!Stap Mekem Gem Plan blong Lod I Muv Hariap!

Sam yia i pas, mi nidim blong toktok long waef blong wan long ol bisop blong mifala long stek, mekem se mi ringim haos blong hem. Wan yangfala boe i ansarem fon. Mi talem: “Halo. ?Mama blong yu i stap?”

Ansa blong hem: “Yes, hem i stap. Bae mi singaotem hem. ?Hu i toktok?”

Ansa blong mi: “Talem long hem se hem i Presiden Nielsen.”

Ples i kwaet smol, mo afta, long wan strong voes, mi harem: “!Hey Mama, Presiden Hinkli i stap long fon!”

Mi no save wanem nao sista ia i tingting long hem. Ating wokbaot ia i wan longfala wokbaot blong hem i kam kasem fon. Wan tingting i kam kros long maen blong mi: “?Bae mi traem?” Mi no mekem, be mitufala i laf smol. Naoia we mi tingbaot, ating bae hem i sore smol se hem i toktok long mi nomo.

?Wanem nao bae yu mekem sapos profet blong Lod i singaotem yu? Be yes, !hem i mekem! Presiden Tomas S. Monson, olsem we hem i mekem bakegen long moning ia, hem i bin singaotem wanwan long yumi long wan impoten wok. Hem i talem: “Naoia i taem blong ol memba mo ol misinari oli kam tugeta, blong wok tugeta, blong wok long plantesen blong Lod blong tekem ol sol oli kam long Hem.” (“Faith in the Work of Salvation” [worldwide leadership training broadcast, June 2013]; lds.org/broadcasts).

?Yumi bin stap lisin gud?

Raon long wol, ol stek, ol distrik, mo ol misin oli eksperiensem wan niu level blong paoa, taem we toktok blong Sevya long Josef Smit long 1832, i stap kamtru taem Hem i talem se bae Hem i mekem wok blong Hem i hariap moa long taem we i stret (luk long D&C 88:73).

Ol brata mo sista. !Taem ia i naoia! Mi filim, mo mi sua se yufala tu.

Mi wantem putum strong tingting mo fet blong mi long Jisas Kraes long aksen. taem mi plei futbol, mi tingting long wan plan blong gem. I no gat kwestin se, sapos yumi stap go long kompetisen, mo tim blong yumi i rere wetem ol raet teknik, bae yumi gat sakses. Be, mi jes toktok long top koj blong BYY, Lavel Edwod, long saed blong ol plan blong hem, mo hem i talem: “!Mi no kea long wanem teknik bae yu yusum, be blong yu skorem poen nomo! Olsem wan long ol kwotabak blong hem, mi ting se i moa had bitim hemia, be ating, simpol tingting blong hem i risen ia nao we oli singaotem stadium ia folem nem blong hem.

From se yumi evriwan i stap long tim blong Lod, ?wanwan long yumi i gat gem plan blong hem blong win? ?Yumi rere blong plei? Sapos yumi, olsem ol memba, i rili lavem famle, fren, mo wokfren blong yumi, ?bae yumi no wantem serem testemoni blong yumi abaot gospel we i kambak wetem olgeta?

Long Semina blong ol Niu Misin Presiden we oli bin holem long manis Jun, rekod i kasem 173 niu presiden mo waef blong olgeta we oli kasem las instraksen blong olgeta bifo oli statem seves blong olgeta. Evri 15 memba blong Fas Presidensi mo Kworom blong Olgeta Twelef Aposol oli toktok long spesel grup ia.

Elda L. Tom Peri i givim las toktok: “Hemia i taem we i moa gud long histri blong Jos. Hemia i wan samting we i stap long level blong ol bigfala samting we i bin hapen long histri, olsem Fas Visen, presen blong Buk blong Momon, Restoresen blong gospel, olsem evri samting we i bildimap fandesen ia blong yumi blong go fored mo tij insaed long kingdom blong Papa we i stap long Heven.” (“Concluding Remarks” [address given at the seminar for new mission presidents, June 26, 2013], 1, Church History Library, Salt Lake City).

Yumi nid blong wok bitim bifo blong kasem level blong tingting blong ol lida blong yumi mo komitmen blong ol fultaem misinari blong yumi. !Wok ia bae i no muv fored long wei we Lod i tingting long hem sapos yumi no stap! Olsem Presiden Henri B. Aering i talem: “ Nomata wanem yia blong yumi, paoa, Jos koling, o ples, yumi olsem wan pipol nomo we Hem i singaotem yumi blong helpem Hem blong karembak ol sol blong Hem.” (“We Are One,” Ensign o Liahona, May 2013, 62).

Bae mi serem wetem yufala wan gem plan we mi bin filim blong yufala afta we mi tingting hevi long ol eksperiens blong bifo, mo prea, mo ridim japta 13 blong Prijim Gospel blong Mi. Mi invaetem yufala blong lukluk long ol trifala poen taem yufala i stap tingting long plan blong yuwan.

Faswan, prea stret blong tekem wan i kam kolosap long Sevya mo gospel blong Hem, evri dei. Yumi save mekem hemia taem yumi luk evriwan olsem ol boe mo ol gel blong God we oli stap givgivhan long olgeta long rod i gobak hom. Tingting long ol niu fren we bae yu save gat.

