2010–2019
Itok, Kobatok Ippām
Oktoba 2013


Itok, Kobatok Ippam̧

Jekdo̧o̧n jekjek rot ko ami, kain armej rot kom̧, ak kajoor in naan in kam̧ool eo ami, ewōr jikin n̄an kom̧ ilo Kabun̄ in.

Juon tōre eaar wōr juon em̧m̧aan eo eaar ettōņak bwe ke eaar pād ilo juon em kileplep ijo aolep kabun̄ ko ilo laļ in raar kuk ippān doon. Eaar kile bwe kajojo kabuñ āinwōt ñe elap aer aorōk im wānōk.

Eaar ioon ripālele ro me rej jutak ilo etan Kabun̄ eo an Jisōs Kraist im Armej ro Rekwojarjar ilo Raan-ko Āliktata im kar kajjitōk, “Ta eo kom̧ij kajjitōk jān membōr ro ami?”

Jej jab kajjitōk kōn jabdewōt.” raar uwaak. “Bōtaab Irooj ej kajjitōk bwe kōmij ajeļo̧k aolep.”

Ripālele eo eaar etal wōt im kōmeļeļeik kōn kūr ko ilo Kabun̄ in, katak ko ilo m̧oko im jerbal in loļo̧k ko an kōrā, jerbal ko an mijen aolep raan, nokon in jota ko kajjojo wiik an baam̧le, jerbal in tam̧peļ, welfare im humanitarian ilo jerbal in jipan̄, im ijjitōn̄ ko n̄an katakin.

“Kom̧ij ke kōļļāik armej ro ami kōn jerbal ko rej kōm̧m̧ani?” em̧m̧aan eo eaar kajjitōk.

“O, jaab,” ripālele ro raar ba. “Rej ļelo̧k iien ko aer ejjeļo̧k oņaan.”

“Barāinwōt,” ripālele ro raar etal wōt in ba. “aolep jiljino allōn̄ ko membōr ro am ilo Kabun̄ in rej jolo̧k juon weekend ak 10 awa ko n̄an alooje kweilo̧k eo eļap.”

“Jon̄oul awa in an armej ro ekōnono?” em̧m̧aan eo eaar bwilōn̄.

“Ak kōn iien kabun̄ jar ko ami kajjojo wiik? Ewi jon̄an aer aitok?”

“Jilu awa, kajjojo Jabōt!”

“O, ekwe,” em̧m̧aan eo eaar ba. “Membōr ro an kabun̄ eo am̧i rej lukkuun kōm̧m̧ane ta eo kwar ba?”

“Ekanooj lōn̄. Kōm̧ij jan̄in kwaļo̧k kōn menmenbwij an baam̧le, kāām ko an jodikdik, nokon in jota ko, ekkatak jeje ko rekwojarjar, kaminene an ritōl, m̧akūtkūt ko an jodikdik, jemenere in jibbon̄ tata, n̄an kōjparok im̧ōn jar ko, im aaet ewōr juon kien in ājmour an Irooj, jitlo̧k n̄an jipan̄ rijeram̧ōl allōn̄ otemjeļo̧k, im juon m̧ōttan jon̄oul.”

Em̧maan eo eaar ba, “Kiiō itarbo̧k. Etke jabdewōt ekōņaan kobatok ilo kain kabun̄ rōt in?”

Ripālele ro raar ettōn̄ im ba, “Kōm̧ kar ļōmņak kojjamin kar kajjitōk.”

Etke Jabdewōt Emaron̄ Kobatok ilo kain Kabun̄ Rōt in?

Ilo juon tōre ke elōn̄ kabun̄ ko aolepān laļ in raar ioon dikļo̧k ko reļļap in membōr ro, Kabun̄ eo an Jisōs Kraist im Armej ro Rekwojarjar ilo Raan-ko Āliktata—men̄e edik ilo keidi ippān elōn̄ ko jet—ej juon iaan kabun̄ ko em̧ōkaj an eddōk ilo laļ in. Āinwōt ilo Jeptōm̧ba 2013 Kabun̄ in elōn̄ļo̧k jān 15 milien membōr ro ipeļaakin laļ in.

Elōn̄ un ko kōn wāween in, ak imaron̄ ke kwaļo̧k wōt jet?

