ການຕັດສິນໃຈຊົ່ວນິລັນດອນ

ໂດຍ ແອວເດີ ຣະໂຊ ເອັມ ນຽວສັນ

ແຫ່ງສະພາອັກຄະສາວົກສິບສອງ

ຮູບພາບ

ການໃຊ້ອິດສະລະພາບທີ່ທ່ານມີໃນທາງທີ່ສະຫລາດ ແມ່ນສຳຄັນຫລາຍສຳລັບຄວາມເຕີບໂຕທາງວິນຍານຂອງທ່ານ, ໃນຕອນນີ້ ແລະ ຊົ່ວນິລັນດອນ.

ອ້າຍເອື້ອຍນ້ອງທັງຫລາຍ, ແຕ່ລະມື້ເຮົາຕ້ອງຕັດສິນໃຈ. ປະທານທອມມັສ ແອັສ ມອນສັນ ໄດ້ສອນເຮົາວ່າ “ການຕັດສິນໃຈກຳນົດວິຖີຊີວິດ.”¹ ການໃຊ້ອິດສະລະພາບທີ່ທ່ານມີໃນທາງທີ່ສະຫລາດ ແມ່ນສຳຄັນຫລາຍສຳລັບຄວາມເຕີບໂຕທາງວິນຍານຂອງທ່ານ, ໃນຕອນນີ້ ແລະ ຊົ່ວນິລັນດອນ. ທ່ານບໍ່ນ້ອຍເກີນໄປທີ່ຈະຮຽນ, ບໍ່ເຖົ້າແກ່ເກີນໄປທີ່ຈະປ່ຽນແປງ. ການຢາກຮຽນຮູ້ ແລະ ການປ່ຽນແປງຂອງທ່ານແມ່ນມາຈາກຄວາມພະຍາຍາມສຳລັບຄວາມກ້າວໜ້ານິລັນດອນ.² ແຕ່ລະມື້ຈະນຳໂອກາດມາໃຫ້ ອັນທີ່ຈະສະທ້ອນຕໍ່ນິລັນດອນ.

ເຮົາເປັນບຸກຄົນທີ່ດຳເນີນໄປຊົ່ວນິລັນດອນ—ເປັນລູກໆທາງວິນຍານຂອງພຣະບິດາເທິງສະຫວັນ. ພຣະຄຳພີບັນທຶກວ່າ “ພຣະເຈົ້າໄດ້ສ້າງມະນຸດໃນຮູບລັກສະນະຂອງພຣະອົງ, … ພຣະອົງໄດ້ສ້າງຊາຍ ແລະ ຍິງຂຶ້ນ.”³ ບໍ່ດົນມານີ້ ຂ້າພະເຈົ້າໄດ້ຍິນກຸ່ມນັກຮ້ອງເຍົາວະຊົນຮ້ອງເພງຊື່ວ່າ “ເຮົາເປັນລູກຂອງພຣະເຈົ້າ.”⁴ ຂ້າພະເຈົ້າໄດ້ຄິດວ່າ, “ເປັນຫຍັງຂ້າພະເຈົ້າຈຶ່ງບໍ່ໄດ້ຍິນຜູ້ເປັນພໍ່ແມ່ທີ່ຊື່ສັດຮ້ອງເພງນີ້ເລື້ອຍໆ?” ເຮົາ ທຸກຄົນ ບໍ່ໄດ້ເປັນລູກໆຂອງພຣະເຈົ້າບໍ? ຕາມຄວາມຈິງແລ້ວ, ບໍ່ມີໃຜໃນພວກເຮົາສາມາດ ລົ້ມເລີກ ການເປັນລູກຂອງພຣະເຈົ້າໄດ້!

