2010–2019
Hem I Bin Singaotem Mi blong Talemaot Toktok blong Hem
Oktoba 2013


Hem I Bin Singaotem Mi blong Talemaot Toktok blong Hem

Sapos yu putum tingting blong yu i stap daon mo, obei, mo lisin long voes blong Spirit, bae yu faenem bigfala glad long seves blong yu olsem wan misinari.

Taem oli sastenem mi olsem wan Jeneral Atoriti long las Epril, mi stap olsem wan misin presiden long India. Mi bin luk stret wanem wan nara foma misin presiden i bin talem long mi: “Ol misinari blong Jos ia oli gud gud tumas.”1

Wan long ol gudgudfala misinari we Sista Funk mo mi i wok wetem i Elda Pokrel blong Nepal. Afta we hem i kam memba blong Jos blong 2 yia nomo, oli singaotem hem blong go long misin long India Bangalor Misin, wan misin we oli toktok Inglis. Bae hem i talem se hem i no rere gud. Mi save andastan. Hem i neva luk wan misinari kasem taem hem i kam wan, from se i nogat ol yang misinari we i stap mekem misinari wok long Nepal. Hem i no ridim Inglis gud inaf blong andastanem ol instraksen we i stap long leta blong hem. Taem hem i kam long misinari trening senta, hem i no tekem ol naes traoses, waet sot, mo nektae;’ hem i pakemap, long toktok blong hem, “faef jin traoses, tu tisot, mo plante jel blong hea.”2

Iven afta we hem i kasem ol stret klos, hem i talem se hem i filim se hem i no inaf evri dei, hemia long ol fas wik. Hem i tokbaot taem ia i: “Inglis i had, be tu, wok i gat fulap jalenj. … antap long hemia, mi hanggri, mi taed, mo mi wantem gobak hom. … Nomata situesen i had, mi gat strong tingting. Mi filim wik mo mi no naf. Bae mi prea, long ol taem ia, se bae Papa long Heven bae i helpem mi. I no mestem. Evri taem mi prea, bae mi kasem kamfot.”3

Nomata misinari wok i niu mo i wan jalenj long Elda Pokrel, hem i bin wok wetem bigfala fet mo i bin fetful, i luklukgud blong andastanem mo folem wanem hem i stap lanem long ol skripja, Prijim Gospel blong Mi, mo ol misin lida blong hem. Hem i kam wan strong tija blong gospel—long Inglis—mo wan gudfala lida. Afta long misin blong hem, mo sam taem long Nepal, hem i gobak long India blong gohed long skul blong hem. Stat long Jenuware, hem i stap olsem wan branj presiden long Niu Deli. From tru fasin blong gro we hem i gotru long hem olsem wan misinari, hem i gohed blong tekpat long tru fasin blong gro blong Jos long India.

?Olsem wanem wan yang man we i neva luk wan misinari, i kam wan wetem strong paoa long spirit? ?Olsem wanem bae yu kasem paoa blong spirit olsem wan misinari blong openem ol doa, ol imel bokis, mo hat blong olgeta insaed long misin we bae yu wok long hem? Olsem oltaem, ol ansa oli stap insaed long ol skripja mo ol toktok blong ol profet mo ol aposol we oli stap laef.

Taem we oli stap prijim gospel fas taem long Inglan long Julae 1837, Lod i bin talemaot [long ol aposol] huia we bae oli sendem long nem blong hem, tru long voes blong ol brata blong olgeta, Olgeta Twelef, we olgeta stret i givim nem mo givim raet long olgeta, bae oli gat paoa blong openem doa blong kingdom blong hem long eni nesen long weaples we bae oli sendem olgeta long hem.4

Weples we oli sendem yu long hem, long wanem misin we oli putum yu long hem, yu mas save se wan memba blong Olgeta Twelef i bin rekomendem wok ia, mo profet blong Lod i singaotem yu long wok ia. Oli singaotem yu “tru long profesi, mo tru long fasin blong putum han antap long hed blong man.”5

Afta we Lod i givim ol kondisen blong promes ia i kamtru. Hem i talem se folem hamas [we i minim se promes bae i kamtru sapos] oli [we i minim ol misinari we oli sendem olgeta,] oli [1] putum tingting blong olgeta i stap daon long fored blong hem, mo [2] stap obei long toktok blong hem, mo [3] lisin gud long voes blong Spirit blong hem.6

Ol promes blong Lod oli klia. Blong save gat paoa long saed blong spirit we i nid blong openem doa blong kingdom blong God long nesen we oli sendem yu long hem, yu mas gat tingting i stap daon mo, obei mo gat paoa blong harem mo folem Spirit.

