Koniferedi Raraba: Vaqaqacotaki ni Vakabauta kei na iVakadinadina

Vinaka Peresitedi Monson, na nomu veivakavulici kei na ivakaraitaki ni veiqaravi va- Karisito kei na nomuni veidusimaki me keimami na daukaulotu taucoko. Keimami na dau masulaki kemuni tu ga.

Ena noda itabatamata, e vakatauvatana e dua na soqoni vata ni Yalododonu na iVakabula o Jisu Karisito kina “noqu koniferedi raraba.”¹

Se evei ga na vanua e vuravura eda tiko kina, se da ciqoma vakacava na kaburaki ni itukutuku, au vakadinadinataka ni da sa soqoni tiko oqo ena Nona koniferedi. Au vakadinadinataka talega nida na rogoca na Nona Vosa ni sa tukuna oti o Koya, “Na vosa kau sa tukuna se ra tukuna na noqu tamata.”²

Sa dau tiki tu ni lotu dina i Jisu Karisito na koniferedi. A vakasoqoni ira vata na nona kawa o Atama ka parofisaitaka na veika ena yaco mai. A vakasoqoni ira vata na luvei Isireli o Mosese ka vakavulici ira ena ivakaro sa soli mai vua. A vakavulici ira na lewe vuqa na iVakabula ena Vanua Tabu vakakina mai Amerika. A vakasoqoni ira vata na vakabauta o Pita mai Jerusalemi. Na imatai ni koniferedi ena veitabagauna oqo, a vakayacori ni se qai oti ga e rua na vula mai na gauna e tekivu kina na Lotu, ka se vakayacori tikoga na koniferedi me yacova mai nikua.

Ena dau vakatulewa ga na Turaga ena veikoniferedi kece e qaravi, ka na veituberi kina na Nona Yalotabu.³ Keimami sega ni dau lesi ena ulutaga me keimami na vosa kina. Ena vica na macawa kei na vula, so na gauna e sega na moce, ni keimami na waraka na Turaga. Ena lolo, masumasu, vuli, kei na vakanananu, keimami na vulica na itukutuku e gadreva o Koya me keimami na vosa kina.

E so ena taroga, “na cava na vuna e sega ni dau yaco mai kina vakarawarawa ka vakatotolo na veivakauqeti?” E a vakavulici Oliver Cowdery na Turaga, “Sa dodonu sara mo vakasamataka taumada vakavinaka, kevaka sa dodonu vei iko mo qai kerea.”⁴ Na itukutuku ni koniferedi ena lako mai vei keimami ni sa oti na vakavakarau ena masumasu, ena veivakauqeti ni Yalo Tabu.

Na ivakavuvuli oqo e dina vei ira kece na lewe ni Lotu ni da vakavakarau tiko ena koniferedi ni tabanalevu, iteki kei na koniferedi raraba. Eda na vakasamataka na ka eda gadreva ka vinakata mai vei Tamada Vakalomalagi ka da masulaka meda na laki cakava na ka eda sa vulica. Ni sa yaco mai na gauna ni koniferedi eda sa na kauta laivi na veitavi tale e so, “[kakua] ni domona na iyau vakavuravura, [ia] mo vakasaqara na iyau sa uasivi sara.”⁵ Oti, meda sa qai vakasoqoni ira vata mai na noda matavuvale, meda mai rogoca na vosa ni Turaga, me vaka e a kaya o Tui Penijamini.⁶

Era taleitaka na gonelalai kei na itabagone mera na tiko talega kina. Eda sa na cala tiko keda nanuma ni koniferedi e sega ni ganiti ira baleta ni sa rui tiko e cake na kena itagede vakavakasama ka vakayalo talega. Vei ira na itabagone ena Lotu, au yalataka ni kevaka mo ni na vakarorogo, ko ni na vakila vakavinaka saraga kina na Yalotabu. Ena tukuna vei kemuni na Turaga na veika mo ni na vakayacora ena nomuni bula.

