Yac Kuht Etuh Ma Oasr Yohrohsr?

Ke “Sucu: Sie Mwe Fahkwack nuh fin Facluh,” Prestuhnsi Se Met ac U luhn Mwet Sap Singucul Luo fahkwack: “Mwet nuh kwewa—mukul ac muhtwacn—oreklac ke luhman God. Kais sie pa tuhlihk mukul nguhn ac tuhlihk muhtwacn nguhn wolacna nuhtin pahpah ac ninac inkuhsrao, ac, kais sie eis luhman God ac in kuh in oacna God.”¹ In sun ma inge, kais sie mukul ac muhtwacn nuhtin God enenuh akwuck ac wuhlweacng luhn pristut.

Kuht enenuh pacptais. Ke kuht tili otyak nuh ke kof luhn pacptais, kuht olwelah in eis inen Kraist yohrohsr, Esamuhl pacl nuh kwewa, karihngihn masap Lal, ac Kuhlwacnsapuhl nuh ke sahflah, na kuht kuh in eis Nguhn Lal in oasr yohrohsr pacl nuh kwewa.²

Kuht enenuh mwe sang luhn Nguhn Muhtahl. Ke akwuck se ingacn, oasr lwelah lasr nuh ke wi luhn Nguhn pacl nuh kwewa. Prestuhn Wilford Woodruff el luti: “Kais sie mukul kuh muhtwacn suc tuh utyak nuh in alu luhn God uh ac tuh pacptaislac ke ahknwacsnwacsyeyuck luhn ma koluk uh el lwelahyuck nuh ke eisyacn fwackyuck, lwelahyuck nuh ke Nguhn luhn God, in kahsrwelos ke orekma lalos, ke karihngihn lalos nuh sin tuhlihk nahtuhlos, ke kahsruh nuh sin tuhlihk nahtuhlos ac mwet suc elos pahngonyuck in karihngihn. Nguhn Muhtahl el tiac ma nuh sin mukul, kuh nuh sin mwet sap ac mwet pahluh; el ma nuh sin mukul ac muhtwacn oaru nuh kwewa, ac nuh sin tuhlihk nuh kwewa suc fal matwacl in eis wosasuc luhn Kraist.”³

Kuht enenuh in eis mwe sang muhtahl luhn tempuhl. Elder M. Russell Ballard el fahk: “Ke mukul ac muhtwacn som nuh tempuhl, ituckyang nuh selos kwewa mwe sang luhn kuh se pacna, suc ke kahs sahyac pa kuh luhn pristut. … Mwe sang muhtahl pa mwe sang luhn kuh.”⁴

Kuht enenuh akwuck luhn siliyac, ma kol kuht nuh ke moul ma pahtpaht, ac pa mwe sang ma yohk emet luhn God.⁵ Akwuck se inge luhn pristut kuh in eisyuck sin mukul ac muhtwacn tuhkweni muhkwena. Elder Russell M. Nelson el luti, “Wal luhn pristut fohlohkihnyuckyak sucu in muh kuh in siliyucklac nuh ke ma pahtpaht.”⁶

Kuht enenuh pacl sukohsohk in ahksasucye wuhlweacng lasr kais sie wik ke kuht ipeis kuhfa luhn Leum. Mwet pahluh ac mwet sap luhn Lwen-sahflah elos luti lah ke kuht ipeis ke kuhfa luhn Leum ke ohiyac suwohs, kuht tiac ahksasucye wuhlweacng lasr ke pacptais muhkwena tuhsruhktuh “wuhlweacng nuh kwewa kuht oraclah tari yurin Leum.”⁷

Akwuck ac wuhlweacng inge ke pristut lwelah kuht in eis mwe insewowo nuh kwewa ma uliyucklac nuh sesr sin God, ma kuh in sikyak ke srihpen Iwaclah luhn Mwet Lahngo. Elos sang kuh nuh sin mukul ac muhtwacn nuhtin God, kuh luhn God,⁸ ac use nuh sesr ohiyac ma kuht kuh in eis moul ma pahtpaht—in fohlohk nuh ye muhtuhn God ac moul Yohrohl ke sucu ma pahtpaht Lal.

Kuhtuh pacl somlah ah nga som yurin mwet kol luhn pristut in som muhtwacta ke lohm sin muhtwacn ahkosr fin acn Honduras. Tahmtahel inge ac sucu lalos enenuh ki ac wal luhn pristut, akwuck ac wuhlweacng luhn pristut, ac kuh ac mwe insewowo luhn pristut.

