Mga Desisyon alang sa Kahangturan

Ang akong daghang katuigan isip usa ka medikal nga doktor nakahatag nako og dakong pagtahud sa lawas sa tawo. Gibuhat sa Dios isip gasa kaninyo, talagsaon gyud kini kaayo! Hunahunaa ang inyong mga mata nga makakita, mga dunggan nga makadungog, ug mga tudlo nga mobati sa mga butang sa inyong palibut. Ang inyong utok nagtugot kaninyo nga makakat-on, makahunahuna, ug makarason. Ang inyong kasingkasing walay hunong nga nagpitik adlaw ug gabii, gani hapit dili ninyo mamatikdan.⁸

Ang inyong lawas makapanalipod sa kaugalingon. Ang sakit moabut isip pasidaan nga dunay dili maayo ug kinahanglan og atensyon. Ang makatakod nga mga sakit moabut matag karon ug unya, ug kon kini moabut, ang mga antibody maporma nga makadugang sa inyong resistensya sa mosunod nga impeksyon.

Ang inyong lawas moayo sa iyang kaugalingon. Ang mga samad ug mga bun-og mamaayo. Ang nabali nga mga bukog malig-on pag-usab. Akong nasulti ang gamay lang nga sampol sa daghang talagsaong mga hiyas sa lawas nga gihatag sa Dios.

Bisan pa, ingon og sa kada pamilya, kon dili sa kada tawo, pipila ka pisikal nga mga kondisyon anaa nga nagkinahanglan og espesyal nga pag-atiman.⁹ Usa ka sumbanan sa pag-atubang sa mao nga hagit gihatag sa Ginoo. Siya miingon, “Ako mohatag ngadto sa mga tawo og kahuyang nga sila mahimo nga magpaubos; … kay kon sila magpaubos sa ilang mga kaugalingon … ug magbaton og hugot nga pagtuo ngari kanako, niana ako mohimo sa mahuyang nga mga butang nga mahimo nga malig-on ngadto kanila.”¹⁰

Ang talagsaong mga espiritu kasagaran gisulod sa dili hingpit nga mga lawas.¹¹ Ang gasa niana nga lawas makapalig-on sa pamilya samtang ang mga ginikanan ug mga igsoon andam nga molig-on sa ilang kinabuhi libut niana nga bata nga natawo nga dunay espesyal nga panginahanglan.

Ang proseso sa pagkatigulang gasa usab gikan sa Dios, ingon man ang kamatayon. Ang kamatayon unya sa inyong mortal nga lawas importante sa halangdong plano sa Dios alang sa kalipay.¹² Ngano man? Tungod kay ang kamatayon motugot sa inyong espiritu nga makapauli ngadto Kaniya.¹³ Sa mahangturong panglantaw, ang kamatayon sayo ra alang niadtong dili andam nga makigkita sa Dios.

Uban sa inyong lawas nga importante kaayo nga bahin sa mahangturong plano sa Dios, dili ikatingala nga si Apostol Pablo mihulagway niini nga “templo sa Dios.”¹⁴ Kada higayon nga motan-aw kamo sa samin, tan-awa ang inyong lawas isip inyong templo. Kana nga kamatuoran—angayng pasalamatan kada adlaw—positibong makaimpluwensya sa inyong mga desisyon unsaon ninyo sa pag-atiman sa inyong lawas ug unsaon ninyo kini sa paggamit. Ug kadto nga mga desisyon motino sa inyong destinasyon. Sa unsang paagi kini mahimo? Tungod kay ang inyong lawas templo sa inyong espiritu. Ug giunsa ninyo paggamit ang inyong lawas makaapekto sa inyong espiritu. Ang pipila ka mga desisyon nga motino sa inyong mahangturong destinasyon maglakip:

• Unsaon ninyo pagpili sa pag-atiman ug paggamit sa inyong lawas?

• Unsa nga espiritwal nga mga hiyas ang inyong pilion nga palamboon?