ໃນຖານະທີ່ເປັນລູກໆຂອງພຣະເຈົ້າ, ເຮົາຄວນຮັກພຣະອົງດ້ວຍສຸດຈິດສຸດໃຈ, ແມ່ນແຕ່ຫລາຍກວ່າເຮົາຮັກພໍ່ແມ່ຂອງເຮົາຢູ່ໃນໂລກນີ້.⁵ ເຮົາຄວນຮັກເພື່ອນບ້ານຂອງເຮົາເໝືອນເປັນອ້າຍເອື້ອຍນ້ອງດຽວກັນ. ບໍ່ມີພຣະບັນຍັດຂໍ້ໃດທີ່ຍິ່ງໃຫຍ່ໄປກວ່ານີ້.⁶ ແລະ ເຮົາຄວນນັບຖືຊີວິດຂອງມະນຸດ ແຕ່ລະຊ່ວງໄລຍະຂອງມັນ.

ພຣະຄຳພີສອນວ່າ ຮ່າງກາຍ ແລະ ວິນຍານເປັນຈິດວິນຍານຂອງມະນຸດ.⁷ ໂດຍທີ່ມີສອງພາກສ່ວນ, ທ່ານແຕ່ລະຄົນສາມາດຂອບພຣະໄທພຣະເຈົ້າສຳລັບຂອງປະທານອັນລ້ຳຄ່ານີ້ທີ່ເປັນຮ່າງກາຍ ແລະ ວິນຍານ.

ຮ່າງກາຍຂອງມະນຸດ

ອາຊີບເປັນນາຍໝໍຂອງຂ້າພະເຈົ້າໄດ້ເຮັດໃຫ້ຂ້າພະເຈົ້າມີຄວາມນັບຖືຫລາຍຕໍ່ຮ່າງກາຍຂອງມະນຸດ. ໂດຍທີ່ພຣະເຈົ້າໄດ້ສ້າງຂຶ້ນເປັນຂອງປະທານໃຫ້ທ່ານ, ມັນເປັນສິ່ງປະຫລາດໃຈຫລາຍ! ໃຫ້ເຮົາຄິດກ່ຽວກັບຕາທີ່ຫລຽວເຫັນ, ຫູທີ່ໄດ້ຍິນ, ແລະ ນິ້ວມືທີ່ໄດ້ຈັບບາຍທຸກສິ່ງທີ່ໜ້າອັດສະຈັນໃຈ. ສະໝອງຂອງທ່ານປ່ອຍໃຫ້ທ່ານຮຽນ, ຄິດ, ແລະ ພິຈາລະນາ. ຫົວໃຈຂອງທ່ານເຕັ້ນບໍ່ເຄີຍຢຸດທັງກາງເວັນ ແລະ ກາງຄືນ, ໂດຍທີ່ທ່ານເກືອບບໍ່ຮູ້ສຶກຕົວເລີຍ.⁸

ຮ່າງກາຍຂອງທ່ານປ້ອງກັນຕົວມັນເອງ. ຄວາມເຈັບປວດຈະເກີດຂຶ້ນເພື່ອເຕືອນວ່າບາງສິ່ງຜິດປົກກະຕິ ແລະ ຕ້ອງເອົາໃຈໃສ່. ຄວາມປ່ວຍໄຂ້ຈະເກີດຂຶ້ນເປັນບາງຄັ້ງ, ແລະ ເມື່ອມັນເກີດຂຶ້ນ, ສານຕໍ່ຕ້ານເຊື້ອພະຍາດຈະຮວມຕົວເຂົ້າກັນເພື່ອກຳຈັດພະຍາດ.

ຮ່າງກາຍຂອງທ່ານຈະປິ່ນປົວຕົນເອງ. ມັນຈະປິ່ນປົວບາດແຜ ແລະ ບ່ອນບວມຊ້ຳ. ກະດູກທີ່ຫັກກໍສາມາດເຂັ້ມແຂງຄືນໃໝ່. ສິ່ງທີ່ຂ້າພະເຈົ້າໄດ້ກ່າວມານີ້ ເປັນພຽງຕົວຢ່າງເລັກນ້ອຍເທົ່ານັ້ນ ໃນຮ່າງກາຍທີ່ມະຫັດສະຈັນ ຊຶ່ງພຣະເຈົ້າໄດ້ປະທານໃຫ້.

