Olsem Wan Man we Oli Sakem Finis

Aposol Pita i bin raetem se ol disaepol blong Jisas Kraes oli mas “gat sore long yufala.”¹ Wetem tingting ia, mi wantem tokbaot olgeta we oli safa long wan sik blong tingting o gat filing problem, nomata ol hadtaem ia oli strong o no strong, i blong smol taem o i stap blong wan laeftaem. Mifala i filim se ol poen ia oli no isi taem yumi harem ol dokta oli tokbaot fasin blong tingting i fasfas mo nomo save tingting stret, sik blong famle, abaot strong fasin blong wantem samting, tingting i no wok gud, lusum hed, mo sik we man i nomo save samting. Nating we evri sik ia, oli no save eksplenem, oli sam long ol ril samting blong laef long wol, mo man i no mas sem blong talem se hem i gat sik ia, mo i semmak olsem blong talem se yu faet wetem hae blad presa, o yu kasem sik kansa.

Taem wan i traehad blong kasem pis mo andastaning long ol had poen ia, hem i impoten tumas blong tingbaot se yumi stap laef—mo yumi jusum blong laef—long wan wol we i no stret, wan ples we bae ol hadwok blong stanap from ol tabu samting mo kam olsem wan god, bae oli testem, mo bae oli traem yumi bakegen mo bakegen. Bigfala tras long wan plan blong God, i we i gat promes blong wan Sevya, wan Ridima, we tru long bilif long Hem, bae i mekem yumi kam antap mo winim ol tes mo hadtaem ia, nomata praes blong hem bae i bigwan tumas long tugeta, Papa we i sendem Pikinini, mo Pikinini ia we i bin kam. Hem i nomo taem yumi glad from bigfala lav ia we bae i mekem se smol safaring blong yumi bae i isi blong tekem, afta yumi andastanem, mo i pemaot yumi.

Bae mi livim ol bigfala sik ia we mi bin tokbaot, mo lukluk nomo long BSTS—Bigfala Sik blong Tingting i Slak”—we oli save gud olsem “Tingting i Slak.” Taem mi tokbaot hemia, mi no stap tokbaot wan nogud dei, taem blong pem takis, o smol taem we tingting i slak we yumi evriwan i gat. Evriwan bae i wari, o hat i daon wanwan taem. Buk blong Momon i talem se Amon mo ol brata blong hem oli bin gat sik blong tingting i slak long wan hadtaem,² mo i save posibol long yumi tu. Be tedei, mi stap tokbaot wan samting we i moa series, wan hol insaed long tingting, we i dip tumas we i no gat wan i save talem se bae i lus sapos ol sikman ia oli jes stanap stret, mo tingting stret——!nomata we mi mi wan we mi faet blong man i stanap stret mo tingting stret!

No, naet blong tudak we i stap long maen mo spirit, i moa bitim fasin blong slakem tingting. Mi bin luk i kasem wan enjel man taem gudfala waef blong hem we i gat 50 yia i ded. Mi bin luk long ol niu mama wetem wanem we oli singaotem “afta bebi-blu sik.” Mi bin luk i kasem ol studen we oli wari tumas, ol olfala soldia, mo ol bubuwoman we oli wari long gudlaef blong ol bigfala pikinini blong olgeta.

Mi bin luk long ol yang papa we oli traehad blong putum kakae long tebol. Long saed ia, wan taem, miwan mi gotru long hemia. Long wan poen long mared laef blong mitufala, taem mane i sot, mo bodi i taed, mi no bin luk i kam, be laef i faetem gud mi mo i bin ril. Wetem gladhat blong God mo lav blong famle blong mi, mi gohed blong tingting gud mo gohed blong wok, be, iven afta long ol yia ia, mi stap gohed blong filim bigfala sore long ol narawan we oli kasem sik ia wanwan taem, o sik ia i kam bigwan long olgeta i bitim mi. Long eni kes, yumi evriwan i kasem paoa long olgeta we, long toktok blong Profet Josef, “oli lukaotem mo lukluk long hol ia we i tudak,”³ mo oli bin gogohed tru long taem ia— mo sam long ol bigfala man ia oli Ebraham Linkon, Winston Jejil, mo Elda Joj Albet Smit, mo man ia i bin wan man we i kaen gud mo i olsem Kraes long dispensesen blong yumi, we i bin faet wetem sik blong tingting i slak blong plante yia, mo afta, i kam namba-eit profet blong wol mo Presiden blong Jos blong Jisas Kraes blong Ol Lata-dei Sent.

