Ngwetack

Sel Elder Adrián Ochoa

Ke U luhn Mwet Itngucul


Mihsenge pa pacl in ngwetack nuh sin El suc Orwaclah ma pwacye ac oruh in pwacye lah luhlahlfongi lasr uh kuh.

Ke nga yac oalkosr ah, nga tuhlihk luo suc ac ma wiyuck suhpweyuck nuh ke mura se ma oan fototo in moli mwe mongo nuh ke lwen 15 tohkoh. Ke nga esam pacl se inge, nga fwefwelac ke luhpan luhlahlfongi luhn ninac mahtuh kiyuck ac elos suc ac pahpah ninac kiyuck ah kacsr. Kuhsrao ke lututacng ah kahlwem ac sahromrom ke kuht sroacng nuh fin u srihsrihk lasr ke ohsr tolkoe.

Ke infulwacn acn mahmah se, oasr nuhnak na suhmaht se muh kuht in srolah ke ohsr nahtuhsr ac sritacl ramihne. Na kuht oruh—ke pacl na loeloes. Kuht lohacng na pwacye nuh ke sritacl se lasr ah oruh kuht tiacna liye “mwe akucl luhn pacl uh” lucng liki sifacsr ke puhkuhnyeng lohsrlohsr afuhnlah kuhsrao. Ke pacl se kuht akihlenack ma orek ah, wacngihn pacl lasr in sroacng nuh fin ohsr nahtuhsr ah. Af ah tuhngalkuhti arlac upac, ac hail ah tuhngalye muhtahsr, oruh wacngihn ma kuht nuhnkuh in oruh sahyacn eislah saddle ke ohsr ah ac afihnkuhti ye kahot se ke saddle ah.

Ke wacngihn ohsr nahtuhsr, sroksrok, ac mihsrihsr, kuht kalweni ke fuhfahsryuhsr lasr, ingena srihke in fahsr arulacna muhi. Ke kuht apkuhran in sun acn se kuht som nuh kac ah, kuht liye lah inkacnek sralacp soko ma utyak nuh ke mura ah sronotyak ac oacna infacl se yuhme nuh yohrohsr. Ingena sulaclah sefanna lasr pa in sislah kahot lasr ah ac fanuhkyac kalkal weah kohsroh ma raunwelah mura sac. Pahtlac ke fong ah ke, ullac ac ngal ac sroksrok, kuht suk acn in muhta ke lohm se emet kuht liye ke kuht utyak nuh in mura sac. Sucu wo fuhsr se we kahsrwe kuht in paholah, kihte kuht bean burrito yucyuc, ac use acn kuht in mutul kac ke infuckihl lasr sifacna. Tiac paht kuht konwacack muh falfucl ke infuckihl sac tuhpahsrpahsr ke fohk, oruh sifilpac oasr nuhnak na suhmaht se lasr. Kuht sruhlwaclah circle se ke falfucl ah ac kalweni sritacl ramihne se lasr nuh ke kuht puhtatlac nuh in fohk ah in mutul.

Ke kuht tuhlihk ah kuht nuhnkuh na kacsr sifacna. Kuht tiacna nuhnkuh ke mwet luhngse lasr suc suk ke insefosrngah kacsr e lohm ah—kuht fin etuh, kuht ac tiac ikolyac fuhfahsryucsr lasr ke mukwikwi wacngihn srihpac se. Ac kuht fuhnuh lahlmwetmwet kuhtuh, kuht luhkuhn ngwet nuh ke kuhsrao, liye puhkuhnyeng orekwacni, ac ahkmuhiye fahsr lasr in som met liki pahkah sac. Ingena ke yohk kuhtuh etwacack luhk, nga kwacna ahkacsmakihnyeyuc sifacna “Nimet muhlkuhnlah in ngwetack.”

Ma se nga puhlakihn ah yurin tuhlihk suc ac ma wiyuck ah lutiyuc in akihlen mwe akucl luhn pacl lasr uh. Kuht moul ke lwen pahkah, sensen ma Paul el ahkuhtweyac: “Mwet uh fah luhngse elos sifacna, … seahkos pahpah ninac, nihkihn sang kuloh, semuhtahl, … mwet kuhtasrihk, sopoklot, … mwet luhngse mwe pwacr yohk liki God” (2 Timothy 3:2–4).