ເຖິງແມ່ນເປັນເຊັ່ນນັ້ນ, ເບິ່ງຄືວ່າ ໃນແຕ່ລະຄອບຄົວ, ຖ້າຫາກບໍ່ແມ່ນແຕ່ລະຄົນ, ຈະມີບັນຫາສຸຂະພາບບາງຢ່າງທີ່ຕ້ອງເອົາໃຈໃສ່.⁹ ພຣະເຈົ້າໄດ້ມອບແບບແຜນສຳລັບການອົດທົນນຳການທ້າທາຍໃຫ້ແລ້ວ. ພຣະອົງໄດ້ກ່າວວ່າ, “ເຮົາຈະມອບຄວາມອ່ອນແອໃຫ້ມະນຸດ ເພື່ອເຂົາຈະໄດ້ຖ່ອມຕົວ; … ເພາະຖ້າຫາກເຂົາຖ່ອມຕົວຕໍ່ໜ້າເຮົາ … ແລະ ມີສັດທາໃນເຮົາ, ເວລານັ້ນເຮົາຈະເຮັດໃຫ້ສິ່ງທີ່ອ່ອນແອນັ້ນກັບມາເຂັ້ມແຂງສຳລັບເຂົາ.”¹⁰

ວິນຍານທີ່ດີພ້ອມທຸກຢ່າງ ສ່ວນຫລາຍແລ້ວຈະເຂົ້າຢູ່ໃນຮ່າງກາຍທີ່ບໍ່ສົມປະກອບ.¹¹ ຮ່າງກາຍເຊັ່ນນັ້ນ ຕາມຈິງແລ້ວ ສາມາດເພີ່ມຄວາມເຂັ້ມແຂງໃຫ້ແກ່ຄອບຄົວໄດ້ ເມື່ອພໍ່ແມ່ ແລະ ອ້າຍເອື້ອຍນ້ອງເຕັມໃຈທີ່ຈະດູແລຜູ້ທີ່ເກີດມາກັບຄວາມຕ້ອງການພິເສດ.

ການເຖົ້າແກ່ຊະລາກໍເປັນຂອງປະທານຈາກພຣະເຈົ້າຄືກັນ, ເຊັ່ນດຽວກັບຄວາມຕາຍ. ການຕາຍຂອງຮ່າງກາຍທີ່ເປັນມະຕະຂອງທ່ານເປັນສິ່ງສຳຄັນຫລາຍຕໍ່ແຜນແຫ່ງຄວາມລອດຂອງພຣະເຈົ້າ.¹² ເປັນຫຍັງ? ເພາະວ່າຄວາມຕາຍຈະອະນຸຍາດໃຫ້ວິນຍານກັບຄືນໄປຫາພຣະອົງ.¹³ ອີງຕາມທັດສະນະຂອງນິລັນດອນແລ້ວ, ຄວາມຕາຍໄດ້ມາເຖິງໄວສຳລັບຜູ້ທີ່ບໍ່ທັນຕຽມພ້ອມທີ່ຈະພົບພຣະເຈົ້າເທົ່ານັ້ນ.

