Kehlpen Emen sang ni Tomw en Sises Krais

Me kerente, I kapaikihda ei tuhwongidi pwihn en me pwulopwul kaselel ehu sang state en Idaho. Emen serepein mour mwahu peidek rehi dahme I pehm iei me keieu kesempwal me irail anahne doadoahngki nan arail mour ansou wet. I nda me irail en esehla kasawiada manaman en Tomw en Sises Krais nan arail mour. Rahn wet I pahn kawehwe ehu pali en manamano, me iei kehlpen emenemen me kitail kak alehdi sang Tomw en Sises Krais.

Nan Pwuken Mormon kitail wadek en Ammon oh riehkan arail padapadahk rongamwahu en Sises Krais ong aramas me kamasepwehk oh keptakai oh lawalo.¹ Tohto irail weliakapwala oh pilada ren kesehla arail wiewia dipan akan. Arail weliakapw inenen unsek eri re sarepedi neirail dipwisoun mahwen kan oh inoukihieng Kauno me irail sohte pahn pwurehng doadoahngki.²

Mwuhr, tohto riarail me sohte iang weliakapwala kohdo peieng irail oh tepida kemeirailla. Irail kan me loaloapwoatlahr pilada ren mehkihla kedilahs sang mwein kawehla mour en pali ngenirail sang ni pwurehng pwokada neirail dipwisoun mahwen. Arail karasaras pwung sewese aramas tohto en weliakapwala oh kihdi neirail mehn mahwin en akupwung kan.³

Sang Ammon, Kauno kaweid irail en repen wasahn keiru rehn mehn Nephi kan, oh irail wiahla mehn Ammon.⁴ Mehn Nephi kan silehkinirailehr sounpar tohto tohto, ahpw kedekede oh sounpei en Nephi kan tepidahr luwetala, oh utuhtpehkan lalaudlahr anahnepe.⁵

Mehn Ammon mihmihier nan kemwekid kesempwal ong pali ngehn en arail mour. Irail kin loaloapwoat ong arail inou en solahr mahwin. Ahpw irail wehwehki me pahpa kan me pwukoahki silepen arail peneinei kan.⁶ Anahn wet mwomwen sais mwahu pwe irail en kak medewe en kauwehla arail inou.⁷

Arail kaunen priesthood eripit men, Helaman, ese me kauwehla ehu inou rehn Kauno sohte pwung. E kasalehda mwekid marain ehu. E katamanohng irail me neirail pwutangkan sohte dipikihda soangen dihp pwuko oh eri sohte anahne wiahda inouo.⁸ Mendahte neirail pwutangko ahr uhdahn pwulopwul, irail kehlail ni paliwar oh, me uhdahn kesempwal, irail mour mwahu oh mwakelekel. Irail kehlailla sang ni pwoson en arail nohno kan.⁹ Pahn kaweid en arail kaun me wia soukohp men, mwahnakapw pwulopwul pwukat alehdi en arail pahpa kan pwukoahn uhpoarih arail peneinei kan oh imwarail kan.¹⁰

Kemwekid kan me pid kupwur kesempwal wet kasalehda ia mwomwen Tomw en Sises Krais eh kin kihdo kehlpen emen ong mour kan en serihkan en Koht. Medewe pepehm kan en pahpa pwuko. Ia pahn mwomwen arail pepehm ni arail esehda me mwekid en akupwung kan sang arail mour mahso kipeiraildier sang silehdi arail pwoud kan oh neirail serihkan nan ansou en anahn? Pwehki ahr pein ese duwen tiahk lemei kan me neirail pwutak kan pahn uhd lelohng, mwein irail wie sengiseng seli ahpw sohte me ese. Pahpa kan, kaidehn serihkan, me konehng sinsile arail peneinei kan!¹¹ Arail lokolok mweinte uhdahn doar mehlel.

Dahme pahn kahreda arail kaun en priesthood maraino eh pahn periki arail medewe en sarepada neirail mehn mahwin ko kakete kahrehieng arail katiasang palingenirail?¹² Kauno ketin mahsanih me irail kan me kin koluhkihla diparail kan miehier mahkpe, oh Kauno sohte kin tamataman.¹³ Ohl loaloapwoat pwukat koluhkilahr diparail kan mahso oh mwakelekeldahr sang ni Tomw en Sises Krais, eri dahme irail alehkihdi peneu en sohte sile arail peneinei kan?

