2010–2019
Salkweack Plwacn in Sritacl luhn Leum!
October 2013


Salkweack Plwacn in Sritacl luhn Leum!

Kuht kais sie enenuh in ahkyohkye ac usaclihk plwacn in sritacl lasr sifacna in kuhlwacnsap ke rahrah sisken misineri pacl nuh kwewa uh.

Yac pucspucs somlah ah nga enenuh in sramsram nuh sin muhtwacn kiacn sie sin pisap ke stek lasr ah, oruh nga pahngon lohm selos ah. Sie tuhlihk mukul fuhsr nahtuhltahl ah topuk tacluhfon ah. Nga fahk, “Hello. Kuh ninac kiom an oasr?”

El topuk: “Ahok, el oasr. Nga ac pahnglol. Suc ngwe?”

Top luhk: “Fahk nuh sel muh Prestuhn Nielsen.”

Oasr kihtin welac, ac na, ke sie puhsra na yohk, nga lohng, “Hey, Ninac, Prestuhn Hinckley la ke tacluhfon uh ngwe!”

Nga tiac kuh in nuhnkuh lah meac elac nuh nuhnkuh uh. Sahp ac na pa fahsr loeloes se emet la nuh ke tacluhfon ah. Nuhnak se sikme nuh sihk: “Yac ngwac?” Nga tiacna, tuhsruhk kuht isrwacsr kac. Ingena ke nga nuhnkuh kac uh, sahp elac nuh puhla koluk in sramsram nuh sihk na.

Meac kom fah oruh fin mwet pahluh luhn Leum pahngon kom na pwacye? Na pa, el oruh! Prestuhn Thomas S. Monson, ke el sifilpac oruh olutu se inge, el pahngon kais sie sesr nuh ke sie orekma na yohk srihpac. El fahk, “Pa inge pacl se nuh sin mempucr ac misineri uh in tuhkweni fahsrweni, in tuhkweni orekma, in orekma ke imac luhn Leum in use nguna uh nuh Yohrohl” (“Faith in the Work of Salvation” [broadcast ke ahkpah nuh sin mwet kol fin facluh nohfohn, June 2013]; lds.org/broadcasts).

Yac kuht nuh porongo?

Fin facluh nohfohn, stek, tistrik, ac misin uh puhlakihn sie lacfuhl sasuc ke kuh, ke fahkwack luhn Mwet Lahngo nuh sel Joseph Smith ke 1832 ah ahkfalyeyucklac: Ma fahk muh Nga fah salkweack orekma luhk ke pacl la sifacna (liyeD&C 88:73).

Tamuhlwel ac tahmtahel, pacl se ingacn pa ingena! Nga kuh in puhla, ac nga etuh lah kowos puhla pac.

Nga luhngse sang pwacrwack luhk uh ac luhlahlfongi luhk ke Jisus Kraist nuh ke mukwikwi. Ke nga sritacl football, nga nuhnkwaclah ke pacl in plwacn luhn sritacl uh. Wacngihn tahfuhluo lasr ke muhtwacwacack sritacl uh lah fin u lasr uh ahkolah ke plwacn pwacye uh, kuht ac orwaclah wo. Ne ohinge, nga tuhfahna sramsram yurin sie mwet liyacacng sritacl etweyuck luhn BYU LaVell Edwards ke plwacn in sritacl lasr uh, ac el fahk, “Nga tiac elyah ke sritacl ma kom fah oruh an nga kena u lasr uh in orwaclah sie teng ah!” In oacna sie quarterback lal, nga pahngon ac upac likina ingacn, tuhsruhk sahp ohiyac fihsrwacsr lal pa srihpac se oasr acn in sritacl se lal pahngpahng ke inel uh.

Ke kuht nohfohn oasr ke u luhn Leum, yac kais sie sesr oasr plwacn in itto ke sritacl lasr sifacna uh? Yac kuht ahkolah in sritacl? Kuht fin, oacna mempucr uh, luhngse na pwacye sucu lasr, kawuck, ac mwet tuhkweni uh, yac kuht ac tiac kena in akacsruhi fahkwack luhlahlfongi lasr ke wosasuc fohlohkyak inge yohrohlos?

Ke seminar se nuh sin misin prestuhn sasuc uh orek ke Jun, sie luhpah 173 ke prestuhn sasuc ac muhtwacn kiaclos eis mwe kol sahflah met liki muhtwacwacack kuhlwacnsap lalos. Mempucr 15 nohfohn ke Prestuhnsi Se Met ac U luhn Mwet Sap Singucul Luo sramsram nuh sin u yohk srihpac se inge.

