Kede Medengei el Kmo Ngera Kede Olab?

Chelsel “A Telungalek: Chais el mora Beluulechad,” e a First Presidency me a Chelechad er a Teruich me a terung el Apostol a kmo: “A rokui el chad—sechal me a redil—a ulebeob el uaia Dios. A dersta er tir a ngalek el sechal malechub eng redil er a reng er a rechedam me a rechedil er a babeluades, me a, leuaisei, e ngarngii a chedaol teletelir me a omerollir.”¹ A mo uchul e kede mo er tial chedaol teletael, e a dersta el sechal me a redil ngelekel a Dios a ousbech a chedaol ruoll me a telbiil er a priesthood.

Kede ousbech er a techolbechelid. Sel de modulb er a ralm er a techolbechelid, e kede tibir el mo nguu a ngklel a Kristo, blechoel melbedebek er Ngii, e oltirakl a Llechul, e mesiou er Ngii el mora ulebongel, me luchul e a Chedaol Reng er Ngii a mo obengked.²

Kede ousbech er a sengk er a Chedaol Reng. Ngokiu tial ruoll, eng sebeched el mo kldemel Chedaol Reng. A President Wilford Woodruff a ulsisechakl: “A bek el sechal me a redil el mla soiseb er a ikelesia er a Dios e mla metecholb el kirel a ngbetel a klengit a ngarngii a lemeltel kirel ocholt, lemeltel er a Chedaol Reng er a Dios, el mo olngeseu er tir er a urerir, me a urerir el mora rengelekir, el mellach er a rengelekir me tirkel tir a mokedong el mo oungerachel er tir. A Chedaol Reng a diak di le bora rsechal, malechub eng di mora reapostol me a reprofet: ng mora rokui el blak a rengrir el sechal me a redil, me a bek el ngalek el ngii a rekil a mla mo sebechel nguu ebangkelio er a Kristo.”³

Ng kired el ngmai a klengeltengat er a temple. A Elder M. Russell Ballard a millekoi: “A rsechal me a redil sel bora temple, ete nguu a klengeltengat er a osisiu el klisiich, el ngii a dolekoi er ngii el klisiich er a priesthood. … A klengeltengat a mera er ngii a sengk er a klisiich.”⁴

Kede ousbech chedaol ruoll el merenged, el uchul a diak a ulebengelel klengar, “el ngii a kot el ngarbab er a rokui el sengkel a Dios.”⁵ A chedaol ruoll er a priesthood a di mengai er a sechal me a redil el dmak. A Elder Russell M. Nelson a ulsisechakl, “A ngerachel er a priesthood a mla moluut me luchul e a telungalek bol merenged el mora ulebongel.”⁶

Kede ousbech er a techall el mo omekbeches aikal telbiil er a bek el sandei sel dolai er a sacrament. A reprofet me a reapostol er a Uriul-klebesei a mla olisechakl el kmo sel deklikiid e dolai er a sacrament, e kede mekbeches a diak di el telbiil er a techolbechelid ng dirrek el ikel “rokui el telbiil el bla desiseb er ngii lobengkel a Rubak.”⁷

Aikal chedaol ruoll me a telbiil er a priesthood a meskid a techall el mo ngmai a rokui el klengeltengat el bla le yaksok er kid a Dios, el di sebechel mekedmokl lokiu a Tngkaireng er a Osobel. Ng dongu er a rsechal me a redil er a Dios loba klisiich, klisiich er a Dios,⁸ e meskid a techall el mo nguu a diak a ulebengelel klengar—e lmuut el mora rengedel a Dios e kiei Lobengkel el ngara diak a ulebengelel telungalek er Ngii.

Ak dirk ulebengterir a roba priesthood el mo oldingel a blirir a reteua el redil er a Honduras. Tirkal odos me a telungalek er tir a kmal ulusbech er a ngerachel me a kiis er a priesthood, chedaol ruoll me a telbiil er a priesthood, me a klisiich me a klengeltengat er a priesthood.

Aki uleldingel er a bechiil odos me a reteru el klebokel el ngelekel. Ng kmal blak a rengul e mesisiich er a Ikelesia, e olisechakl er a rengelekel el melilt er a ungil. A bechil a kmal loldubech er ngii er a ngerchelel er a Ikelesia, eng di diak el chad er a ikelesia. A telungalek er tir a mesisiich, eng di a lmuut el ngarbab el klisiich el bol ngai a ultuil, er a klengeltengat er a priesthood. Te ousbech er a chedam el mo nguu a techolbechelid me a sengk er a Chedaol Reng e dirrek el mo nguu a priesthood. Te ousbech er a klisichel a priesthood lokiu a klengeltengat me bo el merenged el telungalek.

