2010–2019
Paoa long Prishud
Oktoba 2013


Paoa long Prishud

Wan man i save openem keten blong saenlaet i kam insaed long rum, be man i no ona blong san, o laet, o hot we san i givim.

Ol Blesing blong Prishud Oli blong Evriwan

Taem ol pikinini long sakramen miting oli hapi mo singsing Praemeri singsing “Oli Toktok Lanwis blong Lav long Ples Ia,” evriwan i smael mo agri. Wan gudfala mama we i lukaotem faef pikinini i lisingud long seken ves : “Hom blong mi, evri aoa i gat blesing tru long paoa blong prishud paoa.”1 Hem i harem nogud i tingting: “Ol pikinini blong mi oli no save kaen hom olsem.”2

Mesej blong mi long fetful woman ia, mo long evriwan, i we yumi save laef evri aoa “wetem blesing blong paoa blong prishud paoa, nomata wanem situesen blong yumi.

Samtaem, yumi joenem tumas, paoa blong prishud, wetem ol man insaed long Jos. Prishud paoa i paoa mo atoriti blong God we Hem i givim blong sevem ol man mo blesem evriwan—ol man, ol woman, mo ol pikinini.

Wan man i save openem keten blong saenlaet i kam insaed long rum, be man i no ona blong san, o laet, o hot we san i givim. Ol blesing blong prishud oli moa bigbigwan bitim man ia we oli askem hem blong blesem man.

Blong kasem ol blesing, paoa, mo promes blong prishud long laef ia, mo long nekis laef, i wan long ol bigfala janis mo responsabiliti blong laef long wol ia. Taem yumi stap klin inaf, ol odinens blong prishud oli mekem laef long wol i kam rij, mo i mekem yumi rere long ol bigfala promes blong nekis wol. Lod i talem: “Insaed long ol odinens blong hem, i gat paoa we i olsem hemia blong God i kamaot.”3

Oli ol spesel blesing we oli kam long God i go long evriwan we i klin inaf, we i baptaes, we i kasem Tabu Spirit, mo tekem sakramen oltaem. Tempol i ademap laet, mo paoa, wetem promes ia we i laef we i no save finis.4

Evriwan long ol odinens oli invaetem yumi blong bildimap fet blong yumi long mekem mo kipim ol kavenan wetem God. Taem yumi kipim ol tabu kavenan ia, yumi kasem paoa mo blesing blong prishud.

?Olsem wanem? ?Yumi no stap filim paoa ia blong prishud insaed long laef blong yumi, mo luk paoa ia long medel blong ol memba blong Jos we oli kipim kavenan? Yumi luk paoa ia long ol niu konvet taem oli aot long wota blong baptaes wetem filing blong fogivnes mo stap klin. Yumi luk ol pikinini blong yumi mo yut we oli lisingud long ol kwaet toktok mo daereksen blong Tabu Spirit. Yumi luk ol odinens blong tempol we oli kam wan ples blong paoa mo laet long ol man mo woman we oli stret mo gud raon long wol.

Long manis we i pas, mi luk wan yang kapol i kasem fulap paoa long ol siling promes blong tempol taem gudfala bebi boe blong tufala i bon, be i laef wan wik nomo. Tru long ol odinens blong prishud, yang kapol ia mo evriwan long yumi i kasem kamfot, paoa, proteksen, pis, mo ol promes we oli no save finis.5

Wanem Nao Yumi Save Finis Abaot Prishud

Ating sam i askem kwestin wetem tru hat: “Sapos paoa mo blesing blong prishud i stap blong evriwan, ?from wanem ol odinens blong prishud, man nomo i stap givimaot olgeta?”

Taem wan enjel i bin askem Nifae: “?Yu save ol samting long saed blong ol wok we God i kamdaon blong mekem wetem man? Nifae i ones i ansa: “Mi save se hem i lavem ol pikinini blong hem; be, mi no save mining blong evri samting.”6

Taem yumi tokbaot prishud, i gat plante samting we yumi save.

Evriwan I Semmak

Yumi save se God i lavem evri pikinini blong Hem mo i no stap lukluk long taetol blong man. “hem i no tanem baksaed blong hem long eniwan we i kam long hem, … man mo woman; … mo evriwan i semmak long God.”7

Olsem wanem we i tru we yumi save se lav blong God “i semmak” long ol boe mo gel blong Hem, yumi save tu se Hem i no bin krietem man mo woman, we tufala i semsemmak. Yumi save se fasin blong stap man o woman, i impoten samting blong laef blong yumi long wol, mo long aedentiti blong yumi long taem we i no save finis, mo long stamba tingting. Ol tabu responsabiliti, oli givim long tufala tugeta, long man mo long woman.8

