Mei, Bom Teloi er Kemam
Ng diak el iior er a teletael el mngara chelsel, reksi er a klengar kau, malechub a klisichel a klaumera er kau, ngarngii a basio el kirem er a chelsel tial Ikelesia.
Ng mlarngii a tal chad el ulemerrous el kmo ng mlara chelsel a klou el blai el rechad lomtechei a kakerous el kelchelid a mle kldibel er a chelsel. Ng mlo mtebegnar el kmo ngarngii a kmo ngera er a chelsel aikel kakerous el klechelid el ungil e klou a belkul.
Ng mlo kebetech ngii me a romtechei er a Ikelesia er a Jesus Kristo er a Uriul-klebesei el Santo e uleker tir, “Ngera ng kirir a rechedal a ikelesia el meruul?”
“Kemama diak ki mongerchir a ngerang,” tir a millekoi. “Eng di Rubaka kmo kede odars a rokui.”
Tirkal obekel a millemolem el mesaod el kirel okedong er a Ikelesia, oldingel e olisechakl, mission, ongdibel er a telungalek, ureor er a templo, teletael me a tekoi er a ngeso, me a ngerachel el olisechakl a klas.
“Kom harau er a rechedemiu el meruul aika el ureor?” ngii el chad a uleker.
“Oh, ng diak,” tirka el obekel a ulenger. “A rechedal a ikelesia odars a temir el di tada.”
“Dirrek,” tirkal lobekel a millemolem, “bek lelolem el buil, e a rechedal a ikelesia a chemoit a kmeed el teruich el sikang lomes e orrenges er a klou longdibel.”
“Teruich el sikang el rechad a mengedecheduch?” ngika el chad a mlo mechas a rengul.
“E a ikel ongdibel er kemiu er a bek el sandei? Ngua ngera klemengetel?”
“Edei el sikang, er a bek el Sandei!”
“Oh, oi,” ngika el chad a dilung. “A rechedal a ikelesia te meral meruul aikal rokui el bla mdung?”
“Ma lmuut el bebil. Ng dirkak ki basech a ureor er a reksi er a telungalek, camp er a rengeasek, devotionals, omesubel chedaol llechukl, miting me a omesuub el kirel omerreder, omilil er a rengeasek er a bek el sandei, seminary er a bek el tutau, kedmeklel omekedecheraol er a ikelesia, e dirrek el ngarngii a llechul a Rubak el kirel a ulekerreuil a bedenged, olsengerenger er a bek el buil lolngeseu er a remechebuul, me a ongeltacher.”
Ngika el chad a dula el kmo, “Ng kora rrau a renguk. Ngera uchul me a ngii di el chad a soal mo chedal tial ikelesia?”
Tirka el obekel a mlo klikmechur e dula el kmo, “Aki ulureng me moker tiaikid el ker.”
Ngera Uchul me a Ngii Di el Chad a mo Chedal tial Ikelesia?
Ngarngii a taem e a betok el ikelesia er a beluulechad a uaia lorael a rechedal mo kesai, eng di a Ikelesia er a Jesus Kristo er a Uriul-klebesei el Santo—a uaisei el kmal kekerei a dongaisisu er ngii—eng di ng ta er a kot el mereched el mo obdois a rechedal ikelesia er a beluulechad. Se er a September 2013 e a Ikelesia a ngar er ngii a betok er a 15 milion el chedal er a beluulechad el rokir.
Ngarngii a betok el uchul tiang, eng di msall e kuchais a bebil?
Ikelesia er a Osobel
A kot, tial Ikelesia a mloluut er chelechal taem lokiu a Jesus Kristo. Tiaikid a obetik er a ngerachel loba Ngklel el meruul a urerel—melecholb el kirel a ngbetel a klengir, omor er a chim el kirel a sengk er a Chedaol Reng, e merenged a ngara beluulechad me a babeluades.1
Tirkel mo chedal tial Ikelesia a meruul er ngii le tir loubeltikelreng el mora Osobel el Jesus Kristo e sorir el mo oltirakl er Ngii. Te semeriar er a klemedengei el kmo a Dios a mla lmuut el mengedecheduch el mora chad. Sel ngai a chedaol ruoll er a priesthood el siseb er a telbiil lobengkel a Dios, e te melchesuar a Klisichel er a klengar tir.2Sel siseb er a chedaol templo, e te omelchesiu el seluk er a Rengedel. Sel longuiu a chedaol llechukl3e loltirakl a osischeklir a reprofet er Ngii, e te merael mo kmeed er a Osobel el tir oubeltikelreng er ngii.