E wia padahk mehlel me sang Tomw en Sises Krais kitail kak mwakelekelda. Kitail kak mwahu oh mwakelekella. Ahpw, ekei pak atail kin wiahda pilipil sapwung kan kin kihieng kitail pweine me sohte imwi. Ehu dake kesempwal kan pwehn kaimwsakala koluhla iei en ale pweinen dihp en mahso sohte lipilipil ma re dadaur ansou mwotomwot de reirei. Arail pilipil en mahso kihieng pahpa en mehn Ammon kan ineng en paliwar ehu me kakete pwurehng wia mehkot en kaluwetih irail me Sehdan pahn men doadoahngki.

Sehdan pahn song en doadoahngki atail mehn ketemen ong sohte lipilipil en dihp en mahso pwehn lukeikitail ong ah manaman. Uhdahn kitail anahne ansou koaros tehk mwahu soikala ah luhk kan. Iet irair en pahpa loaloapwoat kan en mehn Ammon. Lella mwurin arail sounpar kan en mour loaloapwoat, e udahn anahn ren sile pein irail ni palingehn sang kemwekid koaros ong mehn ketemen sang dihp en mahs akan.

Nanpwungen mahwin tohtohie, Captain Moroni kolahng kakehlailih kahnihmw kan me keieu luwet. E wiada nah pwihn en kalapwuhs ko ren kauwada kehl me wiawihkihda tuhke loalen warawar me pidakih kahnihmw ko. Oh irail kesehiei pwehl en warawaro kainenehiengte ni kehl en tuhke k o lao irail kapilkipene kahnihmwo kehl kehlail en lepin tuhke oh pwehl me uhdahn ileile.”¹⁴ Captain Moroni wehwehki kesempwalpen kakehlailih wasa luwet kan pwehn wiahda me kehlail.¹⁵

En mehn Ammonite pahpa kan koaros rasehng. Re anahne silasil laud kan en pali ngehn pwehn katohrepeseng arail mour loaloapwoat kan oh mwekid sohte mwahu kan en mahso. Neirail pwutak ko, me kapaikihda tiahk pwung kan, sohte nohn luwetki kasongosong pwuko. Irail kak sile arail peneinei kan ni loaloapwoat oh mwekido sohte kak kauwehla arail kehlail en pali ngehn.

Rohng kaperen kapw kan ong emenemen me inengieng saledek sang kahpwal en pilipil soh itar en mahs kan iei me Kauno kilang luwet kan wekpeseng sang Ah kilang akupwung. Pwehki Kauno ng me irail me akupwung ahpw saik koluhla pahn alehdi kalokpe,¹⁶ ni ansou me Kauno mahsanih duwen luwet akan, e kin ansou koaros mie mahkpe.¹⁷

Ni mehlel, mie ekis kalahngan pwehki en mehn Ammon pahpa ko kasukuhlki tiahk sapwung kan sang arail pahpa nohno kan, ahpw koaros Sapwellimen Sahm Nanlengo serihkan me kohdohng mour wet ahniki Marain en Christ. Eri sohte lipilipil kahrepen arail mwekid suwed kan, ketingpe iei keirdahn ehu luwet en pali ngehn me Sehdan pahn song en doadoahngki.

Ni kahlangan, irail alehdi padahk en rongamwahuo, koluhla, oh sang ni Tomw en Sises Krais kehlailla ni palingehn laudsang en Sehdan kasongosong kan. Likamwete irail saikinte kehnda kasongosong en pwurehng arail mwekid suwed en mahso, ahpw sang ni idihdawehn arail kaun soukohpo, re sohte mweidohng en Sehdan ansou mwahu en pitih ngenirail kan, oh en kahluwairaillahng ni keneinei nan ehl.¹⁸ En Sounkomouro Tomwo kaidente kamwakelehsang diparail kan, ahpw pwehki arail peikiong kaweid en kaun en priesthood, Sounkomouro kin sileirail sang arail luwet kan oh kakehlailihirail. Arail inou karakarahk me re loaloapwoatki erein mour unsek en tokedihsang wiewia suwed kan kin silehdi arail peneinei kan laudsang mehteikan me re kakete wia nan wasahn mahwino. Arail peik sohte kin kihsang arail kapai kan. E kakehlailih irail oh kapaiada irail oh kapaiada diren dih en mwuhr kan.

