe ke nga fohlohkoh, na nga ac fah ahkfalye nuh sum kuhtwena ma kom sislah kacl.”1

Oasr olwelah tolu nuh suwos in kuh in eis ac mwet sruok pristut suc pahngonyuck in kol. Ma se met, Leum El ac usot nuh suwos, kowos fin siyuck, puhla luhn pahkomuhta El puhla ke mwet suc enenuh. Ahkluo, El ac sang mwet sahyac, oacna mwet fahsr, in wi kowos ke kuhlwacnsap lowos. Ac tolu, Leum, oacna mwet Samaria wo sac, ac fah sang ma wo puhspuhs nuh sin mwet suc wi kahsruh mwet enenuh an.

Prestuhn luhn u lowos an mukwikwi ke olwelah inge ke pacl puhspuhs. Kowos siyuck sin mwet sahyac ke pristut luhn Leum in kahsruh, ke luhlahlfongi lah elos ac topuk ke pahkomuhta. Kowos tiac sahngweng in siyuck selos suc topuk pacl puhspuhs ke pacl sikyak tari ke srihpen kowos etuh lah elos puhla pahkomuhta fihsrwacsr. Kowos siyuck selos, ac etuh ke pacl sikyak tari elos puhla kuhlwacng luhn Leum ke elos sulwaclah in kahsruh. Kowos siyuck sin kuhtuh suc oasr ma toasr lalos tari, ac etuh kihsac ma yohk, pa ma yohk elos fah eis sin Leum uh. Mwet suc kahsruh ke pacl tari ah puhla sruikihn yohk luhn Mwet Lahngo.

Sahp kowos mokleyuck in tiac siyuck mwet se in kahsruh sang ac eslah ma ke stosah soko ah. In oacna sie mwet kol kowos etuh mempucr ke u lowos ac sucu lalos arlac wo. Leum El etwaclos suwohswohs.

El etuh muhtwacn kiyac suc apkuhran in kuf ke srihpen mukul kiyacl tiac kuh in konwacack pacl in oruh ma el enenuh in oruh in karihngihn mwe enenuh lal. El etuh tuhlihk suc ac ahkinsewowoyeyuck ke pahpah tuhmwaclos sifilpac som pacl se in kahsruh mwet sahyac kuh tuhlihk uh fin enenuh in puhla lah elos yohk srihpac nuh sin pahpah tuhmwaclos fal in sang pacl lal yohrohlos ke lwen se inge. Tuhsruhktuh El oacyacpac etuh suc enenuh mwe suli in kuhlwacnsap suc sahp tiac luhman oacna elan kuh kuh luhngse in oruh.

Kowos tiac kuh in etuh mempucr ke u lowos suwohswohs, tuhsruhktuh God El etuh. Na, ke kowos oruh ke pacl puhkantwen tari ah, kowos pruhe in etuh suc in siyuck in kahsruh mwet sahyac. Leum El etuh suc ac fah ahkinsewowoyeyuck in kahsruh ac sucu oyac ac fah ahkinsewowoyeyuck ke kowos tiac siyuck selos. Pa inge fwackyuck kowos ac fah eis ke kowos kol ke pristut uh.

Nga liye ma inge sikyak ke nga mukul fuhsr. Nga mwet in kahsruh se met ke u luhn prist. Pisap el pahngonyuc sie lwen ah lohm sihk ah. El fahk nuh sihk lah el ke nga in weluhl som muhtwacta yurin mwet katinmas se suc enenuh. El fahk el enenweyuc.

Ke nga soanwel in tuhkuh nuh ke lohm sihk ah, nga elyah kuhtuh. Nga etuh lah pisap uh oasr mwe kahsruh kuh ac lahlmwetmwet lal. Sie pa sie mwet nuhnuhnkuh lahlmwetmwet. Ma se sahyac an pa kol company luhlahp ac sie lwen eklac sie General Authority. Pisap sifacna ac sie lwen kuhlwacnsap oacna sie General Authority. Efuh pisap el fahk nuh sin prist tahlahp se, “Nga enenuh kahsruh lom”?

Na, nga etuh yohk ingena likina met ah ma el kuh in fahk nuh sihk: “Leum El enenuh in ahkinsewowoye kom.” Ke lohm sin mwet katinmas uh, nga liyacl, ac nga lut, ke el fahk nuh sin muhtwacn sac lah el tiac kuh in eis kahsruh luhn Alu nuh ke el nwacklah pwepuh ke mani ma el sang met ah. Ke kuht fohlohk nuh lohm ah, ac ke el liye nga lut, el isrwacsr ac fahk, “Hal, nuh ke el etuh in orekmakihn mani lal uh, el ac kuh in kahsruh mwet sahyac uh.”