Ouuedikel el Klaumerang
A tara uchul a kmo a Ikelesia a kudmokl a techall er a ungil lomeruul.
A oumera er a Dios a kmal ungil, eng di te betok el chad a sorir lmuut el meruul a betok er a bai di orrenges a ungil cheldecheduch er a chedaol llechukl malechub ete oureng el kiei er a babelaudes.4 Ng sorir el rullii a klaumera er tir el mo oureor. Ng sorir el imuiil a chimal a bilir e mora ureor.
E tiaikid a dubech sel bol teloi er kid—ng betok a techellir lousbech a duch er tir, chubechub, me a temir el meruul a ungil. Ng uaisei el diak a chad el udeudel el meruul a ureor er tial oberberk el ikelesia, eng di a rechedal a ikelesia a di tir el meruul a ureor. Te mokedong lokiu odbechel Chedaol Reng. Bebil er a taem e ke de di odars a temed, ea le bebil er a taem e kida “modars el mo meruul.” Ng diak domes a ureor el uaia le berraod ng bai techall el mo kudmokl a telbiled el kid a remuul el mo mesiou er a Dios me a Rengelekel.
Mekreos el Klengeltengat
Ongedei el uchul e a rechad a mo chedal tial Ikelesia a kmo sel rael el dorael er ngii el mo chedal a Kristo a uchul a mekreos el klengeltengat.
Kede mesa techolbechelid el uaia luchelel a omerolled el chedal a Kristo. Omerolled er a bek el sils lobengkel a Jesus Kristo a meskid a budech me a moktek er tial klengar me a dmolech el deureng me a diak a ulebengelel klengar er sel mei el beluulechad.
Tirkel blak a rengrir loltirakl er tiaikid el rael a mo mochib er a betok el kengaol, klengitelreng, me a ouchelreng er a klengar.
A rengariou a rengrir me a remelemalt a rengir a mo metik a mekreos el llomes er tial beluulechad.
Tirkel ngara ringel malechub a klengitelreng a mo metik osumechereng.
Tirkel loberraod er a klengit a mo metik er a klausubes, iilmokl, me a ulengull.
Mo er Tirkel mo Iikrii tial Ikelesia
A skel a klemerang a mla mekrolterir a rebetok el chad el mei er a Ikelesia er a Jesus Kristo er a Uriul-klebesei el Santo. Eng di, te ngarngii a rebebil el mo iikrii a Ikelesia el ngii a tara taem e ng mle sorir.
A chad a locha oker, “Alsekum e a ebangkelio a kmal ungil, e ngera uchul me a chad a mo iikrii?”
Bebil er a taem e kede omdasu el kmo te locha mlo kesib a rengrir malechub e te mesaik malechub eng klengit a uchul. A mera er ngii, ng diak el beot el tekoi. Ng klemerang, el diak a di chimo el uchul a kakerous el teletael.
Bebil er a rechedal a ikelesia er kid a ngara ringel el betok el rak el kirel a kmo te mo cheroid er a Ikelesia ng diak.
Chelsel tial Ikelesia el kmal mesisiich el mengeluolou a mimokl lomelilt er a dersta el chad, el mloluut lokiu a ngeasek el chad el mlarngii a keril e ulengit a nger, e kede mengull er tirkel tir a meral losiik er a klemerang. Ng locha mo moalech a rengud sel sekum e te mo cheroid er a Ikelesia me a klemerang el bla debetik er ngii, eng di kede mengull er a llemeltir el mengull er a Mesisiich el Dios loltirakl er sel lomdasu er ngii eng klemerang, el kmal di uaikid.5
Dirkak a Nger ngii el Ker
A rebebil a ngara ringel el kirel a dirkak el ngai a nger ngii el ker el ngii a mla mekedmokl malechub eng mla medung ruchei. Aki bleketakl el kmo chelsel aikal mereko el eru el dart el rak er a reksi er a Ikelesia—lobengkel a chedaol cheldecheduch, chetengakl, me a teletael kirel odbechel a klaumerang—e ngarngii a bebil er a tekoi el mla medung e mla mekedmokl el rulterir a rechad el mo rrau a rengrir.
Bebil er a taem ea ker a duubech le kid el dirkak dengai a rokui el tekoi el kirel meng kired el telkib el mo klou a rengud e mengiil. Uriul el bla bo dodengei a rokui el klemerang, e a ikel tekoi el dimlak el bleketakl a mo bleketakl er a uldesued.
