ຈົ່ງມາຮ່ວມກັບພວກເຮົາ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ບໍ່ວ່າສະພາບການຂອງທ່ານ, ປະຫວັດຂອງທ່ານ, ຫລື ປະຈັກພະຍານຂອງທ່ານຈະເປັນແນວໃດ, ແຕ່ກໍມີບ່ອນສຳລັບທ່ານຢູ່ໃນສາດສະໜາຈັກນີ້.
ຄັ້ງໜຶ່ງ ມີຊາຍຄົນໜຶ່ງຜູ້ໄດ້ຝັນວ່າລາວຢູ່ໃນຫ້ອງໂຖງໃຫຍ່ ບ່ອນທີ່ຝ່າຍສາດສະໜາທັງຫລາຍໄດ້ມາປະຊຸມກັນ. ລາວຮັບຮູ້ວ່າ ທຸກໆສາດສະໜາມີຫລາຍສິ່ງທີ່ລາວສົນໃຈ ແລະ ມີຄ່າ.
ລາວໄດ້ພົບກັບສາມີພັນລະຍາຄູ່ໜຶ່ງທີ່ເປັນຕົວແທນໃຫ້ແກ່ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ໄດ້ຖາມວ່າ, “ພວກທ່ານ ຮຽກຮ້ອງຫຍັງແດ່ຈາກສະມາຊິກຂອງພວກທ່ານ?”
“ພວກເຮົາ ບໍ່ໄດ້ຮຽກຮ້ອງສິ່ງໃດ,” ເຂົາເຈົ້າຕອບ. “ແຕ່ ພຣະຜູ້ເປັນເຈົ້າ ຂໍໃຫ້ເຂົາເຈົ້າອຸທິດທຸກສິ່ງ.”
ສາມີພັນລະຍາຄູ່ນີ້ໄດ້ອະທິບາຍກ່ຽວກັບການເອີ້ນຢູ່ໃນສາດສະໜາຈັກ, ການສອນປະຈຳບ້ານ ແລະ ການຢ້ຽມສອນ, ການເຜີຍແຜ່ເຕັມເວລາ, ການສັງສັນໃນຄອບຄົວທຸກອາທິດ, ວຽກງານຂອງພຣະວິຫານ, ການຮັບໃຊ້ສະຫວັດດີການ ແລະ ມະນຸດສະທຳ, ແລະ ການມອບໝາຍໃຫ້ສອນ.
“ພວກທ່ານຈ້າງຜູ້ຄົນຂອງພວກທ່ານ ທີ່ເຮັດວຽກໃຫ້ພວກທ່ານບໍ?” ຊາຍຄົນນັ້ນຖາມ.
“ໂອ້, ບໍ່,” ສາມີພັນລະຍາຄູ່ນັ້ນໄດ້ອະທິບາຍ. “ເຂົາເຈົ້າໄດ້ສະລະເວລາຂອງເຂົາເຈົ້າ.”
“ພ້ອມນີ້,” ເຂົາເຈົ້າໄດ້ເວົ້າຕໍ່, “ທຸກໆຫົກເດືອນ, ສະມາຊິກຂອງສາດສະໜາຈັກຂອງເຮົາໄດ້ໃຊ້ເວລາ 10 ຊົ່ວໂມງໃນທ້າຍອາທິດ ເພື່ອຮັບຊົມຮັບຟັງກອງປະຊຸມໃຫຍ່ສາມັນ.”
“ຜູ້ຄົນປາໄສເຖິງສິບຊົ່ວໂມງພຸ້ນບໍ?” ຊາຍຄົນນັ້ນຖາມ.
“ສ່ວນການໄປໂບດແຕ່ລະອາທິດເດ້? ໄປຈັກຊົ່ວໂມງ?”
“ສາມຊົ່ວໂມງ, ທຸກວັນອາທິດ!”
“ປາດຕິໂທ,” ຊາຍຄົນນັ້ນເວົ້າ. “ສະມາຊິກຢູ່ໃນສາດສະໜາຈັກຂອງພວກທ່ານເຮັດດັ່ງທີ່ພວກທ່ານເວົ້າແທ້ໆບໍ?”
“ເຮັດແທ້ໆ ແລະ ເຮັດຫລາຍກວ່ານີ້ອີກຊ້ຳ. ພວກເຮົາຍັງບໍ່ໄດ້ເວົ້າຫຍັງເທື່ອກ່ຽວກັບປະຫວັດຄອບຄົວ, ຄ້າຍຂອງຊາວໜຸ່ມ, ການປະຊຸມ, ການສຶກສາພຣະຄຳພີ, ການຝຶກຝົນຜູ້ນຳ, ກິດຈະກຳຂອງຊາວໜຸ່ມ, ການຮຽນເລື່ອງສາດສະໜາແຕ່ລະເຊົ້າ, ການດູແລຕຶກໂບດ, ແລະ ກໍມີກົດເລື່ອງສຸຂະພາບຂອງພຣະຜູ້ເປັນເຈົ້ານຳອີກ, ການຖືສິນອົດເຂົ້າແຕ່ລະເດືອນເພື່ອຊ່ອຍເຫລືອຄົນຍາກຈົນ, ແລະ ການຈ່າຍເງິນສ່ວນສິບ.”
