Fihliyac Luhlahlfongi Lowos nuh sin Leum

Sel Elder M. Russell Ballard

Ke U luhn Mwet Sap Singucul Luo


Wi oruh ma kom kuh in oruh ke akacsruhi ke pweng wolacna luhn Fohlohkyak ke wosasuc luhn Jisus Kraist.

Tahmtahel Ballard ac nga tuhfahna fohlohk liki sie fuhfahsryucsr nuh ke acn limekohsr fin acn Europe. Kuht tuh eis pacl wo in ohsun nuh sin misineri pucspucs, sahp kuhtuh sin wen ac acn nuhtuwos. Ke pacl se Prestuhn Thomas S. Monson el sulkackihn kihlyucki ke matwacn mukul fuhsr lasr ac muhtwacn fuhsr lasr in kuhlwacnsap, nga tuh eis pacl wo in ohsun nuh sin ahluhkwelah 3,000 selos. Kahlwem luhn Kraist kahlmwelihk ke muhtahlos, ac elos ahkolah in ahkfahsrye orekma uh—in sokwack ac luti, in pacptaiselah, in ahkmukwikwiye, ac in ahkfokokoyelah ac in muhsaheack tohkohsrahi luhn God. Weluhlos meeting, sie mwet ac sa in etuh, ohinge, lah elos tiacna kuh in muhkwena oruh orekma se inge. Mihsenge nga ke sramsram nuh sin mempucr nuh kwewa ke Alu uh, mweyen oasr sie elyah tuh kais sie sesr in akacsruhi ke wosasuc uh.

Oacna ke fwackyuck ke pacl pucspucs, Mwet Pahluh Joseph Smith el fahkwack lah tukun ma nuh kwewa fwacklac, kunohkohn wo se emet ac yohk srihpac emet an pa in luti Wosasuc (Teachings of Presidents of the Church: Joseph Smith [2007], 330).

Ke yac 1974 Prestuhn Spencer  W. Kimball el fahk lah: “sahp srihpac yohk se emet ke orekma luhn misineri uh pa in sang nuh sin mwet fin facluh pacl wo in lohng ac insese in eis wosasuc. Ma suhmuhslah uh nwacnwaclah ke sap ac uli ac pahng ac mwe sang ke lutiyacn wosasuc. Nga orekmakihn kahs se inge sap uh tuh kahs se inge oacna in fahfahlac na in mwe kolyuck ma kuht, kais sie ac kuht nuh kwewa, tiac kuh in kahingkihn” (“When the World Will Be Converted,” Ensign, Ohktohpa 1974, 4.)

Ke Julahe ke yac sepacna ingacn, Tahmtahel Ballard ac nga weacng tuhlihk nahtuhsr ah tuh som in muhta ke Canada Toronto Misin. Nga esam kahs lal Prestuhn Kimball, yohkna ke el tuh fahk: “Mwet lili, nga nuhnkuh lah yac kuht oruh ma nuh kwewa ma kuht kuh in oruh. Yac kuht muh fal ohiyac lasr in luti facluh nohfohn? Kuht inge forfor luti ke lusen yac [siofok angngaul ahkosr] 144. Yac kuht ahkolah in ahkyohkye kuhiyacsr? In ahkwoye insacnweacng lasr?” (Ensign, Ohktohpa 1974, 5).

El oacyacpac siyuck sesr in orekma pihsrpihsr liki met ah, tuhkweni orekma in muhsaheack Alu ac tohkohsrahi luhn God.

Jun tari ah Prestuhn Thomas S. Monson el kalweni pweng sacpacna nuh sin mempucr luhn Alu uh. Prestuhn el fahk: “Pa inge pacl ma mempucr ac misineri uh in tuhkweni nuh sie … [ac] orekma ke imac in grape luhn Leum in use mwet nuh Yohrohl. El ahkolah inkacnek nuh sesr in akacsruhi ke wosasuc ke kain in inkacnek pucspucs, ac El fah kahsrwe kuht ke orekma lasr uh kuht fin mukwikwi ke luhlahlfongi in oruh orekma Lal” (“Faith in the Work of Salvation” [sramsram uh utuckuh ke sie mwe sulkackihnyuck yohk srihpac, Jun 23, 2013]; lds.org/broadcasts).