A kuk ta er a odngelam a mlora blirir a reteru el mesobil odos, redil mesisiich a klaumera er tir. A ta er a odos a mlarngii a ngelekel sechal mengedmokl er ngii el mora mission. E ngika el ta er a odos a ngara ukeruul er a secherel kasinoma. Chelsel a taem el ngara ringel me a klengitelreng, e te dobedebekii a Tngkaireng er a Osobel e mo mui er a klaumerang me a ongiil. Tir el terung lousbech a lmuut el klengeltengat me a klisiich lokiu chedaol ruoll er a temple. Aki milngelechel er tir el mo teloi er tirkel mochu misionari el uchul a kedmeklir el mo ngmai aikal ruoll.

A ulebongel lodngelam a mlora blil odos el bechil a dirk ke mlad el mle aksident. Ng dirk ulebult el mora Ikelesia, eng dimlak lodengei el kmo ng sebechel ngmai a klengeltengat el kirel mo moak el mora bechil. Tia er a ki mosischeklii el kmo aikal klengeltengat a sebechel ngmai me a dirrek el ngika el mla mad el bechil, eng mlo mui er a deureng. A bocha lodengei el kmo ngokiu a chedaol ruoll er a temple e a telungalek er ngii a sebechel merenged el mo dmak, eng mlo er ngii a klaumera er ngii me a blakelreng el mo chelebangel a ringel er medal.

A sechal ngelekel ngika el redil a mengedmokl er ngii el mo melai er a Priesthood er a Aaron. Sel loterkeklel a kmal klou el klengeltengat el mo er ngii me a telungalek er ngii. Ng mocha er ngii oba priesthood er a blirir. 

Sera kisterir tirkal blak a rengrir el redil el ngara Honduras, e ak milsa el kmo te milasm el mengedechuul a telunglaek er tir me te mesisiich er a ebangkelio. Te ulureng a sulir a roltirakl a telbiil el chedal a ward el kmal kerekikl lomes er tir e olngeseu er tir er a ikel lousbech a bedengir me a dirrek el reng er tir. Eng di, dersta er tirkal odos a ngarngii a lulusbech el dirkak el bol mui mekedmokl.

Chelsel a dersta er a ikal obliil el ki muleldingel, e a mellomes a rengul loba priesthood el chad a uleker er tirka el odos el kmo te mla nguu a klengeltengat er a priesthood. A nger a mle blechoel diak. A dersta er tirkal odos a ulengit e ngiluu a klengeltengat er a priesthood er tiaikid el sils. A dersta er tir a lilangel e oureng a saul el kirel ongelaod, ulekrael, omelisiich, me a ulekrael el mlei lokiu a Demal er a Babeluades lokiu a klikiid loba priesthood el chad.

Tirkal odos a meskak chedaol llomes. Te ochotii omengull el mora Dios me a Klisichel me a deruchellel. Ak dirrek el mlo mereng a saul el kirir a roba priesthood el mlo oldingel aika el obliil lobengkek. Sera ki morael, e a ki mle chadecheduch el kirel a ngeso el mo er tirkal telungalek me bo lengai chedaol ruoll el tir ousbech el melemolem loltirakl a telbilir e melisiich a rekeblirir.

Chelechal sils eng klou a usbechellel el sechal me a redil a morngii omengull er tir el mora ta me a tang el ngelekel a Dios el sechal me a redil me a omengull el mora Demad er a Babeluades me a priesthood er Ngii—el Klisichel me a urerel.

Ngii a ngarngii a moktek er ngii el kired, e sel dultuil er a klaumerang e dultuil er Ngii, e a omengull er kid el mo er Ngii me a klisichel a priesthood er Ngii a mo mesisiich.

