ដូចជាសរសៃឈាមដែលបែកធ្លាយ
ដោយ អែលឌើរ ជែហ្វ្រី អ័រ ហូឡិន
ក្នុងកូរ៉ុមនៃពួកសាវកដប់ពីរនាក់
តើអ្នកឆ្លើយតបបានល្អយ៉ាងដូចម្ដេចទៅ ពេលបញ្ហាផ្លូវ ឬអារម្មណ៍កើតមានចំពោះអ្នក និងមនុស្សដែលអ្នកស្រឡាញ់?
សាវកពេត្រុសបានសរសេរថា សិស្សនៃព្រះគ្រីស្ទត្រូវ « មានចិត្តអាណិតអាសូរ » ។1 ក្នុងស្មារតីនេះ ខ្ញុំចង់និយាយទៅកាន់អ្នកដែលរងទុក្ខដោយជំងឺផ្លូវចិត្ត ឬបញ្ហាអារម្មណ៍ក្នុងរូបភាពមួយចំនួន មិនថាការរងទុក្ខនោះតូច ឬធំ មានពេលវែង ឬខ្លីនោះទេ ។ យើងយល់ពីភាពស្មុគស្មាញនៃបញ្ហានេះ ពេលយើងឮពួកអ្នកជំនាញនិយាយពីជំងឺសរសៃប្រសាទ រោគចិត្ត ពីការជម្រុញចិត្ត និងការបង្ខំចិត្តពីហ្សែន និងរោគឆ្កួត ។ តែមិនថាគេមានការភ័ន្តច្រឡំយ៉ាងណាទេ ការរងទុក្ខនេះជាធាតុពិតមួយចំនួនក្នុងជីវិត ហើយមិនគួរខ្មាស់អៀនក្នុងការស្គាល់វា ជាងការស្គាល់រោគលើសឈាម ឬជំងឺមហារីកដ៏អាក្រក់ឡើយ។
ក្នុងការខិតខំរកក្ដីសុខសាន្ដ និងការយល់ខ្លះពីបញ្ហាលំបាកទាំងនេះ វាសំខាន់ត្រូវចាំថា យើងកំពុងរស់នៅ---និងបានជ្រើសរើសរស់នៅ---ក្នុងពិភពលោកវឹកវរមួយ ដែលការខិតខំដ៏ស្មោះត្រង់របស់យើងឆ្ពោះទៅរកភាពដូចជាព្រះ នឹងទទួលការសាកល្បង និងត្រូវព្យាយាមដដែលៗ ។ ក្នុងការអះអាងដ៏អស្ចារ្យបំផុតក្នុងផែនការព្រះ ព្រះអង្គសង្គ្រោះត្រូវបានសន្យា ជាព្រះមួយអង្គដែលជួយយើងឲ្យឈ្នះពីការសាកល្បងទាំងនោះ តាមរយៈជំនឿយើងទៅលើទ្រង់ ទោះព្រះបិតាជាអង្គដែលបញ្ជូនទ្រង់មក និងព្រះរាជបុត្រា ជាអង្គដែលយាងមក ត្រូវបង់ថ្លៃដ៏ធំដើម្បីធ្វើកិច្ចការនោះក្ដី ។ វាជាការដឹងគុណតែមួយគត់ចំពោះក្ដីស្រឡាញ់ដ៏ទេវភាពនេះ ដែលនឹងធ្វើឲ្យការរងទុក្ខតិចតួចរបស់យើង ដំបូង អាចទ្រាំទ្របាន រួចហើយអាចយល់ និងចុងក្រោយ អាចសង្គ្រោះបាន ។