Bebil er a taem e ngarngii a klekakerous er a uldasu el kirel a meral belkul a “klemerang.” A ker el uchul a rraureng er a rebebil a sebechel, alsekum e kede mo ungil tirterii, choisisii a klaumera er a rebebil.
Cheleuid er a re Diak el Melemalt el Chad
Chelechang, e a kmal di mo bleketakl, ngarngii a taem e a rechedal malechub ete mengeteklel a Ikelesia a remuul a cheleuid lomeruul. Ng locha tekoi el mildung malechub eng milkedmokl el diak el tabesul ngii me a ikel doumerang, suobel, malechub eng osisechakl.
A kumtab el kmo a Ikelesia a locha mo cherrungel omko rechad lorrurt er ngii a melemlat el chad. A Dios a cherrungel, e a Osischeklel a klikiid. Eng di Ngii oureor lokiu kid—kid el diak de melemlat el Ngelekel—ea rechad el diak el melemlat a remuul a cheleuid.
Chelsel a Babier er a Mormon e kede menguiu el kmo a lengarngii a cheleuid eng cheleuid er a rechad meng diak doltuub a tekingel a Dios, me luchul e bo de klikiid er sel kerkeriil er a Kristo.6
Tiaikid a dimla teletael e melemolem el uaisei el mo er sel sils el Kristo a Ngii a mo mengedereder er a beluulechad.
Ng kerior el bebil a mla ruebet el cheleuid er a rechad a uchul. Eng di diak el iior er a ikal cheleuid, le diak a ulebengelel klemerang er a mla moluut el ebangkelio me a Ikelesia er a Jesus Kristo er a Uriul-klebesei el Santo a diak el mengodech, diak bo lak, me a diak el metemall.
Ngak el Apostol er a Rubak el Jesus Kristo e tara mla mes er a medak a urerel a chelechad er a chelsel a Ikelesia, e a kuchais er a sioning er ngak el kmong diak a ngii di el uldasu el kirel tial Ikelesia el mekedmokl el diak lokiu a nglunguuch losiik er a llomes, ulekrael me a kengei er a Diak a Ulebengelel Chedam. Tia Ikelesia er a Jesus Kristo. A Dios a diak el becherei tial urerel me le mengodech a rolel malechub el meterob sel chedaol omerollel.
Ngarngii a Basio el Kirem
Tirkel tir a mla mo cheroid er a Ikelesia, e a kmo, kemiu el sechelik, ngarngii a basio el kirem.
Mei e mdechel a decham, sengk el molab, me a klisichem lobengkemam. Kede rokui el mo ungil ruriul.
A rebebil a locha oker,“E a ikal rraureng er ngak ng mekera?”
Ng uaisei el kirel ngarngii a ker—a tane er a melemalt el rraureng a dimla blechoel duubech el mo klou el kerrekar er a klemedengei. Ngarngii a re kesai el chedal a Ikelesia el tir, a tara taem, eng dimlak a rraureng malechub eng oberaod el ker er a uldesuir. A tara moktek er a Ikelesia a omekeroul e melisiich er a tane er a klaumerang—luldimukl alsekum eng mechitechut lokiu a rraureng. A klaumerang a oureng a tekoi el diak le meues eng di ng klemerang.7
A ;euaisei e rodam me a rodos—kemiu el sechelik—a kulengit er kemiu mebo moumededenger er a rraureng er kemiu ruchei er a moumededenger er a klaumera er kemiu.8 Ng diak el kired el mecherei a rraureng me luchul e dechelsimer el diak dengai a chedaol beltikelreng, budech, me a mekreos el sengk el mei lokiu a klaumera er a Rubak el Jesus Kristo.
A rebebil a locha kmo, “Ng kmal diak chatter el teloi er kemiu el chedal a Ikelesia.”
Omko ng sebechem el mesa chelsel a rengum, e ke locha mo metik el kmo ke bai kmal chatter er a ikel kuk di mle uldesuem. Ng locha mo mechas a rengum el metik el kmo ng di osisiu a soad me a mondai el de ngara chelsel. A klengar kau me a ulekerulem a locha ngodech er sel osengem er a Ruriul-klebesei el Santo, eng di tia sebechel klengeltengat. Rodam me a rodos, kemiu el sechelei, kede ousbech a duch er kemiu me a uldesuiu. Sel klakakerous er a rebetok el chad el meliuekl er a beluulechad a klisichel tial Ikelesia.
