Klou el Ongdibel: Melisiich a Klaumera er Kid

Ke mesulang, e President Monson, er a osischeklem me a okesium el uaia Kristo me a tekingem el mei er kid el rokui el kirel a klemisionari. Aki melemolem el meluluuch el kirem.

Chelechal taem, e a Osobel el Jesus Kristo a mesaod el kirir a Resanto el mo kldibel el uaia le “er ngiiklou el ongdibel.”¹

Ngii di el ker el dengarngii er a beluulechad, me a ngii di el teletael domes er tial ongdibel, e a kuchais el kmo kid a kldibel er a ongdibel er Ngii. Ak dirrek louchais el kmo kede mo remenges a Tekingel, le Ngii a mla kmu el kmo a le tobed er a Ngerel malechub a ltobed er a ngerir a Remesiungel, eng diosisiu.²

A Meklou el Ongdibel a di mla tebedechel a mera el Ikelesia er a Jesus Kristo. A Adam a milngideb er a rengelekel e ulemlaoch el kirel a tekoi el mo dubech. A Moses a milngideb er a rengalek er a Israel e ulsisechakl er tir a llach lengilai. A Osobel a ulsisechakl er a seked er a Chedaol Beluu me a Beluu er a Merikel. A Petrus a milngideb er a roumerang er a Jerusalem. A kot el klou el ongdibel er a chelechal uriul klebesei a ulemuchel er a eru el buil ruriul er a lemechederoder a Ikelesia e melemolem el mei er chelechal sils.

Aikal ongdibel a di mla ngara cheungel a derdelel a Rubak, lulekrael er a Chedaol Reng er Ngii.³ Kemam el mengedecheduch a diak a tokubets el dai er a cheldecheduch el ki mngai. Ng chelsel a sandei me a buil, me a blechoel diak a cheliuam a le klebesei, el ki mongiil er a Rubak. Ngokiu a olsengerenger, nglunguuch, omesuub, me a omelbedebek, e a ki mo medengelii a klumech el Ngii a soal.

A rebebil a locha oker, “Ngera uchul me a nger a diak el beot el mereched el mei?” A Rubak a ulsisecheklii a Oliver Cowdery el kmo ng kirel mesuub er ngii er a uldesuel, e sola oker er a Rubak el kmo ng melemalt.⁴ A klemechel a meklou el ongdibel a mei er kemam loeak Chedaol Reng, ruriul er a kemanget el nglunguuch.

Tial osisechakl a klemerang el mora rokui el chedal a Ikelesia sel ki mongedmokl er kemam el kirel a meklou el ongdibel er a ward, me a stake. Aki mesuub er ngii er a uldesuam sel soal a Chedam er a Babeluades, e ngara nglunguuch el mo medengei e oltirakl a bla ki mosisechakl er ngii. Sel lemei sel temel a ongdibel, e a ki mo mechei a bebil er a tekoi, el mo mechei a tekingel a beluulechad e osiik a kuk ungil tekoi.⁵ E mengidb er a telungalek er kemam el mo orrenges a tekingel a Rubak, el uaia rechedal a King Benjamin.⁶

A rengalek me a rengeasek a sorir el mo uldimukl. Kede kmal klou el cheleuid alsekum e kede omdasu el kmo a ongdibel a locha teletael el diak el bo lodengelii er a uldesuir me a rengrir. Kemiu a rengeasek el chedal a Ikelesia, ak yaksok er kemiu el kmo alsekum ko morrenges, e ko mo melchesuar Chedaol Reng el merael mo mesisiich. A Rubak a mo subedemiu aikel Ngii a soal bo moruul.

Chelsel a klou el ongdibel eng sebeched el ngmai a tekingel a Rubak el ngii a kmal di melutk el kired. A tal chedal a ikelesia a ulechais: “Ng mlo mechas a renguk, er a kurrenges er a cheldechedecham. … A cheldechedecham a ocholt er a Rubak el melutk el kirel a telungalek er ngak. Ng dirkak a ta me kumelchesiu er a mesisiich el olchotel Chedaol Reng er a klengar ngak el uai tial taem el Chedaol Reng a milngedecheduch er ngak.”

E a kuk chimong a millekoi, “Ng dirkak a ta me kumelchesiu el kmal mesisiich el kmo tial tekoi a melutk el kirek.”

Tia kmal sebechel le Chedaol Reng a nguu a tekingel a Rubak loiia er a rengud er sel ngii a sebeched el mo medengelii.⁷ Sel kuluches a tekoi el medung er a ongdibel, e ng diak sal komakai el melai a tekingel a chad; ak meluches a ulekrael el Chedaol Reng a meskak.

A mildung el tekoi a diak el sal klou a ultutelel er a ikel morrenges me a ikel domelchesiu.⁸ Seikid a uchul eng blak a rengmam el kudmeklii a basio er a ongdibel el sebechel a chelellakl, kekekrei el ngor er a Chedaol Reng el bleketakl el morenges, melchesiu, e mo medengelii.