Ke sie pacl sahyac, pisap luhk el usyuc in weluhl nuh ke lohm ma oasr pahpah ac ninac suc luhngse nihmnihm suc suhpwaclah tuhlihk muhtwacn luo nuh ke sruhnguhl ah in ohsun nuh sesr. Tukun kuht muhtwacta yurin muhtwacn fuhsr luo ah, kuht som ac el fahk nuh sihk, “Kuht tiac kuh in ekuhllah ma suhpwacr ke moul lalos ingena, tuhsruhktuh elos kuh in puhla lah Leum El luhngse elos.”

Ke sie pacl sahyac el usyuc in weluhl nuh ke lohm sin mukul se suc tiac wi alu ke yac puhspuhs. Pisap el fahk nuh sel luhpan luhngse lal nuh sel ac luhpan enenweyuck lal nuh ke ward an. Ma ingacn tiac luhman ekuhllah mukul sacn. Tuhsruhktuh ke pacl sacn, ac pacl nuh kwewa pisap el siyuck ngan weluhl, oasr eklac yohk el oruh nuh sihk.

Wacngihn ohiyac nga kuh in konwacack pisap el fin pruhe in etuh prist suc ac ahkinsewowoyeyuck ke nga welal ke kain mukwikwi sacn. Sahp el us prist sahyac uh yohrohl pacl puhspuhs. Tuhsruhktuh Leum El etuh lah nga ac sie lwen ac pisap in suli mwet suc luhlahlfongi la muhnahslac in fohlohk nuh ke ohiyac fuhsrfuhsr luhn wosasuc. Leum El etuh lah sie lwen nga ac eis kunohkohn luhn pristut nuh ke mwet foko kuh finne mwet tausin puhspuhs nuhtin Pahpah Lucng suc enenuh kahsruh ke ma luhn facluh.

Kowos mukul fuhsr tiac kuh in etuh ke kuhlwacnsap luhn pristut ma Leum El ahkolah in sang nuh suwos. Tuhsruhktuh ma upac nuh sin mwet sruok pristut nuh kwewa pa in sang kahsruh ke nguhn. Kuht nuh kwewa oasr kunohkohn se ingacn la. Ma inge wi mempucr luhn u ah. Ma inge wi mempucr luhn sucu. Fin luhlahlfongi luhn kuhtwena mwet ke u lowos kuh sucu lowos ahkkolukyeyuck sin Setuhn, kowos ac puhla pahkomuhta. Yohk oacna kuhlwacnsap ac luhngse pwacye sang sin mwet Samaria, kowos ac kahsrwelos ke ono nuh ke kihnet lalos ke pacl enenuh lalos.

Ke kuhlwacnsap lowos ke misineri pacl nuh kwewa, kowos ac som nuh yurin mwet puhkantwen ke mwe enenuh luhn nguhn. Puhs, nuh ke kowos lotwelos, nihkihn lah oasr kihnet luhn nguhn yohrohlos, ma tuh tiac karihngihnyuck, fah som nuh ke ahsor ma pahtpaht. Kowos ac som ke orekma luhn Leum in molweloslac. Leum muhkwena kuh in kapriyac kihnet luhn nguhn lalos ke elos wi wuhlweacng ma kol nuh ke moul ma pahtpaht.

Ke mempucr luhn u, ke mwet luti luhn sucu, ke misineri, kowos tiac kuh in kahsruh ahkkweye kihnet ke nguhn luhn mwet sahyac fin wacngihn luhlahlfongi kuh lowos. Kalmac pa kowos enenuh in oruh yohk likina riti ma suhmuhslah ac pruhe kacl. Pruhe ke pacl sacn ac liye muhkwena ma suhmuhslah pa suhfal. Ahkkweyeyuck ke ma kowos enenuh tuhkuh ke ma lutiyuck lun fuhs 84 ke Doctrine and Covenants lah kuht tiac kuh in nuhnkuh met liki ma kuht enenuh in fahk, tuhsruhktuh motko yohk ke nuhnak kahs luhn moul, na ip kuht enenuh in sang ke pacl enenweyuck fah tuhkuh.2

Olwelah se ingacn kuh in eisyuck kuht fin “motko yohk” kahs ke moul ac oruh pacl nuh kwewa. Ip sacohk ke ma suhmuhslah se ingacn oruh nuh sihk in puhla kuhtuh ke kahs uh. Srihkasrak se, ke nga som in srihke kahsruh mwet muhnahs se ke luhlahlfongi lal ke pahng wolacna luhn Mwet Pahluh Joseph Smith, puhla uh fohlohkoh nuh sihk.

