Eda Kila Beka na Ka sa Tu Vei Keda?

E “Na Matavuvale: Ai Vakaro ki Vuravura Raraba,” e ratou vakaraitaka kina na Mataveiliutaki Taumada kei na Kuoramu ni iApositolo Le Tinikarua: “Oi keda yadudua sara na tamata—na tagane kei na yalewa—eda a buli me ucuya na Kalou. Oi keda yadua eda luvena yalewa, se tagane lomani vakayalo na noda itubutubu vakalomalagi, ka tu na keda dui ituvaki kei na icavacava vakalou.”¹ Ni gadrevi me rawati na keda icavacava vakalou oqo, sa gadrevi ki na luvena tagane kei na luvena yalewa yadua ni Kalou na cakacaka vakalotu kei na veiyalayalati ni matabete.

Sa gadrevi meda papitaiso. Ena gauna eda sa tabadromuci kina ki na wai ni papitaiso, eda sa veiyalayalatitaka meda taura na yaca i Karisito, ka dau nanumi Koya, ka maroroya na Nona ivunau, ka qaravi Koya ki na ivakataotioti, ka me tiko ga kei keda na Nona Yalotabu.²

Eda sa gadreva na isolisoli ni Yalotabu. Mai na cakacaka vakalotu oqo, sa rawa meda itokani tiko kei na Yalotabu. E vakavulica vei keda o Peresitedi Wilford Woodruff: “Na tagane kei na yalewa yadua e sa bau mai curuma na lotu ni Kalou ka sa papitaisotaki ena vakabokoci ni ivalavala ca sa vakadonui vua na ivakatakila, vakadonui ki na yalo ni Kalou, me vukei ira ena nodra cakacaka, ena nodra qaravi ira na luvedra, ena vakasalataki ni luvedra kei ira sa kacivi me ra vakatulewa kina. Na Yalo Tabu e sega ni vakatarai walega vei ira na tagane se iapositolo se parofita; era taukena talega vakayadua na tagane kei na yalewa yalodina, kei ira na gone yadua era sa qase cake me ra ciqoma na kosipeli i Karisito.”³

E gadrevi meda na ciqoma na edaumeni ni valetabu. E kaya kina o Elder M. Russell Ballard: “Ni ra tadu yani na tagane kei na yalewa ki valetabu, rau na vakaedaumeni ena kaukauwa vata ga, o ya ena kaukauwa ni matabete. … Na vakaedaumeni sa isolisoli ga ni kaukauwa.”⁴

Eda sa gadreva na cakacaka vakalotu ni veivauci, e veimuataki yani ki na bula tawamudu, “na isolisoli uasivi duadua ni Kalou.”⁵ Na cakacaka vakalotu ni matabete oqo rau na ciqoma vakatautauvata walega e dua na tagane kei na dua na yalewa. E vakavulica o Elder Russell M. Nelson, “Sa vakalesui mai na dodonu ni Matabete me rawa ni vauci kina me tawamudu na matavuvale.”⁶

Eda na gadreva na madigi meda vakavouya kina na noda veiyalayalati ena veimacawa ni da laki vakayagataka na sakaramede. Era sa vakavulica na parofita kei na iapositolo edaidai ni gauna eda vakayagataka kilikili kina na sakaramede, eda sega walega ni vakavouya kina na noda veiyalayalati ni papitaiso ia “eda sa vakavouya kina na veiyalayalati kece sa vakayacori vua na Turaga.”⁷

O ira na cakacaka vakalotu kei na veiyalayalati ni matabete oqo era sa katuba tiko ki na veivakalougatataki sa yalataka tu vei keda na Kalou, ka ra sa vakayacori rawa ena vuku ni Veisorovaki ni iVakabula. Era sa vakaiyaragitaki kina na luvena tagane kei na luvena yalewa ni Kalou ena kaukauwa, o ya na kaukauwa ni Kalou,⁸ ka vakarautaka vei keda na madigi meda ciqoma kina na bula tawamudu—meda lesu rawa ki na iserau ni Kalou ka laki bula vata kei Koya kei na Nona matavuvale tawamudu.