Elder L. Tom Perry el sang fahk in ahksahf uh: “Pa inge pacl wolacna se emet ke ma mahtuh luhn Alu uh. Pa inge sie ma apkuhran in oacna yohk srihpaciyacn mukwikwi yohk sikyak ke pacl mahtuh somlah, oacna Aruhruhma Se Met, oacna mwe sang ke Puk luhn Mormon, oacna Fohlohkyak luhn wosasuc, oacna ma nuh kwewa ma muhsahlah pwelucng sac nuh sesr in fahsr nuh met ac luti ke tohkohsrahi luhn Pahpah tuhmasr Inkuhsrao” (“Sramsram in Kaliyac” [sramsram ituckyang ke seminar nuh sin prestuhn sasuc luhn misin uh, June 26, 2013], 1, Church History Library, Salt Lake City).

Kuht enenuh in wi nuh ke orekma yohk liki na met in sun luhpan rahrah luhn mwet kol lasr ac muhngnguh luhn misineri in pacl nuh kwewa lasr uh. Orekma se inge ac tiac fahsr nuh met ke ohiyac placniyuck luhn Leum fin tiac ma yohrohsr! Oacna Prestuhn Henry B. Eyring el tuh fahk, “Finne meac matwacsr, kuh lasr, kunohkohn lasr ke Alu, kuh acn sesr, kuht nohfohn pahgonyuck nuh sie nuh ke orekma in kahsrwel ke kosrwacni Lal ke nguhna uh” (“We Are One,” Ensign or Liahona, Mei 2013, 62).

Lwelah ngan akacsruhi yuruwos sie plwacn in sritacl luhk nga puhla mokleyuck in sruhmuhn tukun pruhe, riti sapta 13 ke Preach My Gospel, ac motko puhlakihnyuck somlah ah? Nga suli kom in nuhnkuh srihpac tolu inge ke kom nuhnkuh plwacn lom sifacna an.

Ma se met, pruhe na in use sie mwet ah fototoeni nuh sin Mwet Lahngo ac wosasuc Lal lwen nuh kwewa. Kom kuh in oruh ma inge ke kuht liye mwet nuh kwewa oacna tuhlihk mukul ac muhtwacn nuhtin God suc kahsruh sie sin sie nuh ke soko inkacnek nuh lohm selos ah. Nuhnkuh ke kawuck sasuc kom kuh in orwaclah uh.

Ahkluo, pruhe ke misineri kuhlwacnsap ke acn lom an ac mwet lutlut yohrohlos an ke ine lwen nuh kwewa. Inkacnek sefanna in oruh ma inge pa in pain misineri an, liye badge lalos an, pahnglolos ke inelos, ac siyuck selos lah suc elos luti uh. Elder Russel M. Nelson el, “Nuh ke kom etuh sie ine kuh muhtuhn mwet, Leum El tiac kuh in kahsrwe kom etuh insiacl.”

Nga wi pacptais luhn sie muhtwacn na wowo, suc akacsruhi fahkwack luhlahlfongi lal. Nga fah esam ma pahtpaht fahk lal ah, “Nga tuhfahna puhla in puhs mwet pruhe keik ac puhla luhngse yohk! Nga etuh lah orekma se inge pwacye!”

Ahktolu, suli sie kawuck nuh ke sie mukwikwi in lohm sum ah kuh oacna sie acn. Acn nuh kwewa kom som nuh we kuh oacna sie ma kom oruh, motko lah suc ac fah engankihn pacl sacn na lihpsre Nguhn ke El kol kom.

Mwet Lahngo El lutiyuc sie lesin fihsrwacsr ke lutlut luhk sifacna ke wosasuc uh ma, nga luhlahlfongi, kapsra arlac kahto nuh ke “salkweack.” Ke nga puhla enganwack ke sie ma uh, ac ahkkahlwemyeyuck ke sihm luhk ac kwacna sahflah ke sie exclamation point ma kalmeyac uh ahkkahlwemye sie “puhla fokoko [kuh sie] akucl ke ma yohk srihpac” (Merriam-Webster’s Collegiate Dictionary, 11th ed. [2003], “exclamation point”).

Nga ke etuh ke ma suhmuhslah ke “fahsrweni sac” ma sahlfah ke punctuation mark se inge muhtwacwacack in arulacna kahlwem nuh sihk, oacna mukwikwi ke insiacl Alma tuh elan kuh in sie lupufacn, ac elan kuh in eis finsrak se tuh elan kuh in som ac sramsram ke mwe ukuk luhn God, ke sie puhsra in osrokwack facluh, ac sapkihn auliyak nuh sin mwet nuh kwewa! (liyeAlma 29:1).

