Bōk Kōjeram̧m̧an ko an Bujen ko Am̧

Kora ro jeiu im jatu, elap an emman nan bed ipami bar juon alen.

Raan ko ļo̧k iaar ioon juon kōrā eo eaar kōbpopo n̄an peptaij. Jabōt jab eo eaar itaak tok imōn jar eo ālkin an etetal ruo mail ko (3 km) ilo pedkat ko remijel. Eaar mōkaj im etal n̄an imōn kōpojak eo n̄an utik nuknuk ko repedkat, kwaļi, im kōņan nuknuk in jar ko. Ilo kweilo̧k eo an Doulul eo an Kōrā, eaar bwebwenato kōn oktak eo an. Iaar im̧we jen kōņaan eo an eobrak n̄an kareeo im erreo jen ukweļo̧k im en̄taan in pinmuur eo an Rilo̧mo̧o̧r eo. Iaar bar im̧we jen an m̧ōņōņō in joļo̧k “mour eo emor” n̄an kōm̧m̧an bujen ko rekwojarjar ippān Jemād ilo Lan̄. Eaar jepel jān ļeo jeran, anjo ioon an̄ūrlep ko n̄an mour jen Naan in Māletlet, joļo̧k an jerbal in Jabōt n̄an pād im jar, im kar luuji jem̧jerā an ro rejitōn bōro ke eaar kōjjeļāik karōk in peptaij eo an. Eaar lukkuun ikdelel n̄an joļo̧k aolep jerawiwi ko an, bwe en maron̄ en̄jake iakwe in lo̧mo̧o̧r eo an Rilo̧mo̧o̧r eo im maron̄ erreo. Iaar im̧we jibbon̄ eo jen ikdelel eo an n̄an erom erreo jim̧or ilo ānbwin im jetōb.

Kōm̧ jeļā bwe elōn̄ iami raar kōm̧m̧an ejja kaarmejete kein ilo ami kar en̄jake kam̧ool eo an Jetōb Kwojarjar im kar ikdelel n̄an ukweļo̧k, peptaij, im erom erreo. Bōlen ejjeļo̧k bar iien jej en̄jake iakwe eo ekwojarjar an Rilo̧mo̧o̧r eo āinwōt eļap ilo ad kōm̧m̧an n̄e jej ukweļo̧k im en̄jake kajoor in iakwe eo An n̄an kōj im jeļā An iakwe im errā.

Jet Jabōt rem̧ootļo̧k ke ij ron̄jake jar in kwojkwoj eo, iaar em̧m̧akūt jen wāween an pris eo ba kajjojo naan kōn juon en̄jake em̧m̧an. Tokālik iaar kūr pris eo n̄an kam̧oolol e kōn jipan̄ im kōm̧m̧an eo an bwe kwojkwoj eo ej juon en̄jake em̧wiļaļ ilo jetōb n̄an n̄a im jarlepju eo. Eaar jab pād m̧weo im̧ōn, ak jinen eaar uwaak, “O, enaaj lukkuun m̧ōņōņō bwe kwaar ko̧o̧ltok! Eaar kein kajuon in an jar e jar in kwojkwoj eo, im kōm̧ ar kōppopo ippān doon, kōnono kōn aorōk in kwojkwoj eo im erreo kōkāāle bujen peptaij eo am̧ ippān Rilo̧mo̧o̧r eo.” Ewi jon̄an iakwe in aō n̄an m̧am̧a in kōn an katakin ļaddik in nejin kōn kajoor in bujen peptaij eo im iien em̧m̧an eo an n̄an jipan̄ membōr ro an ward eo en̄jake kajoor in.

