Toro Voleka Vua na Kalou

Na makubui keirau tagane, yabaki ono o Oli ka dau kacivi au ena yaloloma, “Poppy”, e a lako me laki kauta mai e dua na iyaya mai na motoka. A tucake tu ga o tamana e lomanivale ka sega ni kila o Oli, ni sa dolava na motoka ena kena idola vakalivaliva ena nona sa voleka yani kina, ka sogota talega vakakina. Cici mai vale o Oli ena matadredredre!

Era tarogi koya kece na lewe ni matavuvale. “O a dolava ka lokataka tale vakacava na motoka?” A dredre ga mai o koya.

Na tinana, ka luvei keirau yalewa, e kaya, “E rairai vaka na ka e dau cakava o Poppy—o rairai dau cakamana beka vakaikoya!”

Ni yaco tale ni oti toka ga e vica na miniti, sa qai vaka oqo na nona isau ni taro me baleta na veika tale eso sa mai rawata yani, “Veivakadrukai dina! Au kila baleta ni lomani au o Poppy ka dua o koya na noqu itokani vinaka duadua, ka dau maroroi au!”

Au sa kalougata niu sa kila na veika ni caka mana ka sa yaco ena nodra bula na Yalododonu vakabauta mai Aferika, Papua Niu Kini, Ositerelia, Niu Siladi, kei na veiyanuyanu ena wasa Pasifika. Au duavata kei Oli—Au nanuma ni o ira na tamata vakabauta oqori era vakila kece na veika baleti Tamada Vakalomalagi kei na iVakabula, vaka ga na nona dau vakila o Oli na veika baleti au. Era lomana na Kalou me vaka e dua na nodra itokani voleka, ka sa dau maroroi ira o Koya.

O ira na lewe ni Lotu e dodonu me nodra, ka lewe levu era sa ciqoma, na ivakadinadina vakayalo, ka ra sa ia, na veiyalayalati bibi mera muria na Turaga. Dina ga ni so era toro yani Vua, ka so e sega. Vakacava o kemuni ko ni tiko beka ena yasana cava?

Me toka donu ena loma ni noda bula na Kalou—me noda idusidusi taudonu. E vaka beka kina? Se, ena so ga na gauna sa dau yawa saraga mai na noda vakasama kei na yaloda? (raica na Mosaia 5:13). Nanuma ni sega walega ni nanuma ni lomada e bibi ia na “gagadre” Ena vakaraitaka vakacava na ka eda cakava na ka eda dau vakananuma?

Ni yabaki 16 na luvei keirau o Ben, e vosa ena koniferedi ni iteki ka taroga kina na taro, “Ena vakacava na ituvaki ni nomu bula ni dua e yalataka vei iko e dua na ka me cakava ena veimacawa ka qai sega ni vakayacora vakakina?” E tomana ka kaya, “eda vakabibitaka ki na yalayala eda cakava ni da sa vakayagataka na sakaramede ka yalataka ni da na dau nanumi Koya ka talairawarawa kina Nona ivunau?”

Ena vakarautaka na Turaga na sala meda nanuma kina na Nona kaukauwa dau veimaroroi. E dua vei ira na sala ka sa vakarautaka me baleti keda kece—sotavi ni veika rarawa (raica na Alama 32:6). Niu dau vakananuma lesu na veika rarawa au a sa sotava oti mai, sa matata vei au niu sa tamata vinaka cake, ka sa kila ka ena yalololoma. Sa kauti au vakavoleka sara vua na Tamada Vakalomalagi kei na Luvena, ena veika au sa sotava ka sa ceuti tu e yaloqu.

Na Nona veituberi na Turaga kei na ivakasala sa bau veiganiti sara ga. E a vukea na taci Jereti, ena kena wali e rua na bolebole e a sotava ni a tukuna vua me vakauta na cagi bulabula kina loma ni waqa ka sa taya oti tu (raica na Ica 2:20). Ia, sa dusia tu, ni Turaga ena sega walega ni laivi koya vakalekaleka ena kena qarai na iwali ni leqa kei na ka me caka me wali rawa kina me rawa na rarama, ia, sa vakamatatataka sara tu ga ni o Koya na Turaga ena vakatara na vei dredre e yaco me na vulici rawa kina na kena wali na leqa. O Koya, ena, dau vakaliwava na cagi, ena vakatauca na uca kei na dobui (raica na Ica 2:23–24).