E a, kede mera el lousbech a meklou el ongdibel! Ngokiu a meklou el ongdibel e a klaumera er kid a mo mesisiich e mo dmolech. E sel dobult, e kede melisiich er a ta me a tang e melemolem el mesisiich er a chelsel a ultok me a ongarm er chelechal taem.⁹

Aika el mereko el rak, e a Ikelesia a mla duoseb er a ikel cheleuid me a odechelakl el mlo er tirkel Santo er a uchelel. Ng diak el bo lolemolem el uaisei. A rechad er a beluulechad a merael mo cheroid er a Rubak el uaia le mereched e cheroid. A cheraro ousbech a klisichel me a teletelel er a beluulechad. Kede omes, orrenges, menguiu, mesuub, e kauchais a tekingir a reprofet el kired el muklatk e mocheliu. Okesiul tiang e sel “Telungalek: Chais el mora Beluulechad” a tilobed ruchei er a bo de chelbangel a ringel el telungalek a ngarngii er chelechal taem. Sel “Ngar el Kristo: Klaumerang er a Reapostol” a di mla mekedmokl ruchei lometech a bo dousbech er ngii.

Ng locha diak dodengei rokui luchul e a reprofet me tirkel mengedecheduch er a ongdibel a mesaod el kirel a tokubets el tekoi er a chelsel ongdibel, eng di Rubak a medengei. A President Harold B. Lee a ulsisechakl: “A di chimo el selbechakl el teletael dobang a rechedal tial ikelesia a sel … bo doltirakl a tekoi me a llach el Rubak a ngmai el msa profet er Ngii. Bebil er a tekoi a kired el mo oba kllouelreng me a klaumerang er ngii. Ng locha diak el soam aikel ledung a remerreder er a Ikelesia. Ng locha omtok er a kuk di [uldesuem]. Ng locha omtok er sel osengem er a klechad. Ng locha mo mengesang a bebil er a teletael er a klengar kau. Eng di alsekum e korrenges aikal tekoi, el uaia ltobed er a ngerel Ngii el Rubak, loba kllouelreng me a klaumerang, e a yaksok a kmo a ‘chesmerel a beluu er a ngau a diak bol mesisiich er kau; … e a Rubak a mo choridii a klisichel a iilkolk er kau, e rullii a babelaudes meng mo melmesim el kirel a klungiolem me a klebkelel a ngklel’ (D&C 21:6).”¹⁰

Ng mlekera President Lee e medengei ikel bo dechelbangel er chelechal sils? Ng mle medengei e le ngii el profet, chad er a ues, me a ocholt. E a lsekum e kede orrenges e oltirakl er a profet er chelechang, luldimukl er tirkel mo mengedecheduch er tial ongdibel, e kede mo mesisiich e mucheliu.

Sel kot el klou el klengeltengat er a ongdibel a mei er kid ruriul er a bol merek a ongdibel. Molbedebek er a teletael el blechoel ngara chedaol llechukl: kede mo kldibel e orrenges a tekingel a Rubak, e merael mo remei e mo oltirakl.

Uriul er a lolisechakl er a rechedal a King Benjamin, “eng milchiteterir me te merael, me te rokui liluut, el mo kairirei er a telungalek er tir, me a rekeblirir.”¹¹A King Limhi, a mirruul er a osisiu el teletael er sera le temel.¹² Uriul er a lolisechakl e lolngeseu er a rechad el mlara templeo er a beluu er a Bountiful, e a Osobel a milngelechel er a rechad me le bo le kairirei e lolbedebek aika el tekoi el Ngii a mla dmung, e loker er a Chedam, el ngara ngklel [Osobel], me bol ngesuterir el mo medengei Osischeklel, e le kedmokl a uldesuir el kirel a bo el kukuk el Ngii a lmuut el mei.¹³

Kede kongei er a siotai er a Osobel sel dolbedebek e doluluuch el mo medengei aikel mla mosisechakl e bo doruul a Soal. Kom lemadk a tekingel a President Kimball: “Ak mla kudmeklii er a uldesuek el sel bok rei ruirul er tial [klou] longdibel … eng kmal betok, el betok a teletael er a chelsel a klengar ngak el sebechek el mo churungel el mo ungil. Ak mla lmuches er a uldesuek, e kirek el mo kudmokl sel recheded el mo merek.”¹⁴A President Monson a dirk millekoi el kmo: “Ak mengelechel er kemiu el mo menguiu aikal cheldecheduch … e bo molbedebek a klumech el ngara chelsel. Chelsel a klengar ngak e ak mla metik el kmo ng kmal betok a kngai er a ikal chedaol cheldecheduch sel kngara dmolech el omesubel.”¹⁵

Ongingil a omesubel a chedaol llechukl er a derta el chad me a telungalek, e a Chedam er a Babeluades a soal kid a de blechoel mesuub e doltirakl aikel desuub er a ongdibel. A kuchais el kmo tirkel lotilii a klaumera er tir er a Rubak e oltirakl er tial llach loba klaumerang a mo ngmai a klisiich el mo omekngeltengat a klengar tir me a telungalek er tir me a telcheroll el merael mei.