?So, Yu yu mekem wanem taem ol jalenj long saed blong tingting mo filing oli fesem yu, o kasem olgeta we yu lavem? Antap long evri samting, neva lusum fet long Papa we i stap long Heven, we i lavem yu moa bitim we yu save andastanem. Olsem we Presiden Monson i talem long ol Rilif Sosaeti sista long las Satedei aftenun: “Lav ia i neva jenis … I stap ia blong yu kasem taem yu no filim gud, o yu hapi, taem tingting i slak o i gat hop. Lav blong God i stap ia blong yu, nating yu naf o no naf blong kasem. I stap ia nomo oltaem.”⁴ Neva gat tu tingting long hemia, mo neva mekem hat blong yu i kam strong. Askem advaes long olgeta we oli holem ol ki blong gud laef blong yu long saed blong spirit. Askem mo holemtaet ol prishud blesing. Tekem sakramen evri wik, mo hang strong long ol promes blong Atonmen blong Jisas Kraes. Bilif long merikel. Mi bin luk plante merikel i kam taem evri samting i talem se i nomo gat hop. Hop i neva lus. Sapos ol merikel ia oli no kam kwiktaem, o fulwan, o i luk se oli no kam nating, tingbaot eksampol blong bigfala wari blong Sevya: sapos konkon kap i strong tumas, yu dring mo stap strong, mo trastem se ol hapi dei oli stap kam yet.⁵

Blong stopem ol sik ia, taem i posibol, lukaot long ol mak blong presa long yuwan, mo long ol narawan we yu save helpem. Semmak olsem trak blong yu, lukaot long tempereja we i go antap, spid tumas, o tank we bensin i finis. Taem yu fesem “tingting we i fasfas from yu taed tumas”, stretem yuwan. Fasin blong taed i enemi blong yumi evriwan—slodaon, spel, kasembak paoa, mo fulumap gud yu. Ol dokta oli promes se, sapos yu no tekem taem blong yu kam gud, nao bae yu mas tekem taem afta, blong yu sik.

Sapos ol samting oli gohed blong go nogud i mekem yu stop wok, lukaotem advaes blong sam gudfala man we oli kasem profesenol trening, ol profesenol skil, mo ol gud valiu. Stap ones wetem olgeta abaot histri mo ol traehad blong yu. Prea mo wetem responsabiliti, tingting long kaonsel we oli givim, mo ol ansa we oli talem. Sapos yu gat apendiks, God bae i wantem yu kasem wan prishud blesing, mo kasem gudfala help long hospital. Semmak wetem ol sik blong filing. Papa blong yumi long Heven i wantem yumi yusum evri gudfala presen we Hem i givim long gudfala dispensesen ia.

Sapos yu nao yu stap long trabol, o yu yu stap kea long wan olsem, traem blong no sapraes wetem saes blong wok blong yu. No ting se yu save stretem evri samting, be stretem wanem yu save mekem. Sapos oli ol smol win nomo, talem tangkyu from, mo gat longfala tingting. Plante taem, long skripja, Lod i givim oda long wan blong “stap kwaet,” o blong “no muv” mo wet.⁶ Blong stap strong long sam samting wetem longfala tingting, i pat blong edukesen blong yumi long wol.