Kabun̄ eo an Rilo̧mo̧o̧r

M̧oktata, Kabun̄ in eaar jepļaaktok ilo tōre in ad jen Jisōs Kraist Make. Ijin kom̧ maron̄ lo mālim eo n̄an jerbal ilo Etan―n̄an peptaij n̄an jeo̧rļo̧k jerawiwi ko, n̄an bōk menin letok eo an Jetōb Kwojarjar, im n̄an liāp ioon laļ in im ilo lan̄.1

Ro rej kobatok ilo Kabun̄ in rej iakwe Rilo̧mo̧o̧r Jisōs Kraist im rej kōņaan ļoor E. Rej m̧ōņōņō kōn jeļā in ke Anij ej bar juon alen kōnono n̄an armej. N̄e rej bōk kain̄i ko rekwojarjar an priesthood im kōm̧m̧ani bujen ko ippān Anij, remaron̄ en̄jake kajoor eo An ilo mour ko aer.2 N̄e rej delo̧n̄ ilo tam̧peļ eo ekwojarjar, āinwōt n̄e rej pād Im̧aan mejen. N̄e rej riiti jeje ko rekwojarjar3 im mour kōn katak ko an rikanaan ro An, rej epaakeļo̧k Rilo̧mo̧o̧r eo rekanooj iakwe.

Juon Tōmak Edim

Bar juon un ej kōnke Kabun̄ in ej letok iien ko rem̧m̧an n̄an kōm̧m̧an em̧m̧an.

Tōmak ilo Anij elukkuun em̧m̧an, bōtaab elōn̄ armej rekōņaan kōm̧m̧an eļapļo̧k jān ron̄jake katak ko reim̧we ak ettōņak kōn ijōko jikier ilōn̄.4 Rej kōņaan kōjerbal tōmak eo aer. Rej kōņaan limtake pein jōōt ko aer im jino bōk kuņaer ilo jerbal in elap tokjen.

Im en̄in ej ta eo ej waļo̧k n̄e rej koba tok ippād—elōn̄ aer iien ko rem̧m̧an n̄an ukōt tōļan ko aer, tenkwadik, im iien ko n̄an jerbal ko rem̧m̧an. Kōnke jejjab kōļļāik rūkaki ro ad ijo jokwe ie ilo jarlepju ko ad aolepān laļ in, membōr ro ad rej kōm̧m̧ane jerbal in kwaļo̧k eo er make. Rej kūr er kōn im̧we. Jet iien jej baļintier; jet iien jej “baļintier.” Jej lo ijjitōn̄ ko ejjab āinwōt eddo ko ak āinwōt iien ko rem̧m̧an n̄an kakūrm̧ool bujen ko jaar m̧ōņōņō in kōm̧m̧ani n̄an jerbal n̄an Anij im ajri ro Nejin.

Kaorōk Kōjeram̧m̧an ko

Un eo kein kajilu bwe armej ren koba tok ilo Kabun̄ in ej kōnke etetal ilo iaļ an rikaļoor ej tōlļo̧k n̄an kōjeram̧m̧an ko raorōk.

Jej lo peptaij āinwōt ijjino eo ilo em̧m̧akūt in rikaļoor eo ad. Ad etetal ippān Jisōs Kraist kajjojo raan ej tōlļo̧k n̄an aenōm̧m̧an im jibadbad eo an mour in im lan̄lōn̄ eo em̧wilaļ im lo̧mo̧o̧r indeeo eo ilo laļ eo ej itok.

Ro retiljek me rej ļoor iaļ in rej joļo̧k elōn̄ kauwōtata ko, būrom̧ōj ko, im ajļo̧k ko an mour in.

Jeram̧ōl ilo jetob im m̧ool ilo bōro rej lo aorōk ko reļļap an jeļāļo̧kjeņ ijin.

Ro rej en̄taan ak būrom̧ōj rej lo kemour ijin.

Ro rej edodo kōn jerawiwi rej lo jeorļo̧k bōd, anemkwoj, im kakkije.

N̄an Ro Rej Em̧m̧akūt

Pukōt m̧ool eo eaar tōl tok milien armej ro n̄an Kabun̄ eo an Jisōs Kraist im Armej ro Rekwojajar ilo Raan-ko Āliktata. Mekarta, ewōr jet ro raar em̧m̧akūt jān Kabun̄ in me raar juon iien iakwe.