Bar juon m̧am̧a ijeļā kōn an kijon̄ jijet make iaan ilo m̧ōnjar eo ium̧win elōn̄ iiō ko ippān emān nejin ajri jiddik. Emmakijkij maron̄ kejōkļo̧kjeņ kōn Rilo̧mo̧o̧r eo ilo kwojkwoj eo, eaar kōm̧m̧ane juon karōk. Kiiō eaar kajjieon̄ joļo̧k iien kajjojo Jadede etale wiik eo an im ļōmņak kōn bujen ko an im ta ej aikuj in ukweļo̧k kaki. “Innām,” ej ba, “jekdoon ta kain rot en̄jake eo ippa kōn ajri ro nejū ilo Jabōt, ij m̧aanjebpopo n̄an bōk m̧ōttan kwojkwoj eo, kōkāāle bujen ko aō, im en̄jake kajoor in karreo eo jen Pinmuur eo.”

Etke Rilo̧mo̧o̧r eo ej likūt aorōk eo eļap ilo kwojkwoj eo, kōrā ro jeiū im jatū? Ta aorōk in kōkāāl bujen peptaij ko ad kajjojo wiik ej jerbal ilo mour ko ad? Jej ke kile maron̄ eo an Rilo̧mo̧o̧r eo n̄an lukkuun karreoik kōj aolep wiik ilo ad bōk m̧ōttan kwojkwoj eo ilo erreo im kōļmenļo̧kjeņ? Būreejtōn Boyd  K. Packer eaar kam̧ool, “En̄in ej jibadbad eo an ko̧jpeļ eo an Jisōs Kraist im Pinmuur eo:  … ilo jem̧ļo̧k in [mour eo ad, jemaron̄] ilo̧k ilo rōn̄ōļ eo dedeļo̧k kar ukweļo̧k jān jerawiwi ko [ad] im dedeļo̧k kar karreoik kōn bōtōktōk eo an Kraist.”¹

Būreejtōnji eo ad ej en̄jake lan̄lōn̄ eo eļap āinwōt kōrā ro jeid im jatid im baam̧le ko aer rej kōm̧m̧an im kōjparok bujen ko, ak būruōm emetak kōn kom̧ ro rej en̄jake apan̄ ilo mour ko ami kōn wōt rubrub bujen an ro rejitōn bōro. Rikanaan Jekab, eo jatin Nipai, eaar kapilōk jen Irooj n̄an kōnono n̄an ļōm̧aro jein kōn kōrā im ajri ro rewāppen ilo raan ko an. Ij kam̧ool bwe naan ko an kar kōjparok eļaptata n̄an raan kein ad. Ej kōnono n̄an kōj āinwōt eļan̄n̄e Rilo̧mo̧o̧r eo Make ekar kōnono. Jekab eaar “eddo kōn eļap  … inepata” āinwōt eaar kam̧ool n̄an ļōm̧aro pālele im baba ro:

“E kabūrom̧ōj eō bwe ij aikuj kōjerbal wāween ekkōnono eo e kanooj eddo  … im̧aan kōrā ro pālemi im ajri ro nejimi, elōn̄ iaer en̄jake ko aer re kanooj pidodo im erreo im kwojarjar. …

“Kōtmāne eo aō bwe raar wanlōn̄ tak ijin n̄an ron̄jake naan e jouj an Anij..  … Elōn̄ bōro ko [raar] mej, deili kōn kinej ko re m̧wilaļ.”²

N̄an kōrā im ajri ro rej kōjparok bujen an raan eo an im ad, Jekab ej kalim̧m̧ur:

“Reilo̧k n̄an Anij kōn kōļmānļo̧kjeņ eo edim, im jar n̄an e kōn eļap tōmak, im Enaaj kaenōm̧m̧an kom̧ ilo en̄taan ko am̧. …

“… Kotak bōrami im bōk naan in jouj an Anij, im kwojkwoj ioon iakwe eo An; bwe kom̧ maron̄, eļan̄n̄e ļōmņak ko ami re dim, indeeo.”³

Ij kam̧ool kōn kajoor im kajoor in jar ilo ad kwaļo̧k būruwōd n̄an Jemedwōj Ilan̄, kwaļo̧k metak ko ad remwilaļ im ikdelel im uwaak ko jej būki ilo ad “kwojkwoj ioon” jeje ko rekwojarjar im naan ko an rikanaan ro emour.

