2010–2019
Na Ka Lailai ka Beci
Okotova 2013


Na Ka Lailai ka Beci

Meda sa qai dodoliga yani kivei ira na tamata ena vakabauta kei na loloma.

Kemuni na taciqu kei na ganequ lomani, ena vica toka ga na macawa sa oti au a tiko ena koronivuli ni veivakarautaki ni kaulotu mai Mexico City meu laki wasea e dua na itukutuku vei ira na daukaulotu. Keirau a nakita vakaveiwatini me keirau yaco totolo yani ni se vo tu e vica na auwa. Keirau laki vakadikeva sara tu na veiloga senikau totoka kei na veigaunisala vakasavasavataki tu vakavinaka ka keirau raica e matanavotu na kena serauni tu ena mamarau na matadra e drau na cauravou kei na goneyalewa daukaulotu, era saga vagumatua tiko mera kila vinaka e dua na vosa vou ka vulica me taleitaka cake vakalevu na nona inakinaki vaka-daukaulotu.

Ni mai malele sara na yaloqu ena ka totoka oqo, au nanuma lesu kina na vosa nei Alama ena gauna a vakaroti luvena kina o Ilamani me vola tiko na kedra itukutuku na nona kawa me tiki ni ivolatukuni sa nuitaki tiko kina ka me maroroya na veika kece oqo ni sa ka tabu me yaco na gauna me vakatakilai yani vei ira na veimatanitu, veimataqali, duivosavosa, kei na kawatamata.

A qai kaya vua o Alama:

“Ia mo kakua ni beca na noqu itatau; raica na ka lailai ka beci, sa tubu mai kina na ka levu; ia na ka lailai talega, sa vakamaduataki ira na vuku.

“Raica sa vakarautaka na Turaga na Kalou na veika me vakayacori kina na nona inaki; ia sa vakayacori na nona inaki ena veika lailai ka beci; era sa vakabulai kina na tamata ka vakamaduataki ira na vuku” (Alama 37:6–7).

Na savasava kei na nodra se gone na noda daukaulotu sa vakaraitaka na sala ni Turaga, ni ko ira sa dau yalomalumalumu era sa rawa ni “vukei ira na tamata mera lako mai ena vakabauti Jisu Karisito kei na Nona Veisorovaki, veivutuni, papitaiso, ciqomi ni isolisoli ni Yalo Tabu kei na vosota me yacova na ivakataotioti” (Vunautaka na Noqu Kosipeli: iDusidusi ki na Veiqaravi ni Daukaulotu [2004], 1).

Vei keda na lewe ni Lotu, eda sa rawa, mai na noda ivakarau ni veika lailai ka beci, me da “veivutunitaka … na nodra ivalavala ca” ka vukea mera “saumaki vua na Kalou mera bula kina” (Alama 37:8).

Ena dua na gauna au a gole vata kei na dua na peresitedi ni iteki kei bisopi me keitou laki sikova e dua na lewenilotu sa luluqa mai na lotu. Keitou a tuberi koya, ena veika rawarawa sara, me baleta tiko na veivakalougatataki ni Siga ni Vakacecegu. Keitou a vakaraitaka vua ni keitou lomani koya dina. A qai kaya mai, “Na ka ga au a gadreva me dua me lako mai me mai solia e dua na abrazo,” se mokoti au. Au a tucake yani ka mokoti koya. Na siga e tarava a Sigatabu. A qai gole mai na turaga oqo vata kei na nona matavuvale taucoko ki na soqoni ni sakaramede.

Ena dua na veisiko, a kaya o Martha, e dua na lewe ni neitou tabanalevu vei watiqu kei na nona itokani me rau kakua tale ni lesu yani. Sa lomana me sa kakua ni mai lotu. E dua vei ira na dauveisiko oqo a kerei Martha ke rawa ni ratou lagata vata ena iotioti ni gauna e dua na sere ni lotu, ka a vakadonuya sara o koya. Ni ratou sa lagasere, a yaco sara e dua na ka talei. Sa tekivu me vakasinaita tikoga mai vakamalua na loma ni rumu na Yalotabu. Era sa vakila vakayadua sara ga. Sa tekivu me malumu mai na yaloi Martha. Ena tonawanawa tu ni matana, sa kaya vei iratou na dauveisiko na ituvaki ni yalona. Ena gauna o ya, sa raica rawa o koya ni sa dina sara na kosipeli. A vakavinavinakataki iratou na nona dauveisiko ka tukuna ni sa gadreva me ratou lesuvi koya tale mai. Tekivu mai na gauna o ya, sa dau ciqomi iratou ena yalo marau.