Long olgeta we oli lukaotem man olsem, long hadwok blong yu blong helpem helt blong wan narawan, yu lukaot blong no spolem helt blong yu. Long evri samting, yu mas waes. No ron kwik moa bitim we yu gat paoa.⁷ Wanem samting moa we yumi save, o no save givim, yumi save mekem prea mo givim tru lav.⁸ “Man we i stap lavem man, tingting blong hem i longfala, … i gat sore,  … i no save mekem tingting i go antap, …i no save letem wan samting i daonem tingting blong hem, …oltaem i stap bilif strong long God, i stap putum tingting i [strong long God, tingting blong hem i no save foldaon. Bigfala lav i neva sot].”⁹

Mo tu, bae yumi mas tingbaot se tru eni sik, o had jalenj, i gat fulap samting long laef i stap blong hop from mo talem tangkyu from. !Yumi gud moa bitim wanem yumi no save mekem mo ol hadtaem blong yumi! Stefani Klak Nilsen mo famle blong hem i fren blong mifala blong ova long 30 yia. Long 16 Ogis 2008, Stefani mo hasban blong hem, Kristion, oli stap long wan plen we i aksiden mo i bon afta. Faea i bonem nogud we oli luksave tonel blong hem nomo we oli pentem taem ol memba blong famle oli kam luksave bodi we i stap. I luk se i no gat janis blong Stefani i save laef. Afta tri manis long bigfala koma, hem i wekap mo luk hemwan. Wetem hemia, bigfala fraet blong mak blong bodi blong hem, mo bigfala slak tingting i kasem hem. Hem i filim se i no nid blong laef. Stefani i bin talem wan taem long mi se: “Mi ting se bae i moa isi long mi, sapos oli jes fogetem mi nomo, mo kwaet nomo mi aot long laef blong olgeta.”

Be blong gud blong hem, mo wetem ol prea blong hasban, famle, fren, fo naesfala pikinini blong hem, mo nambafaef pikinini blong ol Nilsen we i bon 18 manis i pas, Stefani i faet blong i kamaot long hol blong tudak, mo kam wan long ol popula “mama blong raetem blog” long kantri, mo i talem open long fo milian pipol we oli ridim blog blong hem se “tabu stamba tingting” blong hem long laef, i blong i wan mama, mo blong hem i glad gud long evri dei we hem i kasem long naes wol ia.

Nomata wanem faet blong yufala, ol brata mo sista blong mi—long tingting, long filing o long bodi o wan narawan—!yufala i no vot agensem laef mo traem katemaot laef ia! Trastem God. Hang strong long lav blong Hem. Yu mas save se, wan dei, laet bae i brok delaet mo evri tudak blong wol bae oli ronwe. Nomata yumi filim se “i gud blong oli sakemaot yumi, olsem man blong Sam i raetem,¹⁰ yumi mas tingbaot, se bodi blong yumi i stap long han blong tabu dokta. Ol tingting we i no wok gud oli save hil, semmak olsem ol bun mo hat we i brok oli save hil. Taem God i stap wok blong riperem ol samting ia, yumi we i stap i save help taem yumi gat sore, yumi no jajem man, mo stap kaen.

!Mi testifae abaot tabu fasin blong Laef Bakegen long Ded, konaston presen ia long Atonmen blong Lod, Jisas Kraes! Wetem Aposol Pol, mi testifae se wanem oli planem we i no gud, bae wan dei, i girap we i gud evriwan, mo wanem we oli planem wetem ol samting we i no strong, bae long en, i girap wetem paoa.¹¹ Mi talem witnes blong mi abaot dei ia, taem olgeta we yumi lavem we yumi save se oli gat disabiliti long wol ia, bae oli stanap long fored blong yumi, oli strong mo gat glori, oli stret gud long bodi mo tingting. !Bae i wan gudfala taem blong yumi! Mi no save sapos bae yumi hapi moa from se bae yumi witnesem wan merikel, o sapos bae yumi hapi moa from oli stret gud evriwan mo oli fri.¹² Kasem taem ia we bigfala presen blong Kraes i kamaot klia long yumi evriwan, bae yumi laef wetem fet, hang strong long hop, mo stap soem sore long wanwan long yumi¹³ folem rod ia. Mi prea olsem, long nem blong Jisas Kraes, amen.