Enan̄in jilu iiō ko rem̧ootļo̧k juon kūjeek enana eaar kakkure lowaan tarbernacle eo em̧m̧an, ebun̄bun̄ ilo Provo, Utah. Kōn em̧m̧an eo an n̄an paineer ro m̧okta, an jako eaar juon būromōj eļap kile jen jim̧or jukjukinpād eo im membōr ro an Kabun̄ eo. Elōn̄ raar kōļmenļo̧kjeņ, “Etke Irooj ej kōtļo̧k an menin waļo̧k? Em̧ool emaron̄ kar bōbrae kijeek eo ak kabōjrak an jorrāān.”

Jon̄oul allōn̄ tokālik, ilo Oktoba 2011 in kweilo̧k eo eļap, juon ennaan ekabwilōn̄lōn̄ kar maron̄ ron̄ ke Būreejtōn Thomas  S. Monson eaar kōjjeļāik bwe tabernacle eo eaar jorrāān en kar erom juon tampeļ ekwojarjar—juon im̧ōn Irooj! Ejjab etto kōm̧ maron̄ kar lo ta eo Irooj eaar aolep iien jeļā! Eaar jab kwaļo̧k kijeek eo, ak Eaar kōtļo̧k an kijeek eo kakkure lowaan. Eaar loe tabernacle eo āinwōt juon tampeļ em̧m̧anmōn—juon kapejuknen n̄an kōm̧m̧an bujen ko rekwojarjar n̄an indeeo.⁴

Kōrā eo jeiū im jatū, Irooj ej kōtļo̧k ad kajjieon̄ im idajon̄jon̄, jet iien n̄an diktata in maron̄ eo ad. Jaar loe mour ko an ro jitōn bōro til im menkwaraar im kar bwilōn̄ etke juon Jemedwōj Ilan̄ eo eakwe im kea enaaj kōtļo̧k an men kein waļo̧k. Ak E jab likūt kōj ilo menkwaraar ko; Ej jutak kōn Pein reppeļļo̧k, kijerjer karuwaineneik kōj n̄an itok n̄an E. Ej kalōk mour ko ad n̄an tampeļ ko rem̧m̧anmōn ijo Jetōb eo An emaron̄ pād ie n̄an indeeo.

Ilo Doctrine and Covenants 58:3–4, Irooj ej jiron̄ kōj

Jejjab maron̄ lo kōn mej ko mejād remōjņo̧, n̄an iien in, jon̄ok eo an ad Anij kōn men kein naaj itok tokālik im aeboojoj enaaj itok ālkin eļap en̄taan.

Kōnke ālkin eļap en̄taan ej itok kōjeram̧m̧an ko. Kōn menin raan eo enaaj itok n̄e jenaaj pelpel kōn eļap aiboojoj.

Kōrā ro jeiū im jatū, ij kam̧ool bwe Irooj ewōr juon An karōk n̄an kajjojo mour ko ad. Ejjeļo̧k juon men ej waļo̧k ej juon ikūm̧ļo̧k ak ilbōk n̄an E. E ejeļā men otemjej im iakwe men otemjej. E ej kijerjer n̄an jipan̄ kōj, n̄an kainōm̧m̧an kōj, im n̄an bōkļo̧k metak eo ad ilo ad pedped ioon kajoor in Pinmuur eo im nōbar bujen ko ad. Ijeļā menin. Mālijjon̄ ko im en̄taan ko jej en̄jaki remaron̄ men ko rej tōl kōj n̄an itok n̄an E im dāpdep n̄an bujen ko ad bwe jen maron̄ ro̧o̧l n̄an im̧aan Mejān im bōk aolep men ko an Jemān.