Au a gole vata kei ira na iliuliu ni matabete wale tikoga oqo me laki sikovi e dua na vuvale ni va na marama mai Honduras. E ratou gadreva tu na marama oqo kei na nodratou matavuvale na idola kei na lewa ni matabete, na cakacaka vakalotu kei na veiyalayalati ni matabete, vata kei na kaukauwa kei na veivakalougatataki ni matabete.

Keitou a laki sikova e dua na marama lomani e vakamau ka rua tiko na luvena totoka. E gugumatua ka yalodina tiko ena mai Lotu ka sa vakavulici iratou tiko na luvena me ratou digitaka tiko na dina. E tokoni koya o watina ena itaviqaravi ni Lotu, ia e sega ni lewenilotu. E qaqaco vinaka tu na nodratou matavuvale, ia ni gadrevi me ratou marautaka na veivaqaqacotaki cecere, e ratou na gadreva na ikuri ni veivakalougatataki ni matabete. E ratou na gadreva me ciqoma o tamadratou na cakacaka vakalotu ni papitaiso kei na isolisoli ni Yalo Tabu ka me vakatikori vua na matabete. E ratou na gadreva na kaukauwa ni matabete ka lako ga mai ena edaumeni kei na veivauci.

Tarava keitou a laki sikova sara e dua na itikotiko ni rua na marama sega ni vakawati, e cecere sara nodrau vakabauta. E dua vei rau na marama sa vakavakarau tiko o luvena tagane me laki kaulotu. Na kena ikarua e qaravi tiko vakavuniwai ena kenisa. Ni gauna rau dau yalolailai ka nuiqawaqawa kina, rau na nanuma na Veisorovaki ni iVakabula ka vakasinaiti ena vakabauta kei na inuinui. Rau gadreva ruarua na ikuri ni veivakalougatataki kei na kaukauwa e lako mai ena cakacaka vakalotu ni valetabu. Keitou a vakayaloqaqataki rau me rau duavata kei na daukaulotu ni mataka ena nodrau itikotiko me vakavakarau ka ciqoma na cakacaka vakalotu oqori.

Na kena iotioti keitou a laki sikova na itikotiko ni dua na marama se qai mate oti toka o watina ena dua na vakacala-ka rerevaki. Se qai curuvou mai ena Lotu na marama oqo, a sega ni kila vakavinaka ni rawa vua me ciqoma ga na nona edaumeni ka vauci vei watina. Ni keitou sa vakavulica ni sa rawa vua kei na watina sa mate me rau ciqoma na veivakalougatataki oqo, a vakasinaiti sara ena inuinui. Ni sa kila ni sa rawa me vauci vata na nona matavuvale ena cakacaka vakalotu kei na veiyalayalati ni valetabu, sa vakabauta sara ka vakadeitaka ni sa rawa me vorata rawa na veivakatovolei sa tu mai liu.

Sa vakavakarau tiko na luvei yada tagane me na ciqoma na Matabete i Eroni. Na nona tabaki ena yaco me dua na veivakalougatataki cecere vua na yada kei na nona matavuvale. Sa na qai tiko e dua na lewe ni matabete ena nodrau itikotiko. 

Niu sotavi ira na marama vakabauta oqo mai Honduras, au raica ni ra sasagataka tiko mera gugumatua tiko na nodra matavuvale ena kosipeli. Era vakavinavinakataki ira na lewenilotu ni tabanalevu daumaroroya na veiyalayalati era daukaroni ira tiko ka dau vukea mai na nodra gagadre vakayago ka vakayalo. Ia, o ira yadua na marama oqo e tu na veika era gadreva ka se bera ni sotavi kece sara kina na nodra veigagadre.