Kuht ohsun nuh sin muhtwacn se suc pahyuck ac oasr tuhlihk kahto luo nahtuhl. El oaru ac mukwikwi ke Alu, ac el luti tuhlihk nahtuhl in sulaclah ma pwacye. Mukul tuhmwacl el tahpuhk el ke mukwikwi lal ke Alu, tuhsruhktuh el tiac mempucr. Sucu lalos uh fokoko, tuhsruhk in eis yohk kuh likina met, elos enenuh kuhtuh pac mwe insewowo luhn pristut. Elos enenuh pahpah se suc eis akwuck luhn pacptais ac mwe sang luhn Nguhn Muhtahl in lwelah pristut in ahkkweyeyucklac nuh sel. Elos enenuh kuh luhn pristut ma tuhkuh ke mwe sang muhtahl ac siliyac.

Muhtwacta se ahkluo lasr ma nuh ke lohm sin muhtwacn luo, muhtwacn ke luhlahlfongi kuh. Sie selos oasr mukul nahtuhl suc ahkolah nuh ke misin. Tahmtahel sahyac el eis ahkkweyeyuck ke cancer. Ke pacl upac ac ahsor, elos esam Iwaclah luhn Mwet Lahngo ac sesseslah ke luhlahlfongi ac finsrak. Elos kwewana enenuh mwe insewowo ac kuh sahyac ma tuhkuh ke akwuck luhn tempuhl. Kuht ahkkweyaclos in wi misineri tok se ke lohm selos in ahkolah in eis akwuck se ingacn.

Muhtwacta sahflah lasr ah oasr ke lohm luhn tahmtahel suc mukul tuhmwacl tuhfahna misac ke ongaiyac. Mempucr sasuc ke Alu, el tiac kahlwem lah el kuh in eis mwe sang muhtahl lal sifacna ac siliyucklac nuh sin mukul tuhmwacl. Ke kuht lotwel lah mwe insewowo inge kuh in tuhkuh nuh sel ac mukul tuhmwacl suc misac, el sesseslah ke finsrak. In etuh muh ke akwuck ac wuhlweacng luhn tempuhl sucu lal kuh in siliyucklac tuhkweni, oasr luhlahlfongi ac oaru yohrohl in ohsun nuh ke mwe upac ma soenna tuhkuh.

Tuhlihk mukul nuhtin muhtwacn katinmas se inge ahkolah ingena in eis Pristut Aaronic. Ahkkweyeyuck lal ac fah ahkinsewowoyacl ac sucu lal. Ac oasr mwet sruok pristut ke lohm selos. 

Ke lohm tolu inge kuht ohsun nuh kac, mwel kol lahlmwetmwet ke pristut siyuck kais sie tahmtahel el fin eis mwe insewowo luhn pristut. Kais sie pacl top pa mo. Kais sie tahmtahel siyuck ac eis mwe insewowo luhn pristut ke lwen se ingacn. Kais sie tuhng ke el sang kuloh ke ahkkweyeyuck, kolyuck, ac moklweyuck ma tuhkuh sin Pahpah tuhmwaclos Inkuhsrao sin mwet nwacsnwacs ke pristut.

Tahmtahel inge mokle yuc. Elos ahkkahlwemye efahl nuh sin God ac kuh ac wal Lal. Nga kuloh pac ke mwet kol luhn pristut suc som muhtwacta ke lohm inge yuruk. Ke kuht som liki kais sie lohm, kuht tuhkweni sramsram ke ohiyac ma kuht kuh in kahsruh sucu inge eis akwuck elos enenuh in fahsr ke inkacnek luhn wuhlweacng ac ahkfokokoye lohm selos.

Oasr mwe enenuh yohk mihsenge nuh sin mukul ac muhtwacn in ahkyohkye suhnak nuh sin sie sin sie oacna mukul ac muhtwacn nuhtin God ac efahl nuh sin Pahpah tuhmasr Inkuhsrao ac pristut Lal—kuh ac wal Lal.

Oasr plwacn Lal kacsr, ac ke kuht orekmakihn luhlahlfongi lasr ac luhlahlfongi ke plwacn Lal, efahl lasr nuh Sel ac kuh ac wal luhn pristut Lal fah ahkfokokoyeyucklac.