Iiō eo ļo̧k iaar aikuj im kōņaan en̄jake iakwe eo an Irooj eļapļo̧k, n̄an bōk revelesōn eo aō make, im n̄an kōmeraikļo̧k eddodo ko aō. Iaar kōņaan in meļeļeļo̧k bujen ko aō ilo tampeļ. Ke ij jar eļaptata kōn kōjeram̧m̧an kein, iaar en̄jake Jetōb eo ej tōl eō n̄an etal n̄an tampeļ eo im lukkuun keron̄jake kajjojo naan ko an kōjeram̧m̧an ko ba ioō. Iaar kōņaan im aikuji kōjeram̧m̧an kein ilo mour eo aō ilo iien in. Ij kam̧ool bwe ke iaar ron̄jake eļapļo̧k kareel eo im kajjieon̄ kōjerbal tōmak eo aō, Irooj eaar tūriam̧o̧ kōn eō im kar jipan̄ n̄an kōmeraikļo̧k eddodo ko aō. Eaar jipan̄ eō en̄jake aenōm̧m̧an eļap kōn jar ko rej jan̄in uwaak. Jej likwōj Irooj n̄an kōjparok kalim̧m̧ur ko An n̄e jej kōjparok bujen ko ad im kōjerbal tōmak eo ad.⁵ Itok n̄an tampeļ eo, kōrā ro jeiū im jatū, im bōk kōjeram̧m̧an ko ami!

Ikōņaan barāinwōt kōnono kōn bar juon wāween ej kōjparok bujen ko ad ej letok n̄an kōj lōke im tōmak. Kōj jet iien, āinwōt kōrā ro, ewōr ad ikdelel n̄an lukkuun pen kōn kōj make. Ilo iien kein jej aikuj in pukōt Jetōb eo im kajjitōk eļan̄n̄e im̧we kein rej jān Jemedwōj Ilan̄ ak eļan̄n̄e Satan ej kajjieon̄ kakkure laļ ļo̧k kōj. Keememej piktok in Jemedwōj Ilan̄, eo iakwe eo an eweppen im ejjelok jomlokin.⁶ Ekōnan kalōk kōj, jab rupe kōj.

Āinwōt membōr ro an Kabun̄ in, jemaron̄ jet iien en̄jake bwe jej aikuj m̧ōttan juon “baam̧le in LDS ewāppen” n̄an maron̄ bōk jen Irooj. Jej en̄jake jet iien “edik-ļo̧k jen” ak āinwōt jej jab erreo ilo aelōn̄ in kiin̄ in eļan̄n̄e jej en̄jake jej jab juon baam̧le in LDS ewāppen. Kōrā ro jeiū im jatū jitōn bōro, ke men otemjej kar ba im kōm̧m̧ani, ta enaaj menin aikuj n̄an Jemedwōj Ilan̄ enaaj ewi em̧m̧an in ad kar kōjparok bujen ko ad im ewi jon̄an ad kar kajjieon̄ ļoor waanjon̄ok eo an Rilo̧mo̧o̧r eo, Jisōs Kraist.

Ij kam̧ool bwe Jisōs Kraist ej ad Rilo̧mo̧o̧r im Ripinmuur. Kōn en̄taan in pinmuur eo An, jemaron̄ erreo kajjojo wiik ilo ad bōk m̧ōttan kwojkwoj eo An ilo erreo. Ilo ad kōkāāl im kautiej bujen ko ad, ad eddodo emaron̄ meraļo̧k, im jemaron̄ wōnm̧aanļo̧k erom̧ erreo im kajoorļo̧k bwe ilo jem̧ļo̧kin mour ko ad jenaaj bōnbōn wānōk n̄an bōk mour ippān Anij im mour indeeo. Ij kam̧ool kōn men kein ilo etan Jisōs Kraist, amen.