Ma wo se, tamuhlwel ac tahmtahel, in motko ke luti luhn mwet pahluh ke pacl lal Joseph Smith nuh mihsenge. Elos ahkkweye ac siyuck sin mwet kol ac mempucr luhn Alu uh in insacnweacng in us pweng ke Fohlohkyak luhn wosasuc nuh sin tuhlihk nuh kwewa nuhtin Pahpah tuhmasr Inkuhsrao fin facluh nohfohn.

Pweng se luhk ke tahfuhn lwen tok inge pa lah Leum El ahksaye orekma Lal. Ke pacl lasr uh ma se inge kuh in oreklac muhkwena ke mempucr nuh kwewa luhn Alu uh ahsroelah paholos ke luhngse ac akacsruhi ke ma pwacye luhn wosasuc ma fohlohkyak luhn Jisus Kraist. Kuht enenuh in tuhkweni orekma yurin misineri 80,000 lasr ma kuhlwacnsap ingena. Kahs in ahkkahlwemye ke orekma yohk se inge, yohkna ke kunohkohn luhn mwet kol luhn stek ac ward, tahklac kahlwem ke LDS.org ke internet ac sifac an pa “Hastening the Work of Salvation.”

Kuht etuh ke sukok lasr lah inkaiyacn mempucr mukwikwi luhn Alu uh elos luhngse mwe insewowo luhn wosasuc in wi ipin moul luhn mwet sahyac suc elos luhngse, finne elos suc elos soenna ohsun nuh se. Tuhsruhk kuht oacyacpac etuh lah mempucr pucspucs ahlohloh in oruh orekma luhn misineri ac akacsruhi ke wosasuc ke srihpac luo.

  1. Ma se emet an pa sahngweng. Mempucr pucspucs elos tiacna pruhe nuh ke pacl wo in akacsruhi ke wosasuc, sahngweng lah sahp elos ac eis mokleyuck wolacna in oruh kuhtuh ma suc elos motko muh elos tiac kuh in oruh.
  2. Srihpac ahkluo an pa tiacna kahlwem kac lah meac orekma luhn misineri uh.

Kuht etuh lah ke sie mwet el tuyak ac sramsram ke meeting in toeni ke kuhfa luhn Leum ac fahk, “Mihsenge ngwac sramsram ke orekma luhn misineri,” kuh sahp ke Elder Ballard el tuyak ke toeni luhlahp ac fahk ma sepacna inge, kuhtuh suwos suc lohng uh sahp nuhnkuh, “We moh, tiac sulpac kalweniyuck; kuht lohng tari ma inge met.”

Na, kuht etuh lah wacngihn kuhtwena mwet kena puhlakihn mwacta koluk. Sahp kom puhla lah kom ac siyuckyuck se in oruh ma upac ke kuhpahsr lom nuh sin kawuck kuh mwet tuhlan. Ke kahsruh luhn Leum, lwelah nga in eislah sahngweng lom kuh luhn kuhtwena sin misineri ke pacl nuh kwewa lasr in akacsruhi ke wosasuc nuh sin mwet sahyac.

Orwaclah sie sulaclah in oruh ma Jisus Kraist El siyuck sesr in oruh. Mwet Lahngo El tuh fahk:

“Siyuck, na kowos fah eis; suk, na kowos fah konwacack; towolack, na sruhnguhl uh ac fah ikacklah nuh suwos:

“Tuh elos nuh kwewa suc siyuck elos ac fah eis; ac elos suc suk fah konwacack; ac sruhnguhl uh ac fah ikacklah nuh selos suc towolack.

“Suc inmahsrlowos ac sang sie eot nuh sin tuhlihk nahtuhl el fin siyuck ke bread?

“Kuh sang soko wet, el fin siyuck ke ik?

“Kowos fin … etuh in sang ma wo nuh sin tuhlihk nuhtuwos uh, ac fuhkah luhpan woiyacn ma Pahpah tomowos inkuhsrao El ac sang nuh selos nuh kwewa suc siyuck sel?” (Mattu 7:7–11).