Juon emaron̄ kajjitōk, “Eļan̄n̄e ko̧jpeļ in ekanooj em̧m̧an, etke jabdewōt emaron̄ em̧makūt?”

Jet iien jej kōtmene ej kōnke raar metak ak jowaan ak jerawiwi. Ilo m̧ool, ejjab pidodo. Ilo m̧ool, ejjeļo̧k juon un me emaron̄ erom uwaak ñan wāween ko rokoktaktak jān doon..

Jet iian membōr ro ad rejitenbōro rej kakkōt iumin elōn̄ iiō ko kōn kajjitōk eo elan̄n̄e rej aikuj kōjeno̧lo̧k er make jān Kabun̄ eo.

Ilo Kabun̄ in me ej kautiej anemkwoj in kālet eo an juon make ekanooj in kajoor, me eaar kōjepļaaktok jān juon ļaddik edik eo eaar kajjitōk kajjitōk ko im kar pukōt uwaak ko, jej kautiej ro me em̧ool aer pukōt m̧ool eo. Erup būruwōm n̄e iaļ eo aer ebōkļo̧k er jān Kabun̄ in jej iakwe im m̧ool eo em̧ōj ad kar loe, ak jej kautiej jim̧we eo aer n̄an kabun̄-jar n̄an Anij Ekajoor Pōtata ekkar n̄an ta eo rej tōmak e ejim̧we, ejja āinwōt ad ba ejjab jim̧we in wōt n̄an kōj make.5

Kajjitōk ko Rejjab Uwaak

Jet rej kakkōt kōn kajjitōk ko rejjab uwaak kōn men ko me kar kōm̧m̧ani ak ba jem̧aan. Jej kanooj kile bwe enan̄in 200 iiō in bwebwenato an Kabun̄ in—ippān ļo̧k juon jekjek kar jab meļeļe kake an im̧we, kautiej, im iien ko rekwojarjar—eaar wōr jet men ko kar ba im kōm̧m̧ani me maron̄ kar kōm̧m̧an bwe armej ren kajjitōk.

Jet iien kajjitōk ko rej waļo̧k kōnke ejabwe aolep meļeļe ippād im jeaikuj kijenmej bar ļo̧k jidik. N̄e aolep m̧ool ej bōk jikin, men ko kar jab alikar n̄an kōj m̧oktaļo̧k naaj kajju waļo̧k ilo būruwōd.

Jet iien ewōr juon oktak ilo ļōmņak n̄an ta lukkuun meļeļe in “m̧ool ko.” Juon kajjitōk emaron̄ kwaļo̧k pere ilo kōļmenļo̧kjeņ an armej, ālkin lukkuun etale, kalōk tōmak ioon ro jet.

Bōd ko an Armej ro Rejjab Wānōk

Im, inaaj lukkuun m̧ool, ewōr iien ko n̄e membōr ro ak ritōl ro ilo Kabun̄ rej kōm̧m̧an bōd. Emaron̄ in wōr men ko kar ba ak kōm̧m̧ani me rejjab jejjet jekjek ko ad, pedped ko, ak katak eo.

Ij kile bwe Kabun̄ in emaron̄ in wānōk eļan̄n̄e en kar tōl jān armej ro rewānōk. Anij ewānōk, im An katak erreo. Ak Ej jerbal ilo kōj―ajri ro Nejin rejjab wānōk―im armej ro rejjab wānōk rej kōm̧m̧an bōd.

Ilo kōmeļeļe eo an Bok in Mormon jej riit, “Im kiiō, eļan̄n̄e ewōr bōd renaaj bōd ko an armej; kōn men in, jab kabōd men ko an Anij, bwe kwon maron̄ jab libijinjin ilo jea in ekajet an Kraist.”6

En̄in ej wāween eo ealikkar jān etto im enaaj m̧ae raan eo eweppān n̄e Kraist E make enaaj anjo̧ ioon laļ in.

Ejerata bwe jet raar wōtļo̧k kōnke bōd ko kar kōm̧m̧ani jān armej. Ak jekdo̧o̧n kōn menin, m̧ool eo indeeo an jepļaaktok in ko̧jpeļ eo maron̄ loi ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ejjab bōd, ejjab m̧ōjņoļo̧k, ak jorrāān.