ຊາຍຄົນນັ້ນໄດ້ກ່າວວ່າ, “ບັດນີ້ ຂ້າພະເຈົ້າງົງ. ເປັນຫຍັງຜູ້ຄົນຈຶ່ງຢາກເຂົ້າຮ່ວມສາດສະໜາຈັກເຊັ່ນນີ້?”
ຄູ່ສາມີພັນລະຍາຍິ້ມ ແລະ ເວົ້າວ່າ, “ພວກເຮົາຄິດວ່າ ທ່ານຈະບໍ່ຖາມກ່ຽວກັບເລື່ອງນີ້ເລີຍ.”
ເປັນຫຍັງຜູ້ຄົນຈຶ່ງຢາກເຂົ້າຮ່ວມສາດສະໜາຈັກເຊັ່ນນີ້?
ໃນຊ່ວງເວລາທີ່ສາດສະໜາຈັກຫລາຍແຫ່ງຕະຫລອດທົ່ວໂລກນັບມື້ນັບມີສະມາຊິກໜ້ອຍລົງ, ແຕ່ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເຖິງແມ່ນວ່ານ້ອຍໆເມື່ອປຽບທຽບໃສ່ກັບສາດສະໜາອື່ນໆທັງຫລາຍ ເປັນສາດສະໜາຈັກທີ່ເຕີບໂຕຂຶ້ນໄວທີ່ສຸດຢູ່ໃນໂລກ. ນັບແຕ່ເດືອນກັນຍາ ປີ 2013 ສາດສະໜາຈັກມີສະມາຊິກຫລາຍກວ່າ 15 ລ້ານຄົນຢູ່ຕະຫລອດທົ່ວໂລກ.
ມີເຫດຜົນຫລາຍຢ່າງສຳລັບເລື່ອງນີ້, ແຕ່ຂ້າພະເຈົ້າຂໍບອກພຽງສອງສາມຢ່າງຊິໄດ້ບໍ?
ສາດສະໜາຈັກຂອງພຣະຜູ້ຊ່ອຍໃຫ້ລອດ
ທຳອິດ, ສາດສະໜາຈັກແຫ່ງນີ້ໄດ້ຖືກຟື້ນຟູຄືນມາໃໝ່ໃນວັນເວລາຂອງເຮົາໂດຍພຣະເຢຊູຄຣິດພຣະອົງເອງ. ຢູ່ທີ່ນີ້ທ່ານຈະພົບເຫັນສິດອຳນາດທີ່ຈະກະທຳໃນພຣະນາມຂອງພຣະອົງ—ທີ່ຈະໃຫ້ບັບຕິສະມາ ເພື່ອການປົດບາບ, ທີ່ຈະມອບຂອງປະທານແຫ່ງພຣະວິນຍານບໍລິສຸດ, ແລະ ທີ່ຈະຜະນຶກຢູ່ໃນໂລກ ແລະ ໃນສະຫວັນ.1
ຜູ້ຄົນທີ່ເຂົ້າຮ່ວມສາດສະໜາຈັກນີ້ ຮັກພຣະຜູ້ຊ່ອຍໃຫ້ລອດພຣະເຢຊູຄຣິດ ແລະ ເຂົາເຈົ້າຢາກເຮັດຕາມພຣະອົງ. ເຂົາເຈົ້າຊື່ນຊົມທີ່ຮູ້ວ່າພຣະເຈົ້າກ່າວກັບມວນມະນຸດອີກ. ເມື່ອເຂົາເຈົ້າຮັບພິທີການທີ່ສັກສິດຂອງຖານະປະໂລຫິດ ແລະ ເຮັດພັນທະສັນຍານຳພຣະເຈົ້າ, ເຂົາເຈົ້າສາມາດຮູ້ສຶກເຖິງອຳນາດຂອງພຣະອົງຢູ່ໃນຊີວິດຂອງເຂົາເຈົ້າ.2 ເມື່ອເຂົາເຈົ້າເຂົ້າໄປໃນພຣະວິຫານທີ່ສັກສິດ, ເຂົາເຈົ້າຮູ້ສຶກວ່າເຂົາເຈົ້າຢູ່ໃນທີ່ປະທັບຂອງພຣະອົງ. ເມື່ອເຂົາເຈົ້າອ່ານພຣະຄຳພີສັກສິດ3 ແລະ ດຳລົງຊີວິດຕາມຄຳສອນຂອງສາດສະດາຂອງພຣະອົງ, ແລ້ວເຂົາເຈົ້າຈະເຂົ້າໃກ້ຊິດພຣະຜູ້ຊ່ອຍໃຫ້ລອດທີ່ເຂົາເຈົ້າຮັກຫລາຍທີ່ສຸດ.
