2010–2019
Toeni Luhlahp: Ahkfokokoye Luhlahlfongi ac Fahkwack Luhlahlfongi
October 2013


Toeni Luhlahp: Ahkfokokoye Luhlahlfongi ac Fahkwack Luhlahlfongi

Kuht arulacna enenuh toeni luhlahp uh! Nuh ke toeni se inge luhlahlfongi lasr ahkfokokoyeyuck ac ahkloalyeyuck.

Kuloh, Prestuhn Monson, ke luti ac srihkasrak lom ke ohiyacn kuhlwacnsap luhn Kraist ac pahng lom nuh kais sie sesr in ekihn misineri an. Kuht pruhe keim.

Ke pacl lasr uh, Mwet Lahngo Jisus Kraist El sramsram ke oracni luhn Mwet Luhlahlfongi ke toeni luhlahp Lal sifacna.1

Kuhtwena acn kuht oasr ke facluh se inge, kuhtwena ohiyac kuht eis ke toeni se inge, nga fahkwack lah kuht tuhkweni ke toeni Lal. Nga oacyacpac fahkwack lah kuht ac lohng kahs Lal (ke toeni se inge), mweyen El fahk lah tiacna siena mwet fin lohng Puhsrwacl sifacna kuh puhsren mwet kuhlwacnsap Lal, oacna sie.2

Toeni luhlahp uh oasr ke Alu pwacye luhn Jisus Kraist ke pacl nohfohn. Adam el oracni mwet nuh kwewa nahtuhl ac palye ke ma in tuhkuh. Moses el oracni tuhlihk nuhtin Israel ac lotwelos masap el eis. Mwet Lahngo El luti u pucspucs kwewana ke Acn Muhtahl ac Acn Macrike. Peter el oracni mwet luhlahlfongi fin acn Jerusalem. Toeni luhlahp se met ke lwen inge sikyak tukun mahlwem luo tukun Alu uh muhsahiyuckyak, ac toeni an kalweniyuck nuh mihsenge.

Toeni inge kolyuck sin Leum pacl nuh kwewa, kolyuck ke Nguhn Lal.3 Kuht tiac eis sifac kac. Ke lusen wik ac mahlwem, kwacna ke fong ke wacngihn mutullac, kuht sano nuh sin Leum. Ke lalo, pruhe, lutlut, ac motko, kuht etwaclah pweng El kena kuht in usot uh.

Sahp kuhtuh siyuck, “Efuh mokleyuck uh tiac tuhkuh fihsrwacsr ac sa?” Leum El lotwel Oliver Cowdery lah el enenuh in motko ke nuhnak lal, na siyuck sin Leum fin pwacye.4 Pweng ke toeni luhlahp uh tuhkuh nuh sesr tukun kuht pruhe in ahkolah, ke Nguhn Muhtahl.

Ip yohk se inge pwacye nuh sin mempucr nuh kwewa luhn Alu uh ke kuht ahkolah in mukwikwi ke ward, stek, ac toeni luhlahp uh. Kuht motko ke nuhnak lasr ma kuht enenuh ac kena sin Pahpah Lucng, ac kuht pruhe in kahlwem ac orekmakihn ma lutiyuck kuht. Ke pacl in toeni luhlahp tuhkuh, kuht kihsackuhnlah mukwikwi sahyac, ac srwelah ma ke facluh se inge nuh sahyac ac suk ke ma wo liki ke facluh.5 Na kuht oracni sucu lasr in lohng kahs luhn Leum, oacna mwet lal Tohkohsrah Benjamin oruh.6

Tuhlihk ac mwet fuhsr uh luhngse in wi. Kuht oruh tahfonglac yohk se kuht fin nuhnkuh toeni luhlahp inge upac kwaclos in kahlwem ke nuhnak ac nguhn. Nuh sin mempucr fuhsr ke Alu uh, nga olwelah lah kowos fin lohng, kowos ac puhla Nguhn oasr yuruwos. Leum El ac fahk nuh suwos ma El kena kowos in oruh ke moul lowos.

