Klisiich el Kau a nguu lokiu a Tngakireng er a Jesus Kristo

Ng direke tekoi,e ngak a mlo ngeltengat el mesterir a meral remekedung el rengeask el ngalk ra Idaho. A tara kedung el kekerei el redil a uleker ngak el kmo ngera sel kot el klou a belkuul el tekoi el tir a kirir meruul er ngii ra klengar er tir chelechang. Ak milekoi er tir el mo mesuub el omtab er a klisiichel a Tngakireng ra Jesus Krsito ra klengar er tir.Chelecha eng soak el mengedecheduch er a tara techetechel tia el klisiich, el ngii a klisichel a sebeched el nguu lokiu a Tngakireng ra Jesus Kristo.

Ngara Babier er a Mormon a Ammon ma bebil er ngii a osisechakl ra ebangkelio ra Jesus Kristo el mora rechad el tir a mle medengerengel e mekngit el chad.¹Ng betok ra rechad a mlobult a rengrir e mililt el mo mechei a mekngit el blekerdelir. Ng kmal mlo ungil lobult a rengrir mete mlo melakl a kloklir ra mekemad e mlo ra telbiil lobengkel a Rubak el kmo diak el luut el mo ousbech a ikel klekedall.²

A uriul, ea rebetok el dirkak el buult a rengrir el rodam er tir a mle oomekemad e omekeuad er tir. Tirkakid el mekedung el chad a mililt el mo mad ra lebai el bo lolemall ra chedaol klengar er tir el mo oumekemad. A ikel mekedung el omerrelir a ngiltiterir a rebetok el chad el mo omult a rengrir e mo mechei a klekedelir ra mekemad.³

Ng ngokiu a Ammon, ea Rubak ulmekrael er tir el mo selbechak ra delongelir a re Nephites, e te mlo okedongall el rechedal a Ammon.⁴A re Nephites a milsebechakl er tir el betok el rak, eng di a resoldau ra Nephite a mirael el mo mechitechut, e kmal mle chebuul lousbech a ngesou.⁵

A rechedal a Ammon a mlara chetiteuokel el taem el kirel chedaol a klengar er tir. Tem le mui el loltirakl ra telbiillir el diak el luut el mo ousbech a dongu ra mekemad. Eng di te mle medengei el kmo a chedam a ngerchelel el mesebechakl ra telungalk er ngii.⁶ Tia mle sebechel ungil a uchul el mo sebechel tomelii a telbiielir.⁷

A melomes el merredel loba priesthood, el Helaman, a mle medengei el kmo a tomelii a telbiil lobengkel a Rubak a direkak a tang melungil. Ngii a ulechais ra ungil rolel. Ng ulmeklatk er tir ra rengelekir el sechal a dimlak el ruull a osisiu el klengit maluasei e diak a lousbech el meruul ra osisiu el telbiil.⁸ Alta rengelkir el sechal a mle mekekerei, te mle mesisiich a bedengir ma dirrek, e klou a ututelel, te mle mekedung e klikiid. Tirka el rengalek el sechal a ngilai a klisichir leng klaumerang ra derrir.⁹ Te mlara eungel a omredelel a profet, e tirka el mekekerei el chad a ngilai a deruchelir a redemrir el mo mesebechakl er a telungalk er tir ma blirir.¹⁰

A ikel dilubech el meliuek er tial klou a ututelel a ochotii el kmo ng mekera a Tngakireng ra Jesus Kristo a meskid a klisiich ra tang ma tang el mora rokui el ngelekel a Dios. Molatk ra oberaod el rengrir tirkel demrir. Ng locha kmal uangera a rengrir sel lodengei el kmo a mekngit el blekerdelir ra ngara mong a orreked er tir meng diak el sebecherir el mesebechakl ra rebecherir ma rengelkir ra taem ra ngesou? Klemedengei er tir el kirel a merserasch el rengelekir el sechal a mo chobangel, e te locha ulemart er tir e llmangel. Rechedam, el diak el rengalk, a kirir el mesebecheak er a telungalk er tir!¹¹ A kengtil a rengrir a locha kma mle meringel.

Ngera ma merredel er tir loba priesthood a mle medakt a bol lomedasu el lmuut el melai a klekedelir ra mekemad el mo uchul e tebai ruebet ra renged”?¹² A Rubak a mla melekoi el kmo ng ke el chad el mla ouchel a rengul ra kengtil a mla mousubes, ea Rubak a diak bo lolbedebek [a kengtil] .”¹³ Tireka el kedung el rechedam a meketeket ra louchel a rengrir ra kengterir e mla mo beches lokiu a Tngakireng ra Jesus Kristo, meng ngera me te millekoi er tir meng diak bol losebechak ra telungalk er tir?