ខ្ញុំសូមបញ្ចប់ការនិយាយពីជំងឺដែលបានលើកឡើង ដើម្បីគិតពី «រោគបាក់ទឹកចិត្តដ៏ធំ»---ឬជាទូទៅហៅថា «ការបាក់ទឹកចិត្ត» វិញ ។ ពេលខ្ញុំនិយាយពីការណ៍នេះ ខ្ញុំមិននិយាយពីថ្ងៃសោកសៅ ថ្ងៃផុតកំណត់បង់ពន្ធ ឬគ្រាបាក់ទឹកចិត្តផ្សេងទៀត ដែលយើងទាំងអស់គ្នាជួបឡើយ ។ មនុស្សគ្រប់គ្នានឹងមានការព្រួយ ឬសោកសៅម្ដងម្កាល ។ ព្រះគម្ពីរមរមនចែងថា អាំម៉ូន និងបងប្អូនប្រុសគាត់មានការពិបាកចិត្តជាខ្លាំង 2 ហើយយើងគ្រប់គ្នាក៏នឹងជួបដូចគ្នាដែរ។ តែថ្ងៃនេះខ្ញុំនឹងនិយាយពីអ្វីមួយដែលធ្ងន់ធ្ងរជាងនេះ គឺជាការរងទុក្ខធ្ងន់ធ្ងរ ដែលវារារាំងយ៉ាងខ្លាំង មិនឲ្យមនុស្សម្នាក់មានសមត្ថភាពពេញលេញ ជារណ្ដៅភ្លើងក្នុងចិត្តយ៉ាងជ្រៅដែលគ្មាននរណាម្នាក់ អាចបណ្ដេញវាចេញបានឡើយ ទាល់តែជនរងគ្រោះទាំងនោះ ឈរយ៉ាងរឹងមាំ ហើយគិតវិជ្ជមានបន្ថែមទៀត---ខ្ញុំលើកទឹកចិត្តឲ្យឈរយ៉ាងរឹងមាំ ហើយគិតវិជ្ជមាន !
ទេ យប់ដ៏ខ្មៅងងឹតនេះក្នុងគំនិត និងអារម្មណ៍ គឺលើសពីការបាក់ទឹកចិត្តទៅទៀត ។ ខ្ញុំធ្លាប់ឃើញវាកើតមានចំពោះបុរសដ៏ល្អម្នាក់ ពេលភរិយាជាទីស្រឡាញ់របស់គាត់បានចែកឋានទៅក្នុងវ័យ 50 ឆ្នាំ ។ ខ្ញុំធ្លាប់ឃើញវាកើតមានចំពោះម្ដាយជាមួយនឹងអ្វីដែលហៅថា ភាពសោកសៅក្រោយពេលសម្រាលកូន ។ ខ្ញុំធ្លាប់ឃើញវាកើតមានចំពោះនិស្សិត កងទ័ព ជីដូនដែលព្រួយពីសុខទុក្ខនៃកូនចៅខ្លួន ។
ហើយខ្ញុំធ្លាប់ឃើញវាក្នុងខ្លួនឪពុកវ័យក្មេងម្នាក់ដែលកំពុងខំផ្គត់ផ្គង់ដល់គ្រួសារខ្លួន។ ដោយគិតពីរឿងនេះ មានគ្រាមួយ ខ្ញុំបានឃើញវាក្នុងខ្លួនខ្ញុំ ។ ពេលមួយក្នុងជីវិតរៀបការរបស់យើង ការភ័យខ្លាចខាងហិរញ្ញវត្ថុបានកើតមានក្នុងពេលតែមួយនឹងការនឿយណាយ បញ្ហាផ្លូវចិត្តមួយបានកើតឡើងចំពោះខ្ញុំ ដែលពុំបានរំពឹងទុកសោះ ។ ដោយក្ដីមេត្តានៃព្រះ និងក្ដីស្រឡាញ់ពីគ្រួសារខ្ញុំ ខ្ញុំបានបន្តធ្វើការ តែក្រោយមកក្នុងប៉ុន្មានឆ្នាំនោះ ខ្ញុំតែងមានចិត្តអាសូរជាខ្លាំងដល់អ្នកដទៃ ឬអ្នកដែលបានរងទុក្ខយ៉ាងខ្លាំងដោយបញ្ហានេះជាងខ្ញុំ ។ ពិតណាស់ ក្នុងប្រសាសន៍ព្យាការី យ៉ូសែប នោះយើងមានភាពក្លាហានដោយសារអ្នកដែល « បានស្វែងរក... ហើយគិតពីជ្រោះដ៏ងងឹតនោះ » 3 ហើយបានហែលឆ្លងផុតវា មនុស្សដ៏ឆ្នើមមួយចំនួននោះ មានដូចជា អ័ប្រាហាំ លីងគិន, វីនស្ទិន ឈើឈីល និង អែលឌើរ ចច អ័លប៊ើត ស៊្មីធ ជាបុរសរាបសារម្នាក់ ហើយមានចិត្តសប្បុរសដូចជាព្រះគ្រីស្ទបំផុតក្នុងគ្រាកាន់កាប់យើងនេះ ដែលបានច្បាំងឈ្នះលើការបាក់ទឹកចិត្តអស់ជាច្រើនឆ្នាំ ហើយក្រោយមកបានក្លាយជាព្យាការី និងប្រធានទីប្រាំបីជាស្រឡាញ់ទូទាំងសកលលោកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ដូច្នេះតើអ្នកឆ្លើយតបបានល្អប៉ុណ្ណា ពេលបញ្ហាផ្លូវចិត្តកើតមានចំពោះអ្នក ឬមនុស្សដែលអ្នកស្រឡាញ់នោះ ? លើសពីនេះទៀត សូមកុំបាត់បង់ជំនឿអ្នកលើព្រះវរបិតាអ្នក ដែលទ្រង់ស្រឡាញ់អ្នកលើសពីអ្នកអាចយល់បានទៅទៀតនោះឡើយ ។ ដូចប្រធាន ម៉នសុន បានថ្លែងទៅបងប្អូនស្រីក្នុងសមាគមសង្គ្រោះកាលពីល្ងាចថ្ងៃសៅរ៍មុនថា៖ «ក្ដីស្រឡាញ់នោះមិនផ្លាស់ប្ដូរទេ...។ វានៅទីនោះសម្រាប់អ្នក ពេលអ្នកសោកសៅ ឬរីករាយ បាក់ទឹកចិត្ត ឬមានសង្ឃឹម។ ក្ដីស្រឡាញ់នៃព្រះ គឺនៅទីនោះសម្រាប់អ្នក មិនថាអ្នកមានអារម្មណ៍ថា គួរទទួលបាន [វា] ដែរឬអត់នោះទេ។ វាមានជានិច្ច »។4 សូមកុំសង្ស័យ ហើយធ្វើចិត្តអ្នករឹងរូសឡើយ។ សូមស្វែងរកការអនុវត្តដែលនាំព្រះវិញ្ញាណចូលមកក្នុងជិវិតអ្នក។ ចូរស្វែងរកការប្រឹក្សាពីអ្នកដែលកាន់កូនសោសម្រាប់សុខុមាលភាពខាងវិញ្ញាណអ្នក ។ ចូរសូម ហើយឲ្យតម្លៃពរជ័យនៃបព្វជិតភាព ។ ចូរទទួលទានសាក្រាម៉ង់រាល់សប្ដាហ៍ ហើយកាន់ខ្ជាប់ទៅនឹងការសន្យាដ៏ឥតខ្ចោះនៃដង្វាយធួនរបស់ព្រះគ្រីស្ទ ។ ចូរជឿលើអព្ភូតហេតុ ។ ខ្ញុំធ្លាប់ឃើញរឿងនេះជាច្រើនកើតមាន ពេលការចង្អុលបង្ហាញផ្សេងទៀតបាននិយាយថា ការសង្ឃឹមបានបាត់បង់ហើយ។ ការសង្ឃឹមមិនដែលបាត់បង់ឡើយ។ បើអព្ភូតហេតុទាំងនោះ មិនបានកើតមានភ្លាមៗទេនោះ សូមចាំពីគំរូនៃការរងទុក្ខរបស់ព្រះគ្រីស្ទថា ៖ ទោះពែងល្វីងមិនអាចរំលងបានក្ដី 4 សូមផឹកវា ហើយរឹងមាំ ដោយទុកចិត្តនូវថ្ងៃដ៏រីករាយមាននាពេលអនាគត។5