ໂດຍທີ່ຮ່າງກາຍຂອງທ່ານເປັນພາກສ່ວນສຳຄັນຕໍ່ແຜນນິລັນດອນຂອງພຣະເຈົ້າ, ຈຶ່ງເປັນສິ່ງບໍ່ປະຫລາດໃຈແນວໃດ ທີ່ອັກຄະສາວົກໂປໂລໄດ້ບັນຍາຍວ່າມັນເປັນ “ວິຫານຂອງພຣະເຈົ້າ.”¹⁴ ທຸກເທື່ອທີ່ທ່ານຫລຽວເບິ່ງແວ່ນແຍງ, ທ່ານຈະເຫັນຮ່າງກາຍຂອງທ່ານວ່າເປັນວິຫານຂອງທ່ານ. ນັ້ນເປັນຄວາມຈິງ—ທີ່ເຮົາຄວນມີຄວາມກະຕັນຍູຕໍ່ໃນແຕ່ລະວັນ—ສາມາດເປັນອິດທິພົນໃນທາງທີ່ດີໃຫ້ແກ່ການຕັດສິນໃຈຂອງທ່ານ ທີ່ຈະດູແລຮ່າງກາຍຂອງທ່ານໃນທາງໃດ ແລະ ຈະໃຊ້ມັນໃນທາງໃດ. ແລະ ການຕັດສິນໃຈເຫລົ່ານັ້ນ ຈະກຳນົດວິຖີຊີວິດຂອງທ່ານ. ເປັນແນວນີ້ໄດ້ແນວໃດ? ເພາະວ່າຮ່າງກາຍຂອງທ່ານເປັນວິຫານຂອງວິນຍານຂອງທ່ານ. ແລະ ວິທີທີ່ທ່ານໃຊ້ມັນຈະກະທົບກະເທືອນຕໍ່ວິນຍານຂອງທ່ານ. ການຕັດສິນໃຈບາງຢ່າງທີ່ຈະກຳນົດວິຖີຊີວິດຂອງທ່ານຊົ່ວນິລັນດອນ ແມ່ນຮ່ວມທັງ:

• ທ່ານຈະເລືອກດູແລ ແລະ ໃຊ້ຮ່າງກາຍຂອງທ່ານແນວໃດ?
ຄຸນສົມບັດທາງວິນຍານໃດແດ່ທີ່ທ່ານຈະເລືອກພັດທະນາ?

ວິນຍານຂອງມະນຸດ

ວິນຍານຂອງທ່ານເປັນຮູບຮ່າງທີ່ຍືນຍົງຊົ່ວນິລັນດອນ. ພຣະຜູ້ເປັນເຈົ້າໄດ້ກ່າວຕໍ່ສາດສະດາອັບຣາຮາມວ່າ: “ເຈົ້າໄດ້ຖືກເລືອກກ່ອນເຈົ້າມາເກີດ.”¹⁵ ພຣະຜູ້ເປັນເຈົ້າໄດ້ກ່າວບາງສິ່ງທີ່ຄ້າຍຄືກັນນີ້ ກ່ຽວກັບເຢເລມີຢາ¹⁶ ແລະ ກ່ຽວກັບຫລາຍໆຄົນ.¹⁷ ພຣະອົງຍັງໄດ້ກ່າວກ່ຽວກັບທ່ານຄືກັນ.¹⁸

ພຣະບິດາເທິງສະຫວັນຂອງທ່ານໄດ້ຮູ້ຈັກທ່ານເປັນເວລາດົນນານ. ທ່ານ, ໃນຖານະທີ່ເປັນບຸດ ແລະ ທິດາຂອງພຣະອົງ, ໄດ້ຖືກເລືອກໂດຍພຣະອົງໃຫ້ມາສູ່ໂລກໃນເວລານີ້ໂດຍສະເພາະ, ເພື່ອເປັນຜູ້ນຳວຽກງານອັນຍິ່ງໃຫຍ່ຂອງພຣະອົງຢູ່ໃນໂລກ.¹⁹ ທ່ານໄດ້ຖືກເລືອກ ບໍ່ ພຽງແຕ່ບຸກຄະລິກລັກສະນະຂອງຮ່າງກາຍຂອງທ່ານເທົ່ານັ້ນ, ແຕ່ໄດ້ເລືອກຄຸນສົມບັດໃຫ້ ວິນຍານຂອງທ່ານນຳອີກ, ເຊັ່ນ ຄວາມອົງອາດ, ຄວາມກ້າຫານ, ຄວາມຊື່ສັດຂອງໃຈ, ຄວາມກະຫາຍຢາກຮູ້ຄວາມຈິງ, ຄວາມຫິວຢາກໄດ້ສະຕິປັນຍາ, ແລະ ຄວາມປາດຖະໜາທີ່ຈະຮັບໃຊ້ຄົນອື່ນ.