Ke toeni luhlahp uh kuht eis kahs luhn Leum ma ma nuh sesr na. Sie mempucr fahkwack: “Ke nga lohng sramsram lom, nga lut. … Sramsram lom pa fwackyuck sifacna ma tuhkuh sin Leum nuh ke sucu luhk. Wacngihn pacl sahyac nga puhla Nguhn ohinge ke moul luhk sahyacn minit ingacn ke Nguhn Muhtahl sramsram nuh sihk sifacna.”

Sie pac sahyac fahk, “Wacngihn pacl met ah nga puhla yohk oacna sramsram utuckuh nuh sihk.”

Ma inge kuh in sikyak ke srihpen Nguhn Muhtahl us kahs luhn Leum nuh ke insiyacsr ke ohiyac kuht kuh in kahlwem kac.7 Ke nga sihmihs mwe kahsruh ke toeni luhlahp, nga tiac sihmihs pacl nuh kwewa ma sruhmuhnyuck sin mwet in sramsram; nga sihmihs kolyuck sin Nguhn nga eis uh.

Ma fwackyuck uh tiac yohk likina ma kuht lohng ac ma kuht puhla.8 Pa oruh kuht srihke in wi toeni luhlahp ke acn se ma puhsra srihsrihk luhn Nguhn kuh in lohngyuck, puhlweyuck, ac kahlwemkihnyuck.

Kuht arulacna enenuh toeni luhlahp uh! Nuh ke toeni se inge luhlahlfongi lasr ahkfokokoyeyuck ac ahkloalyeyuck. Ac ke kuht eklac, kuht ahkfokokoye sie sin sie in tu kuh ke ma upac luhn pacl sahflah se inge.9

Ke pacl inge, Alu uh tiac arlac wi ahkkolukyeyuck ac lwesrihkiyuck oacna ke pacl luhn Mwet Luhlahlfongi met ah. Ac tiac sifil ohinge pacl nuh kwewa. Mwet luhn facluh som liki nguhn luhn Leum ke ohiyac sa likina met ah. Setuhn el orekmakihn kuh ac mwe sruhf fin facluh. Kuht liye, lohng, riti, lutlut, ac akacsruhi kahs luhn mwet pahluh in ahkolah ac karihngihnyuck. Srihkasrak se, “Sucu: Sie Mwe Fahkwack nuh fin Facluh” kuht eis met liki ma upac sucu lasr uh sun uh. “Kraist Suc Moul: Fahkwack Ke Luhlahlfongi Luhn Mwet Sap” ahkolah met liki kuht enenuh fahkwack se inge yohk.

Sahp kuht tiac etuh srihpac nohfohn efuh mwet pahluh ac mwet sramsram nuh sesr ke toeni uh sramsram ke kuhtwena sifac ke toeni luhlahp uh, tuhsruhktuh Leum El oruh. Prestuhn Harold B. Lee el luti: “Karihngihnyuck muhkwena oasr yurin mempucr ke alu se inge pa … in ukwe kahs ac masap Leum El sang nuh sin mwet pahluh Lal. Oasr kuhtuh ma ac enenuh mongfihsracsr ac luhlahlfongi. Sahp kowos ac sruhnga ma tuhkuh sin general authority luhn Alu uh. Sahp ac lain ohiyac lowos [sifacna] an. Sahp ac lain ohiyac lowos yurin mwet uh. Sahp ac ekuhllah ohiyowos yurin mwet sisken kowos an. Tuhsruhktuh kowos fin lohng ma inge, oacna fin Leum Sifacna El fahkwack, ke mongfihsrwacsr ac luhlahlfongi, olwelah pa motonwac luhn hell tiac kuh in kuhtang kowoslac; … ac Leum God El ac eslah kuh luhn lohsr ye motowos, ac oruh inkuhsrao in rarrar ke ma wo lowos ac wolacna lal’ (liyeD&C 21:6).”10

Prestuhn Lee el etuh fuhkah ma kuht ac sun ke lwen lasr uh? El etuh ke srihpen el pa mwet pahluh, liyactwen, ac mwet eis fahkyuck se. Ac kuht fin lohng ac ahkos mwet pahluh mihsenge uh, wi pac mwet suc sramsram ke toeni luhlahp inge, kuht ac ahkfokokoyeyuck ac karihngihnyuck.