ສັດທາທີ່ເກີດຜົນ
ເຫດຜົນໜຶ່ງອີກແມ່ນເປັນເພາະວ່າ ສາດສະໜາຈັກໃຫ້ໂອກາດເພື່ອເຮັດຄວາມດີ.
ການເຊື່ອໃນພຣະເຈົ້າ ເປັນສິ່ງທີ່ໜ້າສັນລະເສີນ, ແຕ່ຄົນສ່ວນຫລາຍຢາກເຮັດຫລາຍກວ່າການພຽງແຕ່ຟັງຄຳເທດສະໜາເທົ່ານັ້ນ ຫລື “ຝັນຢາກໄດ້ປາສາດ [ຂອງເຂົາ] ຢູ່ໃນສະຫວັນ.4 ເຂົາເຈົ້າຢາກໃຊ້ສັດທາ. ເຂົາເຈົ້າຢາກອອກແຮງ ແລະ ມີພາກສ່ວນໃນອຸດົມການທີ່ຍິ່ງໃຫຍ່ນີ້.
ແລະ ນັ້ນຄືສິ່ງທີ່ເກີດຂຶ້ນເມື່ອເຂົາເຈົ້າມາຮ່ວມກັບພວກເຮົາ—ເຂົາເຈົ້າມີຫລາຍໂອກາດທີ່ຈະປ່ຽນແປງພອນສະຫວັນ, ການເຫັນອົກເຫັນໃຈ, ແລະ ເວລາໃນການເຮັດວຽກງານດີ. ເພາະວ່າພວກເຮົາບໍ່ໄດ້ຈ້າງນັກເທດສະໜາຕະຫລອດທົ່ວໂລກ, ສະມາຊິກຂອງພວກເຮົາຈຶ່ງໄດ້ປະຕິບັດສາດສະໜາກິດດ້ວຍຕົນເອງ. ເຂົາເຈົ້າຖືກເອີ້ນໂດຍການດົນໃຈ. ບາງເທື່ອພວກເຮົາອາສາສະໝັກ, ບາງເທື່ອພວກເຮົາ ກໍຖືກ “ອາສາສະໝັກ”. ພວກເຮົາບໍ່ນັບຖືວ່າການມອບໝາຍເປັນພາລະໜັກໜ່ວງ ແຕ່ເປັນໂອກາດທີ່ຈະບັນລຸພັນທະສັນຍາທີ່ເຮົາໄດ້ເຮັດດ້ວຍຄວາມເຕັມໃຈທີ່ຈະຮັບໃຊ້ພຣະເຈົ້າ ແລະ ລູກໆຂອງພຣະອົງ.
ພອນທີ່ລ້ຳຄ່າ
ເຫດຜົນຢ່າງທີສາມວ່າເປັນຫຍັງຜູ້ຄົນຈຶ່ງເຂົ້າຮ່ວມສາດສະໜາຈັກ ແມ່ນເປັນເພາະວ່າ ການເດີນໄປໃນເສັ້ນທາງຂອງການເປັນສານຸສິດ ຈະນຳໄປສູ່ພອນອັນລ້ຳຄ່າ.
ເຮົາເຫັນການບັບຕິສະມາເປັນຈຸດເລີ່ມຕົ້ນໃນເສັ້ນທາງແຫ່ງການເປັນສານຸສິດຂອງເຮົາ. ການເດີນໄປນຳພຣະເຢຊູຄຣິດທຸກວັນນຳໄປສູ່ຄວາມສະຫງົບ ແລະ ຈຸດປະສົງໃນຊີວິດນີ້ ແລະ ຄວາມສຸກອັນເລິກຊຶ້ງ ແລະ ຄວາມລອດນິລັນດອນຢູ່ໃນໂລກທີ່ຈະມາເຖິງ.
ຜູ້ທີ່ຕິດຕາມເສັ້ນທາງນີ້ຢ່າງຊື່ສັດ ຈະຫລີກເວັ້ນຈາກສິ່ງອັນຕະລາຍ, ຄວາມໂສກເສົ້າ, ແລະ ຄວາມກິນແໜງໃນຊີວິດ.
ຜູ້ທີ່ຍາກຈົນຝ່າຍຈິດວິນຍານ ແລະ ໃຈທີ່ຊື່ສັດ ຈະພົບຊັບສົມບັດແຫ່ງຄວາມຮູ້ອັນຍິ່ງໃຫຍ່ຢູ່ທີ່ນີ້.
ຜູ້ທີ່ທຸກທໍລະມານ ຫລື ໂສກເສົ້າຈະໄດ້ຮັບການປິ່ນປົວຢູ່ທີ່ນີ້.
ຜູ້ທີ່ມີຄວາມໜັກໜ່ວງດ້ວຍບາບ ຈະໄດ້ຮັບການໃຫ້ອະໄພ, ເສລີພາບ, ແລະ ພັກຜ່ອນ.
ຕໍ່ຜູ້ທີ່ໜີໄປ
ການສະແຫວງຄວາມຈິງໄດ້ນຳຜູ້ຄົນຫລາຍລ້ານຄົນມາຫາສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ເຖິງຢ່າງໃດກໍຕາມ, ແຕ່ກໍຍັງມີຫລາຍຄົນທີ່ໜີໄປຈາກສາດສະໜາຈັກທີ່ຄັ້ງໜຶ່ງເຂົາເຈົ້າເຄີຍຮັກ.
