2010–2019
Mekekerei me a Beot el Tekoi
October 2013


Mekekerei me a Beot el Tekoi

Mei e bo dolngeseu er a rebebil loba klaumerang me a beltikelreng.

Rodam me a rodos er ngak, sesei el sandei er a mla memong e ak mla er a basio er a omesubel a klemisionari er a Mexico City el mlo mengedecheduch er a remisionari. Ng mle moktek er ngak me a bechik el somam el mamereched el mo er tial basio. Tia er a ki momais el omes er tial klebokel el sers me a kldmokl el rael er a MTC, eng mlo mechas a rengmam er a deureng er tirkal ngeasek el elders me a re sisters, el blak a rengrir el mesuub er a kuk ta er a duch er a omelekoi e mesuub el mo meduch el mereng a saul el kirel a moktek er tir el misionari.

Tia er a bok chelellak e kumes er tial klebokel ues, e ak mlo melbedebek a tekingel a Alma er a le du er a ngelekel er a Helaman me loluches a reksi er tirkal chedal el tebechedel a reksi el bla lengai e mo mengeluoul a rokui el tekoi el chedaol me a luchul e a tara klebesei eng mo mocholt el mo er a bek el beluu, kebliil, omelekoi, me a rechad.

Me a Alma dilu er a ngelekel:

“Chelchang ng locha omdasu el kmo a ungil ulekerreuil aikel reksi a locha ko er a klebelung er a rengul; eng di ngokiu a mekekerei e beot el tekoi, e a meklou el tekoi a dubech; e chelsel a betok el teletael eng mo omult er a remellomes.

E a Rubak el Dios a oureor er a chelsel a teletael el uchul e a diak a ulebengelel moktek er ngii, e ultuil er a mekekerei el omeruul e a Rubak omult er a remellomes e mo olsobel er a rebetok el chad” (Alma 37:6–7).

Sel klikiid me a klengeasek er a remisionari a okesiul a teletelel a Rubak—el tirkel ngariou a rengrir a sebechir el “siotai er a rebebil el mei er a Kristo lolngeseu er tir el nguu a mla moluut el ebangkelio lokiu a klaumerang er a Jesus Kristo me a Tngakireng er Ngii, ouchelreng, techolbechelid, me a ngeiul a sengk er a Chedaol reng, e outekangel el mo er a ulebongel” (Preach My Gospel: A Guide to Missionary Service [2004], 1).

Me kid el chedal a Ikelesia, a sebeched, lokiu a mekekerei e beot el tekoi el doruul, e “[omult] er a rebetok el cheleuid lengarngii” e ngosuterir “el mo medengelii a Dios er tir el uchul osebelir ” (Alma 37:8).

A tara taem e ak ulebengkel a merreder er a stake me a bisop el mo oldingel er a diak el sal mesiisch el chedal a ikelesia. Aki ulsisechakl er ngii, loba kmal beot el teletael, el kirel a klengletengat er a Chedaol Sils. Aki ulechotii er ngii a beltkil a rengmam. Ng ulenger, “A kmal di ulusbech er a chad el mei e meskak a abrazo,” malechub eng mechulak. A kmal di mlo dechor e mechulii. A bol kukuk eng mle Sandei. Ngika el osisiu odam a mlei er a ikelesia ngii me a telungalek er ngii.

Chelsel a temel odingel e olisechakl, e a Martha, el chedal a ward er kemam, a dilu er a bechik me a kldemel el diak el luut el mo oldingel er ngii. Ng mla tibir el mo diak le bo er a ikelesia. A tara er tirkal loldingel a uleker er a Martha el kmo ng sebechir el kmal di ta el dak el mengitakl a chelitakl er a ikeslesia, e ng kilengei. Tia er a longitakl, e a tokubets el teletael a dilubech. Ng mocha mekekeokil, Chedaol Reng el soiseb er a chelsel tial blai. A dersta er tir a mlo melchesuar. A rengul a Martha merola el mo medemdemek. Ng mocha merael a iiuechel a medal, e ngouchisa er tirkal loldingel er ngii aikel lomelchesiu er a rengul. Tiaikid, eng mlo medengei el kmo a ebangkleio a klemerang. Chelecha e ngoureng a sulir tirkal loldingel e olisechakl er ngii e soal a lluut el mo oldingel er ngii. Seikid el sils el mong, e ng kmal dmeu a rengul sel bo loldingel er ngii.