ក្នុងការការពារជំងឺគ្រប់យ៉ាង ពេលណាអាចធ្វើបាន សូមមើលពីសញ្ញានៃភាពតានតឹងក្នុងខ្លួន និងអ្នកដទៃដែលអ្នកអាចជួយ។ ដូចជាក្នុងឡានអ្នកដែរ ចូរប្រុងប្រយ័ត្នចំពោះការឡើងកម្ដៅខ្លាំង ការមានល្បឿនលឿន ឬធុងប្រេងដែលចុះកម្រិតសាំង ។ ពេលអ្នកជួបការសោកសៅ ដោយសារការនឿយហត់ សូមធ្វើការកែតម្រូវ។ ភាពនឿយហត់ជាសត្រូវទូទៅរបស់យើងគ្រប់គ្នា--- សូមបន្ថយល្បឿន សម្រាក បង្កើនកម្លាំង ហើយបំពេញវា ។ គ្រូពេទ្យសន្យាយើងថា បើយើងមិនទុកពេលសម្រាកទេ នោះយើងនឹងប្រាកដជាមានជំងឺនៅពេលក្រោយ ។
បើរឿងទាំងឡាយបន្តធ្វើឲ្យអ្នកចុះខ្សោយ សូមរកដំបូន្មានពីមនុស្សបំពាក់បំប៉នដែលមានជំនាញ អាជីព ហើយស្មោះត្រង់ ។ ចូរស្មោះត្រង់នឹងពួកគេពីដំណើររឿង និងបញ្ហារបស់អ្នក ។ សូមគិតដោយការអធិស្ឋាន និងដោយត្រឹមត្រូវពីដំបូន្មាន និងដំណោះស្រាយ ដែលគេបានផ្ដល់ឲ្យ ។ បើអ្នកមានជំងឺរលាកខ្នែងពោះវៀន ព្រះរំពឹងឲ្យអ្នកស្វែងរកពរជ័យនៃបព្វជិតភាព ហើយ ទទួលយកការព្យាបាលផ្នែកវេជ្ជសាស្ត្រដ៏ល្អបំផុតដែលមាន ។ ដូចគ្នានឹងជំងឺផ្លូវចិត្តដែរ ។ ព្រះវរបិតាយើងរំពឹងឲ្យយើងប្រើ រាល់ អំណោយទានដ៏អស្ចារ្យ ដែលទ្រង់បានប្រទានឲ្យ ក្នុងគ្រាកាន់កាប់ដ៏រុងរឿងនេះ ។
បើអ្នកជាជនរងទុក្ខម្នាក់ ឬជាអ្នកមើលថែអ្នកជំងឺបែបនេះ សូមកុំព្យាយាមគិតខ្លាំងពេកពីទំហំនៃការងារអ្នក ។ សូមកុំគិតថា អ្នកអាចជួសជុលអ្វីគ្រប់យ៉ាងបានឡើយ តែសូមជួសជុលអ្វីដែលអ្នកអាចធ្វើបានទៅបានហើយ ។ បើនោះជាជ័យជំនះដ៏តូចមួយ សូមមានអំណរគុណចំពោះវា ហើយចូរអត់ធ្មត់ ។ ជាច្រើនដង ក្នុងព្រះគម្ពីរ ព្រះអម្ចាស់បញ្ជាឲ្យមនុស្សម្នាក់ឲ្យ « នៅស្ងៀម » ឬ « បង្អន់សិន »---ហើយរង់ចាំ ។6 ការស៊ូទ្រាំនឹងកិច្ចការមួយចំនួនដោយអត់ធ្មត់ គឺជាផ្នែកនៃការអប់រំយើងក្នុងជីវិតរមែងស្លាប់ ។