ບາງຄົນອາດຖາມວ່າ, “ຖ້າຫາກພຣະກິດຕິຄຸນດີເລີດ, ເປັນຫຍັງບາງຄົນຈຶ່ງໄດ້ໜີໄປ?”
ບາງເທື່ອເຮົາສົມມຸດວ່າ ເປັນເພາະເຂົາເຈົ້າໄດ້ຖືກເຮັດໃຫ້ຜິດໃຈ ຫລື ກຽດຄ້ານ ຫລື ເຮັດບາບ. ແທ້ຈິງແລ້ວ, ມັນບໍ່ເປັນເລື່ອງງ່າຍ. ຕາມຈິງແລ້ວ, ມັນບໍ່ແມ່ນເຫດຜົນດຽວທີ່ໃຊ້ກັບສະຖານະການໃນຫລາຍຮູບແບບ.
ສະມາຊິກຫລາຍຄົນໄດ້ມີຄວາມຂ້ອງໃຈເປັນເວລາຫລາຍປີກັບເລື່ອງທີ່ວ່າ ເຂົາຄວນແຍກຕົວອອກຈາກສາດສະໜາຈັກຫລືບໍ່.
ໃນສາດສະໜາຈັກນີ້ທີ່ນັບຖືອຳເພີໃຈຂອງບຸກຄົນວ່າເປັນສິ່ງສຳຄັນ ຊຶ່ງສາດສະໜາຈັກໄດ້ຖືກຈັດຕັ້ງຄືນໃໝ່ໂດຍຊາຍໜຸ່ມຄົນໜຶ່ງຜູ້ໄດ້ຖາມ ແລະ ໄດ້ສະແຫວງຫາຄຳຕອບ, ພວກເຮົາກໍນັບຖືຜູ້ທີ່ສະແຫວງຫາຄວາມຈິງ. ພວກເຮົາອາດເສຍໃຈຫລາຍ ເມື່ອເຂົາເຈົ້າໄດ້ເດີນໜີໄປຈາກສາດສະໜາຈັກທີ່ພວກເຮົາຮັກ ແລະ ຈາກຄວາມຈິງທີ່ພວກເຮົາໄດ້ພົບເຫັນ, ແຕ່ພວກເຮົາໃຫ້ກຽດສິດທິທີ່ຈະນະມັດສະການພຣະເຈົ້າອົງຊົງລິດອຳນາດຕາມຄວາມເຊື່ອຂອງເຂົາເຈົ້າ, ດັ່ງທີ່ເຮົາມີສິດທີ່ຈະເຮັດເຊັ່ນດຽວກັນ.5
ຄຳຖາມທີ່ບໍ່ມີຄຳຕອບ
ບາງຄົນຫຍຸ້ງຍາກຢູ່ກັບຄຳຖາມທີ່ບໍ່ມີຄຳຕອບກ່ຽວກັບສິ່ງໄດ້ເຮັດ ຫລື ໄດ້ເວົ້າຜ່ານມາ. ພວກເຮົາຮັບຮູ້ຢ່າງເປີດແປນວ່າ ເກືອບເປັນເວລາ 200 ປີ ໃນປະຫວັດສາດຂອງສາດສະໜາຈັກ—ພ້ອມດ້ວຍເຫດການທີ່ດົນໃຈ, ເປັນກຽດ, ແລະ ມາຈາກສະຫວັນ-ຢ່າງຕໍ່ເນື່ອງກັນ—ມີບາງສິ່ງທີ່ໄດ້ກ່າວ ແລະ ໄດ້ເຮັດຜ່ານມາ ຊຶ່ງເຮັດໃຫ້ຜູ້ຄົນມີຄຳຖາມ.
ບາງເທື່ອມີຄຳຖາມ ເພາະວ່າພວກເຮົາບໍ່ມີຂໍ້ມູນຄົບຖ້ວນເທື່ອ ແລະ ພວກເຮົາຕ້ອງອົດທົນຕໍ່ໄປໜ້ອຍໜຶ່ງ. ເມື່ອຄວາມຈິງປະກົດຂຶ້ນ, ສິ່ງທີ່ບໍ່ແຈ່ມແຈ້ງແກ່ເຮົາໃນເມື່ອກ່ອນ ຈະແຈ່ມແຈ້ງ ແລະ ເຮົາກໍຈະເພິ່ງພໍໃຈ.
ບາງເທື່ອ ກໍມີຄວາມຄິດເຫັນທີ່ແຕກຕ່າງກັນກ່ຽວກັບຄວາມໝາຍແທ້ໆຂອງ “ຄວາມຈິງ”. ຄຳຖາມທີ່ກໍ່ໃຫ້ເກີດຄວາມສົງໄສຕໍ່ບາງຄົນ, ຫລັງຈາກໄດ້ສືບສາວລາວເລື່ອງຢ່າງລະອຽດແລ້ວ, ສາມາດສ້າງສັດທາໃຫ້ຄົນອື່ນໄດ້.
