Rechedel a Moktek er a Rubak!

Ng mekesai el rak er a memong, eng mle kirek el mengedecheduch er a bechil a tara bishob er a stake er kemam, me a kulemekedong er a blirir. E a ngelkir el sechal a ngiluu a dengua. Ak dilul kmo, “Alii a delam eng ngar tilechang?”

Ng ulenger: “Choi, ngar tiang. Me bo kukerir. Ngkang techang?”

Ak ulenger: “Mdu er ngii el kmo ak President Nielsen.”

Ng mlo er ngii a telkib el chelelakl, e solae, e a kmal lodikel el ngor, el krirengesii, “Alii, e Chedil, a President Hinckley a ngara dengua!”

Ng kmal diak kudengei el kmo ngerang ngulemedasu. Ng locha mle kot el kemanget lomerael el mo melai er a dengua. A uldasu a mle er a uldesuek: “ak rulii el mo mdasu el kmo ak President Hinckley?” Ng dimlak eng di aki ulecherchur er tial teletael. Chelchal kumdasu er ngii eng dimlak el sa el ungil a rengul el mengedecheduch er ngak.

Ke locha mekerang alsekum a profet er a Rubak a omekedong er kau? Choi, ng mla omekedong! President Thomas  S. Monson, er chelecha el tutau e mla omekedong er a dersta me a dersta er kid el me er tial el kmal klou a ultutelel el ureor. Ng dilu el kmo, “Chelechang ng taem el rechad er a ikelesia me a remisionari a mo tmak el rokui, e oureor, er a sers er a Rubak el mengesuseu er a rechad el mei er Ngii” (“Faith in the Work of Salvation,” [cheldecheduch el mildung er a tokubets el broadcast, June 23, 2013]; lds.org/broadcasts).

Kid kede ulerenges?

Ng meliuekl er a beluulechad, e a stakes, districts, me a missions a melechesuar a beches daouch er a ureor, el tekingel a Osobel el mora Joseph Smith er a 1832 a mla motaut el kmo bo modengei, el kmo ak mo orchedii a urerek er se el temel” (mesa D&C4:1).

Rodam me a rodos, se el taem e chelechang! A kumelchesiu er ngii, ak medengei kau el dirrek.

Ng soak el otutii a klemeriar reng er ngak me a klaumerang er a Jesus Kristo el mo oureor. Se e ra kuusekool a football, a kulemdasu el kirel moketk el mo oltaut. Ng dimlak ki mo mededenger aki bo er a klausichai el kmo aki kltmokl el ousekool, aki mo mesisiich. Ng ungil a rengud er ngii! ! A uriul ak milngedecheduch er a merael chisel oungerachel er a football er a BYU el LaVell Edwards el kirel a moktek er kemam er a klekool, e ng melekoi, “Ng diak kumkereu er a ngara teletael mousbech er ngii ng di motungii a teng!” Ak tara ulusekool lo bengkel, ak milatk el kmo ng etituokl, eng di tial beot el uldesuel a uchul a blai er a klekool a ungkiklii.

Kid el rokui el ngara tim er a Rubak, kid kede kltmokl mo mesisiich? Kid kede kltmokel el mo ousekool? Alsekum e kid, el rechedal a ikelesia, a meral betik a rengud er a telungalek er kid, resechelid, me a kuk di dekaodengei, ng diak el direk el soad el lomerek er tia el ungil e klemerang er a mla moluut el ebangkelio el mo er tir?

Ngar tia el seminar er a mo beches el mission president er mla er ngii er a June, a 173 a rebeches el mengedereder me a rebecherir a mlo mo sisechakl er a uchei er a lomuchel a urerir. A udekial a teruich me a teim el chedal a First Presidency me a Chelchad er a Teruich me a Terung Apostol a milngedecheduch er tial tokubets el seked.