Ena tolu na itikotiko yadua keitou a sikova, a taroga e dua na iliuliu ni matabete matua vei iratou yadua na marama oqo se ratou sa ciqoma beka e dua na veivakalougatataki ni matabete. E ratou a sauma yadudua mai ni sega. Ratou sa qai kerekere yadua na marama ka ciqoma na veivakalougatataki ni matabete ena siga o ya. E ratou a tagi yadudua ena nodratou vakaraitaka na vakacegu, veidusimaki, veivakayaloqaqataki, kei na veivakauqeti sa yaco vei iratou mai vua na Tamana Vakalomalagi mai vua e dua na lewe ni matabete bula kilikili.

E ratou a vakauqeti au na marama oqo. E ratou vakaraitaka na nodratou rokova na Kalou kei na Nona kaukauwa kei na lewa. Au sa vakavinavinaka talega vei rau na iliuliu ni matabete keitou a sikova vata na veiitikotiko oqo. Ni keitou dau biuta mai na itikotiko yadua oqori, keitou dau veivakasalataki ena veika me vukei kina na matavuvale oqo mera ciqoma kina na cakacaka vakalotu e ratou gadreva meratou gumatua yani ki na salatu ni veiyalayalati ka vaqaqacotaka kina na nodra itikotiko.

Era sa gadrevi vakalevu sara tiko nikua na tagane kei na yalewa mera susuga cake na veidokai vakai-ira ni ra sa luvenatagane ka luvena yalewa ni Kalou ka rokova na Tamada mai Lomalagi kei na Nona matabete—na Nona kaukauwa kei na lewa.

Sa tiko na Nona ituvatuva baleti keda, ni gauna eda cakacakataka kina meda vakabauta ka vakadinata na Nona ituvatuva, ena vaqaqacotaki kina na noda rokovi Koya kei na Nona kaukauwa kei na lewa ni matabete.

Ena veituberi ni veiliutaki e vuravura raraba me baleta na Vaqaqacotaki ni Matavuvale kei na Lotu mai na Matabete, eda a vakavulici kina ni sa gadrevi vei ira na marama e sega na lewe ni matabete ena nodra dui itikotiko mera kakua ni galili. Era sa vakalougatataki ka vaqaqacotaki mai na cakacaka vakalotu era sa ciqoma kei na veiyalayalati era sa maroroya. E gadrevi mera kakua ni lomalomarua mera dodoliga yani ni sa gadrevi vakakina na veivuke. E vakavulica o Elder M. Russell Ballard ni sa dodonu mera kila na marama yadua ena Lotu ni tiko e dua na nona bisopi, e dua na peresitedi ni kuoramu ni italatala qase, se dua na dauveituberi vakamatavuvale, kei ira tale eso na lewe ni matabete kilikili era rawa ni vakararavi kina o koya ka rawa ni lako mai ki na nona itikotiko me vukei koya, ka vakayacora na ka e kaya o Sisita Rosemary M. Wixom me, “solia e dua na veivakalougatataki.”⁹

E vakavulica talega o Elder Ballard: “Na Tamada mai Lomalagi sa daulomasolitaka na Nona kaukauwa. Eda rawa ni taura na tagane kei na yalewa taucoko na kaukauwa oqo me veivuke ki na noda bula vakai keda. O ira taucoko era sa cakava na veiyalayalati tabu vua na Turaga ka ra sa rokova tiko na veiyalayalati oqori era sa rawa ni ciqoma na nodra ivakatakila, mera vakalougatataki mai vei ira na agilosi dauveiqaravi, [ka] tiko vata kei na Kalou.”¹⁰

Eda sa veigadrevi vakai keda. O ira na luvena tagane ni Kalou era gadrevi ira na luvena yalewa ni Kalou, kei ira na luvena yalewa ni Kalou era sa gadrevi ira na luvena tagane ni Kalou.