ຄວາມຜິດພາດຂອງຄົນທີ່ຂາດຕົກບົກພ່ອງ
ແລະ ເມື່ອເວົ້າຄວາມຈິງແລ້ວ, ກໍມີເວລາຕອນທີ່ສະມາຊິກ ຫລື ຜູ້ນຳໃນສາດສະໜາຈັກໄດ້ເຮັດຜິດພາດ. ອາດມີຄຳເວົ້າ ຫລື ການກະທຳທີ່ບໍ່ສອດຄ່ອງກັບມາດຕະຖານ, ຫລັກທຳ, ຫລື ຄຳສອນຂອງເຮົາ.
ຂ້າພະເຈົ້າສົມມຸດວ່າ ສາດສະໜາຈັກຈະດີພ້ອມທຸກຢ່າງກໍຕໍ່ເມື່ອມັນຖືກນຳພາໂດຍຄົນທີ່ດີພ້ອມທຸກຢ່າງ. ພຣະເຈົ້າເປັນຜູ້ທີ່ດີພ້ອມທຸກຢ່າງ, ແລະ ຄຳສອນຂອງພຣະອົງກໍບໍລິສຸດ. ແຕ່ພຣະອົງທຳງານຜ່ານຕົວເຮົາ—ລູກໆທີ່ຂາດຕົກບົກພ່ອງຂອງພຣະອົງ—ແລະ ຄົນທີ່ຂາດຕົກບົກພ່ອງຈະເຮັດຜິດພາດ.
ໃນໜ້າຊື່ເລື່ອງຂອງພຣະຄຳພີມໍມອນ ເຮົາອ່ານວ່າ, “ແລະ ບັດນີ້ຖ້າຫາກຈະມີສິ່ງທີ່ຂາດຕົກບົກພ່ອງກໍເປັນຄວາມຜິດຂອງມະນຸດ; ດັ່ງນັ້ນ ຈົ່ງຢ່າໄດ້ຕຳນິເລື່ອງຂອງພຣະເຈົ້າເພື່ອທ່ານຈະໄດ້ພົບວ່າບໍ່ມີມົນທິນທີ່ບັນລັງພິພາກສາຂອງພຣະຄຣິດ.”6
ນີ້ຄືສິ່ງທີ່ເປັນມາ ແລະ ຈະເປັນແບບນີ້ຈົນກວ່າເຖິງມື້ດີພ້ອມທຸກຢ່າງ ຕອນພຣະຄຣິດພຣະອົງເອງປົກຄອງຢູ່ເທິງແຜ່ນດິນໂລກ.
ໜ້າເສຍໃຈທີ່ບາງຄົນມີຄວາມຫຍຸ້ງຍາກຫລາຍ ເພາະຄວາມຜິດພາດທີ່ມະນຸດສ້າງຂຶ້ນ. ແຕ່ເຖິງແມ່ນເປັນແນວນັ້ນ, ຄວາມຈິງນິລັນດອນຂອງພຣະກິດຕິຄຸນທີ່ໄດ້ຟື້ນຟູ ຊຶ່ງພົບເຫັນຢູ່ໃນສາດສະໜາຈັກຂອງພຣະເຢຊູຄຣິດແຫ່ງສິດທິຊົນຍຸກສຸດທ້າຍບໍ່ມີຈຸດດ່າງພ້ອຍ, ອ່ອນແອ, ຫລື ຖືກທຳລາຍ.
ໃນຖານະທີ່ເປັນອັກຄະສາວົກຄົນໜຶ່ງຂອງອົງພຣະເຢຊູຄຣິດເຈົ້າ ແລະ ເຄີຍເຫັນກັບຕາເຖິງການປະຊຸມ ແລະ ວຽກງານຂອງສາດສະໜາຈັກນີ້, ຂ້າພະເຈົ້າຂໍເປັນພະຍານຢ່າງໜັກແໜ້ນວ່າ ບໍ່ມີການຕັດສິນໃຈໃດທີ່ກ່ຽວພັນກັບສາດສະໜາຈັກ ແລະ ສະມາຊິກ ປາດສະຈາກການສະແຫວງຫາການດົນໃຈ, ການນຳພາ, ແລະ ການເຂົ້າຫາພຣະບິດານິລັນດອນກ່ອນ. ນີ້ຄືສາດສະໜາຈັກຂອງພຣະເຢຊູຄຣິດ. ພຣະເຈົ້າຈະບໍ່ປ່ອຍໃຫ້ວຽກງານຂອງພຣະອົງອອກຈາກເສັ້ນທາງທີ່ກຳນົດໄວ້ ຫລື ລົ້ມເຫລວຈາກເປົ້າໝາຍແຫ່ງສະຫວັນຂອງມັນເປັນເດັດຂາດ.”7
ມີບ່ອນສຳລັບທ່ານ
ຕໍ່ຜູ້ທີ່ໄດ້ແຍກຕົວອອກໄປຈາກສາດສະໜາຈັກ, ຂ້າພະເຈົ້າກ່າວວ່າ ເພື່ອນຮັກຂອງຂ້າພະເຈົ້າ, ຍັງມີບ່ອນສຳລັບທ່ານຢູ່.