Elder L.  Tom Perry a mlo dochel ulebongel el cheldecheduch: “Tiang a kot el mengasireng el taem er a reksi er a Ikelesa. Tiang a mengaisisiu er a aikel meklou el tekoi el mla deuubech er a mla memong, el ua Joseph Smith el mesa Rubak el Dios me a Jesus Kristo, el ua sengk er a Babier er a Mormon, el ua Oluutel a ebangkelio, el ua rokui el tekoi el melisiich er a uchetemed me kede omakes el mo ruchei e olsisichakl er a chelsel a rengedel a Demad er a Babeluades” (cheldecheduch el mildung er a re mo beches el mission presidents, June 26, 2013).

Kid a kired el mechesang el diak el uai ngii er a ngara mong el omekesiu er a klemariar reng er kid er a remereder me a telbiilir a remisionari. Tia el ureor a diak el omakes el bedul ruchei el oltirakl a soal a Rubak a lak de ngar ngii! Ua President Henry  B. Eyring el dilul kmo, “Ng diak el rekid, se el sebeched, Okedong e ra Ikelesia, me a lechub e se el de ngar ngii, kede tmak el mo kedong el olengeseu er Ngii el meruu er a rengelkel” (“We Are One,” Ensign or Liahona, May 2013, 62).

Mei me kuchais a ta er a uldasu er a klekool el bla kumelchesiu el mo meruul er a uriul er a kumdasu a ikel blak ruul, meluluuch, me a menguui er a teruich me a edei bleongel er a Preach My Gospel , e bo molebedebek aike el ngii a meketeketang el lomeruul? Ak mengemedaol er kau molatk aikal kldei el uldasu se el momdasu el kirel a moktek er kau.

A kot, moluluuch el kirel a chad el bo mnguu el mo kmeed er a Osobel me a ebangkelio er Ngii er a bek el sils. Ng sebechem el rulii tiang a omomes er a rebek el chad el kmo te ngelekel a Dios el de kai ngeseu er omerolir el lmuut el mo er ngii. Molatk el kirel a mo beches el mo sechelim.

Ongerung, moluluuch el melekoi a knglir a remissionaris me a tirke el lolsisechakl er tir er a bek el sils. A di ta el rolel e kede mo medengelterir, a mengedecheduch er tir, momes a llechukl el ngklir e mo mekedong a ngklir, e mo ker er tir el kmo te er ua techang a lolsisechakl er tir. A Elder Russell  M. Nelson a dirk ulechotii, “Di le merko e bomodengelii a ngklel a chad me a medal, e a Rubak a diak el sebechel ngosukau el mo medengelii a rengul.”

Ak mlo er a techolbechelid er a kmal klebokel el dil el uluchais er a klaumerang er ngii. Ng diak kubes aikel dilung, “Ng dirkak a betok el chad el meluluuch el kirek er a kulasem el losiik a nger el mo er a kerik. Ng kmal dirkak a rebetok el chad e mla meluluuch e obeltik el reng!. Ak medengei el kmo tia el lureor a klemerang!”

A ongedei, mo ngelechel er a sechelim el mei bom kasues er a blim me a lechub ngikrel a blim. Ngidil ker el bo er ngii me a omoruul moruul, mo lbedebek er techa a ungil mekasues e mo renges er a Edaol Reng e lomakrael er kau.

A Osobel a ulsisecheklak er a beot el osisechakl er a chelsel a omesubek, ak kumerang, el klebokel el sobecheklii a “reched.” Se el bo lsiich a renguk el kirek a tekoi, ng chemolt er a omelechesek e blechoel mesisiich el lochotii a “meral ngara renguk [el] klou a ututelel” (Merriam-Webster’s Collegiate Dictionary, 11th ed. [2003], “exclamation point”).

Ng mlo mechas a renguk er a edaol llechukl el mesaod el kirel a “omengideb,” el mlo merek el melisiich er a bades, el makmedum, el ua nglunguchel a Alma: “Olekum ak ua anghel, el sebechek el otutii a ngara renguk, el tuobed e mengedecheduch el oba trombetang er a Dios, loba di delcherul a ngerek el rourour a beluulechad, e lemangel el mo er rebek el chad el mo ouuchel a rengrir er a kengterir!” (Alma 29:1).

