2010–2019
Tepa i Luga
Oketopa 2013


Tepa i Luga

O le aso o le taimi lea e tagai ai i le Punavai o le upumoni ma faamautinoa ua malolosi a tatou molimau.

Ina ua valu ou tausaga, sa auina atu au ma ou tausoga e toalua i se aai e lata ane e aumai ni meaai mo le isi 15 aso. A toe tepa i tua, ou te maofa i le tele o le talitonuina o i matou e tina matua ma le uso ma le tuagane o tina. Sa lagi lelei ma susulu manaia le taeao a o matou o ese atu i la matou vaega toalaiti o solofanua e tolu.

I le ogatotonu o le laufanua lafulemu, sa tonu i o matou manatu e tatau ona matou feosofi i lalo mai solofanua ma taaalo pelē mapu. O lea sa matou faia—mo se taimi umi. Sa matou pulunaunau i la matou taaloga na matou le iloa ai “faailoga o taimi” i luga ae o matou ulu a o ufitia e ao pogisa le lagi. E oo ifo i le taimi na matou iloa ai le mea ua tupu, sa leai se taimi e toe uta ai a matou solofanua. Sa matua taia i matou i timuga mamafa ma taia o matou foliga e matagi tofaata’uta’u, lea sa le mafai ai ona matou mafaufau i se mea e fai ae aveese nofoa solofanua ma pulolou ai i ie lalaga laiti o nofoa solofanua.

Sa aunoa ma solofanua, i le susu, ma le malulu, sa faaauau ai la matou faigamalaga, i le taumafai e faanatinati i le vave e mafai ai. A o matou latalata atu i lo matou taunuuga, sa matou vaaia ai o le auala tele e ulufale atu ai i le aai sa lolovaia ma sa pei o se vaitafe o loo tafe agai mai ia i matou. I lea taimi sa pau le matou filifiliga o le tiai o ie lalaga na matou pulolou ai ae fe’a’ei i le pa uaea sa siomia ai le aai. Sa leva le po a o, vaivai ma tiga ma susupala, sa matou saili ai se malutaga i le fale muamua sa matou vaaia a o matou ulufale atu i le aai. O le aiga talavou lelei iina sa aumaia ni ofu mago, fafagaina i matou i se meaai manaia (burritos), ma faamomoe matou i sa matou lava potu. E lei pine ae matou iloaina o le fola o le potu e gatasi lelei ma palapalā, o lea sa matou maua ai se isi manatu lelei tele. Sa matou tusiaina se lio i le fola ma faaauau la matou taaloga pelē mapu seia oo ina matou pauu i le fola ma momoe ai.

I le avea ai tamaiti sa na o i matou lava na matou mafaufau i ai. Matou te le i mafaufau lava i e pele sa saili ma le atuatuvale mo i matou i lo matou aiga—ana faapea na matou manatu i ai, semanu matou te le faatuai i le matou faigamalaga ona o le taaloga le aoga o le pele mapu. Ma ana faapea matou te popoto, semanu matou te tepa i le lagi, iloa atu faaputuga o ao, ma faateleai lo matou saoasaoa ia muamua atu i le matagi. Lea la ua ou maua sina poto masani, ou te faamanatu pea i taimi uma ia te au lava, “Aua nei galo ona tepa i luga.”

Sa aoaoina au e lou aafiaga ma ou tausoga ia nofouta i faailoga o o tatou taimi. Ua tatou ola i aso matagiā, ma faigata sa faamatalaina e Paulo: “Aua e avea tagata ma e alolofa i latou ia i latou lava, … o e le faalogo i matua, o e le faafetai, o e amioleaga, … o e faatuaupua, o e le taofi manao o le tino, … o e ua tele le manao i mea faafiafia a e leai se manao i le Atua” (2 Timoteo 3:2–4).

I le talanoaina o nei taimi, sa saunoa ai Elder Dallin H. Oaks: “E ao ina tatou taufai faia sauniuniga faaletino ma le faaleagaga. … Ma o le sauniuniga lava e tau le amana’iaina o [le sauniuniga] lea e tau le iloa ma sili atu ona faigata—o le faaleagaga” (“Sauniuniga mo le Afio Mai Faalua,” Liahona, Me 2004, 9). I nisi faaupuga, aua nei galo ona tepa i luga.

I le mauaina o le manaoga vave mo sauniuniga faaleagaga i se taimi o ia faigata, ou te manao e tuuina atu se upu o le lapataiga e uiga i se tasi o faailoga o taimi e malosi tele. Sa ou taimua i mea faatekinolosi ona o lau matata faalegaluega o le olaga, o lea sa ou iloa ai lona taua, aemaise lava i fesootaiga. O le tele o faamatalaga e fatuina e tagata ua faigofie ona maua. Ae ua tumu foi le Initoneti i le tele o mea eleelea ma taufaasese. Ua faaleleia e tekinolosi lo tatou saolotoga o le gagana, ae na te tuuina mai foi ni talitonuga le aloaia i se tagata le agavaa e tusiaina se mea i luga o le Initoneti lea e faitauina e le toatele o tagata. O le mafuaaga lena i le taimi nei, ia sili atu nai lo se isi taimi, e tatau ona tatou manatua lenei mataupu faavae e faavavau: “Tou te iloa ai i latou i o latou fua” (Mataio 7:20).

Aemaise lava, ou te fautuaina outou ia aua nei matamata i ata mataga pe gauai atu i tagata e tuuaia sese ia Keriso ma le Perofeta o Iosefa Samita. O amioga uma ia e lua e fatu ai le aafiaga lava e tasi: o le aveesea o le Agaga Paia ma Lona mana puipuiga ma lagolago. E mulimuli mai i taimi uma le agasala ma le faanoanoa.