Ol trifala fasin ia, oli joen tugeta. Sapos yu putum tingting i stap daon, bae yu wantem obei. Sapos yu obei, bae yu filim Spirit. Spirit i samting yu mas gat; olsem we Presiden Esra Taf Benson i tijim: “Sapos i no gat Spirit, bae yu neva mekem samting, nomata talen mo samting we yu save mekem.”7

Olsem wan misin presiden, samtaem mi bin intaviu long sam misinari we oli traehad from se oli no bin klin fulwan. Oli laef long standet we i daon bitim paoa we oli sapos blong gat. Nomata hamas oli wok, o hamas gud oli mekem, oli no bin save filim pis, mo glad long kampani blong Tabu Spirit kasem taem nomo oli putum tingting blong olgeta i stap daon, oli sakem sin fulwan, mo oli akseptem sore mo gladhat blong Sevya.

Lod i givim instraksen long ol wokman blong Hem blong oli mas putum tingting blong olgeta i stap daon, from se rod blong wan i kamgud evriwan long saed blong spirit, i stat wetem wan hat we i fulap wetem sore. Tingting long gud we i kamaot long ol samting we i brok: graon, oli mas brekem blong planem wit. Wit, oli brekem blong mekem bred. Bred, oli brekem blong kam ol saen blong sakramen. Taem wan we i sakem sin i tekem sakramen wetem wan hat we i fulap long sore mo wan spirit we i wantem sakem sin, hem i kam gud fulwan.8 Taem yumi sakem sin mo kamgud evriwan tru long Atonmen blong Jisas Kraes, yumi gat moa blong givim long Sevya taem yumi wok blong Hem. “Yes, kam long hem, mo givim ol ful sol blong yufala olsem wan ofring long hem.”9

Sapos sin i trabolem yu, mo yu nid blong sakem sin, plis mekem naoia. Taem Sevya i bin hilim olgeta we oli gat hadtaem, plante taem, Hem i invaetem olgeta blong oli girap. Ol skripja oli rekodem se oli mekem hemia wantaem nomo, o stret afta.10 Blong yumi kam oraet long ol trabol long saed blong spirit, plis akseptem invitesen blong Hem blong girap. No wet, toktok long bisop blong yu, branj presiden, o misin presiden, mo statem rod blong sakem sin naoia.

Hiling paoa blong Atonmen bae i tekem pis i kam long sol blong yu, mo bae i mekem yu save filim Tabu Spirit. Sakrifaes blong Sevya i bitim mak, be sin blong yumi, nating oli fulap mo bigwan, yumi save kaontem mo konfesem, livim fogud mo kasem fogivnes. Lod i talem se bae glad blong hem i bigwan tumas from sol we i sakem sin.11

Insaed long Doktrin mo Ol Kavenan Lod i mekem wan strong promes, taem hem i talem se sapos yumi letem klin fasin i flasem ol tingting blong yumi oltaem; afta nao, tras blong yumi bae i gro i kam strong long fored blong God12 Taem yu stap laef long wan laef blong klin fasin, bae yu filim tras wetem pis blong stanap long fored blong God, mo bae yu gat paoa blong Spirit i stap wetem yu.13

Sam, we oli ol niu memba blong Jos, o oli jes kambak long Jos, oli save talem: “Naoia, mi klin inaf, mo mi wantem givim seves, be mi no save sapos mi gat inaf save.” long Epril, Presiden Tomas S. Monson i tijim yumi se: “Wan save abaot trutok, mo ol ansa long ol bigfala kwestin blong yumi, oli kam long yumi taem yumi obei long ol komanmen blong God.”14 Hem i gud tumas blong save se tru long fasin blong obei, bae yumi save kasem save.

Sam narawan oli filim se oli gat smol talen, samting we oli save mekem, o eksperiens blong yusum. Sapos yu gat wari olsem, tingbaot eksperiens blong Elda Pokrel. Rere gud olsem we yu save mekem, mo save se Papa blong yumi long Heven bae i ademap moa folem ol hadwok we yu mekem wetem tingting i stap daon mo fasin blong obei. Elda Rijad G. Skot i bin givim kaonsel ia: “Taem yumi obei long ol komanmen blong Lod mo wok blong ol pikinini blong Hem, we yumi no selfis long hem, wanem i kam afta i paoa we i kam long God—paoa blong mekem moa bitim we yumi save mekem yumiwan. Ol niu tingting, ol talen, ol samting we yumi save mekem oli kam bigwan moa from se yumi kasem moa fulpaoa mo paoa we i kam long Lod.”15

Taem yu stap trastem Lod mo gud blong Hem, God we I Gat Olgeta Paoa bae i blesem ol pikinini blong Hem tru long yu.16 Elda Holings we i kam long Nevada, i bin lanem hemia long stat blong misin blong hem. Dei afta we hem i kasem India, hem i travel wetem Sista Funk mo mi i go long Rajamundri, fas eria blong hem. Long aftenun ia, Elda Holings mo Elda Ganaparam i go visitim wan memba blong Jos mo mama blong hem. Mama i wantem lanem abaot Jos, from se hem i bin luk olsem wanem gospel i bin blesem laef blong gel blong hem. Sista Funk i joenem olgeta blong felosip. From se lesen ia, bae oli tijim long Inglis, mo mama ia i toktok Telugu nomo, wan brata long branj i bin stap blong intepretem wanem oli tijim.