ຈົ່ງມາ ແລະ ນຳພອນສະຫວັນ, ຂອງປະທານ, ແລະ ພະລັງຂອງທ່ານມາຮ່ວມກັບພວກເຮົາ. ພວກເຮົາຈະເປັນຄົນດີຂຶ້ນກວ່າເກົ່າເພາະການນັ້ນ.
ບາງຄົນອາດຖາມວ່າ, “ສ່ວນຄວາມສົງໄສຂອງຂ້າພະເຈົ້າເດ້?”
ເປັນເລື່ອງປົກກະຕິທີ່ມີຄຳຖາມ—ເມັດພືດນ້ອຍໆຂອງຄຳຖາມທີ່ຈິງໃຈ ຈະກໍ່ເກີດເປັນຕົ້ນໃຫຍ່ແຫ່ງຄວາມເຂົ້າໃຈ. ມີສະມາຊິກຫລາຍຄົນຜູ້ເຄີຍມີບັນຫາກ່ຽວກັບຄຳຖາມທີ່ສຳຄັນ ຫລື ແຕະຕ້ອງຈິດໃຈ. ຈຸດປະສົງຢ່າງໜຶ່ງຂອງສາດສະໜາຈັກ ແມ່ນເພື່ອບຳລຸງລ້ຽງ ແລະ ບົວລະບັດເມັດພືດແຫ່ງສັດທານັ້ນ—ເຖິງແມ່ນບາງເທື່ອອາດເປັນກໍລະນີທີ່ມີຄວາມສົງໄສ ແລະ ບໍ່ແນ່ນອນໃຈ. ສັດທາຄືຄວາມຫວັງສຳລັບສິ່ງທີ່ບໍ່ເຫັນ ແຕ່ເປັນຄວາມຈິງ.7
ດັ່ງນັ້ນ, ອ້າຍເອື້ອຍນ້ອງທີ່ຮັກແພງ ໝູ່ເພື່ອນທີ່ຮັກແພງຂອງຂ້າພະເຈົ້າ ຂໍໃຫ້ທ່ານຈົ່ງສົງໄສຄວາມສົງໄສຂອງທ່ານ ກ່ອນທ່ານຈະສົງໄສສັດທາຂອງທ່ານ.8 ເຮົາບໍ່ຕ້ອງປ່ອຍໃຫ້ຄວາມສົງໄສຂອງເຮົາກັກຂັງເຮົາໄວ້ ແລະ ກີດກັນເຮົາຈາກຄວາມຮັກແຫ່ງສະຫວັນ, ຈາກຄວາມສະຫງົບ, ແລະ ຈາກຂອງປະທານທີ່ມາເຖິງຜ່ານທາງສັດທາໃນອົງພຣະເຢຊູຄຣິດເຈົ້າ.
ບາງຄົນອາດເວົ້າວ່າ, “ຂ້າພະເຈົ້າເຂົ້າກັບຄົນໃນສາດສະໜາຈັກຂອງທ່ານບໍ່ໄດ້.”
ຖ້າຫາກທ່ານສາມາດຫລຽວເຂົ້າໄປໃນໃຈຂອງເຮົາ, ທ່ານຈະພົບວ່າທ່ານເຂົ້າກັບພວກເຮົາໄດ້ດີ ເກີນກວ່າທີ່ທ່ານຄິດ. ທ່ານອາດບໍ່ຄິດວ່າ ພວກເຮົາກໍມີຄວາມປາດຖະໜາ ແລະ ບັນຫາ ແລະ ຄວາມຫວັງທີ່ຄ້າຍຄືກັນກັບທ່ານ. ປະຫວັດ ຫລື ຊີວິດຜ່ານມາອາດເບິ່ງແຕກຕ່າງຈາກສິ່ງທີ່ທ່ານຄິດກ່ຽວກັບໄພ່ພົນຍຸກສຸດທ້າຍ, ແຕ່ສິ່ງນັ້ນອາດເປັນພອນ. ອ້າຍເອື້ອຍນ້ອງທັງຫລາຍ, ເພື່ອນທີ່ຮັກແພງ, ພວກເຮົາຕ້ອງການພອນສະຫວັນພິເສດ ແລະ ມະໂນພາບຂອງທ່ານ. ຄວາມແຕກຕ່າງຂອງບຸກຄົນ ແລະ ເພື່ອນມະນຸດຕະຫລອດທົ່ວໂລກ ເປັນພະລັງໃຫ້ແກ່ສາດສະໜາຈັກນີ້.
ບາງຄົນອາດເວົ້າວ່າ, “ຂ້າພະເຈົ້າຄົງບໍ່ສາມາດດຳລົງຊີວິດຕາມມາດຕະຖານຂອງທ່ານ.”