Stat long Stat

Yumi save se stat long stat, Lod i putum olsem wanem prishud blong Hem bae i go. “Oli givim Prishud faswan long Adam.9 Noa, Ebraham, mo Moses, evriwan i bin givim ol prishud odinens. Jisas Kraes i bigfala hae pris. Hem i singaotem Ol Aposol. Hem i talem “Yufala i no jusumaot mi. Mi jusumaot yufala mi mi putumap yufala i go mekem wok.”10 Long taem blong yumi, Jon Baptaes, Pita, Jemes, mo Jon oli putumbak prishud long wol tru long Profet Josef Smit.11 Rod ia nao Papa we i stap long Heven i givimaot prishud blong Hem.12

Plante Presen we Oli Kam long God

Yumi save se paoa blong tabu prishud i no wok hemwan, be wetem fet, Tabu Spirit, mo ol presen blong Spirit. Skripja i givim woning: “Yufala i no tanem baksaed long ol presen blong God, from oli plante; … Mo i gat ol defren fasin we God i givim ol presen ia; be i semfala God we i stap wok long evri ples mo long evri samting.”13

Fasin blong Stap Klin Inaf

Yumi save se, blong stap klin inaf, bae i oltaem stamba samting blong mekem, mo kasem ol prishud odinens. Sista Linda K. Beton, i bin talem: “Stret mo gud fasin we i wanem i mekem yu kwalifae blong invaetem prishud paoa insaed long laef blong yu.”14

Eksampol. Tekem bigfala sik blong ponografi we i stap swipim wol. Standet blong stap klin inaf blong Lod, i no givim spes blong ponografi wetem olgeta we oli stap mekem ol odinens blong prishud. Sevya i talem:

“Sakem sin blong … ol sikret rabis fasin blong yufala.”15

“Ae blong man i olsem laet blong bodi …Sipos ae blong yu i nogud, be i olsem we bodi blong yu i fulap olgeta long tudak.”16

“Be mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.”17

Taem wan i stap blesem o pasem sakramen, blesem ol sikman, o tekpat long ol nara prishud odinens, olsem we Elda Deved A. Bedna i talem, i olsem yu talem nogud nem blong God.18 Sapos wan i no klin inaf, hem i mas kamaot mo no mekem ol prishud odinens, mo wetem prea, i go long Bisop blong hem olsem wan fas step blong sakem sin, mo gobak blong obei ol komanmen.

Fasin blong Gat Tingting I Stap Daon

Wan nara samting we yumi save, hem i we ol blesing blong prishud oli fulap long ol famle we wan stret mo gud mama mo papa oli wan blong lidim ol pikinini blong tufala. Be, yumi save tu se God i givim tu ol semfala blesing long olgeta we oli stap long ol nara situesen.19

Wan mama, we i tekem hevi wok blong lukluk long famle blong hem long spirit mo long laef, wetem kwaet filing, i eksplenem se blong singaotem ol hom tija blong hem blong blesem wan long ol pikinini blong hem, i nidim hem blong putum tingting i stap daon. Be, long nara tingting, i no nidim moa long hem bitim ol hom tija blong hem taem oli stap rere blong blesem pikinini blong hem.20

Ol Ki blong Prishud

Yumi save se ol ki blong prishud, we ol memba blong Fas Presidensi mo Kworom blong Olgeta Twelef Aposol oli holem, oli lidim wok blong Lod long wol ia. I gat ol stret prishud ki we oli givim long ol stek presiden mo ol bisop folem eria blong olgeta. Mo oli stap singaotem ol man mo ol woman tru long revelesen, mo oli sastenem olgeta mo setem olgeta apat blong wok folem atoriti we oli givim olgeta blong tijim mo givhan.21

Nomata yumi save fulap abaot prishud, taem yumi lukluk samting tru long glas blong laef blong wol ia, bae i no save givim yumi ful save abaot ol wok blong God.  Be toktok blong Hem we i kaen we i talem se: “Tingting blong mi, i no olsem tingting blong yufala. Mo fasin blong mi i no olsem fasin blong yufala,”22 i stap talem long yumi se wetem taem mo wetem lukluk we i go long heven, bae yumi save luk ol samting olsem we oli stap tru,23 mo andastanem moa fulwan lav blong Hem we i stret gud evriwan.

Yumi evriwan i glad blong givim seves. Samtaem, yumi filim se koling i no tumas, mo wantem se oli askem moa long yumi. Samtaem, yumi glad taem rilis i kam. Yumi no jusum ol koling we yumi kasem.24 Mi bin lanem lesen ia long ol fas yia blong mared. Keti mo mi i stap long Florida. Wan Sandei, wan kaonsela long stek presidensi i eksplenem long mi se hem i filim blong singaotem Keti olsem wan eli moning seminari tija.

“?Bae mifala i mekem olsem wanem?” mi askem. “Mifala i gat ol smol pikinini, seminari i stat long 5 klok moning, mo mi mi Yang Man presiden blong wod.”