Sa tekivu me mai lotu o Martha vata kei luvena yalewa gone. E vica vata na yabaki nodrau sa mai lotu tikoga, ka sega ni yalolailai o Martha ni na tomani rau o watina. Sa qai yaco mai na siga me tara na yaloi watina na Turaga, ka tekivu me laki lotu vata kei rau, ka vakakina o luvedrau yalewa tale kadua. Sa tekivu me vakila na matavuvale oqo na reki dina e yaco mai ena veivakalougatataki ni kosipeli ena nodratou itikotiko. Sa tekivu me yalodinataka tiko mai kina o Martha na nona veiqaravi vaka-peresitedi ni neimami iSoqosoqo ni Veivukei, ka veiqaravi gumatua tiko o watina ena vica na veikacivi ena loma ni iteki. A tekivu na veika kece oqo ena kena a lagati e dua na sere ni lotu, e dua na ka lailai ka beci ka tara na yaloi Martha.

O Neamani e kavetani ni nona mataivalu na tui kei Siria, e tamata vakaturaga, e tamata qaqa ena ivalu, ia e tauvi koya tu na vukavuka (raica na 2 Tui 5:1). Ni sa sega ni kunea rawa e dua na iwali mai vua na tui kei Isireli me baleta na nona vukavuka, sa mani gole yani o Neamani ki na vale nei Ilaisa, na parofita. A tala yani e dua na tamata o Ilaisa, me kaya:

“Mo ni laki sili vakavitu e na Joritani, ena qai bula tale mai na lewemu, ia ko na savasava mai.

“A sa cudru ko Neamani, ka lako tani, ka kaya, Raica, kau sa vakasama, ni na curu dina mai vei au ko koya, ka tu, ka masuta na yaca i Jiova na nona Kalou, ka yalovaka na ligana e cake e na tikina, ka vakabula na vukavuka. …

“A ra sa toro voleka ko ira era sa qaravi koya, ka vosa vua, ka kaya, Na tamaqu, kevaka ka vakarota vei kemuni e dua na ka levu na parofita, ko na sega li ni cakava? Ia sa dodonu vakalevu cake, ni sa kaya ko koya vei kemuni, Mo sili, ka ko na savasava?

“Sa qai lako sobu ko koya, ka silimi koya vakavitu ena Joritani, me vaka na nona vosa na tamata ni Kalou: a sa bula tale na lewena me vaka na lewe ni gone lailai, a sa savasava mai ko koya (2 Tui 5:10–11, 13–14).

Na noda parofita, o Peresitedi Thomas S. Monson, sa sureti keda kece tiko meda sa lako yani ka laki vueti ira mai na tacida kei na ganeda. E kaya o koya: “Sa gadreva tu o vuravura na nomuni veivuke. E gadrevi na wamalai mera vakatudonutaki, tauri na ligadra, vakayaloqaqataki ni vakasama, vakauqeti na yalo, ka vakabulai na yalo ni tamata. Sa waraki kemuni tiko na veivakalougatataki ni veigauna tawamudu” (“To the Rescue,” Liahona, Julai 2001, 57).

Au vakadinadinataka ni vuqa vei ira era gadreva tu na noda veivuke era sa waraki keda tiko mai. Era sa waraki ira tiko na tacidra kei na ganedra yaloqaqa mera dodoliga yani ka vueti ira mai ena veika lailai ka beci. Au sa vakayagataka vakai au e vuqa na auwa ni nodra sikovi na lewe ni Lotu era luluqa tu sa vakayalomalumalumutaki oti tu na yalodra mai vua na Turaga, ka ra sa tu vakarau mera ciqoma na noda ivakadinadina kei na noda ivakaraitaki dina ni loloma. Ni da dodoliga yani ka sureti ira mai, era na lesu mai ki Lotu ka sega tale ni wawa.

Meda sa qai dodoliga yani kivei ira na tamata ena vakabauta kei na loloma. Meda nanuma tiko na yalayala ni Turaga:

“Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau e na matanitu i Tamaqu!

“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewe vuqa!” (V&V 18:15–16).

Au sa vakadinadinataka na loloma ni Turaga kivei ira taucoko na Luvena. Au kila ni sa bula tiko o Koya ka sai Koya na noda Dauveivueti. Ena yaca i Jisu Karisito, emeni.