Ng kmal klemerang el kmo ngokiu a Tngakireng ra Jesus Kristo e kid a mo beches. Ng sebeched el mo kedung e klikiid. Eng di, bebil ra taem ea mekngit el omelilt a meskid a kemangel el kengtil el dongarm er ngii. A tara kot el dauch el mo rokir a cherungel el ngebetel a klengit a mo outekangel a mekedeb ma mekemangel el ongarm el mlukdubech ra ngaramong el klengit. A ikel el ngaramong el riruul a mla ochotii el mera rechedam ra Ammonite ra reng ra tech el sebechel el bol mechitechut er ngii ea Diablong a mo melasm el lolekiis.

A Diablong a mo melasm el ousbech ra dodengei ra ngaramong el kengtid el mo mengitikaik er kid me bo longederedel er kid. Kid a kmal kired el mo kerkikl el mo cheroid ra ongitikaik er ngii. Tiaikid a blel chelbangel er ngii remekedung el rechedam ra Ammonite. Ma el tang eng mo cheuib a betok el rak ra ungil klengar, eng kmal mle klou a belkul a losebechakl ra chedaol klengar er a ngii di el ngerang el mo rulleterir el mo dobedebek a mle kngterir.

Ngara delongel a betok el mekemad, ea Captain Moroni a millers a ike el mechitechut el beluu.Ng rilterir a rekelbus el mo omekedechor a dobu el kilbekbii ra kerrekar el selers el meliuek er tial beluu. E ngilai a dengitech ma chutem ra dobu el mora bebuul a ikal kbekbel tia el beluu meng mlo mesisiich e klboub el kedidai.”¹⁴ Kabitei el Moroni a mle medengelii a ututelel a lolisiich ra mechitechut el basio el momesisiich.¹⁵

Tirka el rechedam ra Ammonites a mle osisiu. Te ulusbech el melers el mesebechakl a tekoi ra reng el uaia el slers el choridii a ungil blekerdelir ra mekngit el blekeradel er a ngaramong. A rengelkir,el mle ngeltengat ra ungil osisechakl, a dimlak el bol mechitechut ra osisiu el ongetikaik. Ng mle sebecherir el mesebechakl ra telungalk er tir el ngara ungil el diak el bol temelii a chedaol klengar.

A ungil chais a mora ngii dil chad el soal el mengubet ra kengtil el ngii a mle uchul a mekngit el omeruul el kmo a Rubak a omes ra chelitechut el ngodech ra Kuk lomes ra omtok. Seikid ea Rubak a mesubed el kmo tirkel tir a omtok e diak el ouchel a rengrir a mo medebeakl,¹⁶ e sel Rubak a lolekoi a chelitechut, eng bek el taem loba chubechub.¹⁷

Ng kaml merang, leng diak a cheldechulel e le a rechedam ra Ammonite a mlo sisechakl ra chelebirukl ra rechad ra blirir, eng di rokui el ngelekel a Chedam ra Babeluades a mei er tial beluulechad loba Llomes ra Kristo. Ng diak a kmal belkul a uchul a kengterir, ng bai sel chelitechetul a reng el mlukdubech el Diablong a melasm el lolekiis er ngii.

Ngokiu a klechubechub el reng e te mlosisechakl ra ebangkelio, ouchel a rengrir, e ngokiu a Tngakireng ra Jesus Kristo e te kmal mlo mesisiich a rengrir ra ongetikaik ra Diablong. Alta eng dirkak lolechesuar ra ongitikaik el ngoititerir el mora mle delngerngerir ra meketeketang, eng di te mlo otiraklii a profet, e dimlak el bsang a klisichel a Diablong el mo mengeblad er tir el mengitikaik er tir el mo ruebet.¹⁸ A Tngakireng ra Osobel a diak el di lomekbeches er tir ra klengit, ngdi uchul e te mle olngesenges ra priesthood el oungerachel er tir, ea Osobel a mlo sebechel el mesebechakl er tir ra chelitecheterir e melisiich er tir. A klengariou el reng er tir, ma klemengetel a taem el longeroid er tir er a kngterir a bai klou a le sebecheklii el mora telungalek er tir er a ngii di el ngerang el le kedmeklii ra leblora mekemad. Klengariou el reng a dimlak el cheroid a klengeltengat. Ng bai melisiich er tir e omekngeltengat ra telcheroll el merael mei.