Sramsram ke pacl inge, Elder Dallin H. Oaks el fahk: “Kuht enenuh in oruh ahkolah ke kwewana ma luhn ikoac ac ma luhn nguhn. … Ac ahkolah se ma kuh in muhlkihnyucklac pa ma se ma tiac kuh in arlac liyeyuck ac ma upac kuhtuh—ma luhn nguhn” (“Preparation for the Second Coming,” Ensign kuh Liahona, Mei 2004, 9). Ke kahs sahyac, nimet muhlkuhnlah in ngwetack.

Ke srihpen enenuh yohk nuh ke ahkolah luhn nguhn ke pacl sensen inge, nga ke fahk kahs in ahksensen ke sie mwe akucl na kuh se ke pacl uh. Nga tuh orekma yohk ke kampiutucr ke srihpen orekma in moul luhk, oruh nga akihlen sacohkiyac, yohk nuh ke asramsrami. Puhslac etwacack luhn mwet uh fihsrwacsr in eis ingena. Tuhsruhk Internet uh nwacnwaclah pac ke ma fohkfohk ac kikiacp puhs. Kampiutucr uh ahkyohkye sukohsohk in sramsram lasr, tuhsruhk sang pac luhman pwacye tiac fal in ituckyang nuh sin mwet tiac akihlenyuck suc sihmihs ma se nuh ke Internet ma ritiyuck sin mwet puhs. Pa oruh ingena, yohk liki met, kuht enenuh in esam mwe luti ma pahtpaht se inge: “Ke fahko lalos kowos ac etwaclos” (Matthew 7:20).

Yohk, nga ahksensenkihnye kowos in tiac liye petsac fohkfohk kuh sang nuhnak lowos nuh sin mwet suc fahk ma suhtuhuh ke Kraist ac ke Mwet Pahluh Joseph Smith. Kwewana mukwikwi inge orwaclah ohiyac se pacna: wacngihnlac luhn Nguhn Muhtahl ac kuh Lal in karihngihn, ac ahkkweye. Ma koluk ac suhpwacr fahsr tohkoh pacl nuh kwewa.

Tamuhlwel ac tahmtahel sacohk wiyuck, kowos fin sun kuhtwena ma ma oruh kowos in tahfuh luo ke luhlahlfongi ke wosasuc, nga kwacfe kowos in ngwetack. Ngwetacng nuh Sel suc Orwaclah lahlmwetmwet ac ma pwacye nuh kwewa. Ahkkweye luhlahlfongi ac fahkwack luhlahlfongi lowos ke kahs luhn God. Oasr mwet ke facluh suc suk in ahkmuhnahsye luhlahlfongi lowos ke orekmakihnyacn kwewana kikiacp ac ma tahfuhn pwacye. Pa srihpac se arulacna yohk srihpac kowos in nwacsnwacs pacl nuh kwewa ke Nguhn. Wi luhn Nguhn Muhtahl uh tiac mwe ahkfihsrwacsrye pwacr se na—enenweyuck ke moul in nguhn lowos an. Kowos fin tiac sacohkkihn kahs luhn Kraist ac lihpsre wo nuh ke pihrihkyuck luhn Nguhn, kowos ac kiacpweyucklac (liye Joseph Smith—Matthew 1:37). Kuht enenuh in oruh ma inge.

Jisus Kraist, suc suwohswohs na pwacye, ac Joseph Smith, suc fahkwack muh el sifacna tiac, kwewana uniyucklac sin mwet suc fahkwack srihpac suhtuhuh suc ac tiac ahokkuhnlah luhlahlfongi lalos. Yac kuht kuh in etuh fuhkah muh luhlahlfongi lalos pwacye—lah Jisus Kraist El pa Wen nuhtin God ac Joseph Smith el sie mwet pahluh pwacye?

“Ke fahko lalos kowos ac etwaclos.” Yac fahko wo kuh in kapwack ke sahk koluk? Nga sifacna etuh muh Mwet Molwelah luhk El nuhnak muhnahs ke ma koluk luhk ac ahksukohsohkyeyuclac liki srenenuh luhk sifacna, usyucyang nuh ke ohiyacn engan ma nga tiacna etuh muh oasr. Ac nga sifacna etuh muh Joseph Smith el mwet pahluh se mweyen nga orekmakihn olwelah fihsrwacsr se in Puk luhn Mormon ma fahk muh kuht enenuh in siyuck sin God, Pahpah Ma Pahtpaht, ke inen Kraist, (liye Moroni 10:4). Ke kahs fihsrwacsr: ngwetack.