ທ່ານໄດ້ພັດທະນາຄຸນສົມບັດບາງຢ່າງເຫລົ່ານີ້ກ່ອນທ່ານມາສູ່ໂລກ. ສ່ວນຢ່າງອື່ນໆ ທ່ານພັດທະນາມັນຢູ່ໃນໂລກນີ້²⁰ ເມື່ອທ່ານສະແຫວງຫາມັນຢ່າງບໍ່ຫລົດລະ.²¹

ຄຸນສົມບັດທີ່ສຳຄັນທາງວິນຍານແມ່ນການຄວບຄຸມຕົນເອງໄດ້—ການເລືອກທີ່ມີເຫດມີຜົນ ບໍ່ແມ່ນອີງຕາມຄວາມຢາກ. ການສາມາດຄວບຄຸມຕົນເອງ ຈະເຮັດໃຫ້ມີຄວາມສຳນຶກທີ່ແຂງແກ່ນ. ແລະ ຄວາມສຳນຶກຂອງທ່ານຈະກຳນົດການຕອບຮັບໃນເວລາຫຍຸ້ງຍາກ, ຖືກທົດລອງ, ແລະ ຖືກທົດສອບ. ການຖືສິນອົດເຂົ້າສາມາດຊ່ອຍວິນຍານຂອງທ່ານໃຫ້ພັດທະນາຄວາມເຂັ້ມແຂງຕ້ານທານກັບຄວາມຢາກທາງຮ່າງກາຍ. ການຖືສິນອົດເຂົ້າຈະເພີ່ມການໄດ້ຮັບຄວາມຊ່ອຍເຫລືອຈາກສະຫວັນ ເພາະມັນເນັ້ນໜັກຄຳອະທິຖານຂອງທ່ານ. ເປັນຫຍັງຈຶ່ງຈຳເປັນຕ້ອງຄວບຄຸມຕົນ? ພຣະເຈົ້າໄດ້ປະທານຄວາມປາດຖະໜາໃຫ້ເຮົາສຳລັບການບຳລຸງລ້ຽງ ແລະ ຮັກ, ສຳຄັນຫລາຍຕໍ່ຄວາມຢູ່ລອດຂອງຄອບຄົວມະນຸດ.²² ເມື່ອເຮົາສາມາດຄວບຄຸມຄວາມຢາກຂອງເຮົາໃຫ້ຢູ່ພາຍໃນກົດຂອງພຣະເຈົ້າ, ແລ້ວເຮົາຈະສາມາດຊື່ນຊົມກັບຊີວິດທີ່ຍືນຍາວ, ມີຄວາມຮັກຫລາຍກວ່າ, ແລະ ມີຄວາມສຸກອັນລົ້ນເຫລືອ.²³

ບໍ່ໄດ້ເປັນສິ່ງປະຫລາດໃຈເລີຍ, ທີ່ການລໍ້ລວງສ່ວນຫລາຍທີ່ໃຫ້ໜີຈາກແຜນແຫ່ງຄວາມສຸກຂອງພຣະເຈົ້າ ມາຈາກການໃຊ້ຄວາມຢາກທີ່ພຣະເຈົ້າປະທານໃຫ້ ໃນທາງທີ່ຜິດ. ການບັງຄັບຄວາມຢາກ ບໍ່ໄດ້ເປັນເລື່ອງງ່າຍສະເໝີ. ບໍ່ມີໃຜໃນພວກເຮົາທີ່ໃຊ້ມັນຢ່າງຖືກຕ້ອງທັງໝົດ.²⁴ ຄວາມຜິດພາດຈະເກີດຂຶ້ນ ແລະ ຈະເຮັດ, ທັງບາບດ້ວຍ. ແລ້ວເຮົາຈະເຮັດແນວໃດ? ເຮົາສາມາດຮຽນຮູ້ຈາກມັນ. ແລະ ເຮົາສາມາດກັບໃຈແທ້ໆ.²⁵