Ang inyong espiritu mahangturong butang. Ang Ginoo miingon sa Iyang propeta nga Si Abraham: “Ikaw napili sa wala pa ikaw matawo.”¹⁵ Ang Ginoo miingon og susama niini mahitungod ni Jeremias¹⁶ ug sa daghan pa.¹⁷ Miingon man gani siya niini mahitungod kaninyo.¹⁸

Nakaila ang inyong Langitnong Amahan kaninyo sa dugay nang panahon. Kamo, isip Iyang mga anak, gipili Niya nga moanhi sa kalibutan niining sakto nga panahon, nga mahimong lider sa Iyang importante nga buhat sa kalibutan.¹⁹ Kamo gipili dili tungod sa inyong lawasnong mga hiyas apan tungod sa inyong espiritwal nga mga hiyas, sama sa kaisug, kaligdong sa kasingkasing, kauhaw sa kamatuoran, kagutom sa kaalam, ug tinguha sa pagserbisyo sa uban.

Inyong napalambo kining pipila ka mga hiyas sa kinabuhi nga wala pa dinhi sa yuta. Ang uban inyong mapalambo dinhi sa kalibutan²⁰ sa inyong kanunay nga pagpangita niini.²¹

Usa ka importante nga espiritwal nga hiyas mao ang pagkontrolar sa kaugalingon—ang kalig-on nga ipatigbabaw ang pangisip kay sa gana. Ang pagkontrolar sa kaugalingon makapalig-on sa konsensya. Ug ang inyong konsensya motino sa inyong moral nga pag-atubang sa malisud, matintalon nga mga sitwasyon. Ang pagpuasa makatabang sa inyong espiritu sa pagdominar sa inyong pisikal nga mga gana. Ang pagpuasa makadugang usab sa inyong pag-angkon og tabang sa langit, kay makapakusog kini sa inyong mga pag-ampo. Nganong gikinahanglan man ang pagkontrolar sa kaugalingon? Gitanom sa Dios ang kusog nga mga gana ngari kanato alang sa pag-amuma ug gugma, importante sa pagpadayon sa pamilya.²² Kon makontrolar nato ang atong mga gana pinasubay sa gitakda sa mga balaod sa Dios, makatagamtan kita og mas taas nga kinabuhi, mas dakong gugma, ug kompleto nga kalipay.²³

Nan, dili ikatingala nga kasagaran sa mga tintasyon aron mapalayo gikan sa plano sa Dios alang sa kalipay moabut pinaagi sa dili sakto nga paggamit niadtong importante, hinatag sa Dios nga mga gana. Ang pagkontrolar sa atong mga gana dili kanunay nga sayon. Walay usa nato nga hingpit nga makadumala niini.²⁴ Mahitabo ang kasaypanan. Mahimo ang mga sayop. Mga sala mabuhat. Unsay atong mabuhat? Makakat-on kita gikan niini. Ug tinuoray kita nga makahinulsol.²⁵

Makausab kita sa atong kinaiya. Ang atong mga tinguha mausab. Unsaon? Adunay usa lang ka paagi. Ang tinuod nga kausaban—permanente nga kausaban—moabut lamang pinaagi sa makaayo, makalimpyo, ug makatubos nga gahum sa Pag-ula ni Jesukristo.²⁶ Nahigugma Siya kaninyo—matag usa kaninyo!²⁷ Nagtugot Siya kaninyo nga makakuha og tabang sa Iyang gahum samtang kamo nagsunod sa Iyang mga sugo, sa madasigon, matinguhaon, ug tukmang paagi. Ingon ana ka yano ug kasigurado. Ang ebanghelyo ni Jesukristo mao ang ebanghelyo sa kausaban!²⁸

Ang lig-on nga tawo nga makakontrolar sa gana sa unod makakontrolar sa mga pagbati ug dili ulipon niini. Kana nga matang sa kagawasan importante sa espiritu sama nga ang oxygen importante ngadto sa lawas! Ang kagawasan gikan sa pagkaulipon sa kaugalingon mao ang tinuod nga kalingkawasan!²⁹