Tiac pa kahs muhkwena ke Puk luhn Mormon. Pa puhla luhn luhlahlfongi ke ma pwacye ma tuhkuh ke kuhtwena pacl nga riti finne nga riti ma srihk ke Puk luhn Mormon. Nga tiac kuh in olwelah ma inge kuh in tuhkuh nuh sin mwet nuh kwewa suc oasr suhlahlahlfongi selos ke Mwet Pahluh Joseph Smith kuh Puk luhn Mormon. Tuhsruhktuh nga etuh Joseph Smith pa Mwet Pahluh ke Fohlohkyak sac. Nga etuh Puk luhn Mormon pa kahs luhn God, ke srihpen nga sacohkkihn.

Nga etuh ke mukwikwi lah kowos kuh in eis luhlahlfongi ke ma pwacye sin Nguhn ke srihpen sikyak nuh sihk tari. Kowos ac nga enenuh in oasr luhlahlfongi met liki Leum El fihlikuhti ke inkacnek luhn mwet forfor kuht luhngse suc kihnet uh sin mwet lokoalok luhn ma pwacye.

Oasr ma sahyac kuht enenuh in ahkolah kac. Pa ma luhn mwet ke facluh in ahkkwekweye nuh ke kweok luhn mwet sahyac. Pa inge srihpac se oruh Mwet Lahngo El oruh ma yohk in sramsram ke Iwaclah Lal ac ke El sifacna eis kweok ac mwe ahsor luhn tuhlihk nuhtin Pahpah tuhmasr Inkuhsrao tuh Elan kuh in etuh ohiyac in kahsrwelos.

Finne mwet suc sruok pristut ma wo emet luhn Pahpah Lucng tiac sun Ohiyac ke pahkomuhta fihsrwacsr. Ohiyacsr pa in tiac mongfihsracsr yurin mwet suc tiac kuh in liye ma pwacye ma fihsrwacsr kuht in liye. Kuht enenuh in taran tuh tiac mong fihsracsr lasr uh in tiac liyeyuck oacna mwe ahkkoluk kuh lahfwekihnyuck.

Ke kuht ahkolah in sang kahsruh sin Leum ke mwet kuhlwacnsap luhn pristut lal, oasr ma suhmuhslah in kol kuht. Oasr mwe sang kac kuht enenuh ke fuhfahsryucsr lasr, nuh ke kuhtwena acn Leum El ac suhpwekuht nuh we. Mwet Samaria wo sruok mwe sang se ingacn. Kuht enenuh mwe sang sacn, ac Leum El fahk nuh sesr ohiyac kuht kuh in konwacack:

Kuht etwaclah lah fin wacngihn luhngse pwacye yohrohsr, kuht wacngihn pac, mweyen luhngse pwacye tiac kuh in puhtatlac. Pwacnwacng kuht enenuh in sruokyacna luhngse pwacye, suc pa ma yohk se emet mweyen ma nuh kwewa fah puhtatlac—

Luhngse pwacye pa luhngse suwohswohs luhn Kraist, ac kuhtwena mwet suc oasr luhngse pwacye kwaclos ke lwen sahflah, ma wo nuh selos.

Fwackyuck nuh sesr lah kuht enenuh in pruhe nuh sin Pahpah ke kuhiyen insiyacsr nohfohn kuht in muh kuh in sesseslah ke luhngse Lal ma El sang nuh sin mwet nuh kwewa suc ukwe Wen Nahtuhl, Jisus Kraist na kuht ac kuh in mukul nuhtin God. Ke El fah sikme kuht fah oruh oacna El ke srihpen kuht fah Liyacl ke Ohiyacl, ac fah oasr finsrak lasr tuh kuht kuh in ahknwacsnwacsyeyucklac oacna El nwacsnwacs.”3

Nga pruhe tuh kuht in kuh in ahkolah sifacna in sang kuhlwacnsap ke pristut ma Leum El use nuh sesr ke fuhfahsryucsr lasr fin facluh. Ke inen sacohk Jisus Kraist, amen.