Na cava e cakava kina o Koya na ka o ya? Na cava e dau vakasalataki keda kina meda kauti keda laivi mai na itutu ni leqa, ni rawa Vua me tarova ga na leqa? O Peresitedi Wilford Woodruff e talanoataka ni a vakauqeti vakayalo me tosoya na kareti ka Ratou moce tu kina o koya, na watina kei na luvena tagane ka oti ga vakalailai, sa liwa mai e dua na covulaca ka cavuraka e dua na vunikau ka taubisalaka ena vanua e a kele tu kina na nodratou kareti (raica na Nodra iVakavuvuli na Peresitedi ni Lotu: Wilford Woodruff [2004], 51).

Ena rua na ka oqo, e a sega ni rawa me veisau na draki me vakadaroi kina na ka rerevaki ena yaco. Ia, oqo na ka me nanumi—me kakua ni walia na leqa o Koya, e vinakata na Turaga me da vakatorocaketaka na noda vakabauta me rawa kina ni da na dau vakararavi Vua ena noda walia na noda leqa ka vakabauti Koya. Eda sa na qai vakila vinaka sara na nona loloma, ena kena kaukauwa, kena matata vinaka, ka yaco vakayadua sara ga vei keda. Eda sa na qai semati vata kina, ka na yaco me da na veiucui kei Koya. Na Nona inaki vei keda meda na veiucui kei Koya, ni o koya sara ga o ya na Nona lagilagi kei na Nona cakacaka (raica na Mosese 1:39).

E dua na gonetagane e a vakasavasavataka tiko na nodratou daku ni lomanibai me rawa ni na vakatatalo kina kei na nona motoka. E a dabe toka kina e dua na vatu vakaitamera ka sa vakadrederetaka tiko na sasaga ni lomana. E a dreta ka biliga ena nona kaukauwa taucoko, ia e dreve na nona inaki ni sega sara ga ni bau yavala na vatu.

E a saravi koya toka mai o tamana ena dua na gauna, ka sa qai lako mai ka kaya, “ena dodonu mo vakayagataka taucoko na nomu kaukauwa mo tosoya laivi kina na vatu vakaitamera vakaoqo.”

Kaya mai vua na gonetagane, “Au sa vakayagataka kece sara ga na noqu kaukauwa!”

Vakadodonutaki koya o Tamana, ka kaya: Sega o se bera ni cakava vakakina. O se bera ni kerea na noqu veivuke!”

Erau sa qai mai cuvara yani ka biliga laivi na vatu.

Na tamai noqu itokani o Vaiba Rome, na imatai ni peresitedi ni iteki mai Papua Niukini, e a vakavulici talega me dau toro vua na Tamana Vakalomalagi ena veika e dau gadreva. O koya kei ira na nona lewe ni koro era dau bula tu ga ena veika era tea ena nodra iteitei. Dua na siga, e qai vakama e dua na tiki ni nona loga ni were me teitei kina. Ia, na kama e donumaka sara tikoga e dua na draki mamaca balavu ka ra sa madu sara tu ga na veikau e kea. Na nona vakasama o ya e tautauvata sara ga kei na keba e a cakava o Peresitedi Thomas S. Monson, na kena ka a talanoataka ena koniferedi raraba sa oti (raica na “Talairawarawara e kauta mai na Veivakalougatataki,” Liaona, Me 2013, 89–90). Sa tekivu me tete yani kina veico kei na veikau, kei na ivakamacala nei luvena, sa yaco me dua dina na “tama ni kama vakarerevaki”. Sa taqayataki ira na nona lewenikoro kei na kena rawa ni kamayavu na nodra iteitei. Kevaka mesa na vakarusai, o koya sa na lewai vakoro. Ni sa sega ni rawa me bokoca na buka, sa qai nanuma mai na Turaga.