A omesuub a chemolt el ouchais el kmo okolem me a eim el bades a cholecholt er a mesisiich lomelchesiu a remisionari, me a aikal bades el beldukel er riou :

“Ng mui el deu el reng er a chad el mo ouuchel a kengtil !  …

“A le kirem el oureor er a bek el sils er klengar er kau el lemangel e mo er rechad el mo ouuchel a rengrir er a kengterir, e nguu, osebelii a chimo el me er ngak, eng kmal mo mui a deu el reng er kau el obengkel a Demak!

Me chelchang, alsekum me ke mui er a deu el reng er a ngelsuir a chad el me soiseb er a a Demak, ng kmal mo ua ngerang a deu el reng a mengotiterir a rebetok el mei er ngak!” (Mesa D&C 18:15–16).

Ng mle chemolt el me er ngak el mo er a aikal bades er a edaol llechukl el ngilsukak er a ngerchelek el Area Seventy. Ak mle telkib el medakt el chelmengel a Apostol, Elder Quentin  L. Cook, el ngara ongdibel er a stake me ak kmiluluuch el mo sebechel chelelakl a renguk. Ak merael el tmuu er a chelsel a obis er a stake president el mo oumiting er se el sandei, e a kmiles a mechut el oiacher el chelilt er a sintsu el ngara tana el ngarulel a tebelel el tmak el lobengkel a smiich el bades. Se er ak chiui, ak mlo melchesuar el kmo Rubak a mle medengelii a omesubek e, mla onger a nglunguchek e Ngii a mle medengei el kmo ngara kulusbech er ngii el mo chelelakl a renguk.

A kulleker er ngka el stake president me louchais a chisel a ikal oeacher.

Ng dilul kmo:

“Aika orcherel a ngeasek el beches el chad er a Ikelesia el chad er a blil a mle metacher beserir, eng di ngii a mla er ngii er a rengul el mo missionary e mlo er a Guatemala. A lemeremang e ak mlo ngobetii el mlo diak el diak el missionary e ak miles a orcherel el kmal mechetong, diak el klalo. Ngikal ngeasek a milsa a rokui klisiichel el mo er a Rubak el diak a ngera, er ngii me a, dirrek el chad er blil.

“Ng milsekak el ulemes aika el orcherel e uleker er ngak, ‘President ngar ngii a telmall?’

“A kulnger, Ng diak, e Elder, a rokui a kmal di ungil! Ng sebechek el mai a ilechang el oeacher?

Ng kal stake president a milemolem: “A beltkil a renguk a mui el mor ngika el merko el misionari! Ng mle soak el kulii tia el cheldechedechak, me ak mle sintsu aikal oeacher. Ngomeklatk er ngak se el ksiseb er a obis er a blakelreng el kirel lobang el diak el iior er a ikel dengarngii. A bades el mla er a Isaiah: ‘Ng ua ngeral ungil a bo desa tal oderuchel el ngar a ikel rois el mei, el olab a ungil chais el chisel a budech! Ng ouchais er a klisiich e dmu er a Sion el kmo, A Dios er kau a king!’(Isaia 52:7).”

Kemiu el tokubets el odam ma odos, a bechil a bisop a locha melechesuar el kmo ngera ng me a profet a ulumekedong el mo er ngii. Ak kuchais el kmo ngii me a kid a mla mo diak do siik!

Ak medengei el kmo derta er kid a kired el mengetmokl e oltaut er a moktek el mo mesiou el oba klemariar reng e mesiou el tmak lobengterir a remisionaris!

Ak dochelii a klaumerang er ngak lobengkel a Profet Joseph Smith: “E chelechang, e a uriul er aika el mla medung el olchotel a klaumerang el mla medung el kirel, tia a ulebongel, el kemam a chochotii el kirel: Ng ngar!”(mesa D&C 76:22) Oba edaol ngklel a Jesus Kristo, amen.