Tamuhlwel ac tahmtahel, sahngweng uh ac fah aholyucklac ke luhlahlfongi ac ekahk ke mempucr ac misineri ke pacl nuh kwewa uh sikuckmuhtuhnte in pruhe ac siyuck sin Leum in ahkinsewowoyaclos ke pacl wo luhn misineri. Na, kuht enenuh in ahkkahlwemye luhlahlfongi lasr ac lohacng liye pacl wo in ahkkahlwemye wosasuc luhn Jisus Kraist nuh sin tuhlihk nuhtin Pahpah tuhmwacsr Inkuhsrao, ac pwacye lah pacl wo ingacn ac fah tuhkuh. Pacl wo inge ac fah tiacna oruh kuht in topuk ke sie top ma kuht tiac luhlahlfongi kac. Ma inge ac tuhkuh wo ke srihpen luhngse lasr nuh sin tamuhlwel ac tahmtahel wiyacsr. Oruh in wo, ac elos suc kowos sramsram nuh se an fah puhla luhngse lowos. Elos ac fah tiac muhlkuhnlah mwe puhlakihnyuck se ingacn finne tiac pacl wo nuh selos in insese nuh ke wosasuc uh. Ma se ingacn pac sahp ac eklac ke pacl fahsruh uh ke ohiyacn moul lalos an eklac uh.

Upac nuh sesr in puhtatlac ke kuht oruh kuhiyasr nohfohn ke kuht oruh orekma luhn Leum. Sahflahiyac an pa ma sikyak ke orekmakihnyacn sukohsohk in sulaclah luhn mwet se, ac akacsruhi ke wosasuc uh pa kunohkohn lasr uh.

Luhlahlfongi Leum. El pa Mwet Shepherd Wo. El etuh sip nahtuhl, ac sip nahtuhl etuh Puhsrwacl; ac mihsenge puhsrwen Shepherd Wo pa puhsrwem ac puhsrwek. Ac kuht fin tiac wi orekma, mwet pucspucs suc ac lohng pweng ke Fohlohkyak uh ac fah pahsiyucklac. In fahk in fihsrwacsr, ma ke luhlahlfongi ac mukwikwi ke ip lasr uh. Ip yohk kac an arulacna fihsrwacsr—pruhe, sifacna pruhe ac pruhe wi sucu lom an, nuh ke pacl wo in misineri. Leum El fahk ke Doctrine and Covenants lah mwet pucspucs elos tiac eis ma pwacye ke srihpen elos tiac etuh lah elos ac sokwack oyac (liye D&C 123:12).

Kom tiac enenuh in sie mwet kakawuck kuh etatwen ke sramsram kuh mwet luti wo. Fin oasr luhngse ac finsrak lowos, Leum El uli lah kowos fin wowoyak nuh sin mwet inge [ac] kahskahs ke nuhnak ma El ac fah fihliyac ke insiyowos, kowos ac fah tiac fohsack ye muhtuhn mwet uh.

Ac ma inge ac fah utuckot nuh sum ke pacl sepacna, lah meac kom fah fahk (liye D&C 100:5–6).

Preach My Gospel ahkacsmakihnye kuht nuh kwewa lah wacngihn ma sikyak ke orekma luhn misineri ne ke na [kuht] sokwack sie mwet in luti. Sramsram nuh sin mwet pucspucs ke kais sie lwen. Nuh pwacye na in ahlohloh kuhtuh ke kom sramsram nuh sin mwet uh, tuhsruhk kom kuh in pruhe nuh ke luhlahlfongi ac kuh tuh kom in puhlaik in ikucslah oalum in fahkwack wosasuc fohlohkyak se ([2004], 156–57). Kowos misineri ke pacl nuh kwewa an, kowos fin luhngse luti yohk, kowos enenuh in sramsram nuh sin mwet puhs suc kowos kuh in sramsram nuh se ke lwen nuh kwewa. Nuh pa na inge ma Leum El suhpwaclah misineri uh in oruh.

Leum El etwekuht. El etuh ma upac lasr. Nga akihlen lah kuhtuh suwos sahp puhlakihn tohtohlah, tuhsruhk nga pruhe tuh in wacngihn suwos ac puhlakihn lah ahsroelah luhn pouwos ke ohiyac wo in akacsruhi ke wosasuc uh ac toasrlacna. Tuhsruhk, ma wo se! Wacngihn engan yohk ke moul uh liki na in insacnweacng in orekma in kuhlwacnsapuh Leum.

Ip se ma yohk srihpac emet an pa kom in mokleyuckyak sin God, lah kom in siyuck Sel ke kolyuck ac na som ac oruh oacna ke Nguhn uh mokle kom. Ke mempucr uh liye orekma luhn molwelah oacna in muh ma na kunaclos muhkwena, ma inge kuh in mwe ahksahngweng. Ke elos liye ma inge muh sie mwe suliyuck in fahsr tukun Leum in use mwet nuh Yohrohl in lutiyuck sin elder ac tahmtahel misin pacl nuh kwewa, ma inge mwe mokleyuck, ahkkweyeyuck, ac ahkenganyeyuck.