Eda rawa ni rogoca ena koniferedi na ka sara ga e gadreva na Turaga me baleti keda. E a vakadinadinataka e dua na lewenilotu: “Niu vakarogoca toka na nomuni vosa, au sa vakadrukai sara ga. … Na nomuni itukutuku sa ivakatakila sara ga ni Turaga kina noqu matavuvale. Au a se bera vakadua ni vakila na kaukauwa ni veivakauqeti ni Yalotabu ena noqu bula me vaka ena vica na miniti ka a vosa kina vakadodonu vei au na Yalo Tabu.”

Dua tale e kaya, “Au se bera vakadua ni vakila e dua na vosa me baleti au sara ga.”

Oqo ena rawa baleta ni Yalo Tabu ena kauta yani na vosa ni Turaga ki yaloda ena kena ka da na rawa ni kila.⁷ Niu dau vola ivola ena koniferedi, au sega ni dau vola taucoko na ka saraga era tukuna o ira na vosa; au dau vola ga na veidusimaki ka solia tiko vei au na Yalotabu.

Na veika e tukuni e sega soti ni bibi mai na ka eda rogoca kei na ka eda sa vakila.⁸ O ya na vuna e bibi kina meda laki tiko ena koniferedi, na vanua e rawa ni sotavi kina na domo lailai, malumalumu ni Yalotabu, ni da na rogoca, vakila, ka kila.

Isa, o keda eda na gadreva dina sara na koniferedi raraba! Ena vaqaqacotaki na noda vakabauta ka vakatitobutaki na noda ivakadinadina ena koniferedi. Ni da sa saumaki mai, meda veivakaukauwataki meda na tudei, ka vorata na gasau vidi ni itabagauna oqo.⁹

Ena vica na yabaki sa oti sa vaka me mai galala na Lotu mai na veivakacalai kei na veivakacacani era a dau sotava tu mai na Yalododonu e liu. Sa totolo sara tiko na toso yawa tiko mai ni vuravura mai vua na Turaga mai na veigauna sa oti. Sa sereki tu oqo o vuni ca e vuravura. Meda na qaqarauni, vakarogoca, vakawilika, vakavulica, ka veiwaseitaka na vosa ni parofita me veivakasalataki ka veimaroroi. Me kena ivakaraitaki, “Na matavuvale: Ai Vakaro ki Vuravura Raraba.” E a se soli sara ena gauna e se bera tu kina ni sotava na veimatavuvale na bolebole sa sotavi tu nikua. Sa Bula na Karisito: Na nodra iVakadinadina na iApositolo” sa vakarautaki oti tu me baleta na gauna eda na vinakata dina kina.

Eda na sega ni kila taucoko na vuna era dau vosa kina na parofita kei ira na dau vosa vei keda ena ulutaga era vosa kina ena koniferedi, ia na Turaga e kila vinaka tu. A vakavulica vakaoqo o Peresitedi Harold B. Lee: “Na veimaroroi duadua ga eda kila na lewenilotu ena itabagauna oqo meda … talairawarawa kina ivunau ni Turaga mai vei ira na Nona parofita. E so na ka era na taura na vosota kei na vakabauta. O na sega beka ni taleitaka na lewa e rau mai ena Lotu. Ena veisaqasaqa beka kei na nomu rai [vakai iko]. Ena veibasai beka kei na ivakarau ni nomu bula ni veimaliwai. Ia, kevaka ko vakarorogo vinaka kina veika oqo, me vaka e vosa sara tikoga mai na Turaga ena yalomalua kei na vakabauta na yalayala sa ikoya qo, ‘ena sega ni rawai kemudou na matamata ki etesi; … ia ena vakamalumalumutaka na Turaga na Kalou na kaukauwa ni tevoro, raica ena yavavala ko lomalagi ena vukumudou, me vakacaucautaki kina na yacana.’ (V&V 21:6).”¹⁰

A kila vakacava o Peresitedi Lee na ka eda na sotava tiko nikua? E kila baleta ni o koya e parofita, daurairai, ka dauvakatakila. Meda sa vakarorogo ka talairawarawa vei ira na parofita nikua, wili kina o ira era sa vosa sara tiko ga vei keda ena koniferedi oqo, meda na vaqaqacotaki ka taqomaki.