Mwe insewowo wo emet ke toeni luhlahp uh tuhkuh nuh sesr tukun toeni uh tari. Esam akucl ma sihmlac pacl pucspucs ke ma suhmuhslah: kuht fahsrweni in lohng kahs luhn Leum, ac kuht fohlohk nuh lohm ah in moulkihn.

Tukun Tohkohsrah Benjamin el luti mwet lal, el fuhlwelah mwet uh, ac elos nohfohn fohlohk, oracni ke sucu lalos, lun lohm selos.11 Ke lwen se ingacn, Tohkohsrah Limhi el oruh oacna.12 Tukun el luti ac kahsruh mwet ke tempuhl fin acn Bountiful, Mwet Lahngo El kaifwe mwet uh in som nuh lohm selos ac motko ke ma El tuhfahna fahk, na siyuck Pahpah, ke Inel, in kahsrwelos in kahlwem ke mwe luti Lal, ac ahkolah nuhnak lalos nuh ke lwen se tohkoh tuh El ac sulpac fohlohk nuh yohrohlos.13

Kuht insese nuh ke mwe suli luhn Mwet lahngo ke kuht motko ac pruhe in kahlwem ke ma kuht lutiyuck ac na som ac oruh ma luhngse Lal. Esam kahs lal Prestuhn Spencer W. Kimball: “Nga sulaclah tari ke nuhnak luhk ke nga fohlohk nuh lohm ah ke toeni [luhlahp] se inge … oasr ma pucspucs ke moul luhk ma nga kuh in ahkwoye. Nga oraclah tahk soko ke nuhnak luhk, na nga ac som orekma kac tukun kuht tari.”14 Prestuhn Monson el fahk: “Nga kaifwe kowos in riti sramsram an … ac motko pweng oasr kac an. Nga konwacack sifacna ke moul luhk tuh nga etwaclah yohk likina met ke sramsram mokleyuck inge tukun nga lutlut yohk kac.”15

Sahyacn suli kuhtlac in lutlutkihn ma suhmuhslah sifacna ac yurin sucu, Pahpah Lucng El kena kuht in lutlutkihn ac moulkihn pacl puhs ma kuht etwaclah ke toeni luhlahp uh. Nga fahkwack lah mwet suc sang luhlahlfongi lalos nuh sin Leum ac ukwe kolyuck se inge ke luhlahlfongi fah eis kuh yohk in ahkinsewowoyaclos sifacna ac sucu lalos nuh ke fihl tok uh.

Pahpah Lucng El oraclah inkacnek an. Ke toeni se inge, percent 97 luhn Alu kuh in lohng pweng se inge ke kahs lalos. Miliacn luhn mempucr 197 kuh in liye toeni se inge ke kahs 95. Tukun lwen luo kuh tolu pweng an fah oasri ke LDS.org ke kahs English, ac tukun wik se elos muhtwacack ac oasr ke kahs 52. Ingena kuht eis magazine luhn Alu uh tukun wik tolu ke toeni luhlahp uh. Wacngihnlac pacl kuht enenuh in soano mahlwem ekahsr in tuhkuh ke mail. Ke computer, phone, kuh electronic device sahyac, kuht kuh in riti, lohng, liye, ac akacsruhi mwe luti luhn mwet pahluh. Kuhtwena pacl, acn nuh kwewa, kuht kuh in ahkyohkye mwe etuh lasr, ahkfokokoye luhlahlfongi lasr, karihngihn sucu lasr, ac kohlohlos sef nuh lohm ah.