Oasr kuhtuh mwet suc ac sahp fahk muh enenuh in oasr mwe ahkpwacye lom ma kuh in liyeyuck in kuh in luhlahlfongi ke Moulyak luhn Kraist kuh pwacyeiyacn wosasuc fohlohkyak Lal. Nuh selos nga fahk kahs ma Alma el fahk nuh sel Korihor, suc srihke in oruh mwet sahyac in tiac luhlahlfongi. Alma el fahk nuh sel Korihor muh fal mwe akucl lal ac siyuck fin el ac srihfe God, ac fin el ac fahk, ahkkahlwemye nuh sihk sie mwe akucl, ke el eis tari luhlahlfongi luhn mwet lili lal kwewa, ac oacyacpac mwet pahluh muhtahl kwewa. Alma el fahk nuh sel muh ma suhmuhslah ah ituckyang tari nuh sel (liye Alma 30:44).

Kowos ac nga kuht mwet moul suc ahkpwacye ke kuh in iwaclah luhn Mwet Lahngo. Kuht mwet moul suc ahkpwacye ke orekma luhn Mwet Pahluh Joseph ac oaru luhn Mwet luhlahlfongi met ah suc muhta kuh in luhlahlfongi lalos. Alu luhn Jisus Kraist ingena maelihk nuh fin facluh nohfohn ac kapkapwack oacna soenna orek met—ahokkihnyucklac, oacna ke pacl luhn Kraist, sin mwet insepuhsisacl suc tiac enenuh in liye kuh kahl in luhlahlfongi.

Wacngihn mwet etuh lah Leum El ac sifil tuhkuh ngac. Tuhsruhk ingena kuht oasr ke pacl sensen. Mihsenge pa pacl in ngwet nuh sin El suc Orwaclah ma pwacye ac oruh in pwacye lah luhlahlfongi lasr uh kuh.

In fohlohk nuh ke sramsram soko luhk ah, nga cousin luhk ah nguhtwaclihk ke lututacng nuh ke faht kahlwem ac kuhsrao kahto. Mukul se tongtong ke sruhnguhl ah suk tuhlihk mukul tuhlac tolu. El use ohsr kuht in muhta fac, ac kuht muhtwacwack fohlohk nuh lohm ke acn mahmah se pacna ah. Ngwac tiacna muhlkuhnlah ma kuht liye ke som lasr nuh lohm ah—mwet pucspucs suc tuh suk kuht ke lusacn fong ah, tractor ac stosah okoaclos srwemlah ke fohk fuhrahrrahr. Elos tuh konwacack saddle se ke acn ngwe ac ohsr soko ke acn ngi, ac ke elos liye kuht fohlohk nuh lohm ah, nga kuh in puhla insemuhlahlah lalos ac luhngse lalos. Ke muhtuhn mura ah, puhs mwet tuhpan kuht, ac met luhkwelos kwewa pa ninac mahtuh kuhlwacng kiyuck ac elos suc ac pahpah ninac kiyuck ah. Elos sruok kuht ac tuhng, sesseslah ke engan ke elos konwacack tuhlihk tuhlac nahtuhlos. Ma inge mwe acsmakihn wowo nuh sihk lah Pahpah kuhlwacng tuhmwacsr Inkuhsrao El akihlen kuht. El tuhpan fohlohk lasr nuh lohm ah.

Ahok, oasr mwe akihlenyacn pahkah orekwacni raunikuhtlac. Lwelah kuht in ngwetack ac ahkoekuhtlac. Oasr ohiyac sef ke sie luhlahlfongi kuh. Lwelah kuht in engankihn ac ahkfokokoye luhlahlfongi lasr lwen nuh kwewa.

Nga etuh kuht kuh in tuhkweni muhta ke sucu ke pacl ma pahtpaht, lah Pahpah kuhlwacng tuhmwacsr Inkuhsrao El akihlen kuht, tuhlihk Nahtuhl, ke Pahol ahsrweyucklac. Nga etuh muh Jisus Kraist, Mwet in Iwe lasr, El moul. Oacna kacl Peter, wacngihn ikoac ac srah ahkkahlwemye nuh sihk, tuhsruhk Pahpah tumuhk suc oasr inkuhsrao (liye Matthew 16:15–19). Ke ine muhtahl luhn Jisus Kraist, amen.