E duidui na noda isolisoli ka duidui na kaukauwa. E vakamatatataka na imatai ni Korinica wase 12 na nodra gadrevi na luvena tagane kei na luvena yalewa ni Kalou, oi keda vakayadua, meda vakayacora na noda itavi kei na ilesilesi yadua me vaka sa virikotori tu ena ituvatuva ni Turaga, me yaga ki na tamata kecega.¹¹

Kemuni na luvena tagane ni Kalou, ko ni sa kila tiko beka ocei oi kemuni? O ni sa kila tiko beka na ka sa tu vei kemuni? O ni sa bula kilikili tiko beka mo ni cakacakataka na matabete ka ciqoma na kaukauwa kei na veivakalougatataki ni matabete? O ni sa karona tiko beka na nomuni itavi kei na ilesilesi mo ni vaqaqacotaka kina na itikotiko vaka-tama, tubudra na gone, luvena tagane, veitacini, kei na momo? Ko ni sa rokovi ira tiko beka na marama, na itavi vakamarama, kei na matatina?

Kemuni na luvena yalewa ni Kalou, eda sa kilai keda tiko beka? Eda sa kila tiko beka na ka sa tu vei keda? Eda sa bula kilikili tiko beka meda ciqoma na kaukauwa kei na veivakalougatataki ni matabete? Eda sa ciqoma tiko beka na isolisoli a soli vei keda ena vakavinavinaka, loloma, kei na dodonu? Eda sa karona tiko beka na noda itavi kei na ilesilesi meda vaqaqacotaka na itikotiko vaka-tina, budra na gone, luvena yalewa, veitacini, kei na nei? Eda sa rokovi ira tiko beka na turaga, na itavi vakaturaga, kei na matatama?

Ni da sa luvena tagane ka luvena yalewa ni veiyalayalati, eda sa vakabauta beka na Tamada vakalomalagi kei na Nona ituvatuva tawamudu baleti keda? Eda sa vakabauti Jisu Karisito beka kei na Nona Veisorovaki? Eda sa vakabauta beka ni sa tiko na keda ituvaki kei na icavacava vakalou? Ni da sa sasagataka tiko meda rawata na keda icavacava oqo ka ciqoma na veika kece sa tu Vua na Tamada,¹² eda sa kila vakavinaka tiko beka na kena bibi meda ciqoma na veivakalougatataki ni matabete ka vakayacora, maroroya, ka vakavouya na veiyalayalati vata kei na Turaga?

Eda sa luvena tagane kei na luvena yalewa vakayalo lomani ni noda itubutubu vakalomalagi, ena dua na ituvaki vakalou kei na kena icavacava. Sa lomani keda dina sara na noda iVakabula, o Jisu Karisito, me solia kina na Nona bula ena vukuda. Sa vakarautaka na Nona Veisorovaki na sala meda lako tiko ena salatu ki na noda itikotiko vakalomalagi, ena cakacaka vakalotu kei na veiyalayalati ni matabete tabu.

Na cakacaka vakalotu kei na veiyalayalati ni matabete oqo a vakalesuimai ki vuravura mai vua na Parofita Josefa Simici, ka sa taura tu nikua o Peresitedi Thomas S. Monson na idola taucoko ni matabete ena vuravura oqo.

E vakavulica o Elder D. Todd Christofferson: “Ena Lotu i Jisu Karisito ni Yalododonu Edaidai sa tu kina na lewa ni matabete me vakayacora na cakacakatabu vakalotu ka rawa ni vakacurumi keda ki na ivau ni veiyalayalati kei na Tamada Vakalomalagi ena Yaca ni Luvena Tabu. … Ni na maroroya na Nona yalayala vei iko na Kalou ena nomu rokova na nomu veiyalayalati kei Koya.”¹³

Au sa vakadinadinataka na veika oqo ena yaca i Jisu Karisito, emeni.