A Chedam er a Babeluades a mla meskid a rael. Chelsel tial ongdibel, eng 97 el basent er a rechedal a Ikelesia a sebechir remenges aikal klumech er sel tekingir. Te million el chedal a ikelesia er a chelsel a 197 el beluu a mo omes er tial ongdibel er a chelsel a 95 el kakerous lomelekoi. E di chelsel a eru malechub eng edei el klebesei e a ikal klumech a mo chemolt er a LDS.org, el tekoi er a Merikel, e a chelsel a ta el sandei eng mo mekedmokl er a chelsel a 52 lomelekoi. Chelecha e kede ngmai a llechukl el magazine er a Ikelesia er a chelsel edei el sandei ruriul er tial ongdibel. Ng dikea dola buil el mengiil aikal cheldecheduch el ngara mail el mei. Ngara computer, dengua, malechub a ngii di el mesil, eng sebeched el menguiu, orrenges, omes, e kauchais osischeklir a reprofet. Ngii di el taem, ngii di el ker, eng sebechel meleketek a klemedengei er kid, mo mesisiich a klaumera er kid, e mucheliu a telungalek er kid, e omekrael tir el muut el mo remei.

A klemechel tial ongdibel a dirrek luldimukl er sel online curriculum er a rengeasek. Rechedam me a rechedil, ng dirrek el sebechemiu el mo omes a subelir a rengeasek er a LDS.org. Bo modengei el kmo ngera te mesuub a rengelekiu, e mrellii me luchul omesubiu, tekoi el soadel er a telungalek, ongdibel er a telungalek, cheldecheduch er a telungalek, me a ikel berrotel el cheldecheduch lobengterir a rengelekiu.

Ak mengelechel er a rechedal a ikelesia el mo ousbech aikel ngarngii el klekedall er a website me a mobile apps er a Ikelesia. Aika lolemolem lomekbeches meng kmal beot a usbechellel e chatter er a klengar kid. Sel LDS.org a obetik a klekedall el ngosukau el mesuub er a ebangkleio, melisiich a rekeblimiu me a telungalek er kemiu, me a okedong er a ikelesia el mngarngii. Ngargii a dongu el kirel a skel a rebeldeked el tir ousbech a ureor er a temple me a klekedall el ngosukau er a ureor lolsobel, luldimukl er a osischeklel ebangkelio. A rechedam me a rechedil a sebechir lomuchel el mengedmokl er a rengelekir el kirel a techolbechelid, priesthood, me a mora mission, me a templo. Aika sebechel ngosukid el melemolem el merael mo ngmai chedaol ruoll me a telbiil er a templo e mo uchul a klengeltengat er a diak a ulebengelel klengar.

Tial mlo merek el ongdibel er a Ongeua el buil, er sel miting er a priesthood, e a kuluchais er a demak er a lousunga er a soldau el bleiull er a bilel a soldau e olisechakl er ngak el kirel a bleiull er a tekingel a Dios me a chedaol ucheliu el dengai.

Uirul er a bol merek tial ongdibel, e a tara chedam a ulechais er a telungalek er ngii aikel siluub. Me a, ngeasek el ngelekir el sechal er a Jason a mocha omes er a LDS.org el soal lorrenges er tial klumech. Sesei klebesei ruriul e ngouchisa er tial suobel el mora rebebil er ngii er a taem er a ongdibel er a telungalek. Ng kakid.

siasing/Llecheklel

Here he is.

A beot el klumech er a ongdibel, loeak a Rubak, e lenguu a ngalek, a mlosisechakl el mora telungalek er a chelsel a, mesisich el teletael. Ng kmal soak tial kaba er a llemalt lobang. Ng soak tial kaba er a klaumerang lobang. Aikaikid a klengeltengat er a ongdibel.

Rodam me a rodos, a kuchais er a tokubets el sioning er ngak el kmo a Jesus Kristo a ngar e dechor er a bdelul tial Ikelesia. Tiang a ongdibel er Ngii. Ak yaksok er kemiu el ngara Ngklel el kmo alskeum e ko meluluuch el meral somiu el rongesii a ngerel a Chedam er a Babeluades er a chelsel aikal klumech, e ko mo metik el kmo Ngii a mla mengedecheduch er kemiu lolngeseu er kemiu, melisiich er kmeiu, e mekrolemiu el mo er a Rengedel. El ngara ngklel a Jesus Kristo, amen.