Āinwōt juon Rijilōk an Irooj Jisōs Kraist im āinwōt juon eo eaar lo kapilōk ko im jerbal ko an Kabun̄ in, ij kwaļo̧k kam̧ool bwe ejjeļo̧k jokālet eļap an jelet Kabun̄ in ak membōr ro an enan̄in kar kōm̧m̧an ilo ejjeļo̧k m̧ool in pukōt im̧we ko, tōl, im nōbar eo an Jemedwōj Ilan̄. En̄in ej Kabun̄ eo an Jisōs Kraist. Anij ejjamin naaj kōtļo̧k bwe Kabun̄ eo An en peļo̧k jān iaļ eo an kar kōm̧m̧ane ak likjab n̄an kakūrm̧ool jibadbad eo an ekwojarjar.

Ewōr Jikin n̄an Kom̧

N̄an ro raar kejeno̧ļo̧k er make jān Kabun̄ in, ij ba, ro m̧ōtta rejitenbōro, aaet ewōr jikin n̄an kom̧ ijin.

Itok im kobaik taļen ko ami, menin letok ko, im kajoor ko ippān ko am. Jenaaj aolep erom em̧m̧aanļo̧k āinwot juon tōprak.

Jet remaron̄ kajjitōk, “Ak pere ko aō?”

Ekkā an wōr kajjitōk ko―ine eo edik an kappok eo m̧ool ekkā an eddōkļo̧k im kajoorļo̧k ilo juon jon̄ak in meļeļe. Ewōr jet membōr ro an Kabun̄ in me, ilo juon tore ak ilo bar eo juon, raar jab en̄taan in pukōt kajjitok ko reļļap ak rōkallelel. Juon iaan un ko an Kabun̄ in ej n̄an kōkajririik im kaddōkļo̧k ineen in tōmak eo―men̄e jet iien ioon bwidej in pere eo im jab jeļā kake. Tōmak ej n̄an kōjatdikdik kōn men ko jab loi ak rej m̧ool.7

Kōn menin, ro jeiū im jatū jitōnbōro—ro m̧ōttan jitōnbōro—jouj, m̧oktata pere pere ko ami m̧okta jān pere tōmak eo ami. 8 Jej aikuj jab kōtļo̧k an pere likwōj kōj im dāpij kōj jān iakwe eo ekwojarjar, anemkwoj, im menin letok ko me rej itok kōn tōmak ilo Irooj Jisōs Kraist.

Jet remaron̄ ba, “Ijjab ekkar n̄an pād ippāmi armej ro ilo Kabun̄ eo.

Eļan̄n̄e kom̧ maron̄ lo būruwōmi, kom̧ bōlen kar lo bwe kokkar ļo̧k jān ami ļōmņak. Kom̧ maron in ilbōk n̄an lo bwe ewōr ippām ikdelel ko im apan̄ ko im kōjatdikdik ko āinwōt kom̧. Ia eo kwar ruttolok ie im ta eo kojjela kake emaron oktaklok jen ta kwoj loe ippān elōn̄ Armej ro Rekwojarjar ilo Raan- ko Āliktata, ak emaron̄ in juon jeram̧m̧an. Ro jeiū im jatū, ro m̧ōttam̧ rejitenbōro, kōm̧ij aikuji taļen ko im kapeeļ ko ami. Ukoktak in armej ro ipeļaakin laļ in ej juon kajoor an Kabun̄ in.

Jet remaron̄ ba,“Ij ļōmņak ijjab maron̄ mour ekkar nan jon̄ak ko ami.

Ebar lōñlok un ko! Kabun̄ in eaar ejaak n̄an najidik eo ejab wāppen, eo ej ioon apan̄, im eo em̧ōk. Ej obrak kōn armej ro me reikdelel kōn aolepān būruwier n̄an kōjparok kien ko, men̄e rejjan̄in tijem̧ļo̧kkaki aolep.

Jet remaron̄ ba, “Ijeļā juon membōr in Kabun̄ eo ami eo ej juon rijeļā m̧oņ. Ijjab maron̄ in kar kobaļo̧k ilo juon kabun̄ eo me ewōr armej rōt in ej membōr ie.

