2010–2019
Motilii a Klaumera er Kau er a Rubak
October 2013


Motilii a Klaumera er Kau er a Rubak

Bom semeriar el meruul aikel sebechem louchais er tial klumech er a Oluut er a ebangkelio er a Jesus Kristo.

A Sister Ballard me ngak a dirk mle remei luleldingel a kleim el beluu er a Europe. Ng mle techellam el mo kaseues kemam me a rebetok el misionari er kid, locha rengelekiu el sechal me a redil. Ng ulemuchel er sel chisel a President Thomas S. Monson el kirel ongengetel a rekrir a rengeasek el sechal me a rengeasek el redil el mora omesiou, eng mla ngarngii a techellek el kebetech ngak me a kmeed el 3,000 er tir. A Llomes er a Kirsto a dmiich er a osengir, e tir a semeriar er a odbechel tial ureor el mo ruchei—el mo osiik e olisechakl, mo melecholb e melisiich, e olngeseu el mengederoder er a rengedel a Dios. Ng uaisei, el sel momes er tir, e ke mereched el mo medengei el kmo, ng diak el sebechel a di tal chad e meruul er tial ureror. Chelechal sils eng soak el melekoi er a rokui el chedail a Ikelesia, le ngorechudel el bek el dersta er kid a mo omerk er a ebangkelio.

El uaia ikel mla medung el betok el taem, e a Profet Joseph Smith a millekoi el kmo “aikel rokui el mla medung, e sel kot el ngarbab e klou a belkul ngerachel a mo omerk er a Ebangkelio” (Teachings of Presidents of the Church: Joseph Smith [2007], 330).

Sera 1974 e a President Spencer   W. Kimball a millekoi el kmo: “Sel locha kot el ngarbab luchul a ureor era klemisionari a mo msa techall a beluulechad el rongesii e kongei er a ebangkelio. A chedaol llechukl a mui er a oderuchel me a yaksok me a okedong me a nguked el kirel osischeklel ebangkelio. A kuusbech er a tekoi el oderuchel le ng ko er a uaia le mesisiich el tekoi, el dersta er kid me a dedak el rokui, eng diak el sebeched el mochib er ngii” (“When the World Will Be Converted,” Ensign, Oct. 1974, 4).

Sera July er a osisiu el rak, e a Sister Ballard me ngak a mirrael lobengterir a rengelekam el mlo oungerachel er a Canada Toronto Mission. A kmal mlo ungil dobedebek a tekingel a President Kimball, tokuni sera le du el kmo, “Rodam er ngak, ak melatk el kmo kede locha meruul aikel rokui el sebeched. Kede chemat aikal urered lolisechakl er a rokir el beluulechad? Kede mla olisechakl el 144 el rak. Kede kldmokl el mo mengisois a urered? E mo melisiich a blakelreng er kid?” ( Ensign, Oct. 1974, 5).

Ng dirrek el millekoi el kired el mo telkib el mereched loureor, el dmak loureor el mengederoder er a Ikelesia me a rengedel a Dios.

Tial mlomerek el June e a President Thomas S. Monson a millekoi er a osisiu el tekoi el mora rechedal a Ikelesia. A Merredel a dilu el kmo: “Chelechang mla mo taem el rechad er a ikelesia me a remisionari a mo dmak … [e] oureor er a sersel a Rubak luchul osebelir a rechad el mo er Ngii. Ngii a mla kudmokl a teletael dousbech lomerk er a ebangkelio er a chelsel a kakerous el teletael, e Ngii a mo ngosukid er a urered alsekum e kede ultuil er a klaumerang e mengedmokl er a Urerel” (“Faith in the Work of Salvation” [mildung er a tokubets el broadcast, June   23, 2013]; lds.org/broadcasts ).

Ngungil, e rodam me a rodos, el bo dolbedebek osischeklir a reprofet er sera taem er a Joseph Smith el me er chelechang. Te mla mengelechel e olengit er a roungerachel me a rechad er a Ikelesia el mo semeriar louchais er a klemechel a mla Moluut el ebangkelio el mora rokui el ngelekel a Demad er a Babeluades er a beluulechad el rokir.