Na veivakalougatataki levu duadua mai na koniferedi ena yaco mai ni sa mai cava na koniferedi. Nanuma na ituvatuva sa volai oti tu ena ivolanikalou: eda soqoni vata meda rogoca na vosa ni Turaga, ka da lesu yani ki vale ka laki bulataka.

Ni sa vosa oti o Tui Penijamini vei ira na nona tamata, “sa qai vakasukai ira na lewe vuqa; era sa qai lesu tale na tamata yadua kei na nodra vuvale kina nodra itikotiko.”¹¹ Ena nona gauna ni veiliutaki e a cakava talega vaka kina o Tui Limiai.¹² Ni sa vosa oti vei ira na tamata na iVakabula ena valetabu mai Vanuasautu, sa qai kerei ira na tamata, “Ia, mo dou lako mada kina nomudou veivale ka vakasamataka e lomamudou na veika au sa tukuna, io mo dou kerea vei Tamaqu ena yacaqu, me vakatakila na kena ibalebale ka vakarautaki kemudou vinaka mai mo dou rogoci au tale ni mataka.”¹³

Eda sa ciqoma na veisureti ni iVakabula ni da sa vakasamataka ka masulaka meda kila na veika sa cauraki mai ka qai lako ki liu ka kitaka vaka kina na lomana. Nanuma na vosa nei Peresitedi Spencer W. Kimball: “Au sa vakadeitaka oti e lomaqu niu sa na yaco ki vale ni sa cava na koniferedi, [raraba] oqo … sa levu sara na veitikina ena noqu bula meu na laki vakavinakataka. Au sa vakavola tu e lomaqu na veika oqori, kau sa yalataka niu sa na laki tekivu sara ga ni sa oti oqo.”¹⁴ A kaya o Peresitedi Monson: “ Au vakauqeti kemuni mo ni laki wilika na vosa … ka vakasamataka na itukutuku e tiko kina. Au sa kunea ena noqu bula, ni levu sara na ka au vulica mai na vosa eda rogoca.”¹⁵

Me ikuri ni noda sureti meda vulica yadua ka vakamatavuvale na ivolanikalou, e gadreva na Tamada Vakalomalagi meda dau vuli wasoma ka bulataka na veika eda sa vulica mai na koniferedi. Au vakadinadinataka ni o ira era vakararavi vua na Turaga ka muria na ivakasala oqo ena vakabauta, era na vakaukauwawataki mera vakalougatataki kei ira na nodra matavuvale ena nodra veitabatamata muri mai.

Sa vakarautaka na Tamada Vakalomalagi na sala. Ena koniferedi oqo, e lewe 97 na pasede na lewenilotu era na rogoca na itukutuku ena nodra vosa. E milioni na lewenilotu mai na 197 na matanitu era na sarava na koniferedi oqo ena 95 na veimataqali vosa. Ena loma ga ni rua se tolu na siga sa na laurai na itukutuku ena LDS.org, ena Vakavalagi, ka vakakina ena loma ga ni dua na macawa sa na tekivu mera sa laurai ena 52 na veimataqali vosa. Oqo, eda sa na ciqoma na mekasini ni Lotu ka tabaki ena loma ni tolu na macawa mai na koniferedi raraba. Eda sa na sega ni waraka tiko me vica vata na vula qai yaco mai na meli na vosa eda rogoca. Ena kompiuta, ena talevoni, se dua ga na iyaya vakalivaliva sa rawa ni da wilika, rogoca, sarava, ka wasea na nodra ivakavuvuli na parofita. Dua ga na gauna, dua ga na vanua e rawa ni da vakarabailevutaka na noda kila, vaqaqacotaka na noda vakabauta kei na ivakadinadina, taqomaki ira noda matavuvale, ka liutaki ira yani ki na noda itikotiko tudei.