Wok blong Elda Holings long fas tijing apoenmen blong hem i blong tijim Fas Visen, mo yusum ol toktok blong Profet Josef. Long poen ia long lesen, hem i tanem hem long Sista Funk mo askem: “?Bae mi talem evri singgel toktok?” mo hem i save se bae oli intepretem.

Hem i ansabak: “Talem evri singgel toktok blong Spirit i save testifae long wanem samting yu stap talem.”

Taem misinari ia, wetem tru hat blong hem, i tijim Fas Visen, mo yusum ol toktok blong Profet, fes blong dia sista ia i jenis. Wota blong ae i kamaot. Taem Elda Holings i finisim bigfala mesej ia, mo bifo oli save intepretem wanem we hem i talem, sista ia i askem, tru long wota blong ae blong hem, long lanwis blong hem: “?Bae mi save kasem baptaes? ?Bae yu tijim boe blong mi?”

Ol yang wokman blong mi, ol doa mo hat oli stap open evri dei long mesej blong gospel—wan mesej we i tekem hop, mo pis, mo glad i go long ol pikinini blong God raon long wol. Sapos yu putum tingting blong yu i stap daon mo, obei, mo lisin long voes blong Spirit, bae yu faenem bigfala glad long seves blong yu olsem wan misinari.17 !I wan gudfala taem blong stap olsem wan misinari—wan taem we Lod i stap mekem wok blong Hem i muv hariap!

Mi testifae abaot Sevya Jisas Kraes, mo tabu toktok blong Hem18 blong “go mo tijim evri nesen.”19 Hemia i Jos blong Hem. Hem i lidim tru long ol profet mo ol aposol we oli stap laef. Long nekis aoa ia, Fas Presidensi bae i tijim yumi. “Bae yumi “lanem samting kwiktaem,”20 semmak olsem Momon, blong mekem se taem oli singaot i kam, yumi klin inaf mo save talemaot wetem paoa blong Spirit: “Luk, mi mi wan disaepol blong Jisas Kraes, Pikinini blong God. Hem i bin singaotem mi blong talemaot toktok blong hem long medel blong ol pipol blong hem, blong oli save gat laef we i no gat en.”21 Long nem blong Jisas Kraes, amen.

Ol Not

  1. Aot long wan stori wetem Dennis C. Brimhall, presiden blong Kentucky Louisville Mission, 2005–8.

  2. Ashish Pokhrel, “My Name Is Ashish Pokhrel and This Is My Story” (histri blong hemwan we oli no printimaot, Sept. 2011).

  3. Pokhrel, “My Name Is Ashish Pokhrel.”

  4. Luk long Doctrine and Covenants 112:21.

  5. Ol Tok blong Bilif 1:5.

  6. Luk long Doctrine and Covenants 112:22.

  7. Ezra Taft Benson, long Prijim Gospel blong Mi: Wan Gaed long Misinari Wok (2004), 176.

  8. Sam tingting we i kamaot long wan toktok we Elda Jeffrey R. Holland i mekem long Bountiful Utah North Stek konfrens, 8–9 Jun 2013.

  9. Omnae 1:26.

  10. Luk long Mak 5:41–42; Jon 5:8–9.

  11. Luk long Doctrine and Covenants 18:13.

  12. Luk long Doctrine and Covenants 121:45.

  13. Luk long Doctrine and Covenants 121:46.

  14. Thomas S. Monson, “Obedience Brings Blessings,” Ensign o Liahona, May 2013, 89.

  15. Richard G. Scott, “For Peace at Home,” Ensign o Liahona, May 2013, 30.

  16. Taem hem i stap tokbaot wanem nao plante misinari ia bae oli mekem, Elda Rasel M. Nelson i talem: “Bae oli mekem wanem we ol misinari oli stap mekem oltaem. !Bae oli prijim gospel! !Bae oli blesem ol pikinini blong God we I Gat Paoa!” (“Catch the Wave,” Ensign o Liahona, May 2013, 45).

  17. Luk long Prijim Gospel blong Mi, v.

  18. Thomas S. Monson, “Come, All Ye Sons of God,” Ensign o Liahona, May 2013, 66.

  19. Matiu 28:19.

  20. Momon 1:2.

  21. 3 Nifae 5:13.