Chelsel sel omesuub el mo er a roungerachel el kirel a Melisiich a Telungalek me a Ikelesia lokiu a Priesthood,e kede mlosisechakl el kmo a rodos el diak a roba priesthood er a rekeblirir a diak el kirir lomelchesiu el cheloit. Tir a mukngeltengat e mo mesisiich lokiu chedaol ruoll el tir a mla ngmai me a telbiil loltirakl. Ng diak el kirir lomae er a rengrir loldars a ngeso. A Elder M. Russell Ballard a ulisechakl el kmo a bek el redil er a Ikelesia a kirel mo medengei el kmo ngarngii a bisop, chelechad er a re elders, roldingel e olisechakl, malechub a klikiid el oba priesthood el chad el sebechel lultuil er tir el mei er a blil e ngoseuir e dirrek, el uaia lullekoi a Sister Rosemary M. Wixom el kmo, “e mesterir a klengeltengat.”⁹

A Elder Ballard a ulisechakl: “A Demad er a Babeluades a bekerurau er a Klisichel. A rokui el sechal me a rokui el redil a ngarngii a techellir er tial klisiich el kirel a ngeso er a klengar kid. Tirkel rokui el mla soiseb er a chedaol telbiil lobengkel a Rubak e oltirakl a telbilir a sebechir el ngmai chedaol ocholt, e mukngeltengat er a reanghel loldingel, [e ] mengedecheduch lobengkel a Dios.”¹⁰

Kid el rokui lousbech er a ta me a tang. A rengelekel a Dios el sechal ousbech er a rengelekl a Dios el redil, e a rengelekel a Dios el redil ousbech er a rengelekel a Dios el sechal.

Kede olab a kakerous el sengk me a kakerous el klisiich. A Kot el Korinth teruich me a eru el bliongela meketeklii a klou el usbechellir a rengelekel a Dios el sechal me a redil, a dersta er kid, el mo kudmokl a ngercheled lultuil er a moktek er a Rubak, el mo klungioled el rokui.¹¹

Rengelekel a Dios el sechal, ko medengei el kmo kom techang? Ko medengei a omolab? Kom klikiid el mo ousbech er a priesthood e ngmai a klisiich me a klengeltengat er a priesthood? Kom kongei a ngercheliu el mo melisiich obliil el chedam, chedam el rubak, ngalek el sechal, odam, e okdemaol? Ko mochotii omengull el mora redil, kleredil, me a klechedil?

Rengelekel a Dios el redil, ko medengei el kmo kom techang? Ko medengei el kmo ngera ko molab? Kom klikiid el mo ngmai a klisiich me a klengeltengat er a priesthood? Kom ngmai a sengk el molab el ngara omereng el saul, chubechub, me a chetengakl? Ko medengei ngercheliu el melisiich a blai el chedil, chedil mechas, ngalek el redil, odos, e anti? Ko mochotii omengull el mora rsechal, klsechal, me a klechedam?

Kid el ngalek el sechal me a redil er a telbiil, ngarngii a klaumera er kid er a Demad er a Babeluades me sel diak a ulebengelel moktek er Ngii el kired? Ngarngii a klaumera er kid er a Jesus Kristo me a Tngakireng er Ngii? Kede oumera el kmo ngarngii sel chedaol teleteled me a omerolled? E a chelsel sel blakelreng er kid el merael mong e ngmai aikel rokui lolab a Chedam,¹²e kid kede medengei a klou el belkul a ngeiul a ruoll er a priesthood me a meruul, oltirrakl, e omekbeches a telbiil lobengkel a Rubak?

Kid a ngalek el sechal me a redil er a reng er a rechedam me a rechedil er a babeluades, e oba chedaol teleteled me a omerolled. A Osobeled, el Jesus Kristo, a kmal mle betik a rengul er kid me nguldersii a klengar Ngii el kired. ATngakireng er Ngii a meskid a rael el kirel omerolled er a rael el mora blid er a babeluades, lokiu chedaol ruoll me a telbiil er a priesthood.

Aikal ruoll me a telbiil er a priesthood a mloluut el mei er a beluulechad lokiu a Profet Joseph Smith, e chelechal sils e a President Thomas S. Monson olab a rokui el kiis er a priesthood el ngara beluulechad.

A Elder D Todd Christofferson a ulisechakl: “Chelsel a Ikelesia er a Jesus Kristo er a Uriul-klebesei el Santo e kede metik er a ngerachel er a priesthood el meruul a chedaol ruoll luchul eng mo sebeched el soiseb er a telbiil lobengkel a Demad er a Babeluades el ngara ngklel a Chedaol Ngelekel Sechal. … A Dios a oltirakl a yaksok er ngii sel mongull a telbiil el mruul Lobengkel.”¹³

Aikal tekoi a kdung el ngara ngklel a Jesus Kristo, amen.