Ke mwe luti luhn mwet kol nuh facluh ke Ahkfokokoye Sucu ac Alu ke Pristut, kuht etwaclah muh tahmtahel suc wacngihn mwet sruok pristut ke lohm selos tiac enenuh in puhla muhkuh. Elos ahkinsewowoyeyuck ac ahkfokokoyeyuck ke akwuck elos eis ac wuhlweacng elos karihngihn. Elos tiac enenuh in tahfuh luo in sang kahsruh ke kahsruh enenweyuck. Elder M. Russell Ballard el luti muh muhtwacn nuh kwewa ke Alu enenuh in etuh lah oasr pisap lal, prestuhn luhn u luhn elder, mwet luti ke lohm, ac kuhtuh pac mwet sruok pristut suc nwacsnwacslah suc el kuh in siyuck in tuhkuh nuh lohm sel in kahsrwel ac, oacna Tahmtahel Rosemary M. Wixom el fahk, in “sang mwe insewowo se.”⁹

Elder Ballard el oacyacpac luti: “Pahpah tuhmasr Inkuhsrao el kuhlwacng ke kuh Lal. Mukul nuh kwewa ac muhtwacn nuh kwewa kuh in eis kuh se inge in kahsruh ke moul lasr sifacna. Mwet nuh kwewa suc oraclah wuhlweacng muhtahl yurin Leum ac suc ahkfuhlwactye wuhlweacng ingacn kuh in eis fwackyuck sifacna, in ahkinsewowoyeyucklac ke orekma luhn lihpufacn, [ac] aetuhi yurin God.”¹⁰

Kuht nohfohn enenuh sie sin sie. Tuhlihk mukul nuhtin God enenuh tuhlihk muhtwacn nuhtin God, ac tuhlihk muhtwacn nuhtin God enenuh tuhlihk mukul nuhtin God.

Oasr mwe sang siena ac kuh siena sesr. Sie Mwet Corinth sapta 12 sramsram ke mwe enenuh luhn mukul ac muhtwacn nuhtin God, kais sie sesr, in ahkfalye kunohkohn lasr oacna plwacn luhn Leum kuht in muh kuh in ahkinsewowoyucklac.¹¹

Mukul nuhtin God, kowos etuh suc kowos an? Kuh kowos etuh ma lowos? Kowos nwacsnwacs in orekmakihn pristut ac eis kuh ac mwe insewowo luhn pristut? Kuh kowos ahkfalye kunohkohn lowos in ahkfokokoye lohm uh ke pahpah, pahpah mahtuh, mukul nahtuh, mukul wiyac, ac uncle? Kuh kowos ahkfuhlwactye muhtwacn uh, ohiyacn muhtwacn, ac ohiyacn ninac?

Muhtwacn nuhtin God, kuht etuh suc kowos an? Kuht etuh ma oasr yohrohsr? Kuht nwacsnwacs in eis kuh ac mwe insewowo luhn pristut? Kuht eis mwe sang ituckoht nuh sesr ke kuloh, kuhlwacng, ac suhnak? Kuh kuht ahkfalye kunohkohn lasr in ahkfokokoye lohm uh ke ninac, ninac mahtuh, muhtwacn nahtuh, muhtwacn wiyac, ac aunt? Kuh kuht ahkfuhlwactye mukul uh, ohiyacn mukul, ac ohiyacn pahpah?

Ke mukul ac ninac wuhlweacng nahtuh, oasr luhlahlfongi nuh sin Pahpah tuhmasr Inkuhsrao ac plwacn ma pahtpaht Lal kacsr? Oasr luhlahlfongi nuh sin Jisus Kraist ac Iwaclah Lal? Yac kuht luhlahlfongi lah oasr ohiyac ac ma pahtpaht sesr? Ac ke kuh lasr in ohsun ma pahtpaht inge ac eis ma nohfohn ma oasr yurin Pahpah,¹² yac kuht kahlwem yohk srihpaciyacn eisyacn akwuck luhn pristut inge ac oraclah, karihngihn, ac ahksasucye wuhlweacng lasr yurin Leum?

Kuht mukul ac muhtwacn nguhn nuhtin pahpah ac ninac inkuhsrao, ke sie ohiyac ac moul tok muhtahl. Mwet Lahngo lasr, Jisus Kraist, El luhngse kuht fal in sang moul Lal kacsr. Iwaclah Lal oruh in oasr inkacnek kuht kuh in fahsr kac nuh ke lohm sesr inkuhsrao ke akwuck ac wuhlweacng luhn pristut.

Akwuck ac wuhlweacng luhn pristut inge tuh fohlohkihnyuckyak nuh facluh sin Mwet Pahluh Joseph Smith, ac mihsenge Prestuhn Thomas S. Monson el sruok ki nuh kwewa luhn pristut fin facluh.

Elder D. Todd Christofferson el luti: “Ke Alu luhn Jisus Kraist luhn Mwet Luhlahlfongi ke Lwen-sahflah uh konweyuckyak wal luhn pristut in oruh akwuck suc ma kuht kuh in utyak nuh ke olwelah kapihr yurin Pahpah tuhmwacsr Inkuhsrao ke inen Wen Muhtahl Nahtuhl. … God el ac fah karihngihn olwelah Lal nuh sum ke kom ahkfuhlwactye wuhlweacng lom Yohrohl.”¹³

Ke ma inge nga fahkwack ke inen Jisus Kraist, amen.