Kaonsela i smael mo talem: “Bae i oraet Brata Andesen. Bae mifala i singaotem hem, mo bae mifala i rilisim yu.”

Mo hemia nao i bin hapen.

Kontribusen blong Ol Woman

Blong askem wetem tru hat mo stap lisin long ol tingting mo wari blong ol woman, i impoten long laef, long mared, mo blong bildimap kingdom blong God.

Twante yia i pas, long jeneral konfrens, Elda M. Rasel Balad i tokbaot wan storian we hem i bin gat wetem jeneral Presiden blong Rilif Sosaeti. I gat wan kwestin we i kamaot long saed blong mekem strong moa fasin blong stap klin inaf blong ol yut we oli stap rere blong go long misin. Sista Ilein Jak i smael mo talem” Yu save Elda Balad, ol woman blong Jos ia oli gat sam gudfala tingting …sapos nom oli askem olgeta. Long en. …!mifala nao mama blong olgeta!”25

Presiden Tomas S . Monson, oli save gud histri blong hem blong askem mo ansarem wari blong ol woman. Woman we i lidim tingting blong hem plante, i Sista Frances Monson. Yumi evriwan i misim hem. Mo tu, long las Tosdei, Presiden Monson i talem bakegen long ol Jeneral Atoriti hamas samting, olsem wan bisop, hem i bin lanem aot long ol 84 wido blong wod blong hem. Oli lidim bigwan seves blong hem, mo ful laef blong hem.

I no wan sapraes, bifo prea mo desisen blong Presiden Monson abaot jenis long yia blong misinari seves, i bin gat plante toktok wetem jeneral Rilif Sosaeti, Ol Yang Woman presidensi, mo ol Praemeri presidensi.

Ol bisop. Taem yufala i stap folem eksampol blong Presiden Monson, bae yu filim, i bigwan moa, han blong Lod i lidim yu long tabu wok.

Mifala i stap sam yia long Brasil. I no longtaem afta mifala i kasem longwe, mi mitim Adelson Parela, we i stap olsem wan Seventi, mo brata blong hem, Adilson, we i stap long Stek presidensi blong mifala. Afta, mi mitim brata blong tufala, Adalton, we i stap wan stek presiden long Florianopolis mo wan nara brata, Adelmo, we i wan bisop. Mi bin sapraes long fet blong ol brata ia, mo mi askem abaot papa mo mama blong olgeta.

Famle i bin baptaes long Santos, Brasil, 42 yia i pas. Adilson Parela i talem: “Fastaem, Papa i glad tumas blong joenem Jos. Be afta, hem i kam lesaktiv mo askem mama blong no kam long jos.”

Adilson i talem long mi se mama blong hem i stap somap klos blong ol neiba blong pem bas blong ol pikinini blong hem i go long Jos. Ol fo smol boe oli wokbaot tugeta ova wan mael i go long nara taon, tekem bas blong 45 minit, mo afta, wokbaot nara 20 minit blong kasem japel.

Nating we hem i no save go long jos wetem ol pikinini blong hem, Sista Parela i stap ridim ol skripja blong hem wetem ol boe mo gel blong hem, i tijim gospel long olgeta mo prea wetem olgeta. Hambol hom blong olgeta i fulap wetem ol rij blesing blong prishud paoa. Ol smol boe i bin groap, oli go long misin, oli skul, mo mared long tempol. Ol blesing blong prishud i fulumap hom blong olgeta.

Sam yia afta, olsem wan singgel sista, Vani de Pola Parela i go long tempol blong kasem endaomen blong hem, mo afta, i go long 3 misin long Brasol. Naoia hem i gat 84 yia, be fet blong hem i gohed blong blesem ol jeneresen we oli kam biaen long hem.

Testemoni mo Promes

Paoa blong tabu prishud blong God i stap long Jos blong Jisas Kraes blong Ol Lata-dei Sent. Mi testifae se taem yu klin inaf mo tekpat long ol odinens blong prishud, Lod bae i givim moa paoa, moa pis, mo moa lukluk we i no save finis. Nomata wanem situesen blong yu, hom blong yu bae i gat blesing tru long paoa blong prishud paoa, mo olgeta kolosap long yu bae oli wantem moa blong kasem ol blesing ia blong olgetawan.

Olsem ol man mo ol woman, ol sista mo ol brata, ol boe mo ol gel blong God, yumi muv fored tugeta. Hemia i janis blong yumi, responsabiliti blong yumi, blesing blong yumi. Hemia i ples we bae yumi go long hem—blong mekem rere kingdom blong God blong Sevya i kambak. Long nem blong Jisas Kraes, amen.

Ol Not

  1. “Love Is Spoken Here,” Children’s Songbook, 190–91.