A klemechek er chelechal iieta sils a kmo a Rubak a orreched er a Urerel. Chelechal taem e tia di sebechel mekedmokl alsekum a rebek el chad er a Ikelesia a mo oba beltikelreng e oureor lomerk er a klemerang er a mla moluut el ebangkelio er a Jesus Kristo. Ng kired el mo dmak loureor lobengterir tirkal 80,000 el misionari el ngara omesiou er chelechal taem.A omesodel tial klou el ureor, tokuni ngerchelir a roungerachel a stake me a ward, a bleketakl el llechukl el ngara website el LDS.org el dai er ngii a “Hastening the Work of Salvation.”

Aki medengei lokiu omesuub el kmo tirkel kmal mesisiich el chedal a Ikelesia a sorir a klengeltengat er a ebangkelio a bo el tebechedel a klengar er a rebebil el betik er a rengrir, luldimukl er tirkel dirkak el bo el kaodengei. Aki dirrek el medengei el kmo te betok el chedal a ikelesia a omae er a rengrir el meruul a urerel a misionari lomerk er a ebangkelio lultuil er a ikakid el eru el tekoi luchul.

  • A kot a dakt. Betok el chad er a ikelesia diak el ngara nglunguuch el kirel a techall lomerk er a ebangkelio, lomdasu el kmo te mol nguu a ko er a chedaol odubech el mo meruul er a tekoi el tir omdasu el kmo ng diak el sebechir.

  • A ongerung a sel rraureng el kirel a urerel a klemisionari.

Kede medengei el kmo a chad sel bekiis el mo mengedecheduch er a temel a miting er a sacrament e ldu el kmo, “Chelechal sils e ak mo mesaod el kirel a ureor er a misionari,” malechub a Elder Ballard sel bol dechor er a temel a klou el ongdibel el du osisiu el tekoi, e a rebebil er kemiu lorrenges a locha mo omdasu, “Olekoi, ng osisiu el tekoi; aki mla rongesii tiang.”

Kid, a medengei el kmo ng diak a chad el soal lomelchesiu el mekngit. Kom locha omelchesiu el mo mongit el mo meruul a diak el meral tekoi er a chelsel a deleuill lobengterir a resechelimiu me a retonari er kemiu. Ngultuil er a ngelseuil a Rubak, e msall e kcheroid a ngii di el dakt el molab malechub e te olab tirkal misionari er kid sel momerk er a ebangkelio el mora rebebil.

Mkedmeklii er a uldesuem el mo meruul a bla lolengit er kid a Jesus el mo meruul. A Osobel a millekoi:

“Molengit, e ko mo ngmai; mosiik, e ko mo metik; molengod, e a chesimer obok el kiriu:

“Le ngike el olengit a mo nguu; me ngike el osiik a mometik; me ngike el melengod a mo mengai a chesimer el kirel.

“Ngarngii er kemiu a roungalek, a mo msa bad a ngelekel, a lolengit a blauang?

“Malechub e ko msa bersoech a lolengit er a ngikel?

“Alsekum … e ko meduch lomesterir a rengelekiu a ungil, e a Demmiu a bai ngaruchei el mesterir a ungil tirkel tir olengit er Ngii?” ( Mateus 7:7–11 ).

Rodam me a rodos, a dakt a sebechel mutechei er a chelellakl el reng me a klaumerang alsekum a rechad er a ikelesia me a remisionari a ngara nglunguuch e meral lolengit er a Rubak el mo omekngeltengat er tir el kirel a urerel a klemisionari. Sel, dochotii a klaumera er kid e dosiik er a techall el mo ouchais er a ebangkelio er a Jesus Kristo el mora rengelekel a Chedam, e a techall a mei. Aikal techall a kmal diak lultuil er a orrimel malechub e di doruul a tekoi. Ng mocholt lultuil er a beltikelreng er kid el mora rodam me a rodos. Di momes er a klungiolel, e tirkel mongedecheduch er tir a mo melchesuar tial beltikelreng. Ng diak el sebechir lobes er tial lomelchesiu er ngii, alsekum eng diak lungil taem er tir el kongei er a ebangkelio. Tia sebechel mengodech er medad el taem sel kuk le mengodech a teletael el tir a ngara chelsel.