Kuht tiac siyuck sin mwet nuh kwewa in oruh ma nuh kwewa. Kuht siyuck na mempucr nuh kwewa in pruhe, etuh muh fin mempucr nuh kwewa, fuhsr ac mahtuh, ac ahsroelah paholos nuh sin “sie mwet” inmahsrlon pacl se inge ac Christmas, mwet miliacn ac fah puhlakihn luhngse luhn Leum Jisus Kraist. Ac fuhkah wolacnaiyacn mwe sang se inge nuh sin Mwet Lahngo.

Wik ohnkohsr somlah ah nga tuh eis lwacta se sin sucu mempucr luhn misineri na pihsrlac se, sucu Munn fin acn Florida. Elos suhmuhslah:

“Pain kom Elder Ballard, mihnit 30 tukun sulkackihnyuck fin facluh nohfohn ke salkweyacn orekma luhn molwelah, kuht orwaclah sramsram in kahsruh ke misinerisie meeting in sucu ke misineri. Kuht engan in sokwack lah tuhlihk fuhsr nuhtin nahtuhsr elos ke wi. Kuht engan in ahkkahlwemye lah ac ke na meeting se lasr ah, kuht ahkyohkyelah luti luhn sucu lasr uh ke luhpan percent 200.

“Tuhlihk nuhtin nahtuhsr elos us kawuck lalos nuh ke alu ah, puhlakihn engan ke miting in toeni ke kuhfa luhn Leum wi kawuck ma tiacna arulacna mukwikwi, ac oasr mwet sasuc ma kuht sramsram nuh se suc otwelah in eis lutlut sin misineri. Sie sin tahmtahel suc tiacna arulacna mukwikwi el tiac fohlohk muhkwena nuh ke alu uh, tuhsruhk el oacyacpac use mwet sirape sasuc weluhl.

“Wacngihn kuhtwena mwet sruhnga in suliyuck in eis mwe lutlut luhn misineri. Pacl se inge pacl in engan se in sie mempucr luhn Alu uh” (lwacta luhk sifacna, Ohkohs 15, 2013).

Ahkos ma mokleyuck luhn Nguhn. Kwacfe sin Leum ke pruhe fokoko. Wi oruh ma kom kuh in oruh ke akacsruhi ke pweng wolacna luhn Fohlohkyak ke wosasuc luhn Jisus Kraist.

Nga fahk etahin sie pac mempucr misineri pihsrlac Clayton Christensen: “Pacl nuh kwewa ma kom kahsruh sie mwet ac painuhlos nuh sin Jisus Kraist, kom fah puhlakihn luhngse yohk luhn Mwet Lahngo nuh sum ac luhngse Lal nuh sin mwet suc kom sruokyac paho” (The Power of Everyday Missionaries: The What and How of Sharing the Gospel [2013], 1).

God Elan ahkinsewowoye kowos, tamuhlwel ac tahmtahel, in sokwack engan yohk ma tuhkuh ke puhlakihnyacn ma usrnguck ke luhlahlfongi lowos. Oacna ke kuht lutiyuck ke Moroni sapta 7:

Kraist El tuh fahk: Kowos fin luhlahlfongiyuc ac fah oasr kuh yuruwos in oruh kuhtwena ma wo Sihk.

Tuh luhlahlfongi pa oruh ma usrnguck uh in oreklac uh; ac luhlahlfongi pa oruh lihpufacn uh in sikyak ac luti nuh sin mwet uh; ohinge, fin ma inge tui we nuh sin tuhlihk nuhtin mwet, tuh ma ke srihpen suhlahlahlfongi, ac ma nuh kwewa wacngihn srihpac (liye Moroni 7:33, 37).

Ke ma nga sifacna puhlakihn uh nga kuh in fahkwack nuh suwos muh Leum El ac lohng pruhe lowos ac ac fah oasr ma kowos puhlakihn ingena ac ke yac tohkoh in ahkuhtweyac wosasuc luhn Jisus Kraist nuh sin tuhlihk sacohk nuhtin Pahpah tuhmwacsr Inkuhsrao. Prestuhn Monson, kuht lohng tari. Kuht nuh kwewa ac fah suk in sokwack ma se. Nga pruhe tuh kuht nohfohn kuh in puhlakihn engan yohk ma tuhkuh ke kuhlwacnsap luhn misineri, ke ine muhtahl luhn Leum Jisus Kraist, amen.