ចំពោះអ្នកមើលថែ ក្នុងការខិតខំរបស់អ្នកជួយដល់សុខភាពរបស់មនុស្សម្នាក់ទៀត សូមកុំភ្លេចថែទាំសុខភាពអ្នកផងដែរ ។ ក្នុងកិច្ចការទាំងអស់នេះ ចូរវ័យឆ្លាត ។ សូមកុំរត់លឿនជាងកម្លាំងដែលអ្នកមាន ។7 អ្វីក៏ដោយដែលអ្នកអាច ឬមិនអាចផ្ដល់ឲ្យបាន អ្នកអាចផ្ដល់ការអធិស្ឋាន ហើយអ្នកផ្ដល់ « ការស្រឡាញ់ស្មោះត្រង់ » ។8 « សេចក្ដីស្រឡាញ់តែងតែអត់ធ្មត់ ហើយក៏សប្បុរស... មិនរហ័សខឹង...តែ...ក៏គ្របបាំងទាំងអស់... សង្ឃឹមទាំងអស់ ទ្រាំទ្រទាំងអស់ ។ សេចក្ដីស្រឡាញ់មិនដែលផុតរលត់ឡើយ »។9
ចូរយើងចងចាំផងដែរថា តាមរយៈជំងឺ ឬបញ្ហាលំបាកគ្រប់យ៉ាង នៅមានរឿងជាច្រើនក្នុងជីវិតដែលត្រូវសង្ឃឹម ហើយមានអំណរគុណ ។ យើងពិតជាមានលើសពីការកម្រិត ឬការរងទុក្ខយើង! ស្តេហ្វានី ក្លាក នៀលសិន និងគ្រួសារគាត់ ជាមិត្តនឹងយើងជាង 30 ឆ្នាំហើយ។ នៅថ្ងៃ 16 ខែសីហា ឆ្នាំ 2008 ស្តេហ្វានី និងស្វាមីគាត់ គ្រីស្ទាន បានស្ថិតក្នុងការធ្លាក់យន្តហោះមួយ ហើយពេលសមាជិកគ្រួសារមករកមើលជនរងគ្រោះ គាត់ត្រូវបានគេស្គាល់ដោយសារតែថ្នាំលាបក្រចកជើងគាត់ ពីព្រោះខ្លួនប្រាណគាត់ត្រូវបានភ្លើងឆេះ។ ស្តេហ្វានី ស្ទើរតែមិនរួចជីវិត។ ក្រោយពីសម្រាកដាក់អ៊ុកស៊ីសែនអស់ពេលបីខែមក គាត់បានដឹងខ្លួន។ ដោយមានស្នាមលើរូបកាយ នោះភាពតានតឹងដ៏ខ្លាំងបានកើតមាន។ ដោយមានកូនបួននាក់ក្រោមអាយុប្រាំពីរឆ្នាំ ស្តេហ្វានី មិនចង់ឲ្យពួកគេឃើញគាត់ទៀតឡើយ។ គាត់មានអារម្មណ៍ចង់ស្លាប់។ មានគ្រាមួយ ស្តេហ្វានី បានប្រាប់ខ្ញុំនៅក្នុងការិយាល័យខ្ញុំ ថា «ខ្ញុំបានគិតថាវាស្រួលជាង បើគេភ្លេចរូបខ្ញុំ ហើយខ្ញុំចាកចេញពីជីវិតគេដោយស្ងៀមស្ងាត់នោះ»។
តែ ចំពោះស្នាដៃដ៏អស់កល្បរបស់គាត់ ព្រមនឹងការអធិស្ឋានរបស់ស្វាមីគាត់ ក្រុមគ្រួសារ មិត្តភក្តិ កូនៗជាទីស្រឡាញ់ទាំងបួន ហើយកូនទីប្រាំដែលទើបបានកើត 18 ខែ ថ្មីៗ ស្តេហ្វានី បានយកឈ្នះលើវិនាសកម្មដ៏ធំ ដើម្បីក្លាយជា « ប្លកពីម្តាយ » ដ៏មានប្រជាប្រិយភាពបំផុតនៅក្នុងប្រទេស ដែលប្រកាសដោយបើកចំហរដល់មនុស្សបួនលាននាក់ ដែលតាមដាននៅលើ ប្លករបស់គាត់ថា « គោលបំណងដ៏ទេវភាព » នៅក្នុងជីវិត គឺដើម្បីធ្វើជាម្តាយ និងមានក្តីស្រឡាញ់ រាល់ថ្ងៃ ដែលគាត់ទទួលបាននៅលើផែនដីដ៏ស្រស់ស្អាតនេះ ។