Ng diak el sebechem el mo mechitechut sel doruul a urerel a Rubak el mo er sel tkul er bab el sebeched. A olchotel ruriul a ultuil er a mimokl lomelilt er a chad, eng di ngercheled lomerk er a ebangkelio.

Moumera er a Rubak. Ngii a Ungil Mengkar a Sib. Ngii a medengei a Cheremel Sib, e a Cheremel Sib a medengelii oto er a Ngerel; e chelechal sils, e a ngerel a Ungil Mengkar a Sib a oto er a ngerem kau me ngak. E a lak doureor, e a rebetok el sebechir rongesii a klemechel a Oluut a de mochib er tir. Ng beot el tekoi, ng di iior er a klaumerang me a omerelled. A suobel a kmal beot—moluluuch el di kau el tang me a dirrek el telungalek er kau, el kirel a techall el mo misionari. A Rubak a mla kmung er a chelsel a Doctrine and Covenants el kmo te betok el chad a diak lodengelii a klemerang le tir el diak lodengei el kmo te metik er ngii er ker ( D&C 123:12 ).

Ng diak a belkul el sal kirem el kora meduch el teloi er a rechad malechub e ke meduch el mengedecheduch, malechub e ke sensei. Alsekum koba beltikelreng me a urungulem, e a Rubak a mla yaksok el sekum e ke mekengii a ngerem e melekoi a tekoi el Ngii a mo locha er a rengum, eng diak bo meteteremokl er a mederir a rechad.

Ngii a mo meskid a tekoi el bo dolekoi er sel taem el kid ousbech er ngii ( D&C 100:5–6 ).

A ngara Molisechakl er a Ebangkelio er Ngak a mekletkid el rokui el kmo “ng diak a ngera el duubech er a chelsel a urerel a klemisionari el di merekmo [kid] a metik er a chad el bo dolisechakl er ngii. Mongedecheduch er a rebetok el chad er a bek el sils. Ng uaisei el domelchesiu el kora omae er a rengud el mengedecheduch er a rechad, eng di sebechem el meluluuch el kirel a klaumerang me a klisiich el mo blekebek el mekengii a ngerem louchais el kirel ebangkelio” ([2004], 156–57). Kemiu el misionari, alsekum eng somiu el mo olisechakl er a rebetok el chad, eng kiriu el mengedecheduch er a ngii di el chad er a rebetok el chad er a bek el sils. Tiaikid a dimla teletael el Rubak oldurokl er a remisionari el mo meruul er ngii.

A Rubak a medengelkid. Ng medengei a ringel dolab. Ak medengei el kmo a rebebil er kemiu a locha chelbangel a berraod, eng di nglunguchek me ng diak a ta er kemiu lomdasu el kmo a mo ouchais el kirel ebangkelio a uaia le berraod. Ng bai, techall! Ng diak a ngodech el deureng er a klengar er sel semeriar el meruul a urerel a Rubak.

A kot el klou a belkul a kmo ke mukrael er a Dios, lolengit er Ngii a ngeso e mereko mo meruul lultuil er a odbechel Chedaol Reng. A rechad er a Ikelesia sel lomdasu el kirel a ureor lolsobel el uaia di le ngerchelir e merekong, eng sebechel mo meringel. E sel bai lomes er ngii el ongit el mo oltirakl er a Rubak el uchul e a rechad a mo er Ngii lokiu osischeklir a re elders me a re sisters, eng kmal mekrolid, melisiich er kid, e mesebechakl er kid.