A rebebil a locha kmo, “Ng diak el sebechek lotirakl a llechemiu.”
Rokui el di ngarngii a uchul ete mei! A Ikelesia a chelderoder lomekeroul er a re diak el melemalt, re ngara ringel, me a remechitechut. Ng mui er a rechad el tir a blak a rengrir loltirakl a llach, luldimukl a le dirkak bol cherrungel loltirakl.
A rebebil a locha kmo, “Ak medengelii a chedal a Ikelesia er kemiu el diak loltirakl a llach. Ng kmal diak bo kchedal a ikelesia el ngarngii a chad el uaisei.”
Alsekum e ke omdasu er a diak loltirakl a llach el chad el ngii a diak el sebechel mo cherrungel er a ikel ngii a loumerang, e kid el rokui el diak doltirakl a llach. Ng diak a ta er kid el kmeed el uaia Kristo el kid a medengei el kmo ng kired el mo uai ngii. Eng di ng blak a rengud el mo mesisiich er a ikel cheleuid er kid me a kngtid. Me kede oba rengud me a bedenged el melasm el mo ungil lokiu a Tngakireng er a Jesus Kristo.
Alsekum ea ikang a soam, eng diak el iior er a teletael el mngara chelsel, reksi er a klengar kau, malechub a klisichel a klaumera er kau, ngarngii a basio el kirem er a chelsel tial Ikelesia. Mei, bom teloi er kemam!
Mei, Bom Teloi er Kemam!
Meng diak el iior er a chelitechetud, e ngak a ansing el kmo ke mo metik er a rebebil er a rechedal tial Ikelesia el kmal ungil chad el diak ko betik er tir er a ngii di el ker er tial beluulechad. A Ikelesia er a Jesus Kristo a uaia lolechau mad er a rebekokeuii e ungil lomekerreu el chad, remelemalt e iituuk el chad.
Alsekum e komdasu el metik er a remelmalt el chad er tiang, eng locha mo diak ko betik er tir. Eng di alsekum e kosiik er a klikiid el osischeklel a Kristo, el tekingel a Dios el “lomekungil a telemall el reng,”9 me a mengikiid el klisichel Chedaol Reng, e tiaikid a basio el betik er ngii. Chelechal beluulechad el ngomeda klaumerang—chelechal beluulechad el betok a omelchesiu el cheroid er a babeluades—e tiaikid a obetik er a rechad el tir a osiik el mo medengei e mo kmeed er a Osobelir lokiu omesiou el mora Dios me a rebebil, el di uai kau. Mei, bom teloi er kemam!
Ke Locha Dirrek el Mo er Cheroid?
Ak lotkii a taem er a klengar Osobel el betok a mlo er cheroid er Ngii.10 A Jesus a uleker tirkal teruich me a terung el chedal el kmo:
“Kom locha dirrek el mo er cheroid?
“Ea Simeo Petrus a dilu er ngii el kmo, Rubak, a ki mo er techang? kau olab a diak a ulebengelel tekoi er a klengar.”11
Ngarngii a taem e kede ousbech a nger er a osisiu el ker. Kede locha dirrek el mo er cheroid? A lechub e kede, mo uaia Petrus, el urrekodel er a tekingel a diak a ulebengelel klengar?
Alsekum e kosiik er a klemerang, belkul, me a rael el meltii a klaumerang el mo omeruul; alsekum e kosiik er a basio el borngii: Mei, e bom teloi er kemam!
Alsekum e ke mla mo cheroid er a klaumerang el kau a mle tal murrekodel er ngii: Mluut el mei. Bom teloi er kemam!
Alsekum e ke mechetikaik el soam el kimer: Mluut el telkib loutekangel el kiei. Ngarngii a basio el kirem er tiang.
A kulengit er a rokui lorrenges malechub ete menguiu aikal tekoi: Mei, bom teloi er kemam. Mei e motireklii okedongel a bekokeuii el Kristo. Bekiis e bo moltirakl er Ngii.12
Mei, bom teloi er kemam! Le tiaikid a obetik er sel ngii a mekreos el diak el mochar.
A kuchais el kmo tiaikid sel obetik a tekingel a diak a ulebengelel klengar, el rael mora budech, yaksok er a mo suobel me a deureng.
Ak kmal meluluuch el kmo a skem el kirel a klemerang bo luchul e a rengum bol semeriar el mei e teloi er kemam. El ngara chedaol ngklel a Jesus Kristo, amen.