បងប្អូនប្រុសស្រី មិនថាភាពស្មុគស្មាញរបស់ជាអ្វីនោះទេ---ទោះជាផ្នែកស្មារតី ឬ អារម្មណ៍ ឬ ខាងរូបកាយ ឬទោះជាអ្វីក្តី--- សូមកុំបោះបង់ចោលអ្វីដែលមានតម្លៃបំផុតក្នុងជីវិត ដោយការបញ្ចប់វាឡើយ ! សូមទុកចិត្តលើព្រះ ។ សូមតោងឲ្យជាប់នឹងសេចក្តីស្រឡាញ់ទ្រង់ ។ សូមគិតថា នៅថ្ងៃណាមួយ ភាពខ្មៅងងឹតនឹងចេញជាពន្លឺ ហើយស្រមោលនៃជីវិតរមែងស្លាប់នឹងបាត់ទៅ ។ ទោះបីជាយើងអាចមានអារម្មណ៍ថា « ដូចជាឆ្នាំងដែលបែកធ្លាយ » ដូចដែលទំនុកដំកើងបាននិយាយក្ដី 10 សូមឲ្យយើងចងចាំថា ឆ្នាំងគឺក្នុងព្រះហស្ថនៃអ្នកស្មូនឆ្នាំងដ៏ទេវភាព ។ ជនដែលមានគំនិតខ្ទិចខ្ទាំអាចត្រូវបានព្យាបាល គឺដូចដែលឆ្អឹងដែលបាក់ និងចិត្តដែលឈឺចាប់ត្រូវបានព្យាបាល ។ ខណៈព្រះកំពុងធ្វើព្រះរាជកិច្ចដល់របស់ដែលខូចទាំងនោះ នោះយើងទាំងអស់គ្នា អាចជួយដោយការមានចិត្តសណ្តោសប្រណី មិនកាត់សេចក្តី ឬចិត្តអាក្រក់ ។
ខ្ញុំថ្លែងទីបន្ទាល់ពីការរស់ឡើងវិញដ៏បរិសុទ្ធ ដែលជាអំណោយទានដ៏ចាំបាច់ ក្នុងដង្វាយធួនរបស់ព្រះគ្រីស្ទ ! ខ្ញុំសូមថ្លែងទីបន្ទាល់ជាមួយសាវក ប៉ុលថា អ្វីដែលផុយរលួយនឹងបានរស់ឡើងក្នុងភាពឥតខ្ចោះនៅថ្ងៃណាមួយ ហើយអ្វីដែលទន់ខ្សោយនឹងបានរស់ឡើងក្នុងអំណាច ។11 ខ្ញុំថ្លែងជាសាក្សីពីថ្ងៃនោះ ជាពេលមនុស្សដែលយើងស្រឡាញ់ ដែលមានភាពពិការក្នុងជីវិតរមែងស្លាប់នេះ នឹងឈរនៅចំពោះមុខយើងក្នុងភាពរុងរឿង ហើយអស្ចារ្យក្នុងរូបកាយ និងគំនិតដ៏ល្អឥតខ្ចោះ ។ តើវានឹងក្លាយគ្រាដ៏រំភើបយ៉ាងណាទៅ ! ខ្ញុំមិនដឹងថា យើងនឹងរីករាយចំពោះខ្លួនឯងដែលបានឃើញអព្ភូតហេតុមួយបែបនេះ ឬរីករាយចំពោះពួកគេដែលពេញដោយភាពឥតខ្ចោះ ហើយនៅទីបំផុត « មានសេរីភាព » យ៉ាងណានោះទេ ។ 12 រហូតដល់គ្រាដែលអំណោយទានដ៏ពេញលេញរបស់ព្រះគ្រីស្ទបានបង្ហាញឲ្យយើងឃើញ សូមឲ្យយើងរស់ដោយសេចក្តីជំនឿ តោងឲ្យជាប់នឹងក្តីសង្ឃឹម និងបង្ហាញ « ចិត្តអាណិតអាសូរ »13 ខ្ញុំសូមអធិស្ឋានក្នុងព្រះនាមនៃព្រះយេស៊ូវគ្រីស្ទ អាម៉ែន ។