A ulebengelel tial cheldecheduch a ochotii el kmo ng mekera a chubechub ra Rubak e remuul a chelitechut el mo klisiich.”¹⁹Tirke el mekedung el rechedam a uldurokel ra rengelkir el mo oumekemad e ulterekokl er tir ra Helaman. Te ulmekemad ra kmal meringel mekemad el tir rokui a mla er ngii a mekesai el telemall el mlo er tir, el diak a chimo er tir el mlad.²⁰ Te mle mesisiich a bedengir luchul eng mlo mesisiich a re soldau ra Nephite. Te mlo mui ra klaumerang ma chedaol klengar a mlo mesisiich ra luut er tir el mo er mei. Ea telungalk er tir a mlo mukngeltengat, mesebechakl e mlo mesisiich.²¹ Chelechal taem, eng betok a remesuub er a Babier ra Mormon el mla ng mai a llomes lokiu a okisiul a klengar er tirka el klikiid e mekedung el rengalk el sechal.

Ke de bek el chad el di mla ngarngii a taem ra klengar er kid el remuul a mekngit. Kid el rokui a kmal klou lousbech ra ngebetel a klengit el klisichel a Tngakireng ra Jesus Kristo. Ke debek el chad el kmal kired el ouchel a rengud ra ngii di el mekngit el blekerdelled el omtok. A Rubak a mla melekoi el kmo Ngii a diak el sebechel mesa klengit el kengei. ²² Ngii a medengei el kmo ngera a kirel meruul meng mo sebeched el mo uaia Ngii.

Ng betok er kid a mla mecherei a chelitechut meng omekeroul er a chelsel a klengar er kid. Ng ngokiu a Tangakireng ra Jesus Kristo, e kid, el di uaia re Ammonites, a sebeched el omekedechor a chedaol klengar el uaia dorers kid ra ngii dil mekngit el deruull ra ngaramong el Diablong a soal lokekiis. A ika el mesebechak el chedaol klengar a lolmekedechor el meliuekl a rechad ra Ammonite a klengeltengat e klisiich el mor tir, ma telungalk er tir, ma belurir, me a telcheroll el merael mei. A ika meng sebechel el mo klemerang el mei er kid.

Meng uangera a do mekedechor a selers el diak a ulebengelel? A kot el terebel e ng kired el ngarngii a rengud, el kerekikl, e cherrungel el l ouchel a klengit. Ngokiu a Tngakireng ra Jesus Kristo, e a ta ma ta er kid el rokui a mo sebeched el merael mo klikiid ea berroad el mekngit el teteled a mo kebekakl. A ouchel reng a diak el belkul a kmo ke mo mekelbus. Ng rael dokiu ngii eng klou a rengud el mengiil el mora bekeredechel ngarmeded.

Chedam ra Babeluades a mla meskid a dongu el ngosukid el omekedechor e merers er kid ra chelitechetud ma dechal a klaumerang er kid. Momtab aika el el bok dung:

• Mruul chedaol telbiil e mngai a chedaol el ruoll el kirem. E momuchel e blechoel el meruul a hedaol ureor ra chelsel a templo el kirir a rebeldekem.

• Mouchais ra ebangkelio el mora diak el londengelii ma lechub e te diak el sal mesisiich el chad ra blai ma lechub eng resechelim. A mouchais a ika el klemerang eng sebechel meskau a klemeriar ra ebangkelio el mora klengar er kau.

• Mungil mesiou ra rokui el ngerachel ra Ikelesia, tokubets a urelel a molisechakl ra blai ma moldingel e olisechakl. Lak bom uai tirkel el molsisechakl ra blai ma lechuub te moldingel e olsisechakl el di [teruich ma eim] 15 el bung a le bek el buil. Bai, molngeseu er a redersta el chad me a telungalek. Bo mungil medengelterir. Bo mungil sechelei. Ngokiu a blekokeuii lomeruul, e mochotii el kmo ke meral lomekerreu er tir.

• E sel kot el klou a ututelel, molengesu ra rechedal a telungalk er kau. Mrelii a ukurulel er a chedaol klengar ra bechim ma rengelekem el mo kot el ngerchelem. Bom ungil omtab a ikel ngii sebechelm el kudmokel el mo ngoseuir a ta ma tang. Besterir a temem ma kau el chad el di blechoel.

Ngara aikal blak dung, eng ngarngii a chimo el tekoi: bol mui a klengar er kau ra ngelseuim el mora rebebil. Sel bom momtab e moruul a ngesou el mora rengelekel a Chedam er a Babeluades,²³ea ongetikaik ra Diablong a mo mechitechut ra klengar er kau.

Le Demam ra Babeluades a kmal betik a rengul er kau, ea Tngakireng ra Jesus Kristo a rulii me tial klisiich a ngarngii. Ng diak el sal kmal ungil? Betok er kemiu a mla melchesuar ra berredel a mle mekngit el omelilt, e a ta ma tang er kemiu a sebechemiu el melchesuar ra omekellomes ra mesisiich el klausubes er a Rubak, klechubechub ma klisiichel. Ak mla melchesuar, e ngak a sioning el kmo ngarngii el mora dersta er kemiu el rokui, el ngara ngklel a Jesus Kristo, amen.