Ou uso e ma tuafafine, afai lava e te feagai ma soo se mea e mafua ai ona e fesiligia lau molimau o le talalelei, ou te augani atu ia te outou ia tepa i luga. Tagai i Punavai o le poto uma ma le upumoni. Faafailele lou faatuatua ma le molimau i le afioga a le Atua. O loo i ai i latou i le lalolagi o loo saili e faavaivaia lou faatuatua e ala i le faafefiloiina o pepelo ma mea e le atoatoa le moni. O le mafuaaga lea e matua taua ai le tumau o lou agavaa i taimi uma mo le Agaga. O le mafutaga a le Agaga Paia ua le na o se avanoa faafiafiaina—e taua mo lou ola faaleagaga. Afai e te le faatauaina ia afioga a Keriso ma faafofoga lelei i musumusuga a le Agaga, o le a faaseseina lava oe (tagai Iosefa Samita—Mataio 1:37). E tatau ona tatou faia nei mea.

O Iesu Keriso o le sa atoatoa, ma Iosefa Samita, o le sa tautino mai o ia lava e le atoatoa, sa fasiotia uma e e faatuaupua ia sa le taliaina a la molimau. E faapefea ona tatou iloa e moni a la molimau—o Iesu Keriso o le Alo o le Atua ma o Iosefa Samita o se perofeta moni?

“O lea foi tou te iloa ai i latou i o latou fua.” E mafai ea ona fua mai ni fua lelei mai se laau leaga? Ou te iloa mo au lava ua faamagaloina au agasala e lou Togiola ma faasaoloto au mai lau lava amo patino, ma aumaia au i se tulaga o le fiafia sa ou le’i iloaina o loo i ai. Ma ua ou iloaina mo au lava o Iosefa Samita o se perofeta aua sa ou faatinoina le folafolaga faigofie o loo i le Tusi a Mamona: “Ole atu i le Atua, le Tama Faavavau, i le suafa o Iesu Keriso” (Moronae 10:4). I se faaupuga faigofie: tepa i luga.

Ua i ai nisi atonu e fautuaina oe e tatau ona i ai sau faamaoniga faaletino ina ia mafai ona talitonu ai i le Togiola a Keriso po o le moni a’ia’i o Lana talalelei toefuataiina. Ia i latou ia, ou te sii mai upu a Alema ia Korioa, o le sa taumafai e tauanau isi ia aua nei talitonu: “Ua lava faailoga ua ia te oe; e te faaosooso ea i lou Atua? E te fai mai ea, Faaali mai ia te au se faailoga, ae ua ia te oe molimau a ou uso uma nei, ma perofeta paia uma foi? Ua folasia i ou luma tusitusiga paia” (Alema 30:44).

O oe ma au o ni faailoga ola o le mana togiola a le Faaola. O tatou o faailoga ola o le galuega a le Perofeta o Iosefa Samita ma le faatuatua o na uluai Au Paia o e sa tumau malosi i a latou molimau. Ua salalau atu nei Le Ekalesia a Iesu Keriso i le lalolagi atoa ma ua faatupulaia nai lo se isi lava taimi muamua—ua taliaina, e pei o taimi o Keriso, e tagata lotomaualalo o e e le manaomiaina le vaai pe fetagofi i ai ia talitonu ai.

E leai se tasi e silafia pe o afea e toe afio mai ai le Alii. Ae ua tatou oo nei i aso faigata. O le aso o le taimi lea e tagai ai i le Punavai o le upumoni ma faamautinoa ua malolosi a tatou molimau.

I le toe foi atu i la’u tala, sa matou feala ma ou tausoga i le taeao o se la susulu ma se lagi matagofie. Sa tuitui mai se tamaloa i le faitotoa e saili mo ni tamaiti leiloloa e toatolu. Sa ia faatietie i matou i solofanua, ma amata la matou faigamalaga i le aiga e ui atu i le laufanua valevalenoa lava e tasi. O le a le galo lava ia te au mea sa matou vaaia i le ala i lo matou foi atu i le aiga—o le anoanoai o tagata o e sa sailia i matou i le po atoa, o a latou palau ma loli sa mau i le palapala. Sa latou mauaina se nofoa solofanua ii ma se solofanua i o, ma ina ua latou vaai mai i lo matou toe foi atu i le aiga, sa mafai ona ou lagonaina lo latou toomaga ma lo latou alolofa. I le auala e ulufale atu ai i le aai, sa toatele tagata sa faatalitali mai mo i matou, ma i luma atu o i latou uma sa i ai lou tina matua agaalofa ma le tuagane ma le uso o lou tina. Sa latou fusiina i matou ma fetagisi, ma le olioli ua latou mauaina a latou fanau sa leiloloa. O se faamanatu maoae lenei mo au e silafia i tatou e lo tatou Tama Faalelagi agaalofa. O loo ia faatalitali mai ma le popole mo lo tatou toe foi atu i le aiga.

Ioe, o loo i ai faailoga o afa o loo fatufatu faataamilo ia i tatou uma. Ia tatou tepa i luga ma saunia i tatou lava. O loo i ai le saogalemu i se molimau malosi. Ia tatou faapelepele ma faamalolosia a tatou molimau i aso uma.

Ou te iloa e mafai ona tatou ola faatasi o ni aiga mo le faavavau, ma o loo faatali mai lo tatou Tama Faalelagi agaalofa ia i tatou, o Lana fanau, faatasi ai ma Ona aao mafola. Ou te iloa o loo soifua Iesu Keriso, lo tatou Laveai. E pei lava o Peteru, e le o se tagata na faaali mai ia te au, a o lo’u Tama o i le lagi (tagai Mataio 16:15–19). I le suafa paia o Iesu Keriso, amene.