Ke sukok luhk nga sokwack fuhs 65 ahkkahlwemye kain in puhla fokoko inge luhn misineri, weacng ma inge:

“Mwet Lahngo El fahk lah yohk engan Lal ke sie mwet el auliyak ! …

“Ac kuht fin orekma ke lwen lasr nohfohn in luti auliyak nuh sin mwet sahyac uh ac use mwet se na nuh Yohrohl, ac fah oasr engan yohk lasr wi mwet sacn ke tohkohsrahi luhn Pahpah!

“Ac fin engan lasr uh fah yohk ke sie nguhna suc kuht use nuh yurin Mwet Lahngo ke tohkohsrahi luhn Pahpah, ac fuhkah luhpan engan lasr kuht fin use nguhna pucspucs nuh Yohrohl! (liyeD&C 18:15–16).

Etwacack luhk nuh ke fuhs wolacna inge orwaclah sie kunohkohn na yohk srihpac ke orekma se emet luhk oacna sie Mwet Itngucul ke Eria. Nga tuhfal kuhtuh in mwet kahsruh luhn sie Mwet Sap, Elder Quentin L. Cook, ke sie toeni luhn stek. Ke nga utyak nuh ke ohfohs luhn stek prestuhn nuh ke muhtwacwacackiyen miting ke wik sac, nga akihlen sie fahluhk atacn mahi, tuhn bronze fin mwe nwenyuck puk soko fintukun tepuh lal ah weacng sie ma suhmuhslah sahflah ke sie exclamation point. Ke nga riti ah, nga puhla lah Leum El etuh ke lutlut luhk, El tohpohklah pruhe luhk ac El etuh na pwacye ma nga enenuh in ahkwoye inse rahrah se luhk ah.

Nga siyuck sin prestuhn luhn stek sac in sruhmuhn nuh sihk sramsram ke fahluhk sac.

El fahk:

Ma inge pa fahluhk luhn sie mwet eklac fuhsr nuh ke Alu uh suc ohiyacn sucu la ah upac, tuhsruhk el nuhnkuh in kuhlwacnsapuh sie misin oreklac wo ac el oruh ke acn Guatemala. Ke fohlohk lal ah nga ohsun yohrohl in tahfwelah sie fihlfihllac in ahkfuhlwact ac liye lah fahluhk se lal ah muhsahllah. Mukul fuhsr se inge sang ma nuh kwewa nuh sin Leum ke srihklac, fin oasr kuhtwena, ahkkweye luhn sucu.

“El akihlen lah nga siyac fahluhk lal ah ac siyuck sihk, ‘Prestuhn oasr ma koluk?’

“Nga topuk, ‘Moh, Elder, ma nuh kwewa wona! Nga kuh in eis fahluhk ingacn?’”

Prestuhn luhn Stek el kalweni: “Ahkfuhlwact ac luhngse luhk nuh sin misineri fohlohk se inge uh yohk na pwacye! Nga kena in ahkfuhlwactye puhlakihn sac, oruh oasr sihk fahluhk bronze lal an. Sie mwe acsmakihn nuh sihk ke nga fahsryak lun ohfohs se inge ke kuhiyac ma kuht nohfohn enenuh in sang finne fuhkah ohiyac lasr uh. Fuhs uh ma sel Isaiah: ‘Fuhkah woiyac in liye ke sie mwet utuck kahs kasrma finohl uh me, us pweng wo, pweng ke mislac; El sulkackihn kahs in lahngo; ac fahk nuh sin Zion, God lom el leum!’ (Isaiah 52:7).”

Tamuhlwel ac tahmtahel sacohk wiyuck, muhtwacn wowo se kiacn pisap sac acna nuhnkuh lah efuh mwet pahluh el pahnglol. Nga fahkwack luhlahlfongi lah el ac kuht enenuh in tiac sifil nuhnkuh—EXCLAMATION POINT!

Nga etuh lah kuht kais sie enenuh in ahkyohkye ac orwaclah plwacn in sritacl lasr sifacna in kuhlwacnsap ke rahrah wi misineri pacl nuh kwewa uh— EXCLAMATION POINT!

Nga sang fahkwack luhlahlfongi luhk nuh ke ma se lal Mwet Pahluh Joseph Smith: “Tukun fahkwack luhlahlfongi pucspucs ma oreklac ke Mwet Lahngo, el orwaclah fahkwack luhlahlfongi inge, sahflah ma nuh kwewa: Lah Mwet Lahngo El moul!” (liye D&C 76:22 ). Ke ine muhtahl luhn Jisus Kraist, amen.