ເຮົາສາມາດປ່ຽນແປງການປະພຶດຂອງເຮົາ. ຄວາມປາດຖະໜາຂອງເຮົາອາດປ່ຽນໄປ. ເປັນໄດ້ແນວໃດ? ມີວິທີດຽວເທົ່ານັ້ນ. ການປ່ຽນແປງທີ່ແທ້ຈິງ—ການປ່ຽນແປງທີ່ຖາວອນ—ສາມາດມາເຖິງຜ່ານທາງການປິ່ນປົວ, ການຊຳລະລ້າງ, ແລະ ອຳນາດຂອງການຊົດໃຊ້ຂອງພຣະເຢຊູຄຣິດ.²⁶ ພຣະອົງຮັກທ່ານ—ທ່ານແຕ່ລະຄົນ!²⁷ ພຣະອົງປ່ອຍໃຫ້ທ່ານໃຊ້ອຳນາດຂອງພຣະອົງເມື່ອທ່ານຮັກສາພຣະບັນຍັດຂອງພຣະອົງຢ່າງກະຕືລືລົ້ນ, ຢ່າງພາກພຽນ, ແລະ ຢ່າງຖືກຕ້ອງ. ມັນງ່າຍ ແລະ ແນ່ນອນແບບນັ້ນແທ້ໆ. ພຣະກິດຕິຄຸນຂອງພຣະເຢຊູຄຣິດ ເປັນ ພຣະກິດຕິຄຸນທີ່ຊ່ອຍໃຫ້ເຮົາປ່ຽນແປງ!²⁸

ວິນຍານທີ່ເຂັ້ມແຂງຂອງມະນຸດ, ໂດຍທີ່ມີການຄວບຄຸມຄວາມຢາກ, ຈະສາມາດຄວບຄຸມຄວາມຮູ້ສຶກ ແລະ ຄວາມຫລົງໄຫລໄດ້ ໂດຍທີ່ບໍ່ເປັນທາດຂອງມັນ. ອິດສະລະເຊັ່ນນັ້ນ ເປັນສິ່ງສຳຄັນຫລາຍຕໍ່ວິນຍານ ເທົ່າໆກັບອັອກຊີເຈນສຳຄັນຕໍ່ຮ່າງກາຍ! ການມີອິດສະລະຈາກການເປັນທາດຂອງຕົນ ເປັນການປົດປ່ອຍທີ່ແທ້ຈິງ!²⁹

ເຮົາເປັນອິດສະລະ “ທີ່ຈະເລືອກເສລີພາບ ແລະ ຊີວິດນິລັນດອນ … ເລືອກການເປັນຊະເລີຍ ແລະ ຄວາມຕາຍຕາມການເປັນຊະເລີຍ.”³⁰ ເມື່ອເຮົາເລືອກເສັ້ນທາງທີ່ສູງກວ່າ ມຸ້ງໄປຫາການເປັນອິດສະລະ ແລະ ຊີວິດນິລັນດອນ, ເສັ້ນທາງນັ້ນແມ່ນຮ່ວມດ້ວຍການແຕ່ງງານ.³¹ ໄພ່ພົນຍຸກສຸດທ້າຍປະກາດວ່າ “ການແຕ່ງງານລະຫວ່າງຊາຍ ແລະ ຍິງ ເປັນການແຕ່ງຕັ້ງຈາກພຣະເຈົ້າ ແລະ ວ່າຄອບຄົວເປັນຈຸດໃຫຍ່ໃຈກາງຂອງແຜນຂອງພຣະຜູ້ສ້າງ ສຳລັບວິຖີຊີວິດອັນນິລັນດອນຂອງລູກໆຂອງພຣະອົງ.” ເຮົາຍັງຮູ້ອີກວ່າ “ເພດເປັນສິ່ງສຳຄັນຫລາຍຕໍ່ການຈຳແນກບອກໃຫ້ຮູ້ເຖິງບຸກຄະລິກລັກສະນະຂອງແຕ່ລະຄົນຢູ່ໃນໂລກກ່ອນເກີດ, ໃນໂລກນີ້, ໃນນິລັນດອນ, ແລະ ເຖິງຈຸດມຸ້ງໝາຍ.”³²