Pweng ke toeni luhlahp se inge ac fah ituckyang pac nuh ke mwe luti online luhn mwet fuhsr uh. Pahpah ninac, kowos kuh in liye sifacna mwe luti luhn mwet fuhsr ke LDS.org. Konwacack ma tuhlihk nuhtuwos an etwaclah, ac sulaclah in sifac in lutlut lowos sifacna, sramsram ke sucu, ekuh in toeni luhn sucu, kahsruh luhn sucu, ac kihsen siyuck in lohlngohk yurin kais sie tuhlihk nuhtuwos an ac sramsram ke ma kais sie selos enenuh lotwelah sifacna.

Nga kaifwe mempucr nuh kwewa in orekmakihn ma ke website luhn Alu uh ac mobile apps. Ma inge kalweniyuck in ahkwoyeyucklac in muh fihsrwacsr in orekmakihnyuck ac kahsruh moul lasr uh. Ke LDS.org kowos ac konwacack mwe kahsruh in kahsrwe kowos lutlut ke wosasuc, ahkfokokoye lohm ac sucu lowos, ac kuhlwacnsap ke pahng lowos an. Kowos oacyacpac kuh in konwacack mwet mahtuh an suc enenuh akwuck luhn tempuhl ac mwe kahsruh in ahkkweye kowos ke orekma luhn molwelah, wi pac akacsruhi wosasuc. Pahpah ac ninac kuh in ahkolah tuhlihk nahtuhlos nuh ke pacptais, pristut, misineri pacl nuh kwewa, ac tempuhl an. Elos kuh in kahsrwe kuht fahsr ke inkacnek suwohs ac oasrihksrihk ke akwuck luhn tempuhl ac wuhlweacng ac eis mwe insewowo luhn moul ma pahtpaht yurin God.

Ke toeni sahflah ke Eprel, ke miting luhlahp luhn pristut, nga sramsram ke pahpah tuhmuhk el srolwaclah petsac se ke sie solse ke mwe loang in lutiyuc ke nuknukyang ke mwe loang nohfohn luhn God ac karihngihnyuck ke nguhn oasr kac an.

Tukun toeni se inge tari, sie pahpah fahkwack nuh sin sucu lal ma el lotwelah. Mokleyuck, tuhlihk mukul fuhsr se nahtuhl Jason suk LDS.org in sifacna lohng pweng sac. Lwen ekahsr tohkoh ac el sikyang nuh ke ekuh in toeni luhn sucu in akacsruhi lesin an yurin tuhlihk mukul ac muhtwacn wiyacl an. El pa inge:

Petsac
Jason

Pweng fihsrwacsr se ke toeni luhlahp, moklweyuck sin Leum, eisyuck sin sie tuhlihk, lutiyuck nuh sin sie sucu ke ohiyac la sifacna, ac kuh. Nga luhngse mwe loeyuck inniwac suwohswohs lal. Nga luhngse mwe loang ke luhlahlfongi lal in eslah mwe sruhf luhn Setuhn. Pa inge mwe insewowo luhn toeni luhlahp uh.

Tamuhlwel ac tahmtahel, nga fahkwack mwe loh sacohk luhk lah Leum Jisus Kraist El moul ac tu ke sifacn Alu se inge. Pa inge toeni luhlahp Lal. Nga olwelah nuh suwos ke Inel lah kowos fin pruhe ke kena pwacye in lohng puhsrwen Pahpah tomowos Inkuhsrao ke pweng luhn toeni luhlahp se inge, kowos fah konwacack lah El sramsram nuh suwos in kahsrwe kowos, in ahkfokokoye kowos, ac kol kowos nuh lohm ah in Weluhl we. Ke inen Jisus Kraist, amen.