A Martha mocha ngara ikelesia lobengkel a kekerei el ngelekel redil. Ng mle betok el rak lomais el mong, e a Martha a dimlak el kimer el kmo a bechil bo el sebechel mo teloi er tir ruriul. A uriul e ng merema sel sils el Rubak a mla rutechii a rengul, e ng mocha obengterir el mei, e a uriul e a tara ngelekir el redil a mlo teloi er tir. Tial telungalek a mlo omelchesiu er a mera el deureng sel doba klengaltengat er a ebangkelio er a rekeblid. A Martha a mla merreder er a Relief Society er a ward er kemam, e a bechil a mla ngara omesiou er a kakerous el okedong er a stake. Aika el rokui a ulemuchel lokiu omengitakl, kekerei e beot el tekoi eng di rirtechii a rengul a Martha.

A Naaman a mle mengeteklel a klsoldau er a king er a Syria, el chetengakl el chad, el mesisiich el chad, e ng di dirrek el mle chebedes (mesa 2 Kings 5:1). Uriul er a le di lak el betik er a kerul tial secherel chebedes er a king er a Israel, e a Naaman a mocha er a blil a Elisha, el profet. A Elisha a ulderechii a chad el mo kmu er ngii, el kmo:

“Bo er a omeuachel el Jordan e molechong el euid el taem, e a bedengem a mo ungil, e kau a mo beches.

“Eng di a Naaman a mlo kesib a rengul, e mirrael, e mengedecheduch el kmo, Ak millatk, el kmo, Ngii a me tuobed el mei er ngak, e modechor, e meluluuch el mora Rubak el Dios er ngii, e oba chimal meruorou er a rakt er a bedengek, e omekungil er ngak. …

“Me a mesiungel a mocha kmeed, er ngii, e dula er ngii el kmo, Rubak, omko a profet a dilu er kau me ke mo meruul er a tara meringel el tekoi, e ke mlo rullii? Ngera meng diak el sebechem, el bai di mo, Melechong, me bo mungil?

“Meng merola el mocha metengel, e melecholb el euid el taem er a Jordan, loltirakl a tekingel a mesiungel a Dios: me a bedengel a mlo ungil el di mlo uaia bedengel a ngalek, e ngii a mlo beches” (2 Kings 5:10–11, 13–14).

A profet er kid, el President Thomas S. Monson, a mla siotai er kid el rokui el mo osiik er a rodam me a rodos er kid. Ng millekoi: “A beluulechad ousbech a ngeseu er kemiu. Ngar ngii a uach el dolisiich, chim el bo dorreked, uldasu el bo dolisiich, reng el do mekrael, me a rechad el bo do lsobel er tir. A diak a ulebengelel klengeltengat a mengiil er kemiu” (“To the Rescue,” Ensign, May 2001, 48; malechub aLiahona, July 2001, 57).

A kuchais el kmo te betok er tirkel ousbech a ngeseu er kid a mengiil er kid. Te mengiil er a re blak a rengrir el rodam me a rodos er tir el mo ngosuterir e osiik er tir lokiu a mekekerei e beot el teletael. Ngak a mla chemoit a betok el sikang loldingel er a rediak el sal mesisiich el chedal a Ikelesia el rengrir a mla mo medemdemek lokiu a Rubak, el chelechang e te kldmokl el mo remenges olchotel a klaumerang er kid me a meral lolchotel a beltikelreng. Sel dosiik e de siotai er tir, e te lmuut el mei er a Ikelesia el diak el ko er a omael a rengrir.

Mei e bo dolngeseu er a rebebil loba klaumerang me a beltikelreng. Mei e dolbedebek er a yaksok er a Rubak el dilu el kmo:

Alsekum e kede oureor er a chelsel a rokui el sils er kid lolisechakl el kirel a ouchel reng el mo er a rebebil e nguu a kmal di chimo el chad el mo er Ngii, e kede mo ngara deureng lobengkel er a rengedel a Chedam!

E a lsekum e kede mo ngara deureng er a rengedel a Chedam lobengkel a di chimo el chad el bla denguu el mo er a Osobel, e ng ko el uangera el deureng a bo denguu chom ko kede ngoititerir a rebetok el chad el mo er Ngii (D&C 18:15–16).

A kuchais el kirel a beltik el reng er a Rubak el kirel a rokui el Ngelekel. Ak medengei el kmo Ngii a ngar e Ngii a Osobeled. El ngara ngklel a Jesus Kristo, amen.