Au sa na tukuna ga na ka sara ga e a kaya o luvena, na noqu itokani: “E a tekiduru ena veikau ka masuta na Tamada Vakalomalagi me tarova na kama. Vakasauri na kena sa laurai e macawa ni sa kumukumuni vata na o loaloa ka sa tekivu tau e dua na uca bi sara—ia, e a tau wale tikoga ena vanua e kama tiko. Ni veiraiyaki e qai kunea ni karakarawa vinaka tu na vo ni lomalagi ena veiyasana tale e so vakavo ga na vanua e a kama tiko. E sega ni vakabauta ni Kalou ena sauma na masu ni dua e bula tu ga vaka o ya. Sa qai tekiduru tale ka sorova yani e dua na qusi wai ni mata me vaka e dua na gonelailai. E kaya o koya ni vaka sara ga e dua na ka kamikamica” (raica na Alama 36:3).

Na iVakabula e vinakati keda meda lomani Koya dina sara, me yacova sara ni sa duavata saraga kei na Nona lewa na noda. Eda sa na qai rawa ni vakila na Nona loloma ka kila na nona lagilagi. Sa na qai rawa Vua me vakalougatataki keda me vaka na nona lewa. Oqo e a yaco vei Nifai na luvei Ilamani, ni sa yaco ena itagede me na yaco ga na ka e vinakata ena ruku ni nodra sa veidinadinati (raica na Ilamani 10:4–5).

Ena Bula nei Pi, na ivola ni italanoa buli mai vei Yann Martel, e a tukuna vakaoqo o koya ka talanoataki tiko na veika e vakila baleti Karisito: “Au sega ni rawa ni kauti koya laivi mai na noqu vakasama. Na levu ga ni nona vakaosoosotaki au, na kena sega ni rawa meu guilecavi Koya. Na levu ni ka au vulica me baleti koya na kena sa sega ni rawa meu laivi Koya.” ([2001], 57).

E vaka sara ga o ya na ka au vakila me baleta na iVakabula. O Koya e dau voleka sara, vakabibi ena veivanua tabu, kei na veigauna e dau gadrevi kina, kei na so na gauna ena kena sega ni dau namaki, au dau vakila ni dau tarai au ena vatuvatu ni tabaqu me tukuna vei au ni lomani au. Au na vakalesuya vua na loloma o ya ena noqu bula druka ka saga vagumatua meu cabora Vua na yaloqu. (raica na V&V 64:22, 34).

Ena vica ga na vula sa oti au a dabe toka e yasai Elder Jeffrey R. Holland ena nona sa lesi ira tiko na daukaulotu kina nodra ilesilesi ni kaulotu. Ni keirau sa lako yani, e a waraki au, ka vakataqara na ligana e tabaqu. Au a qai tukuna vua ni o ya na ka vata ga e a cakava vei au mai Ositerelia. E qai kaya, “Oya baleta niu lomani iko!” Au kila vinaka tu ni o ya e ka dina taucoko.

Au vakabauta ni kevaka meda na taubale vata tu kei na iVakabula, eda na vakila ni na vakataqara na ligana e tabada me vaka sara ga o ya. Me vaka ga o rau na tisaipeli erau a taubale tiko ki Emeo, e a “katakata na lomadrau” (Luke 24:32). Oqo na nona itukutuku: “Dou lako mai ka raica” (Joni 1:39). E ka ni tamata yadua, na veisureti, ka ciqoma na veisureti ka taubale vata kei Koya ni ovici keda tu na ligana e tabada.

Me da na yalodei tiko mada ga me vakataki Inosi ni sa volai tu ena nona ivola vakairogorogo: “Au sa rekitaka na siga ena vakaisulu kina na yago mate oqo me kakua tale ni mate rawa kau na tucake e matana, ia au na raici Koya, ka na qai kaya vei au: Lako mai vei au, ko sa vakalougatataki ka sa vakarautaki tu e dua na tikina me nomu ena vale nei Tamaqu” (Inosi 1:27).

Me vaka ni sa rui kaukauwa ka levu sara na veika totoka sa sotavi oti mai sa vakadinadinataka vei au na Yalotabu, au vakadinadinataka ena yaloqu taucoko ni bula tiko na Kalou. Au vakila na Nona loloma. Oqori na ka kamikamica duadua au sa vakila. Meda sa na kitaka tikoga na ka e gadrevi meda semati keda tikoga ki Vua ka da yalodina sara ena noda lomani Koya. Ena yaca i Jisu Karisito, emeni.