Ng diak ki molengit er a rebek el chad el mo meruul a rokui el tekoi. Aki di olengit er a rokui el chedal a ikelesia el mongara nglunguuch, lungil medengei el kmo alsekum a rebek el chad, mekekerei me a remeklou, a nguu a kmal “di chimong” er chelechal mo el muut er a Kurismas, e a re million a mo melchesuar a beltikelreng er a Rubak el Jesus Kristo. Ng meral klebokel el beresent el mora Osobel.

Elolem el sandei er a memong e ak ngiluu a babilengel a kmal ungil misionari el telungalek, el telungalek er a Munns er a Florida. Te milluches el kmo:

“Alii e Elder Ballard, okedei el bung ruriul er a sel broadcast er a beluulechad el kirel a rechedel a ureor lolsobel, eng mlo er ngii a misionari council er kemam. Ng mlo ungil a rengmam le tirkal ngeasek el ngelekir a rengelekam a mle sorir el mo teloi er kemam. Ng dmeu a rengmam louchais el kmo uriul er tiaikid el miting, e a ki mla choisisii a teletael er a osisechakl er a telungalek el mo eru el dart el basent.

“A rengelekir a rengelekam a mla ngoiteterir a resechelirir el mei er a ikelesia, e a ki mla ngara deureng er a temel a miting er a sacrament lobengeterir tirkel dimlak el sal mesisiich el sechelimam, e a bebil er a rebeches el chad a mla kongei el mo mesuub lobengterir a remisionari. A ta er a diak el sal mesisiich lodos a diak di bla luut el mei er a ikelesia ng dirrek el mla ngoiteterir a rebeches el chad el mo mesuub.

“Ng dirkak a chad el kotouar er a ongit el mo mesuub lobengterir a remisionari. Ng meral klebokel el taem el de chedal tial Ikelesia” (di llechukl el babier, Aug.  15, 2013).

Moltirakl er a odbechel Chedaol Reng. Mongedecheduch er a Rubak lokiu a mesisiich el nglunguuch. Bom semeriar el meruul aikel sebechem louchais er tial klumech er a Oluut er a ebangkelio er a Jesus Kristo.

Ak dirrek el dmu tekingel a ungil misionari el chedal a ikelesia, el Clayton Christensen: “Bek el taem el mngeseuir a chad e odersii el mora Jesus Kristo, e ke mo omelchesiu er a dmolech el beltikelreng er a Osobel me a beltikelreng er ngii el mora chad el klengar ngii a ngara chimam” ( The Power of Everyday Missionaries: The What and How of Sharing the Gospel [2013], 1).

A Dios bo lomekngetengat er kmeiu, e rodam me a rodos, el mo metik er a deureng lokiu ongasireng er a klaumera er kemiu. El uaia ikel bla de mosisechakl er ngii el ngara Moroni er a euid el bliongel:

“Ea Kristo a mla dmung: Alsekum e kemiu a mo oumerang er ngak eng mo er ngii a klisichiu el meruul a ngii di el tekoi lungil besul er ngak. …

“… Leng klaumerang a uchul e ngarngii a tekoi el chelid; e klaumerang a uchul me a reanghel a mo chemolt e olisechakl er a rechad; me a lsekum eng dikea ikang el tekoi, ete metaech a rengelekl a chad, leng dikeang a klaumerang, me a rokui a di dikea belkul” ( Moroni 7:33, 37 ).

Ngultuil er a mla duubech el mei er ngak e a kuuchais er kemiu el kmo a Rubak a mo remenges a nlgunguchiu e mo betok a techelliu er chelechang me a rak el merael mei el mo omerk er a ebangkleio er a Jesus Kristo el mora remekreos el ngelekel a Chedam er a Babeluades. President Monson, a ki mla remenges, Aki rokui el mo osiik er ngike el chimong. Nglunguchek me bo debetik er a deureng lokiu a ureor er a misionari, el ngara chedaol ngklel a Rubak el Jesus Kristo, amen.