ການແຕ່ງງານລະຫວ່າງຊາຍ ແລະ ຍິງ ເປັນພາກສ່ວນພື້ນຖານຕໍ່ຄຳສອນຂອງພຣະຜູ້ເປັນເຈົ້າ ແລະ ສຳຄັນຕໍ່ແຜນນິລັນດອນຂອງພຣະເຈົ້າ. ການແຕ່ງງານລະຫວ່າງຊາຍ ແລະ ຍິງ ເປັນແບບແຜນຂອງພຣະເຈົ້າ ສຳລັບຊີວິດອັນບໍລິບູນຢູ່ໃນໂລກນີ້ ແລະ ໃນສະຫວັນ. ຈະໃຊ້ແບບແຜນການແຕ່ງງານຂອງພຣະເຈົ້າໃນທາງທີ່ຜິດບໍ່ໄດ້, ຫລືເຂົ້າໃຈຜິດ, ຫລື ແປຄວາມໝາຍຜິດບໍ່ໄດ້.³³ ຈະໃຊ້ມັນແບບນັ້ນບໍ່ໄດ້ຖ້າຫາກທ່ານຢາກມີຄວາມສຸກທີ່ແທ້ຈິງ. ແບບແຜນການແຕ່ງງານຂອງພຣະເຈົ້າປົກປ້ອງອຳນາດທີ່ສັກສິດຂອງການໃຫ້ກຳເນີດ ແລະ ຄວາມສຸກໃນຄວາມສຳພັນຂອງການແຕ່ງງານທີ່ແທ້ຈິງ.³⁴ ເຮົາຮູ້ວ່າ ອາດາມ ແລະ ເອວາ ໄດ້ແຕ່ງງານກັນໂດຍພຣະເຈົ້າ ກ່ອນເຂົາເຈົ້າປະສົບກັບຄວາມສຸກຂອງການເປັນສາມີພັນລະຍາ.³⁵

ໃນວັນເວລາຂອງເຮົາ, ຝ່າຍລັດຖະບານມີຄວາມເປັນຫ່ວງເປັນໄຍກັບການປົກປ້ອງການແຕ່ງງານ ເພາະຄອບຄົວທີ່ເຂັ້ມແຂງຈະກໍ່ຕັ້ງວິທີທີ່ດີທີ່ສຸດໃນການຈັດຫາໃຫ້ສຸຂະພາບ, ການສຶກສາ, ສະຫວັດດີການ, ແລະ ຄວາມຈະເລີນກ້າວໜ້າຂອງຄົນລຸ້ນໃໝ່.³⁶ ແຕ່ຝ່າຍລັດຖະບານກໍຍັງຕົກຢູ່ໃນອິດທິພົນຂອງແນວໂນ້ມຂອງສັງຄົມ ແລະ ໂລກຢູ່ ໃນຂະນະທີ່ເຂົາເຈົ້າຂຽນ, ດັດແປງ, ແລະ ນຳໃຊ້ກົດໝາຍ. ບໍ່ວ່າກົດໝາຍຂອງບ້ານເມືອງຈະເປັນແນວໃດກໍຕາມ, ຄຳສອນຂອງພຣະຜູ້ເປັນເຈົ້າກ່ຽວກັບການແຕ່ງງານ ແລະ ສິນທຳ ບໍ່ສາມາດປ່ຽນແປງ.³⁷ ຈົ່ງຈື່ຈຳໄວ້ວ່າ: ບາບ, ເຖິງແມ່ນມະນຸດຖືວ່າບໍ່ຜິດກົດໝາຍ, ກໍຍັງເປັນບາບໃນສາຍພຣະເນດຂອງພຣະເຈົ້າຢູ່ຄືເກົ່າ!