ທັງໝົດນີ້ເປັນເຫດຜົນທີ່ຈະມາ! ສາດສະໜາຈັກໄດ້ຖືກຈັດຕັ້ງໄວ້ໃຫ້ບຳລຸງລ້ຽງຜູ້ທີ່ຂາດຕົກບົກພ່ອງ, ຜູ້ມີບັນຫາ, ແລະ ອ່ອນເພຍ. ມັນເປັນໄປດ້ວຍຜູ້ທີ່ ປາດຖະໜາ ດ້ວຍສຸດຈິດສຸດໃຈທີ່ຈະຮັກສາພຣະບັນຍັດ, ເຖິງແມ່ນເຂົາເຈົ້າຍັງເຮັດບໍ່ ສຳເລັດ ເທື່ອ.
ບາງຄົນອາດເວົ້າວ່າ, “ຂ້າພະເຈົ້າຮູ້ຈັກສະມາຊິ້ກຂອງສາດສະໜາຈັກຂອງທ່ານຜູ້ໜ້າຊື່ ໃຈຄົດ.. ຂ້າພະເຈົ້າຄົງບໍ່ມີວັນເຂົ້າຮ່ວມສາດສະໜາຈັກຂອງທ່ານ ທີ່ມີສະມາຊິກແບບນັ້ນ.”
ຖ້າຫາກທ່ານອະທິບາຍຄຳວ່າ ໜ້າຊື່ໃຈຄົດ ເປັນບາງຄົນທີ່ບໍ່ສາມາດດຳລົງຊີວິດໃນທາງທີ່ດີພ້ອມທຸກຢ່າງ ຕາມຄວາມເຊື່ອຂອງເຂົາ, ແລ້ວເຮົາທຸກຄົນກໍເປັນຄົນໜ້າຊື່ໃຈຄົດຄືກັນ. ບໍ່ມີໃຜທີ່ເປັນເໝືອນດັ່ງພຣະຄຣິດ ຕາມທີ່ເຮົາຮູ້ວ່າເຮົາຄວນເປັນ. ແຕ່ເຮົາປາດຖະໜາທີ່ຈະເອົາຊະນະຄວາມຜິດພາດຂອງເຮົາ ແລະ ຄວາມໂນ້ມອຽງທີ່ຈະເຮັດບາບ. ດ້ວຍສຸດຫົວໃຈ ແລະ ຈິດວິນຍານຂອງເຮົາ, ເຮົາຢາກກາຍເປັນຄົນທີ່ດີກວ່າດ້ວຍຄວາມຊ່ອຍເຫລືອຂອງການຊົດໃຊ້ຂອງພຣະເຢຊູຄຣິດ.
ຖ້າຫາກສິ່ງເຫລົ່ານີ້ເປັນຄວາມປາດຖະໜາຂອງທ່ານ, ແລ້ວບໍ່ວ່າສະພາບການຂອງທ່ານ, ປະຫວັດຂອງທ່ານ, ຫລື ປະຈັກພະຍານຂອງທ່ານຈະເປັນແນວໃດ, ແຕ່ກໍມີບ່ອນສຳລັບທ່ານຢູ່ໃນສາດສະໜາຈັກນີ້. ຈົ່ງມາຮ່ວມກັບພວກເຮົາ!
ຈົ່ງມາຮ່ວມກັບພວກເຮົາ!
ເຖິງແມ່ນຈະມີຄວາມຂາດຕົກບົກພ່ອງຕາມທຳມະຊາດຂອງມະນຸດ, ແຕ່ຂ້າພະເຈົ້າແນ່ໃຈວ່າ ທ່ານຈະພົບເຫັນຄົນທີ່ດີຫລາຍຢູ່ໃນສາດສະໜາຈັກນີ້. ສາດສະໜາຈັກຂອງພຣະເຢຊູຄຣິດ ເບິ່ງຄືວ່າມັກຈະດຶງດູດຄົນທີ່ມີເມດຕາ, ແລະ ເປັນຫ່ວງເປັນໄຍ, ຄົນທີ່ຊື່ສັດ ແລະ ຂະຫຍັນໝັ່ນພຽນ.
ຖ້າຫາກທ່ານຄາດຫວັງຢາກພົບຄົນທີ່ດີພ້ອມທຸກຢ່າງຢູ່ນີ້, ທ່ານຈະຜິດຫວັງ. ແຕ່ຖ້າຫາກທ່ານສະແຫວງຫາຄຳສອນທີ່ບໍລິສຸດຂອງພຣະຄຣິດ, ພຣະຄຳຂອງພຣະເຈົ້າ “ຊຶ່ງປິ່ນປົວຈິດວິນທີ່ບາດເຈັບ,”9 ແລະ ເຮັດໃຫ້ອິດທິພົນຂອງພຣະວິນຍານບໍລິສຸດສັກສິດ, ແລ້ວຢູ່ທີ່ນີ້ທ່ານຈະພົບສິ່ງດັ່ງກ່າວ. ໃນວັນເວລາທີ່ສັດທາເລີ່ມມີໜ້ອຍລົງ—ໃນວັນເວລາທີ່ຫລາຍຄົນຮູ້ສຶກຢູ່ຫ່າງໄກຈາກຄວາມຮັກຂອງສະຫວັນ—ຢູ່ທີ່ນີ້ທ່ານຈະພົບຜູ້ຄົນທີ່ຢາກຮູ້ ແລະ ເຂົ້າໃກ້ຊິດພຣະຜູ້ຊ່ອຍໃຫ້ລອດ ໂດຍການຮັບໃຊ້ພຣະເຈົ້າ ແລະ ເພື່ອນມະນຸດ, ເຊັ່ນດຽວກັບທ່ານ. ຈົ່ງມາຮ່ວມກັບພວກເຮົາ!