Keimwseklahn soaio kasalehda mwomwen mahk en Kauno eh kin kahrehieng luwet kan eh kin kehlailla.¹⁹ Pahpa loaloapwoat pwukat kadarala neirail pwutak kan ong mahwin pahn kupwuren Helaman. Mendahte pwutangkan ahr kin pei nan mahwin kehlail kan oh irail koaros kin ekis ohla, sohte emen me mehla.²⁰ Mwahnakapw pwuko kihda kehlail kesempwal ong sounpei kan en Nephi. Ahr loaloapwoat oh kehl en pali ngehn ahpwete laudila ni arail pwurala nihmwarail kan. Arail peneinei kan kapaida, silasildi, oh kakehlailda.²¹ Nan rahn pwukat, diren aramas me sukuhliki Pwuken Mormon kin kehlailla sang karasaras en pwutak mwakelekel oh mour pwung pwukat.

Emenemen kitail ahnikihier ansou nan atail mour kan me kitail wiahda pilipil soh itar kan. Kitail koaros kin anahne douluhl manaman en soundor en Tomw en Sises Krais. Emen emen kitail anahne koluhla sang akupwung koaros. Kauno mahsanih me E sohte kak kilang dihp ni mweideng.²² E sohte kak pwe E mwahngih dahme kitail anahne en wia pwehn duwehla Ih.

Tohto kitail mweidehng luwet en mihla nan mwomwatail. Sang Tomw en Sises Krais, kitail, duwehte mehn Ammon kan, kak kauwada silasil kan eni pali ngehn nanpwungen pein kitail oh sohte lipilipil atail sapwung en mahs kan me Sehdan song en doadoahngki. Silasil kan en pali ngehn me kokouda pidakih pahpahn mehn Ammon kan kapaiada oh kakehlailihrailda, arail peneinei kan, arail wehi, oh dih en mwuhr kan. Soahngohte kakete mehlel rehtail.

Eri ia mwomwen atail pahn kauwada silasil soutik pwukat? Tepin dake udahn anahne wia koluhla me mehlel, oh pwon, oh unsek. Sang ni Tomw en Sises Krais, emenemen kitail kak mwakelekelda oh toutou en atail akupwung pahn pwokpwoksang. Taman, koluhla kaidehn kalokolok. E wia ahl me audaudiki koapwoaroapwoar ong rahn kohkohdo me ahwpete lingan.

Sahm Nanleng kihieng kitail dipwisou kan me kin sawas ong kauwada mehn silasil kan nanpwungen atail luwet oh atail loaloapwoat. Medewe kaweid pwukat:

• Wiahda inou kan oh alehda tiahk sarawi kan ong pein kowe. Eri kin doadoahkohng en wia tiahk sarawi kan nan tehnpas sarawi ong pein ahmw keinek kan.

• Ehukihieng rongamwahuo me sohte towe mwomwohdiso de souleng kan me sohte kalapw pwarodo de kompoakapah kan. Ehukihieng mehteikan soahng mehlel pwukat kak kahrehda kaweliakapwalahn ngoang nan ahmw mour.

• Papah ni loaloapwoat nan pwukoa malipilip kan koaros en Mwomwohdiso, mehlel pwukoahn sounpadahk en peneinei kan oh padahk en pas kan. Kedehr wia soangen sounpadahk en peneinei de padahk en pas me kin mihmihkihte minit 15 sounpwong koaros. Kin sewese tohn peneinei koaros ni emenemen. Pehsela. Wia kompoakapah mehlel. Sang ni mwekid kadek kan, kasalehiong irail ia uwen loal en ahmw limpoak ong emenemen irail.

• Me keieu kesempwal, papah towe kan en pein ahmw peneinei. Kesempwaliki laud en kairada pali ngehn en omw pwoud oh noumwa serihkan. Kin nsenohki soahng kan me ke kak wia pwehn sewese emenemen. Kin kihla ni sapan ahmw ansou oh nsenoh.

Nan ehuehu lamalam pwukat, mie oaralap ehu me mie nan koaros: audehkihda ahmw mour papah mehteikan. Ni ahmw pahn sehsehla pein kowe ni omw pahn papah Sapwellimen Sahm Nanleng serihkan,²³ en Sehdan manaman en kasongosong kin tikitikla nan ahmw mour.

Pwehki Semomw Nanleng poakohng uhk ni loal, Tomw en Sises Krais mweidehng kakehlail wet en kak pweida. Met sou uhdahn kasele? Tohto kumwail kehnehr toutou en pilipil soh itar kan, oh emenemen kumwail kak kehn manaman kaileilei en Sapwellimen Kauno mahk, kalahngan, oh kehlail. I pehmehr, oh I kadehde me e kak wiawihieng emenemen kumwail, ni mwaren Sises Krais, ahmen.