Eļan̄n̄e kom̧ij kōmeļeļeijeļā m̧oņ āinwōt juon eo me elikjab n̄an mour jim̧we kōn ta eo ej tōmak kake, innām jej aolep rijeļā m̧oņ. Ejjeļo̧k iaadwōj āinwōt mour an Kraist ilo ad jeļā jej aikuj in āinwōt. Ak jej lukkuun kōņaan anjo̧ ioon bōd ko ad im jerawiwi ko ad im erom em̧m̧anļo̧k kōn jipan̄ eo an Pinmuur eo an Jisōs Kraist.

Eļan̄n̄e errein rej ikdelel ko ami, innām jekdo̧o̧n jekjek rot ko ami, kain armej rot kom̧, ak kajoor in naan in kam̧ool eo ami, ewōr jikin n̄an kom̧ ilo Kabun̄ in. Itok, kobatok ippām!

Itok, Kobatok Ippām!

Ilo en̄jaake in jab wānōk ko ad, ij lōke bwe kom̧ naaj lo ibwilijin membōr ro an Kabun̄ in elōn̄ iaan jetōb ko rem̧m̧an tata laļ in emaron̄ kwaļo̧ki. Kabun̄ eo an Jisōs Kraist āinwōt ekan̄ōltok jouj im kea, m̧ool im kijejeto.

Eļan̄n̄e kom̧ij kotmane n̄an lo armej ro rōweppān ijin, kom̧ naaj inepata. Ak eļan̄n̄e kom̧ naaj pukot katak eo eman an Kraist, naan in Anij “eo enaaj kemour jetōb eo ekinejnej,”9 im kokwojarjar im̧we eo an Jetōb Kwojarjar, innām kom̧ naaj loi ijin. Ilo tōre in idajon̄jon̄ e tōmak―in tōre in ijo ekanooj lōn̄ en̄jake ko rettoļo̧k jān iakwe eo an Anij―ijin kom̧ maron̄ lo juon armej eo eikdelel n̄an jeļā im ej keppakļo̧k aer Rilo̧mo̧o̧r ilo jerbal n̄an Anij im armej ro, ejja āinwōt kom̧. Itok, kobatok ippām!

Kom̧ Naaj Ke Barāinwōt Ilo̧k ?

Ij kememej ļo̧k juon tōre ilo mour eo an Rilo̧mo̧o̧r eo ke elōn̄ raar kowaan E. 10 Jisōs eaar kajjitōk ippān jon̄oulruo rijilōk ro An:

“Kom̧ Naaj Ke barāinwōt ilo̧k?

“Innem Simōn Piter e uwaak E, “Irooj, kōm naaj ilo̧k wōt n̄an wōn? Ippam̧ naan ko naan in mour indeeo.”11

Ewōr iienko n̄e jej aikuj uwaake ejja kajjitōk eo wōt. Jenaaj ke barāinwōt ilo̧k? Ak jenaaj ke, āinwōt Piter, dāpij wot naan in mour indeeo?

Elan̄n̄e kwoj pukōt m̧ool eo, meļeļe, im juon wāween n̄an ukot tōmak n̄an jerbal; eļan̄n̄e kwoj pukot juon jikin n̄an pād ie: Itok, kobatok ippām!

Elan̄n̄e kwar ilo̧k jān tōmak eo juon iien kwar kaorōke: Bar itok. Kobatok ippām!

Eļan̄n̄e kwoj po n̄an ebbwer: Bar bed wōt jidik. Ewōr jikin n̄an kwe ijin.

Ij akweļap ippān aolep ro rej ron̄jake ak riiti ennaan kein: Itok, kobatok ippām. Itok im ron̄jake kūr eo an Kraist emeanwōd. Bōk am dābweel im ļoor E.12

Itok, kobatok ippām! Bwe ijin kwonaaj lo ta eo eaorōkļo̧k jān jabdewōt wōņāān.

Ij kam̧ool bwe ijin kwonaaj lo naan ko an mour indeeo, kallim̧ur in kōjeram̧m̧an eo an pinmuur eo, im iaļ eo n̄an aeņōm̧m̧an im m̧ōņōņō.

Ij lukkuun jar bwe am̧ pukōt make m̧ool eo naaj im̧we būruwōn ikdelel eo am̧ n̄an itok im kobatok ippām. Ilo etan Jisōs Kraist, amen.