ໃນຂະນະທີ່ເຮົາຕ້ອງເອົາແບບຢ່າງຂອງຄວາມກະລຸນາ ແລະ ຄວາມເຫັນອົກເຫັນໃຈຂອງພຣະຜູ້ຊ່ອຍໃຫ້ລອດ, ໃນຂະນະທີ່ເຮົານັບຖືສິດ ແລະ ຄວາມຮູ້ສຶກຂອງລູກໆຂອງພຣະເຈົ້າ, ເຮົາກໍບໍ່ສາມາດປ່ຽນຄຳສອນຂອງພຣະອົງ. ມັນບໍ່ແມ່ນຂອງເຮົາທີ່ຈະປ່ຽນ. ຄຳສອນຂອງພຣະອົງແມ່ນມີໃຫ້ເຮົາເພື່ອສຶກສາ, ເຂົ້າໃຈ, ແລະ ຍຶດຖື.

ວິທີທາງຊີວິດຂອງພຣະຜູ້ຊ່ອຍໃຫ້ລອດແມ່ນຄວາມດີ. ວິທີທາງຂອງພຣະອົງແມ່ນຮ່ວມດ້ວຍພົມມະຈັນ ກ່ອນການແຕ່ງງານ ແລະ ຄວາມຊື່ສັດບໍລິສຸດໃນການແຕ່ງງານ.³⁸ ວິທີທາງຂອງພຣະຜູ້ຊ່ອຍໃຫ້ລອດ ເປັນພຽງວິທີດຽວເທົ່ານັ້ນສຳລັບເຮົາທີ່ຈະປະສົບຄວາມສຸກອັນຍາວນານ. ວິທີທາງຂອງພຣະອົງນຳຄວາມປອບໂຍນອັນໝັ້ນຄົງມາໃຫ້ຈິດວິນຍານຂອງເຮົາ ແລະ ຄວາມສະຫງົບອັນຕໍ່ເນື່ອງມາໃຫ້ບ້ານເຮືອນຂອງເຮົາ. ແລະ ດີກວ່າໝູ່ໝົດ, ວິທີທາງຂອງພຣະອົງຈະນຳພາເຮົາກັບບ້ານ ຄືນຫາພຣະອົງ ແລະ ພຣະບິດາເທິງສະຫວັນ, ໄປສູ່ຊີວິດນິລັນດອນ ແລະ ຄວາມສູງສົ່ງ.³⁹ ນີ້ຄືສິ່ງສຳຄັນທີ່ສຸດຂອງວຽກງານ ແລະ ລັດສະໝີພາບຂອງພຣະເຈົ້າ.⁴⁰

ອ້າຍເອື້ອຍນ້ອງທີ່ຮັກແພງ, ແຕ່ລະມື້ເປັນມື້ທີ່ຕ້ອງຕັດສິນໃຈ, ແລະ ການຕັດສິນໃຈຂອງເຮົາຈະກຳນົດວິຖີຊີວິດຂອງເຮົາ. ມື້ໜຶ່ງເຮົາແຕ່ລະຄົນຈະຢືນຢູ່ຕໍ່ພຣະພັກຂອງພຣະຜູ້ເປັນເຈົ້າໃນການພິພາກສາ.⁴¹ ເຮົາທຸກຄົນຈະໄດ້ຖືກສຳພາດເປັນສ່ວນຕົວນຳພຣະເຢຊູຄຣິດ.⁴² ເຮົາຈະຕ້ອງຮັບຜິດຊອບຕໍ່ການຕັດສິນໃຈທີ່ເຮົາໄດ້ເຮັດກ່ຽວກັບຮ່າງກາຍຂອງເຮົາ, ຄຸນສົມບັດຂອງເຮົາ, ແລະ ວິທີທີ່ເຮົາໃຫ້ກຽດແກ່ແບບແຜນຂອງພຣະເຈົ້າສຳລັບການແຕ່ງງານ ແລະ ຄອບຄົວ. ຂໍໃຫ້ເຮົາຈົ່ງເລືອກຕັດສິນໃຈຢ່າງສະຫລາດໃນແຕ່ລະວັນຊົ່ວນິລັນດອນ ນັ້ນຄືຄຳອະທິຖານຢ່າງຈິງໃຈຂອງຂ້າພະເຈົ້າ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.