ພວກເຈົ້າເດ ກໍຢາກໜີໄປຄືກັນບໍ?
ຂ້າພະເຈົ້າຖືກເຕືອນໃຈກ່ຽວກັບຊີວິດຂອງພຣະຜູ້ຊ່ອຍໃຫ້ລອດ ຕອນຫລາຍຄົນປະຖິ້ມພຣະອົງ.10 ພຣະເຢຊູໄດ້ຖາມອັກຄະສາວົກສິບສອງຄົນຂອງພຣະອົງວ່າ:
“ພວກເຈົ້າເດ ກໍຢາກໜີໄປຄືກັນບໍ?
“ຝ່າຍຊີໂມນເປໂຕໄດ້ຕອບພຣະອົງວ່າ, ອົງພຣະຜູ້ເປັນເຈົ້າຂ້າ ພວກຂ້ານ້ອຍຈະໜີໄປຫາຜູ້ໃດ? ພຣະອົງເປັນຜູ້ມີຖ້ອຍຄຳແຫ່ງຊີວິດນິລັນດອນ.”11
ຈະມີເວລາໃດເວລາໜຶ່ງທີ່ເຮົາຕ້ອງຕອບຄຳຖາມອັນດຽວກັນນັ້ນ. ເຮົາກໍຈະໜີໄປຄືກັນບໍ? ຫລື ເຮົາຈະເປັນເໝືອນດັ່ງເປໂຕ, ຍຶດໝັ້ນຢູ່ກັບຖ້ອຍຄຳແຫ່ງຊີວິດນິລັນດອນ?
ຖ້າຫາກທ່ານສະແຫວງຫາຄວາມຈິງ, ຄວາມໝາຍ, ແລະ ວິທີທີ່ຈະປ່ຽນສັດທາໃຫ້ເປັນການກະທຳ; ຖ້າຫາກທ່ານຊອກຫາບ່ອນທີ່ຈະເຂົ້າຮ່ວມນຳໄດ້: ຈົ່ງມາຮ່ວມກັບພວກເຮົາ!
ຖ້າຫາກທ່ານໄດ້ໄປຈາກສັດທາທີ່ທ່ານເຄີຍມີ: ຈົ່ງກັບຄືນມາອີກ. ມາຮ່ວມກັບພວກເຮົາ!
ຖ້າຫາກທ່ານຄິດຢາກຈະໜີໄປ: ຈົ່ງຢູ່ກ່ອນຈັກໜ້ອຍໜຶ່ງ. ຍັງມີບ່ອນສຳລັບທ່ານຢູ່.
ຂ້າພະເຈົ້າຂໍວິງວອນທຸກຄົນທີ່ໄດ້ຍິນ ຫລື ອ່ານຂໍ້ຄວາມເຫລົ່ານີ້: ຈົ່ງມາຮ່ວມກັບພວກເຮົາI ຈົ່ງມາເຊື່ອຟັງສຽງເອີ້ນຂອງພຣະຄຣິດທີ່ອ່ອນຫວານ. ຈົ່ງຍົກເອົາໄມ້ກາງແຂນຂອງທ່ານ ແລະ ຕິດຕາມພຣະອົງໄປ.12
ຈົ່ງມາຮ່ວມກັບພວກເຮົາ! ເພາະຢູ່ທີ່ນີ້ ທ່ານຈະພົບເຫັນວ່າແມ່ນຫຍັງທີ່ມີຄ່າຫລາຍທີ່ສຸດ.
ຂ້າພະເຈົ້າເປັນພະຍານວ່າ ຢູ່ທີ່ນີ້ທ່ານຈະພົບເຫັນຖ້ອຍຄຳແຫ່ງຊີວິດນິລັນດອນ, ຄຳສັນຍາແຫ່ງການໄຖ່, ແລະ ເສັ້ນທາງທີ່ພາໄປຫາຄວາມສະຫງົບ ແລະ ຄວາມສຸກ.
ຂໍພະເຈົ້າອະທິຖານດ້ວຍຄວາມຈິງໃຈວ່າ ການສະແຫວງຫາຄວາມຈິງຈະເຮັດໃຫ້ທ່ານມີຄວາມປາດຖະໜາທີ່ຈະມາ ແລະ ຮ່ວມກັບພວກເຮົາ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.