  2. Imel blong mi, 5 Ogis 2013.

  3. Luk long Doctrine and Covenants 84:20.

  4. Luk long Doctrine and Covenants 138:37, 51.

  5. Luk long Doctrine and Covenants 84:35; 109:22.

  6. 1 Nifae 11:16–17.

  7. 2 Nifae 26:33.

  8. Luk long “Famle: Wan Ofisol Toktok I Go long Wol,” 35538 852 o Liahona, Nov. 2010, 129.

  9. Teachings of Presidents of the Church: Joseph Smith (2007), 104; luk tu long Doctrine and Covenants 84:16; 107:40–53; 128:18, 21; Russell M. Nelson, “Lessons from Eve,” Ensign, Nov. 1987, 86–89.

  10. Jon 15:16.

  11. Luk long Joseph Smith—History 1:72; luk tu long Doctrine and Covenants 13; 27.

  12. Luk long M. Russell Ballard, “Let Us Think Straight” (BYY Kampas Edukesen Wik Divosen, 20 Ogis 2013); speeches.byu.edu. Elda Balad i talem: “?From wanem nao oli stap odenem ol man long ol ofis blong prishud, be i no ol woman? Presiden Godon B. Hinkli i bin eksplenem se Lod nao, i no man, ‘we i putum se ol man nomo insaed long Jos blong Hem bae oli gat prishud,’ mo Lod nao i bin givim long ol woman ‘ol spesel paoa blong mekem bigfala mo gudfala oganaesesen ia, we i Jos mo kingdom blong God i fulwan, i komplit’ (“Women of the Church,” Ensign, Nov. 1996, 70). Afta we Hem i talem evri samting mo mekem evri samting, Lod i no talemaot from wanem Hem i bin oganaesem Jos blong Hem long wei ia we Hem i bin mekem.”

  13. Moronae 10:8.

  14. Linda K. Burton, “Priesthood: ‘A Sacred Trust to Be Used for the Benefit of Men, Women, and Children’” (Toktok we i kamaot long Brigham Yang Yunivesiti- Konfrens blong Ol Woman 3 Mei 2013); ce.byu.edu/cw/womensconference/pdf/archive/2013/lindaBurtonTalk.pdf.

  15. 3 Nifae 30:2.

  16. Matiu 6:22–23.

  17. Matiu 5:28; luk tu long Alma 39:9. Presiden Tomas S. Monson i talem: “Ponografi nao, hem i bigfala denja mo i mekem yu wan adik. Blong go stap lukluk raon blong luk se wanem ia ponografi, i save kam wan fasin we yu nomo save kontrolem, mo i lidim yu i go long sam samting we i moa nogud, mo i go kasem yu brekem loa long saed blong seks. Mekem evri samting, be stap longwe evriwan long ponografi” (“Preparation Brings Blessings,” Ensign o Liahona, Mei 2010, 65).“Ripot blong ol man mo woman we oli stap yusum Intanet from ol tingting we i nogud mo i daonem man, i stap go antap bigbigwan tumas … mo fasin blong lukluk ponografi i wan long ol bigfala stamba tingting blong lukluk Intanet we i kamaot long ripot ia. Ol brata mo sista blong mi. !Blong stap mekem samting ia i prapa spolem gud spirit. Stap strong. Stap klin. Stap longwe long ol kaen samting ia we i daonem man mo i spolem man tumas—nomata oli kamaot wea! Mi givimaot woning ia long evriwan, long evri ples” (“Until We Meet Again,” Ensign o Liahona, May 2009, 113).“Stap longwe long eni samting we i luk olsem ponografi. Bae i mekem spirit i ronwe mo mekem tingting i nomo wok. Insaed long Doktrin mo Ol Kavenan, oli talem yumi se wanem samting we i no leftemap yu i no kam long God, be hem i tudak [Doctrine and Covenants 50:23]” (“Stap Tru long Fet,” Ensign o Liahona, Mei 2006, 18–19).

  18. Luk long David A. Bednar, Act in Doctrine (2012), 53.

  19. Luk long Dallin H. Oaks, “Priesthood Authority in the Family and the Church,” Ensign o Liahona, Nov. 2005, 24–27.

  20. Imel blong mi, 5 Ogis 2013; luk long Jemes 5:14.

  21. Luk long Hibrus 5:4.

  22. Aesea 55:8.

  23. Jekob 4:13.

  24. Luk long Doctrine and Covenants 81:4–5. Presiden Godon B. Hinkli i talem: “Wanem wok yu mas mekem insaed long limit blong responsabiliti blong yu, i series semmak olsem wok we mi mas mekem long limit blong responsabiliti blong mi. I no gat koling insaed long jos ia we i smol, o i no impoten tumas” (“This Is the Work of the Master,” Ensign, Mei 1995, 71).

  25. M. Russell Ballard, “Strength in Counsel,” Ensign, Nov. 1993, 76.