Sa na tiko talega na itukutuku ni koniferedi oqo ena nodra ivurevure ni vuli ena initaneti ni itabagone. Kemuni na itubutubu sa na rawa ni ko ni raica na nodra lesoni na itabagone me baleti kemuni ena LDS.org. Vakasaqara na ka era sa vulica tiko na luvemuni ka cakava me nomu ulutaga ni vuli, veitalanoa mai vale, lotu ni matavuvale, matabose ni matavuvale kei na veivakatarogi vei ira yadua na luvemu ena veika mera vakatavulici yadudua kina.

Au vakauqeti kemuni na lewenilotu taucoko mo ni vakayagataka na ivurevure ena mataveilawa ni Lotu. Era sa na tomani tikoga na kena vakacokotaki me rawarawa kina na kena vakayagataki ka ganita na noda bula. Ena LDS.org ko na raica na ivurevure me na vukei iko mo vulica na kosipeli, vaqaqacotaka na nomu matavuvale, ka veiqaravi ena nomu veikacivi. Sa rawa talega ni o kunei ira na nomu qase ka ra gadreva na veiqaravi ni valetabu me baleta na nodra cakacaka ni veivakabulai, wili kina na vunautaki ni kosipeli. E rawa ni ra sa veiliutaki sara ga na itubutubu ena nodra vakarautaki na luvedra kina papitaiso, na matabete, na kaulotu tudei kei na valetabu. E rawa ni ra vukei keda meda muria na sala rabalailai ka qiqo ni cakacaka vakalotu ni valetabu ka cakacaka me baleta na veivakalougatataki ni bula tawamudu.

Ena koniferedi ni Epereli sa oti, ena soqoni raraba ni matabete, au a talanoataka ni a droinitaka tiko o tamaqu e dua na qaqa ni ivalu me vakavulici au ena daramaki taucoko ni iyaragi ni Kalou kei na veimaroroi ni kosipeli ka tiko kina.

Ni sa oti na soqoni o ya e a tukuna e dua na tama kina nona matavuvale na veika sa vulica na cauravou. Sa vakauqeti sara na luvena lailai o Jason me vaqaqara ena LDS.org me rogoca vakaikoya na itukutuku. Ena vica tale na siga e muri sa qai basika ena lotu ni matavuvale me wasea kina na lesoni vei ira na tacina kei na ganena. Sa ikoya oqo.

iVakatakilakila

Jason

Dua na itukutuku ni koniferedi rawarawa, veivakauqeti kina na Turaga, ka ciqoma e dua na gonelailai, ka vakavulici ki na dua na matavuvale ena sala veivakauqeti kaukauwa. Au taleitaka na iubi ni lomaserena ni yalododonu. Au taleitaka na nona isasabai ni vakabauta me vorata na gasauvidi ni vunica. Oqo na veivakalougatataki ni koniferedi.

Kemuni na taciqu kei na ganequ, au wasea na noqu ivakadinadina ni bula tiko na Turaga o Jisu Karisito ka tucake tu ena ulu ni Lotu oqo. Oqo na Nona koniferedi raraba. Au yalataka vei kemuni ena Yacana, ni kevaka mo na masulaka ena gagadre dina mo rogoca na domo ni Tamada Vakalomalagi ena itukutuku ni koniferedi oqo, ko na raica ka kila ni sa vosa dina vei kemuni me vukei kemuni ka vaqaqacotaki kemuni, ka me na liutaki kemuni yani ki na nomuni itikotiko ena Nona iserau, Ena yaca i Jisu Karisito, emeni.