Kita “gawasnon sa pagpili sa kalingkawasan ug sa kinabuhi nga dayon … o pagpili sa pagkabihag ug sa kamatayon.”³⁰ Kon kita mopili og mas maayo nga dalan paingon sa kalingkawasan ug kinabuhi nga dayon, naglakip kana sa kaminyoon.³¹ Ang mga Santos sa Ulahing mga Adlaw nagpahayag nga ang “kaminyoon tali sa lalaki ug babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.” Nasayud usab kita nga ang “pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay katapusan nga pag-ila ug katuyoan.”³²

Ang kaminyoon tali sa lalaki ug babaye sukaranan sa doktrina sa Ginoo ug importante sa mahangturong plano sa Dios. Ang kaminyoon tali sa lalaki ug babaye mao ang sumbanan sa Dios sa kahingpitan sa kinabuhi dinhi sa kalibutan ug didto sa langit. Ang sumbanan sa Dios sa kaminyoon dili mahimong abusuhan o saypon pagsabut.³³ Kana kon gusto kamo og tinuod nga kalipay. Ang sumbanan sa Dios sa kaminyoon nanalipod sa sagrado nga gahum sa paglalang og kinabuhi ug sa kalipay sa tinuod nga kasuod sa kaminyoon.³⁴ Nasayud kita nga si Adan ug Eva giminyo sa Dios sa wala pa sila makasinati sa kalipay sa panaghiusa isip bana ug asawa.³⁵

Sa atong panahon, ang gobyerno adunay interes sa pagpanalipod sa kaminyoon tungod kay ang lig-ong mga pamilya naglangkob sa labing maayong paagi sa pagsangkap alang sa panglawas, edukasyon, kaayohan, ug kauswagan sa nagtubo nga mga henerasyon.³⁶ Apan ang gobyerno naimpluwensyahan pag-ayo sa sosyal nga kabag-ohan ug sekular nga mga pilosopiya sa ilang pagsulat, pag-usab, ug pagpatuman sa mga balaod. Bisan unsa pay sibil nga balaod nga napasar, ang doktrina sa Ginoo kabahin sa kaminyoon ug sa moralidad dili mausab.³⁷ Hinumdumi: ang sala, bisan himoong legal sa tawo, sala gihapon sa mga mata sa Dios!

Samtang atong sundon ang kaayo ug kalooy sa Manluluwas, samtang atong hatagan og bili ang mga katungod ug pagbati sa tanang mga anak sa Dios, dili nato mausab ang Iyang doktrina. Dili kita makausab niini. Ang Iyang doktrina kinahanglang atong tun-an, sabton, ug dapigan.

Ang paagi sa Manluluwas sa kinabuhi maayo. Ang Iyang paagi naglakip sa kaputli sa dili pa ang kaminyoon ug hingpit nga pagkamatinud-anon sulod sa kaminyoon.³⁸ Ang paagi sa Ginoo mao lamang ang paagi nga kita makasinati og mahangturong kalipay. Ang Iyang paagi nagdala og malungtarong kahupayan sa atong mga kalag ug padayon nga kalinaw sa atong mga panimalay. Ug labaw sa tanan, ang Iyang paagi naggiya kanato balik ngadto Kaniya ug sa atong Langitnong Amahan, ngadto sa kinabuhing dayon ug kahimayaan.³⁹ Mao kini ang diwa sa buhat ug himaya sa Dios.⁴⁰

Minahal nga kaigsoonan, kada adlaw mao ang adlaw sa pagdesisyon, ug ang atong mga desisyon motino sa atong destinasyon. Moabut ang adlaw nga kita mobarug atubangan sa hukmanan sa Ginoo.⁴¹ Kada usa kanato dunay personal nga interbyu uban ni Jesukristo.⁴² Kita manubag sa mga desisyon nga atong gihimo sa atong mga lawas, sa atong espirituhanong mga hiyas, ug giunsa nato pagtahud ang sumbanan sa Dios sa kaminyoon ug pamilya. Nga kita maalamong mopili kada adlaw sa mga desisyon alang sa kahangturan mao ang akong matinguhaong pag-ampo sa sagrado nga pangalan ni Jesukristo, amen.