Nekiswan, prea from ol misinari we oli stap wok long eria blong yu, mo nem blong wanwan investigeta blong olgeta evri dei. Wan wei nomo blong mekem hemia, i blong gritim olgeta, luk long baj blong olgeta, singaotem nem blong olgeta, mo askem olgeta huia nao oli stap tijim. Wetem waes, Elda Rasel M. Nelson i talem: “Kasem taem we yu save nem mo fes blong wan, Lod i no save helpem yu blong save hat blong man o woman ia.”

Mi bin go long baptaes blong wan naes sista we i serem testemoni blong hem. Bae mi tingbaot oltaem we hem i talem: “!Mi neva gat plante pipol olsem we oli stap prea from mi stap filim moa lav! !Mi save se wok ia i tru!”

Nambatri, invaetem wan fren long wan aktiviti insaed o aotsaed long haos blong yu. Weaples yu go, o wanem yu mekem, tingting hevi long huia bae i gat gud taem, mo afta, lisin long Spirit taem Hem i stap lidim yu.

Sevya i bin tijim mi wan spesel lesen long fasin blong mi lanem gospel, we mi biliv, i go tu wetem fasin blong “muvum wok hariap.” Taem mi fulap long wan filing abaot wan samting, i kamaot long wei we mi raet, mo plante taem, i kamaot long strong tok mak long en blong sentens we i talemaot wan strong filing, [o wan] samting impoten.” (Merriam-Webster’s Collegiate Dictionary, 11th ed. [2003], “exclamation point”).

Mi kam blong wari se ol skripja abaot “wok blong karem tugeta” we sentens i finis wetem mak ia oli stap kamkamaot long mi, olsem toktok ia blong Alma: “!O mi wantem kam wan enjel, mo save gat hop blong hat blong mi, blong mi save go aot mo toktok wetem bigfala pupu blong God, wetem wan voes blong mekem wol i seksek, mo taltalemaot fasin blong sakem sin long evri pipol!” (Alma 29:1).

Stadi i soem se i gat 65 skripja we i tokbaot ol kaen strong filing blong misinari, wetem olgeta ia:

Sevya i talem se glad blong hem i bigwan tumas from sol we i sakem sin …

Mo sapos yumi wok evri dei blong laef blong yumi blong taltalemaot long ol pipol ia blong oli sakem sin, mo tekem wan sol nomo i kam long Hem, bambae glad blong yumi i bigwan wetem hem insaed long kingdom blong Papa;

Mo !sapos glad blong yumi bae i bigwan wetem wan sol we yumi bin tekem i kam long Sevya insaed long kingdom blong Papa, bambae glad blong yumi i bigbigwan moa sapos yumi tekem plante sol i kam long Hem! (luk longD&C 18:13, 15–16).

Taem mi luksave gud ol spesel ves ia, i mekem wan impoten samting long fas wok blong mi olsem wan Eria Seventi. Mi fraet smol blong stap kompanion blong wan Aposol, Elda Kwentin L. Kuk, long stek konfrens. Taem mi wokbaot i go long ofis blong stek presiden blong fas miting blong wiken ia, mi luk wan sus we i olfala, biaen long ofis tebol wetem wan skripja we i stap long hem wetem woning mak ia long en. Taem mi ridim, mi filim Lod i savegud abaot stadi blong mi, i bin ansarem ol prea blong mi, mo Hem i bin save stret wanem mi nidim blong hat blong mi i go daon.

Mi askem stek presiden blong talem stori blong sus ia.

Hem i talem:

“Hemia ol sus blong wan yang konvet long Jos we famle situesen blong hem i no gud tumas, be yet, hem i gat strong tingting blong go long wan gud misin mo hem i mekem long Guatemala. Taem hem i kambak, mi sidaon wetem hem blong givim wan rilis wetem ona, mo luk se sus blong hem i brok nogud evriwan. Yang man ia i bin givim evri samting long Lod, nating hem i no gat fulap, o no gat famle sapot.

“Hem i luk se mi stap lukluk sus blong hem, mo askem mi: ‘Presiden, ?wan samting i rong?”

“Mi talem: ‘!No Elda, evri samting i oraet! ?Mi save gat sus ia?’”

Stek Presiden i gohed: “!Respek mo lav blong mi long riten misinari ia, i bigwan! Mi wantem blong kipim memori blong eksperiens ia, mekem se mi kalarem sus ia i braon. I mekem taem mi wokbaot i kam long ofis, mi tingbaot hadwok we yumi evriwan i mas mekem nomata wanem situesen blong yumi. Ves ia i kam long Aesea: “I gud tumas blong luk man blong karem tok, we i wokbaot i kamkros long ol bigbigfala hil, blong kam talemaot gud nius, we i nius blong pis. !Samting ya i gud tumas blong luk! Bambae man olsem i kam long Saeon, i talemaot long yumi se, !God blong yufala i King! !Hem i stap sevem yufala!’ (Aesea 52:7).”

Ol dia brata mo sista blong mi. Waef blong gudfala bisop ia, ating i stap tingting se from wanem profet i stap singaotem hem. Mi testifae se hem, mo yumi, i no nid blong tingting i go moa— !STRONG TOK MAK!

Mi save se wanwan i mas developem mo wokemaot gem plan blong yumiwan blong wok wetem laef tingting long saed blong ol fultaem misinari—!STRONG TOK MAK!

Mi ademap testemoni blong mi long hemia blong Profet Josef Smit, afta long plante testemoni we oli bin givim abaot Sevya, hem i givim testemoni blong hem laswan long evriwan, we mitufala i givim abaot hem: !Se Sevya i laef! (luk longD&C 76:22). Long tabu nem blong Jisas Kraes. amen.